Mɛn ꞊vadhɛ ˗bhaa ˈgü, mɛn tii ˗nu waa ˈˈkwi ˗nu ˈkun ˗kɔ ˈyaa ꞊mɔɔn˗ ˗bha kö ˗yö kë do toŋtoŋdhö.

•   Pë ˈö Antonio Guterɛsö ˈö ˗kë Nashiɔn zuni ˗bha ˈsëëdhɛ ˗bɛnzëmɛn ˈka ˈö˗ pö, yö ꞊nɛɛn: «Mɛn kwi ˈˈɲan ˗ga ˗sü kö ˗wo mɛn zë ˈgü ˗a ˈkosɔn bhë, ˗yö ˈwɔn yaa kë ˗ni ˈgü ꞊dedewo mɛnbhɩɩdhe ˗nu ˈka ˈˈsɛ ꞊gban ˈˈpɛpɛ ˈgü. ˗Ya ˗kë ˈö ˈwo mɛn ˈbhaa ˗nu ˈkun ˗kɔ yaa ˗kë.»

 Mɛn tii ˗nu waa ˈˈkwi ˗nu ˈkun ˗kɔ ˗dho kë do yi ˈbha ˈka ˗ee? ˈMën Biblö ˗ya pö?

 ˗Kɔ ˈö ˗Zlan ˗yö mɛn ˗nu ˈö ˗an kwi ˈˈɲan ˈyaa do ˗an yö ˗a ˈka, Biblö ˗ya ˗zɔn.

•   «Yö [˗Zlan] ꞊në gɔndënë do ˗da yi ˈbha ˈka. Gɔndënë do bha ꞊në ˈˈkpʋngtaamɛ ˈˈpɛpɛ ꞊gban ˈwo go˗ ˈgü. Yö ˈö bha ꞊në˗ ˗kë ˈzü kö ˈmɛ ˈwo bha ˗wo ꞊mɔɔ ˈˈkpʋngtaadhɛ ˈˈpɛpɛ ꞊gban ˈgü.»—Këwɔn ˗nu 17:26.

•   «˗Zlan ˈyaa mɛ ˗zë ˈgü kë [...]. ˈˈKɛɛ mɛ ˈˈʋʋ mɛ ˈö go ˈˈsɛ ˈˈʋʋ ˈˈsɛ ˈö˗ ˈgü ˈö˗ ꞊bhlëë ˗ya, ˈö ˈwɔn ˗nu ˈö pö ˈaa˗ ˗bha ˗a ˗kë, ˗a ˗mɛ ˗dhɔ ˗ya ˗kë.»—Këwɔn ˗nu 10:34, 35.

 Biblö ˗ya ˗zɔn ꞊dhɛ mɛnbhɩɩdhe ꞊gban ˈˈpɛpɛ ˗wo ˗go ˈkɔdhi do ˈgü, ˈgo mü ˈzü ˗Zlan ˗yö ö ˗kɔ ˗ya mɛn ˗nu ˈö ˗an kwi ˈˈɲan ˈyaa do, ˗an ꞊gban ˗bha.

 ˗Zlan ˗bha ˗Gblüdëdhɛ, ˗a ˗bha mɛnkɔɔnsü ˈö dhaŋ˗ ˈgü ˈnën ˗dho ˗a ke kö mɛn tii ˗nu waa ˈˈkwi ˗nu ˈkun ˗kɔ ˗yö kë do. Mɛnkɔɔnsü ˈö bhë ˗dho ˗kɔ ˈö mɛnbhɩɩdhe ˗nu ˈwo dho wo ˈko ˗nu ˈkun ˗a ˈka ˗së ˈka, ˗a ˗zɔn ˗an ˗dhɛ. Mɛn ˗nu ˗dho ˗kɔ ˈö ˈwo dho mɛn ˗nu waa˗ ˗nu ˗an kwi ˈˈɲan ˈyaa do ˗an ˗san bho ˗a ˈka wo zuʋ̈ˈˈ ˈˈpiʋ̈, ˗a draanˈˈ.

•   «ˈˈSɛ bhë ˗a ˈgümɛn ˗nu ˗dho ˈwɔn ˗së kë ˗sü draanˈˈ.»—Isaïe 26:9.

•   «ˈWɔn kpɛnŋdhö ꞊dede ˗dho nu ˗ya ˗deflëëgüsü ˈka, ꞊ii ˈwɔn kpɛnŋdhö kë ˗sü ꞊dede ˗dho nu ˗deslɔɔdhe waa ˈˈsɛ ˗bha ˈwaannusü ˈö˗ ˈˈdhiʋ̈todhɛ ˈyaa ˈdhö ˗a ˈka.»—Isaïe 32:17.

 ꞊Dɛɛ, mɛn ˈˈmliɲɔn ꞊va ˗wo ˗kɔ ˈö ˈwo dho mɛn ˈˈwɛɛ ˗nu ꞊bhlëë ˗ya, ˈwo ˗an ˈkun ˗a ˈka ˗së ˈka ˗a draanˈˈ ˗ni ˈgü Biblö ˈgü.

•   ˈBha˗ pö ˈü ˈbha˗ ˈgüman ˗bhö ˈwɔn ˗gɔ ˈö yö ˈˈkpɛnŋ Réveillez˗vous ! ˈö˗ ˗gɔ ˗kë « Y a-t-il un remède contre les préjugés ? » ˈka bhë ˗a ˈgü, ˗a ˗wo pö.

•   ˗Bhö ˈwɔn ˗gɔ « Comment parler de racisme à votre enfant » ˗wo pö kö ˗kɔ ˈö ˈnënmɛn ˗nu ˈwo ꞊mɔɔn˗ ˗bha ˈwo ˈwɔn bhë ˗a ˗dhiaŋ zë ˗a ˈka ˈˈkwɛɛnŋdhö, kö ˈü˗ dɔ.