˗Kwɛ 2023 ˈˈMaandhooyi Fevlie 24 ˈka, kö ˗gblü ˈö gɔn ˗ni ˈgü Üklɛnö bhë, ˗ya ˗kwɛ do bho. Mɛn ˈbha ˗nu ˗wa ˗bɛn ˗zë ˈö ˈwo˗ pö ꞊dhɛ ˗a ˈbha ˗ya kë kö Üklɛnö waa Rusi ˗mɛn ˗nu ˗bha ˈˈsɔdha ˗nu ˈö ˗an ˗gɔ ˗yö to ˗gblü ˈö bhë ˗a ˈgü ɛɛnˈˈ ˈö ˈwo ꞊gii, ˈwo ˗mɔɔn mɛn 300.000 ˗bha. ˗Wa ˗pö ˈzü ꞊dhɛ mɛn ˗nu ˈö ˈwaa ˈˈsɔdha ˈka, ˗a mɛn ˗nu ˈö ˈwo ꞊mɔɔn mɛn 30.000 ˗bha ˈnën ˈö ˈwo ga ˗a ˈgü. ˈˈKɛɛ ˗a ˈbha ˗ya kë kö mɛn ˈˈpɛpɛ ˈö ˈwo ga ˗gblü ˈö bhë ˗a ˈgü, ˗an ˈˈdhi ˗yö ˗ʒiö bhë!

 ˗Wëëwɔn ˈö ˈdhö ˈyö ˈtɔ˗ ˗gblü ˈö bhë ˈyaa bhɔ pë ˈö ˗dho ɲën ˈˈvaandhö ˗a ˗bha.

•   «ˈÖ sü ˈˈtʋ̈ŋ ˈö Rusi ˗mɛn ˗nu ˗bha ˈˈsɔdha ˗nu ˈwo ˗da ˗a ˈka Üklɛnö ˗a ˗bha ˈö yö˗ ˈka ꞊dɛɛ ˗bha, pë ˈbha ˈö ˗dho ˗a ˗zɔn ꞊dhɛ ˗an ˗bha ˗gblü ˈö bhë ˗dho ɲën ˈˈvaandhö ˈyaa ˈdhö. Kanŋ ˗dhɛ ˈö ˗dho ˗a ga ˈsü, mɛn ˈbha ˈyaa˗ dɔ. ꞊Ya ˈgo mü, mɛn ˈbha ˈyaa˗ ˈwɔn dɔ ˈˈni ꞊ya kë ꞊dhɛ ˗an ˗wo ˗dho ꞊mɔɔn ˈwɔn ˈbha ˗bha kö ˗wo ˗gblü ˈö bhë ˗a ˈduannu.»—˗Kwɛ 2023 Fevlie 19, NPR (National Public Radio)

 ˗A ˗dhɛ ˗mü ꞊dedewo kö ˗wëë ˗yö bɔ mɛn ꞊va ˗ta. ˈYö ˗tɔ ꞊dhɛ ˗gblü ˈö bhë waa˗ ˈˈwɛɛ ˈbha ˗nu ˗wo saanˈˈ ꞊dede wɔ ˗ni ˈgü mɛn ˗nu ˈö ˗an ˗bha ˈwɔn ˈbha ˈyaa˗ ˈgü, ˗an ˗ta ˈˈkpɔnŋtaadhɛ ˗todhʋ̈sü ˈgü. Biblö ˗yö ˗dhɛkpaɔ dhiʋ̈ˈˈ ˗së ˗wɔn ˗blɛɛ ˗ee? ˗Gblü ˗dho ɲën yi do ˈka?

 Biblö ˗yö ˗gblü ˈbha ˈö ˗dho mɛnbhɩɩdhe ˗nu dha, ˈö ˈyii ˈdho ˗an ˈgü shiʋ̈ˈˈ, ˗a ˗wɔn ˗blɛɛ. ˗A ˗gblü ˈö ˈˈdhʋ̈ ˗wa ˗dhɛ Aamagedɔn. Yö ˈnën ˗tɔ «˗glu ˈö dho kë ˗Zlan ˈpiigbeezë ˗bha yi ꞊va ˈka.» (˗Dhɛkpaɔ dhiaˈˈ ˈsëëdhɛ 16:14, 16, NTBL) ˗Zlan ˗dho bɔ ˗gblü ˈö bhë ˗a ˗ta ˈö mɛnbhɩɩdhe ˗nu ˗bha mɛnkɔɔnsü ꞊gban ˈˈpɛpɛ ˈˈdhiʋ̈ ˈduannu. ˈYö ˗tɔ ꞊dhɛ wo ꞊nën ˈö ˈwo nu ˗gblü ˈka. ˗Kɔ ˈö Aamagedɔn ˈö ˗dho nu ˗yadeflëëgüsü ꞊dede ˈka ˗a ˈka, ˈbha˗ pö ˈü˗ dɔ, ˗bhö ˈwɔn ˗gɔ ˗nu ˈö ˈwo yö ˗an ˗wo pö:

•   « Qu’est-ce que la bataille d’Armaguédon ? »

•   « Armaguédon : une bonne nouvelle ! »