Nɔɔn˗ ˗së ˈsëëdhɛ ˈö Lukö ˗ya ˗bɛnzë 21:1-38
21 ˈDhɛ ˈö ö ˈˈɲan ˈˈdhiʋ̈ ꞊luu ˈö ˗dhɛ ˗ga, ˈyö ˗kpan ꞊nɔɔnmɛn ˗nu ˗bha kö ˗wo wo ˗bha gbɔɔdhe ˗nu ˗da ˗ni ˈgü gbɔɔdhe ˗da ˗a ˈgü ˗pë ˈö ˗Zlan ˗dhɔkë ˗a ˈgü ˗kɔ ˈgü bhë ˗a ˈgü.
2 ˗Yö ˗kpan ˈpö ꞊gɛandhe ˈˈfleesü do ˗bha kö ˗yö ˈwëë˗ ˗piö ˈˈkpaan ga ˈsɛnsɛn ꞊plɛ ˈö ˗an ꞊bhlëë ˈyaa yö pë ˈbhaa ˗bha* bhë ˗an ˗da ˗ni ˈgü mü.
3 ˈYö Yesu ˗ya pö: «A˗ ˗pö ka ˗dhɛ gagade ˈka ꞊dhɛ, ˈwëëga ˈö ꞊gɛandhe ˈˈfleesü ˈö dɔ bhë ˈö˗ ˗da pë ˈgü bhë, ˗a ꞊bhlëë ˗yö ꞊va ˈö ˗ʒiö ˗a ˈka mɛn ˈˈpɛpɛ ˈwo to ˗an ˗bha ˗ta.
4 ˗A ˗gɛn ˗mü ꞊dhɛ wo ˗zë ˈwëë˗ ˈdhɛ ˈö˗ ˗kë ˗a ˈka ˗pë ˈyaa ˗an ˗gɔ bhë, ˈyö ˈwo˗ ˗da mü. ˈˈKɛɛ yö ˈö ˈˈfleesü bhë, pë ˈˈpɛpɛ ˈö ˗ya ˈto ˗a ˗gɔ kö ˗yö ˗tosɛta kë ˗a ˗ta bhë, ˈyö˗ ꞊gban ˗da mü.»
5 ꞊Taabha, mɛn ˈbhaa ˗nu ˗wo ˗kun ˗Zlan ˗dhɔkë ˗a ˈgü ˗kɔ ˗wɔn blɛɛˈˈ ˗ni ˈgü ˈö ˈwo˗ pö ˗gwö ˗nu waa pë ˗nu ˈwo˗ gbɔɔ ˗Zlan ˗gɔ ˈö ˈwo ˗a ˗yökë ˗an ˈka bhë, ˗wo ˗së.
6 ˈYö Yesu ˗ya pö: «Yi do ˈbhaa ˗dho ˗wo ˈö pë ˈö ˈka˗ yö ˗ni ˈgü ˈˈtʋ̈ŋ ˈö yö ˗a ˈgü bhë, ˗a ˗gwö ˗nu dosɛnŋ ˗ʒiaan wo ˈti ˗dho ˈto ˈko ˗ta. ˗An ꞊gban ˗dho ˈwü ˈpapadhö.»
7 ˈDhɛ ˈö˗ pö ˈˈdhʋ̈, ˈyö ˈwo˗ dhɛɛˈˈ kpɔ ˈwo˗ pö: «˗Gɔmɛn, ˈwɔn ˗nu ˈwo bhë ˗wo ˗dho kë ˈˈtʋ̈ŋ ˗mɛɛn ˈka? Yi ˗dho ˗an kë ˈˈtʋ̈ŋ ˈsuaan˗ bho ˗mën ˗bha?»
8 ˈYö˗ ˗yɔ bɔ ˗an ˗gɔ ˈö˗ pö: «˗Ka ka ˗zokë ka ˗de ˈˈpiʋ̈, kö ˈwa ˗dho ˈˈkpënŋ˗ kë ka ˗gɔ. ˗A ˗gɛn ˗mü ꞊dhɛ mɛn ꞊vadhɛ ˗dho n ˈtɔ ˗ya wo ˗bha ˈö ˈwo nu ˈwo˗ pö: ‹Man ˈnën ˈa ˗tɔ Klito,›* ˈö ˈwo˗ pö ˈzü: ‹ˈˈTʋ̈ŋ ˈö bhë ˗ya yö ꞊klöö˗.› ˈKaa ˗dho ˗ʒiö ˗an ꞊kee˗.
9 ˗Ya ˈgo mü ˈzü, ˈka ˗gblü waa ˗bhluubhluudhe ˗nu ˗an ˗tɔɔ man, ˈˈsuʋ̈ ˈya ˗dho ka kë. ˗A ˗gɛn ˗mü ꞊dhɛ ˈwɔn ˗nu ˈwo bhë ˗an dua ˗mü kö ˗wo kë ꞊köŋ ˗blɛɛsü. ˈˈKɛɛ ˈˈkpɔnŋtaadhɛ ˈˈdhiʋ̈ ˈto ˈˈtʋ̈ŋ yö ˈti ˗dho ˈto mü ˈö ˗wo.»
10 ˈYö go mü ˈzü ˈö˗ pö: «ˈˈSɛgɔ ˗nu ˗dho ˗puö wo ˈko ˗nu ˗ta ˈö ˈwo ˗gblü gɔn, ˈö ˗gblüdë ˗nu ˗wo nu wo ˈko ˗gɔ.
11 ˈˈSɛ ˗dho ꞊zii ꞊gbɔɔnsü ˗dhɛ ˗nu ˈgü, ˈö din˗ ˗nu ˗wo ˗da, ˈö ˈˈyua ˗nu ˗wo ˗pɛn ˗dhɛ ˗nu ˈgü ˈö ˈwo yö ˗a ˈka ˈko ˈˈpiʋ̈. Mɛn ˗nu ˈˈɲan ˗dho ˗da ˈwɔn ˗ziisü ˗nu ˈgü, ˈö ˈwɔn ˈˈmlünmlünsü ˗nu ˗wo ˗kë dhaŋ˗ ˗bha ˈwo˗ yö.
12 «ˈˈKɛɛ ˈˈsanni ˈwɔn ˗nu ˈwo bhë ˗wo kë, mɛn ˗nu ˗dho ka ˈkun ˈö ˈwo ka ˈˈklʋʋ bhɔ, ˈö ˈwo dho ka ˈka ˗yakwëë ˗kë ˗a ˈgü ˗kɔ ˗nu ˈgü ˈö ˈwo za dɔ ka ˗bha, ˈö ˈwo ka ˗da ˗kaso ˈgü. ˗Wo ˗dho ˈdho ka ˈka ˗gblüdë ˗nu waa ˈˈsɛkɔɔnmɛn ˗nu ˗kuu ˈˈdhiʋ̈ n ˈtɔ ˗wɔn ˈgü.
13 ˗Ya kë ˈˈdhʋ̈, ka ˗dho bɔ ˗a ˗ta ˈö ˈka n ˗wɔn ꞊blɛɛ ˗an ˗dhɛ.
14 ˈˈKɛɛ ˗ka pë ꞊gban ˈˈpɛpɛ kë kö ˗kɔ ˈö ˈka ˗dho ka ˗de ˗ta ˗za dɔ ˗a ˈka, ˈkaa ˗dho ˗a ˈto ˈˈdhiʋ̈ ˈö ˈka ka ˗de ꞊baa ˗a ˗bha.
15 ˗A ˗gɛn ˗mü ꞊dhɛ pë ˈö ˈka ˗dho ˗a pö, man ꞊dede a ˗dho ˗a dɔ ka ˈˈdhi, ˈö ˈa ꞊kpɔɔdhɛ nu ka ˗dhɛ. A ˗dho ˗a kë ˈˈdhʋ̈ kö mɛn ˗nu ˈwo ˗dho ˗gban ka ˗gɔ bhë ˈwa ˗dho ˗mɔn ka ˗bha, kö ˈka yö ˗an ˈˈdhi ˗ta.
16 ˗Ya ˈgo ˗a ˈgü ˗ʒiaanwo, ka ˗de ˗mɛn ˗nu, ka ˗de ꞊dhegblü ˗nu, ka ˗bha ˈkɔdhigümɛn ˗nu waa ka ˈˈtɔŋdë ˗nu, ˗wo ˗dho ka ˈˈdhoodɔ, ˈö mɛn ˗nu ˗wo mɛn ˈbhaa ˗nu zë ka kpö ˈgü.
17 Ka ˗san ˗dho mɛn ꞊gban ˈˈpɛpɛ kë n ˈtɔ ˗wɔn ˈgü.
18 ˈˈKɛɛ ˈkö ˗kë ˈˈdhʋ̈, ka ˗bha wundhɛ ˗nu ˈwo ka ˗gɔ ˗bha, ˗a dosɛnŋ yö ˈti ˗dho ꞊dhiɔŋ.
19 ˈKa bɔ ˈwɔn ˗nu ˈwo bhë ˗an ˈgü zuʋ̈saadhɛ ˈka, ka ˗dho dha.*
20 «ˈˈKɛɛ ˈka˗ yö ꞊dhɛ ˈˈsɔdha ˗nu ˗wa ꞊klëën Zedhizadhɛmö ˗dhɛ ˗zü, ˗kaa ˈwɔn dɔ ꞊dhɛ ˗a ˈgü shiʋ̈ˈˈ ˈˈtʋ̈ŋ ˗ya yö ꞊klöö˗.
21 ˗Ya kë ˈˈdhʋ̈, mɛn ˗nu ˈwo Zude ˗sɛ ˈgü, ˗wo ˗ya ꞊duëë ˗sü ˗bha ˗wo ˈdho ˗tɔn ˈˈpiʋ̈ ˗dhɛ ˗nu ˈgü, kö mɛn ˗nu ˈwo ˗dho kë Zedhizadhɛmö, ˗wo ˈgo mü ˗wo yö ˈˈkpɛnŋ. Mɛn ˗nu ˈwo ˗dho kë ˈbhlaa, ˈwa ˗dho wo ꞊yɛɛ kë ˈwo nu ˈplöö.
22 ˗A ˗gɛn ˗mü ꞊dhɛ ˈˈtʋ̈ŋ ˈö bhë, ˗yö ˗dho kë ˗Zlan ˗bha ˈwɔn ˗bho mɛn ˗nu ˈgü* ˈˈtʋ̈ŋ ˈka, ˗yö kë ˈˈdhʋ̈ kö pë ˈˈpɛpɛ ˈwo ˗bɛnzë ˗sü ˈka ˗a ˗gɔ ˈsëëdhɛ ˈgü, ˗wo yökodhiʋ̈.
23 Dhebɔ ˗nu ˈwo ˗dho kë ˈgblëëdhe ˈka ɛɛnˈˈ ˈö ˈnën dho kë ˗an ˗gɔ ˈɲɔn ˗bha ˈˈtʋ̈ŋ ˈö bhë ˗a ˈgü, ˗an ˗bha ˗dho kë ˗wëësü. ˗A ˗gɛn ˗mü ꞊dhɛ saanˈˈ ˗ziisü ˗dho kë ˈˈsɛ ˈö bhë ˗a ˈgü, ˈö ˈwo ˈwɔn bho ˗a ˈgümɛn ˗nu ˈgü.
24 ˗A mɛn ˈbhaa ˗nu ˗dho ˈto ˗blaan ˗dhaa ꞊kwaa, ˈö ˈwo ˗a mɛn ˈbhaa ˗nu kun ˈˈgan ˈka ˈwo dho ˗an ˈka ˈˈsɛ ˈˈpɛpɛ ˈgü. ˈˈSɛ ˈˈwɛɛ ˈgümɛn ˗nu* ˗dho taaˈˈ Zedhizadhɛmö ˗dhɛ ˗ta, ˈö to ˗a ˈka ˈˈdhʋ̈ ˈö yö ˗a ˈka ˈˈtʋ̈ŋ ˈö ˗Zlan ˗ya nu ˈˈsɛ ˈˈwɛɛ ˈgümɛn ˗nu ˗dhɛ ˗a ˈˈdhiʋ̈toyi ˗bha.
25 «˗Ya ˈgo mü ˈzü, ˈwɔn ˈˈmlünmlünsü ˗nu ˗dho kë ˈɲaan˗, ˗gbɔdë waa ˈˈsusënŋga ˗nu ˗an ˗bha. ˈˈSuʋ̈ ˗zizisü ˗dho ˗da ˈˈkpɔnŋtaamɛn ˗nu ˈgü, ˈö ˈpë ˈwo ˗dho ˗a kë wo ˈti ˗dho ˗a dɔ, ꞊weeyi ˗bha ö kpökpö kë ˗sü ˈö ö ˈˈvuu dɔ ˈö ˗zuö ˗a ˗wɔn ˈgü.
26 ˈˈSuʋ̈ ˗zizisü ˗dho ˗da mɛn ˗nu ˈgü, ˈwɔn ˗nu ˈwo ˗dho kë ˈˈsɛ ˗ta ˈö ˗an nu ˗sü zuʋ̈dhiʋ̈tɛ ˈdhö ˗an ˗bha ˗a ˗wɔn ˈgü. ˗A ˗gɛn ˗mü ꞊dhɛ ˈˈpiigbɩɩpë ˗nu ˈwo dhaŋ˗ ˈgü, ˗wo ˗dho ꞊zii.
27 ˗Ya kë ˈˈdhʋ̈, ˗wo ˗dho mɛn Gbö yö kö ˗yö nu ˗ni ˈgü ˈˈdhuu kpö ˗ta dhaŋ˗ ˈgü ˈˈpiigbɩɩdhɛ waa ˈtɔbhɔdhe ˗ziisü ˈka.
28 ˈWɔn ˗nu ˈwo bhë ˗wa ˗ya kë ˗sü ˗bha, ˗ka dɔ ka ˗gɛn ˗ta ˈka ka ˗gɔ ˈˈdhiʋ̈ luuˈˈ, ˗a ˗gɛn ˗mü ꞊dhɛ kö ka ˗go ˈˈgan ˈgü ˈˈtʋ̈ŋ ˗ya yö ꞊klöö˗.»
29 ˈDhɛ ˈö go mü, ˈyö ˈwɔnzuan do ˈˈwɛɛ ˈbhaa ˗zɔn ˗an ˗dhɛ ˈö˗ pö: «˗Ka figö ˗dhü waa ˈˈdhü ˈˈpɛpɛ ˈwo to ˗an ˗ga.
30 ˈKa˗ yö ꞊dhɛ ˗wo wo ˈˈdhɛ ˗dɛɛ ˗nu ˗ya ˗ni ˈgü, kö ˗ya kë ka ˈˈɲaan ꞊dhɛ dha ˈˈyi ˈˈtʋ̈ŋ ˗ya yö ꞊klöö˗.
31 ˗Kɔ do ˈö bhë ˗a ˈka ˈpö, ˈwɔn ˗nu ˈwo bhë ˗wo kë ˗ni ˈgü ka ˈˈɲan ˗ya ˗da ˗an ˈgü, kö ˗a ˈwɔn ˗yö kë ka ˈˈɲaan ꞊dhɛ ˗Zlan ˗bha ˗Gblüdëdhɛ ˗ya yö ꞊klöö˗.
32 A˗ ˗pö ka ˗dhɛ gagade ˈka ꞊dhɛ, ˈwɔn ˗nu ˈwo bhë ˗an ꞊gban ˗dho kë kö ˈˈtʋ̈ŋ ˈö bhë ˗a ˈgümɛn ˗nu ˈˈpɛpɛ ˈti ga ꞊köŋ.
33 Dhaŋ˗ waa ˈˈsɛ ˗wo ˗dho ʒiö, ˈˈkɛɛ n ˗wo ˗nu ˗zë, wo ˈti ˗dho ˈgo ˈˈgblʋʋ toŋtoŋdhö.
34 «˗Ka ka ˗zokë ka ˗de ˈˈpiʋ̈ kö ka ˗zota ˗a ˈgü ˗wɔn ˈya ˗dho kë pë ˈˈgblʋ̈gblʋ̈ ˗bhö ˗sü, we ˈˈgblʋ̈gblʋ̈ mü ˗sü ɛɛnˈˈ ˗ya ˗tosɛta ˗wɔn ꞊zɔnŋ ˗ta ˗sü ˈka dosɛnŋ, ˈö ka ˗gɔ ˗yö to ˗a ˗bha ˈö ˗dhɛkpaɔyi ˈö bhë ˈö nu ˈö ˗kan ka ˈgü
35 ꞊dhɛ ꞊döŋ ˗bha mɛn ˈkun ˗sü ˈdhö. ˗A ˗gɛn mü ꞊dhɛ ˗dhɛkpaɔyi ˈö bhë ˗yö ˗dho nu ˈö ˗kan mɛn ꞊gban ˈˈpɛpɛ ˈwo ˈˈsɛ ˗ta ˗an ˈgü.
36 ˈDhɛ ˈö ˈˈdhʋ̈, ˗ka ˗ya ka ˈˈɲaan, ˈka bhɛɛˈˈ ˗kplawo kö ˈka dha ˈwɔn ˈˈpɛpɛ ˈwo ˗dho kë bhë ˗an ˗gɔ, kö ˈka ˗mɔn ˗dɔ ka ˗gɛn ˗ta ˗sü ˗bha mɛn Gbö ˗kuu ˈˈdhiʋ̈.»
37 ˗Dhɛ ˗ya ꞊kpɔɔ, Yesu ˗yö mɛn ˗nu ꞊klaŋ ˗kë ˗Zlan ˗dhɔkë ˗a ˈgü ˗kɔ ˈgü. ˈˈKɛɛ ˈˈbin ˗ya ˈmën, ˈyö dho ˗tɔn ˈwo˗ ˗dhɛ Olivie ˗tɔn bhë ˗a ˗ta ˈö ˗wɔ mü.
38 ˗Dhɛ ˗ya ˈˈpʋ, ˈyö mɛn ˈˈpɛpɛ ˗wo ˗soo ˈwo dho ˗a ˈˈpiʋ̈ ˗Zlan ˗dhɔkë ˗a ˈgü ˗kɔ ˈgü kö ˈwo wo ˈˈtʋ ˈto ˗a ˗wo ˗bha.
-Zoto -a ˈˈpiʋ̈ -wɔn -nu
^ Glɛkö ˗wo ˈgü ˈyö ˗tɔ «lɛpta ꞊plɛ.» Yö ˈö mɛn ˗ya ˗kë minitö ˗kɔŋ do (10) ˈˈpiʋ̈ ˗a ꞊saa ˗mü.
^ Glɛkö ˗wo ˈgü ˈyö ˗tɔ «yö ˗mü n ˈka.»
^ Ɛɛnˈˈ «ka ˗dho ka ˈniin˗ dha.»
^ Glɛkö ˗wo ˈgü ˈyö ˗tɔ «˗Zlan ˗bha kpɛnŋdhödhɛ yö ˗sü.»
^ ˗Wo ˗we «ˈˈsɛ ˈˈwɛɛ ˗nu ˈö ˈwaa Zuifö ˗nu ˗bha ˈˈsɛ ˈka ˗an ˈgümɛn ˗nu» ˈka.
