ZANNOO 34

Wala Teŋ Na Baŋ E A Wuli Ka Te Nɔnɔ La Jehoova?

ŊMƐ

Saŋa na hoŋ piili zanna a Baabole na, lɛ soŋ boŋ hoŋ toɔ̃ tage peɛle Naaŋmen bee? Ho boɔrɔŋ ka ho neŋ Naaŋmen niiloŋ na maaleŋ e kpeɛŋaa yaga zaa bee? Ka lɛ la, baŋ ka Jehoova meŋ na nɔŋ boŋ a kyɛ kaara ho zu velaa zaa, ka onaŋ wa nyɛ ka ho taa la nɔmmo naŋ e zuluŋ a koo. Wala hoŋ na baŋ e a wuli ka ho nɔŋ la Jehoova?

1. Wala teŋ na baŋ e a wuli ka te nɔnɔ la Jehoova?

Ka teneeŋ sagra Jehoova nɔɛ, lɛ wuleeŋ ka te nɔmooŋ. (Kanne 1 Gyɔɔn 5:3.) Jehoova ba ferɛ noba ka ba sagra o nɔɛ. Kyɛ, o ko la te kaŋa zaa sori ka te kaa iri yɛlɛ teŋ boɔrɔ, ka te na sagrɛɛ o nɔɛ, bee ka te koŋ sagra o nɔɛ. Bonso ka Jehoova e lɛ? A ananso la ka, Jehoova boɔrɔŋ ka te “sagra noɔre a [te] sukyie poɔ.” (Urom 6:17) Lɛ wuleeŋ ka Jehoova boɔrɔŋ ka ho sagra o nɔɛ ho naŋ nɔmoo zuŋ, kyɛ a ba e ka a naŋ e ferebo zuŋ la. A gane ŋa kyɛlee 3 ane 4 ŋa na soŋ boŋ ka ho de ho yel-erre wuli ka ho nɔŋ la Jehoova. Ho na lɛ zanne nyɛɛ lɛ hoŋ na toɔ̃ erɛ yɛlɛ naŋ pɛlɛ o poɔ, a kyɛ tage ho meŋɛ yi yɛlɛ naŋ ba pɛlɛ o poɔ eŋɛŋ.

2. Bonso aŋ maŋ e kpeɛŋaa ka te de te yel-erre wuli ka te nɔŋ la Jehoova?

A Baabole yeleeŋ ka: “Sontuuro maŋ taaɛ toɔrɔ gyamaa.” (Yieme 34:19) Lɛ wuleeŋ ka, te naŋ e noba naŋ ba pɛgiyi na zuŋ, a maŋ eɛ kpeɛŋaa ko te ka te erɛ yɛlɛ naŋ soma. Saŋa kaŋa meŋ te libi yɛlɛ ba maŋ taa nimiri, te maŋ tuoree daŋkyagre ane yelkpeɛne mine meŋ. Ka teneeŋ wa tuoro yelkpeɛne, a ba maŋ e mɔlɔ ko te ka te erɛ yɛlɛ naŋ pɛlɛ Jehoova poɔ. Bonso a maŋ e la mɔlɔ ka te erɛ yɛlɛ naŋ ba soma. Kyɛ, ka hooŋ yi yelmennoŋ poɔŋ a erɛ yɛlɛ Jehoova naŋ boɔrɔ, lɛ na wuliŋ ka ho nɔŋɛɛ Jehoova a gaŋ bonzaa. Ho maŋ lɛ wuliŋ ka ho diree yelmennoŋ a koroo. Jehoova meŋ na diree yelmennoŋ a korɔ bo. O daŋ koŋ zagre bo bare zaa.—Kanne Yieme 4:3.

ZANNE YƐLƐ YAGA POƆ

Ho na zanne nyɛɛ bon naŋso ka Jehoova poɔ maŋ pɛle yaga zaa saŋa na hoŋ sagra o nɔɛ na. Ho na lɛ zanne nyɛɛ yɛlɛ naŋ na toɔ̃ soŋ bo ka ho dire yelmennoŋ a koroo.

3. Yelnimizeɛ kaŋa naŋ kyaare bo

Gyoob gane naŋ be a Baabole poɔŋ na vɛŋɛɛŋ teŋ baŋ ka, Setaana da yelee yelnimizeɛ kaŋa a kyaare Gyoob. Kyɛ, Gyoob yoŋ naane ka a yɛlɛ da kyaare, a yɛlɛ kyaarɛɛ neɛzaa naŋ boɔrɔ ka o puore Jehoova. Kanne Joob 1:1, 6–2:10, a kyɛ gyieli a soorebie naŋ tu na yɛlɛ:

Setaana yeleeŋ ka bonso ka Gyoob puoro Jehoova?—Kaa Joob 1:9-11.
Bo yɛlɛ ka Setaana yel kyaare hooŋ ane nensaaleba zaa?—Kaa Joob 2:4.

Kanne Joob 27:5b, a kyɛ gyieli a soorebiri naŋ tu na yɛlɛ:

Wala ka Gyoob da e a wuli ka o sereŋ nɔŋ la Jehoova?

Gyoob yelmennoŋ na oŋ da di ko Jehoova na da wuleeŋ ka o nɔŋ la Jehoova

Ka teneeŋ meŋ dire yelmennoŋ korɔ Jehoova, lɛ na wuliŋ ka te nɔŋ la Jehoova

4. Vɛŋ ka Jehoova sukyiri taa popɛle

Kanne Yeng Yelibie 27:11, a kyɛ gyieli a soorebie ŋa yɛlɛ:

Ka te naŋ e yɛŋbanneba a sagra Jehoova nɔɛ, wala oŋ maŋ teɛre? Bonso hoŋ yel lɛ?

5. Ho na baŋ diree yelmennoŋ korɔ Jehoova

Te naŋ nɔŋ Jehoova zuŋ, te maŋ mannɛɛ o yɛlɛ korɔ noba. Aneazaa ka a ba maŋ e mɔlɔ ko te ka te e lɛ, kyɛ yelmennoŋ na teŋ dire koroo na maŋ vɛmeŋ teŋ naŋ moɔ̃ nimiri a manna o yɛlɛ korɔ noba. Ŋmɛ a VIDIO, a kyɛ gyieli a soorebie naŋ tu na yɛlɛ.

VIDIO: Nare Ho Meŋɛ A Manne A Duorisoŋ Ko Neɛzaa Naŋ Iri Zɔɔre Neŋ A Yelmeŋɛ (5:09)

A maŋ e la kpeɛŋaa ko bo saŋa kaŋa ka ho manne Jehoova yɛlɛ ko neɛ kaŋa bee?
A vidio poɔŋ, boŋ da soŋ te Yɔɔdɔɔ Grayson oŋ zɔɔtoɔ̃ o dabeɛ̃ na?

Ka teneeŋ nɔŋ bon na Jehoova naŋ nɔŋ, a kyɛ kyiiri bon na Jehoova naŋ kyiiri, a na e la mɔlɔ ko te ka te dire yelmennoŋ a koroo. Kanne Yieme 97:10, a kyɛ gyieli a soorebie naŋ tu na yɛlɛ:

A yi yɛlɛ na hoŋ zanne yi a Baabole poɔŋ na, bo yɛlɛ hoŋ teɛre ka Jehoova nɔnɔŋ? Bo yɛlɛ mine la hoŋ teɛre ka Jehoova kyiireeŋ?
Boŋ na baŋ soŋ bo ka ho nɔŋ yɛlɛ naŋ soma a kyɛ kyiire yɛlɛ naŋ ba soma?

6. Ka teneeŋ sagra Jehoova nɔɛ, te na nyɛɛ tɔnɔ yaga

Ka teneeŋ sagra Jehoova nɔɛ, te menne aŋ na soŋ. Kanne Aizeeya 48:17, 18, a kyɛ gyieli a soorebie naŋ tu na yɛlɛ:

Ho teɛre ka Jehoova baŋɛɛ yɛlɛ naŋ soma ko te bee? Bonso hoŋ yel lɛ?
A yi saŋa na hoŋ piili zanna a Baabole ane a yelmeŋɛ Naaŋmen Jehoova yɛlɛ na, bo tɔnɔ hoŋ nyɛ?

NOBA MINE MAŊ YELEŊ KA: “Ka maaŋ erɛ yelsonne, bee yelfaare, Naaŋmen yɛlɛ kyebe.”

Ka neɛŋ yel lɛ, a Baabole sɛgre buo soba hoŋ na kanne ko o soba ka o nyɛ ka te yel-erre na baŋ vɛmeŋ ka Jehoova poɔ pɛle, bee ka o poɔ sãã?

A ZANNOO YELNIMIZEERE

Ka hooŋ sagra Jehoova nɔɛ, lɛ wuleeŋ ka ho nɔŋ la Jehoova. Ka te naŋ wa dire yelmennoŋ korɔ Jehoova saŋa na teŋ tuoro yelkpeɛne na, lɛ meŋ na wuliŋ ka te nɔŋ la Jehoova.