ˈWƆN ˗GƆ 29
ˈKa ka ˗de baaˈˈ ˈˈklʋʋbhɔdhe ˈkpii˗ ˗bha ˗ee?
«˗Ka kë baasü ˈka yi ꞊gban ˈˈpɛpɛ ˈka.»—DHU. 12:40.
ˈˈTAN 150 ˗Bhö ˗Zlan mɛɛnˈˈ, kö ü dha
ˈPË ˈKWA DHO ˗A YÖ a
1. ˈMën ˗kë ˈö ˗së kö ˈkwa kë baasü ˈka ˈwɔn ˈˈgbɩɩ˗ ˗nu ˗bha?
˗DEBAASÜ ˗yö mɛn ˗dha. ˗A ˈwɔnzuan ˈnën ˗tɔ ˈwɔn ˈˈgbɩɩ˗ ˗nu ˈwo ˗kë ꞊dhɛ ˈˈyi ˗bha pa ˗sü, ɛɛnˈˈ ˈˈtee ˈˈgbɩɩ˗ ˗bha ʒiö ˗sü ˗nu ˈdhö bhë ˗wa kë, mɛn ˗nu ˈwo ˗an to ˈˈdhiʋ̈ ˈwo wo ˗de ꞊baa ˈnën ꞊ya kë ꞊shiöŋ ˈwo dha, ˈö ˈwo mɛn ˈˈwɛɛ ˗nu ˗takun. ˗Kɔlokota do ˈö Edhɔpö ˈö˗ ˗bha yö ˗kë ˗nu mɛn ˗dhɛ ˗sü ˈka, ˗ya ˗pö: «Mɛn ˗nu ˗wa wo ˗de baaˈˈ ˗së ˈka, ˗wo ꞊mɔɔn˗ ˗bha kö ˗wo dha.»
2. ˈMën ˗kë ˈkwa dho kwa ˗de baaˈˈ ˈˈklʋʋbhɔdhe ˈkpii˗ ˗bha? (Dhukö 12:40)
2 ‹ˈˈKlʋʋbhɔdhe ˈkpii˗› ˗bha nu ˗sü ˗dho ˈˈkan mɛn ꞊vadhɛ ˈgü. (Mat. 24:21) ˈˈKɛɛ ˈyii ˗dho kë ꞊dhɛ ˈwɔn ˈˈgbɩɩ˗ ˈˈwɛɛ ˗nu ˈwo to ˗an ˈdhö, ˈyö ˗tɔ ˗a ˈwɔn kwa ˈˈɲaan ˈsaadhö ꞊dhɛ ˗yö ˗dho nu. ˗A ˗kwɛ ˗ya ˗mɔn 2.000 ˗bha ꞊dɛɛ ˈö Yesu ˗ya pö ö ˗bha gwëëˈˈ ˗nu ˗dhɛ ˗wo wo ˗de baaˈˈ yi ˈö bhë ˗a ˗bha. (Dhukö 12:40 ˗wo pö.) ˈKwa kë baasü ˈka, ˗bɔ ˈˈtʋ̈ŋ ˈˈgbɩɩ˗ ˈö bhë ˗a ˈgü ˗sü ˗dho kë kwa ˗kɔa ˈˈplëëplë, ˈö ˈkwa ˗mɔn mɛn ˈˈwɛɛ ˗nu ˗takun ˗sü ˗bha.—Dhu. 21:36.
3. Zuʋ̈saadhɛ, mɛn ˗wëëzësü waa ˗dhɔ ˗wo ˗dho kwa ˗takun ˗kɔ ˗kë ꞊dhɛ ˈˈklʋʋbhɔdhe ˈkpii˗ ˈˈtʋ̈ŋ ˈgü?
3 ˈˈKlʋʋsë ˗yaaga ˈwo dho kwa ˗takun kö ˈkwa kwa ˗de baaˈˈ ˈˈklʋʋbhɔdhe ˈkpii˗ ˗bha, ˗kwa ˗an ˗ga. Zoova ꞊yaa˗ pö kwa ˗dhɛ ˈkwa ö ˗bha za nɔɔn˗ pö, mɛn ˗nu ˈö ˈwaa ˈdhaŋ˗ bho ˗a ˈˈdhiʋ̈ ˗wa ˗gban kwa ˗gɔ, ˈmën ˈkwa dho ˗a kë? (˗Dhɛ. 16:21) Kwa ˗bhawɔn ˗dho yö zuʋ̈saadhɛ ˗bha kö ˈkwa ˈwɔn man ˗a ˗ta, ˈkwa kwa ˗zo yö ꞊dhɛ ˗yö ˗dho kwa ˗takpa. Kwa ꞊dhegblü ˗nu ˗bha ꞊nɔɔnpë ˈbha ɛɛnˈˈ ˗an ˗bha pë ꞊gban ˗ya shiʋ̈ˈˈ, ˈmën ˈkwa dho ˗a kë? (Hab. 3:17, 18) Mɛn ˗wëëzësü ˗ya kë kwa ˈgü, kwa ˗dho ˗an ˗takun. Yi ˈö ˈˈsɛgɔ ˗nu ˗lokotasü dho nu ˗a ˈka kwa ˗gɔ, kwaa kwa ꞊dhegblü ˗nu ꞊va ˈkwa kë ˗dhɛ do ˈgü, ˈmën ˈkwa dho ˗a kë? (Ézéch. 38:10-12) ˗An ˗dhɔ ꞊dede ˗dho kwa ˗takun kö ˈkwa bɔ ˈˈtʋ̈ŋ ˈˈgbɩɩ˗ ˈö bhë ˗a ˈgü.
4. ˗Kɔ ˗mɛɛn ˈö Biblö ˗ya ˗zɔn ˗a ˈka ꞊dhɛ kwa dua ˗mü kö ˈkwa zuʋ̈saadhɛ, mɛn ˗wëëzësü waa ˗dhɔ ˗an draanˈˈ ˗kplawo?
4 ˗Zlan ˈˈDhiwo ˗yö kwa ꞊faanmën kö ˈkwa zuʋ̈saadhɛ, mɛn ˗wëëzësü waa ˗dhɔ ˗an draanˈˈ ˗kplawo. Dhukö 21:19 ˗ya ˗pö: «꞊Ya ˈkun bho ka ˈgü, kö ˈkii bo n ˈka, ˈyö ˈka dho ˗da ꞊sii ˈö ˈyaa yën ˗a kë ˗dhɛ ˈgü.» Kodhɔsö 3:12 ˗ya ˗pö: «Mɛ ˈˈbhɩɩ˗ ˗nu ˗wëë ˗yö ka kë ꞊dedewo.» 1 Tesadhonikö 4:9, 10 ˗ya ˗pö ˈpö: «˗A ˈdhɛ ˈkö ˗gban ka ˈko ˗dhɔ ˗bha ˈka ˈko kë ˗sü ˈö [˗Zlan] ˗bha zian ˗ta bha˗ ˗bha, [...] yöö ꞊dede ꞊ya ka ꞊klang kë yö ˗zë ˈka. [...] ˈˈKɛɛ ˈwɔn ˈö yi ˈˈpiʋ̈ ꞊dhɛ ˈyi˗ pö ka ˗dhɛ [...] yö ˗mü ꞊dhɛ kö ˗dhɔ ˈö ka ˗gɔ bha˗ ˈbha ꞊në ˗yö ˗da ˈgü kö ˗yö ˈdho˗ ˈka ˈˈdhiʋ̈ ˗kpɛawo.» ˗Wo ˗nu ˈwo bhë ˗wo ˗an ꞊gban ˗pö Yesu ˗bha gwëëˈˈ ˗nu ˈö zuʋ̈saadhɛ, mɛn ˗wëëzësü waa ˗dhɔ ˈdhö ˗an ˈgü ˈsaadhö, ˗an ˗dhɛ. ˈˈKɛɛ ˈkö ˗kë ˈˈdhʋ̈, ˗an dua ˗mü kö ˗wo ˈˈklʋʋsë ˗nu ˈwo bhë ˗an draanˈˈ ˗kplawo. Kwa dua ˗mü ˈpö ˈkwa˗ kë ˈˈdhʋ̈. ˗A ˗wɔn ˈgü, ˗kɔ ˈö kletiɛn ˗blɛɛsü ˗nu ˗wo ˈˈklʋʋsë ˗nu ˈwo ˈˈdhʋ̈ ˗an ˗zɔn ˗a ˈka kwa ˗dho kwa ˈˈtʋ̈ŋ kë ˗a ˈgü, kö ˗kɔ ˈö ˈkwa dho ˈto ˗a ˈka ˗an ˗bha ˈwɔnzuan ˈˈpiʋ̈ ˈkwa kwa ˗de baaˈˈ ˈˈklʋʋbhɔdhe ˈkpii˗ ˗bha, ˈkwa˗ dɔ.
˗KWA KWA ˗BHA ZUƲ̈SAADHƐ ˗GƐN ˗GBAN
5. ˈMën kletiɛn ˗blɛɛsü ˗nu ˗takun ˈwo ˈwɔn ˈˈgbɩɩ˗ ˗nu bun?
5 Kletiɛn ˗blɛɛsü ˗nu ˗bhawɔn ˗kun ˈwɔn ˈˈgbɩɩ˗ ˗nu ˗bun zuʋ̈saadhɛ ˈka ˗sü ˗bha. (Ebl. 10:36) ˗Ya ˈˈkan ˈwɔn ˈˈgbɩɩ˗ ˗nu ˈwo nu ꞊shiöŋ mɛn ꞊gban ˈˈpɛpɛ ˗ta ˗an ˗bha, kletiɛn ˗nu ˗kun bɔ ˗ni ˈgü ˈˈklʋʋbhɔdhe ˈˈwɛɛ ˈbha ˗nu ˈgü ˗an ˗bha ˗zoyödhe ˗wɔn ˈgü. Zuifö ˗nu ˗bha ˗zlanwo ˗gɔmɛn ˗nu, Wlɔmö ˈˈsɛkɔɔnmɛn ˗nu waa ˗an ˗de ˗bha ˈkɔdhigümɛn ˗nu ˗kun ˈˈklʋʋbhɔdhe wɔ ˗ni ˈgü ˗a mɛn ꞊vadhɛ ˗ta. (Mat. 10:21) ˗Ya ˈgo mü ˈzü ˗an dua ˗mü kö ˗wo wo ˗de ˈkun ˗ta ˗yö ˗Zlan ˗bha ˗mɛn ˗nu ˈwo kun ˗kankwëëdhe ˗da ˗ni ˈgü ˗zlanwokɔɔdhö, ˗an ˗bha. (Këw. 20:29, 30) ˈˈKɛɛ ˗wo ˈwɔn ˈˈgbɩɩ˗ ˗nu ˈwo bhë ˗an ˗bun zuʋ̈saadhɛ ˈka. (˗Dhɛ. 2:3) ˗Kɔ ˗kë ꞊dhɛ? Mɛn ˗nu ˈwo ˈwɔn ˈˈgbɩɩ˗ ˗nu bun zuʋ̈saadhɛ ˈka ꞊dhɛ Zɔbö ˈdhö, ˗wo wo ˗zota ˗an ˗bha ˗kwɛzlan ˗nu ˈgü. (Zak. 5:10, 11) ˗Wo ˗bhɛɛ kö ˈwo ꞊faan ꞊slɔɔ. (Këw. 4:29-31) ˗Wo wo ˗zota ˈzü ˈwɔn ˗së ˗nu ˈwo dho ˗an ꞊slɔɔ zuʋ̈saadhɛ kë ˗sü ˈgü, ˗an ˈgü.—Këw. 5:41.
6. ˈDhɛ ˈwo ˗gban Merita ˗gɔ, ˈmën ˗kë? ˈYö ˗gleŋ ˗mɛɛn ˈö˗ ˗da kwa ˗bha?
6 Mɛn ˗nu ˈwo ˈwɔn ˈˈgbɩɩ˗ ˗nu bun zuʋ̈saadhɛ ˈka, ˈkwa ˗an ˗bha ˗kwɛzlan draanˈˈ Biblö waa kwa ˗bha ˈsëëdhɛ ˗nu ˈgü, ˈkwa kwa ˗zota ˗an ˈgü, kwa ˗dho ˗mɔn ˗bɔ ˈwɔn ˈˈgbɩɩ˗ ˗nu ˈgü ˗sü ˗bha ˈpö. ˈPë kwa ꞊dhegblüdhe do ˈwo˗ ˗dhɛ Merita ˈö Albani ˗a ˗takun kö ˗a ˗bha ˈkɔdhigümɛn ˗nu ˗wa ˗gban ˗a ˗gɔ, ˈyö bhë. ˗Ya ˗pö: «Zɔbö ˗bha ˗kwɛzlan n ꞊faanmën ꞊dedewo. ˗A ˈˈklʋʋ ˗yö ˗bhɔ, ˈö ˈmɛn kun saanˈˈ wɔ ˗ni ˈgü ˗a ˗ta ˈyaa˗ dɔ. ˈˈKɛɛ ˈkö ˗kë ˈˈdhʋ̈, Zɔbö ˗ya ˗pö: ‹ˈÖ dho ˈö yö ˗a ˈka n ga ˗yi ˗bha, n ˈti ˗dho n ꞊kwaa n ˗man ˗klu ˗Zlan ˗bha ˗sü ˗zü!› (Job 27:5) A˗ ˗yö ˈzü ꞊dhɛ Zɔbö ˗bha ˈwɔn ˈˈgbɩɩ˗ ˗yö ˗ʒiö n ˗man ˗ta ꞊gblɛɛn, ˈyö ˗tɔ ꞊dhɛ man ˗zë mɛn ˗nu ˈwo kun n ˈˈklʋʋbhɔ ˗ni ˈgü, a ˗an ˗dɔ.»
7. ˈKö ˗kë ꞊dhɛ ˈwɔn ˈˈgbɩɩ˗ ˗nu ˈwaa kwa ˗ta ˈˈtʋ̈ŋ ˈö yö ˗a ˈgü, ˈmën kwa dua ˈdhö ˗mü ˈkwa˗ kë ˗sü draanˈˈ?
7 ˈKwa bhɛɛˈˈ, ˈkwa kwa zuʋ̈ˈˈ ˈˈpʋ Zoova ˗dhɛ ˗kplawo, kwa ˗bha ˈwɔn ˈˈgbɩɩ˗ ˗nu ˗bun zuʋ̈saadhɛ ˈka ˗sü ˗gɛn ˗dho ˗gban ˈpö. (Fdh. 4:6; 1 Tes. 5:17) ˗A ˈbha ˗ya kë kö ˈˈtʋ̈ŋ ˈö yö ˗a ˈgü, ˈwɔn ˈˈgbɩɩ˗ ꞊gbɔɔnsü ˈyaa kwa ˗bha. ˈˈKɛɛ ˈwɔn ˗ya ˗shiö kwa ˗dhɛ, ɛɛnˈˈ kwa zuʋ̈ˈˈ ˗ya ˈˈkaankwöö ɛɛnˈˈ ˈzü ˈpë ˈkwa dho ˗a kë ˈkwaa˗ dɔ ˗ni ˈgü, kwa˗ ˗pö Zoova ˗dhɛ ˗yö kwa ˗takun ˗ee? ˈWɔn ˈsɛɛn˗ ˗nu ˗wa nu kwa ˗ta ꞊dɛɛ ˈkwa ˗takundhe ˗dhɛ Zoova ˗gɔ, ˗a ˈˈgblʋ̈gblʋ̈ ˗nu ˗wa nu kwa ˗ta dhiʋ̈ˈˈ, ˗takundhe ˗dhɛ ˗a ˗gɔ ˗sü ˈti ˗dho kë kwa ˗kɔa ˈˈgbɩɩ˗. ˈKwa˗ kë ˈˈdhʋ̈, ˗yö ˗dho kë ga ˗sü ˈka kwa ˈgü ꞊dedewo ꞊dhɛ ˈˈtʋ̈ŋ waa ˗kɔ ˈö dho kwa bho ˗a ˈka ˈwɔn ˈˈgbɩɩ˗ ˗nu ˈgü, ˗ya ˗dɔ.—Ps. 27:1, 3.
ZUƲ̈SAADHƐ
ˈWɔn ˈˈgbɩɩ˗ ˗ya nu kwa ˗ta, ˗a ˗kun kwa ˗bha ˗sü ˗dho kwa ˗kian ˗a ˈdhɛ dho nu ꞊taabha ˗a bun ˗sü ˗bha. (Kpɔɔˈˈ ˗wo ˗bhüöö kpö 8 ˈgü.)
8. Mira ˗bha ˈwɔnzuan ˗ya ˗zɔn ˗kɔ ˗kë ꞊dhɛ ꞊dhɛ ˈkwa ˈwɔn ˈˈgbɩɩ˗ ˗nu bun ꞊dɛɛ, ˗a ˗dhɛ ˗nu ˈwo dho nu dhiʋ̈ˈˈ kwa ˗dho bɔ ˗an ˈgü? (Zakö 1:2-4) (Kpɔɔˈˈ ˈzü pë ˈˈbin ˗bha.)
8 ˈKwa ˈto ˗klu ˗sü ˈka Zoova ˗bha ˈwɔn ˈˈgbɩɩ˗ ˗nu ˈgü ꞊dɛɛ, kwa ˗dho ˗mɔn ˗bɔ ˈˈklʋʋbhɔdhe ˈkpii˗ ˈgü ˗sü ˗bha dhiʋ̈ˈˈ. (Wlɔ. 5:3) ˈMën ˗kë ˈkwa˗ pö ˈˈdhʋ̈? Kwa ꞊dhegblü ˗nu ꞊vadhɛ ˗wa ˗pö ꞊dhɛ ˈwɔn ˈˈgbɩɩ˗ ˗nu ˗wa nu wo ˗ta ˈwa ˗an bun, ˗ya ˗kë ˈö˗ ˈbha ˗nu ˗wa nu ꞊taabha ˈwo ˗mɔn ˗an bun ˗sü ˗bha ˈpö. ˈWɔn ˈˈgbɩɩ˗ ˗nu ˗bun zuʋ̈saadhɛ ˈka ˗sü ˗yö ˗an ˗bha ˗zoyödhe ˗gɛn ˗gban, ˈö ga ˗an ˈgü ꞊dhɛ Zoova ˗ya ˈˈpiʋ̈ kö ˈö wo ˗takun. ˗Zoyödhe ˈö ˈˈdhʋ̈, ˗yö ˗dho ˗a kë kö ˈwɔn ˈˈgbɩɩ˗ ˈˈwɛɛ ˈbha ˗ya nu ˗an ˗ta ˗wa ˈkun wo ˗bha. (Zakö 1:2-4 ˗wo pö.) Mira ˈö ˗yödhiʋ̈ ˈka Albani, ˗ya ˗yö ꞊dhɛ ˈwɔn ˗nu ˈö ˗an bun zuʋ̈saadhɛ ˈka ˈˈdhiʋ̈ ˗be bhë, ˗wa ˗kë ˈö ˗a ˗dhɛ ˗nu ˈwo nu ˗ni ˈgü ꞊dɛɛ ˈö ˗mɔn ˗an bun ˗sü ˗bha. ˗Ya ˗pö ꞊dhɛ ˈˈtʋ̈ŋ ˈbha ˗nu ˈka, ˗yö ˗kë ö ˈgü ꞊dhɛ yö dosɛnŋ ˈnën ˈwɔn ˈˈgbɩɩ˗ ꞊va nu ö ˗ta. ˈˈKɛɛ ˗ya kë ˈˈdhʋ̈, ˗a ˗zo ˗yö ˗bo ˗kɔ ˈö Zoova ˗ya ˗takun ˗a ˈka ˗kwɛ 20 ˈˈpiʋ̈ ˗a ˈka, ˈö˗ pö ö ˗de ˗dhɛ: «ˈBha ˗dho ˈˈkan Zoova ˗bha, ˗ya ü ˗takun ˈko ˗ta ꞊va ˈbha bɔ ˈwɔn ˈˈgbɩɩ˗ ˗nu ˈgü.» Kwa ˗de ˈpö kwa ꞊mɔɔn˗ ˗bha ˈkwa kwa ˗zota ˗kɔ ˈö Zoova ˗ya kwa ˗takun ˗a ˈka ˈwɔn ˈˈgbɩɩ˗ ˗nu ˈgü, ˗a ˈgü. ˗Yö ga kwa ˈgü ꞊dhɛ ˈwɔn ˈˈgbɩɩ˗ ˗nu ˈkwa ˗an ˈkun ˗ni ˈgü kwa ˗bha bhë, ˗yö ˗an ˗yö ˈö dho ˈwɔn ˗së kë kwa ˗dhɛ. (Mat. 5:10-12) ˈKwa˗ kë ˈˈdhʋ̈, ˈˈklʋʋbhɔdhe ˈkpii˗ zü ˗ya dɔ ˈpë ˈkwa dho ˗a kë kwa ˗dho ˗a dɔ.
MƐN ˗NU ˗WËË KWA KË
9. Kletiɛn ˗nu ˈwo kun Anŋtiɔsö Siidhi ˗sɛ ˈgü bhë, ˗an ꞊dhegblü ˗nu ˗wëë ˗yö ˗an ˗kë ˗kɔ ˗kë ꞊dhɛ?
9 ˈDhɛ din ˈkpii˗ ˗yö ˗da Zude ˗sɛ ˈgü, pë ˈö kletiɛn ˗nu ˗wa ˗kë ˗kwaa ˗ga. ˈDhɛ ˗a mɛn ˗nu ˈwo kun Anŋtiɔsö Siidhi ˗sɛ ˈgü ˈwo˗ man ꞊dhɛ din ˗ya ˗da wo ꞊dhegblü ˗nu ˗ta, ˗an ˗wëë ˗yö ˗an ˗kë, ˈö ˈwo pë ˈbha ˗kë kö ˈwo ˗an ˗takun. ‹Pë ˈö ˗an ˗kɔ ꞊mɔɔ˗ ˗bha ˗wa ˗bho ˈko ˗ta kö ˈwo˗ bɔ wo dheebhang ˗nu ˗dhɛ.› (Këw. 11:27-30) ˈKö ˗kë ꞊dhɛ ˗an ꞊dhegblü ˗nu ˈwo ˈˈdhʋ̈ ˗wo ˗kun mü ꞊gblɛɛn, kletiɛn ˗nu ˈwo kun Anŋtiɔsö ˗wo pë ˈˈpɛpɛ ˗kë kö ˈwo ˗an ˗takun.—1 Zn. 3:17, 18.
MƐN ˗WËËZËSÜ
ˈˈTee ˈˈgbɩɩ˗ ˗ya ʒiö ɛɛnˈˈ ˈˈyi ˗ya pa, mɛn ˗nu ˗wëë kwa ˗kë ˈö ˈkwa ˗an ˗takun. (Kpɔɔˈˈ ˗wo ˗bhüöö kpö 10 ˈgü.)
10. ˈWɔn ˈˈgbɩɩ˗ ˗nu ˗wa nu kwa ꞊dhegblü ˗nu ˗ta, kwa ˗dho ˗a ˗zɔn ꞊dhɛ ˗an ˗wëë ˗yö kwa ˗kë ˗kɔ ˗kë ꞊dhɛ? (Kpɔɔˈˈ ˈzü pë ˈˈbin ˗bha.)
10 ꞊Dɛɛ, ˈkwa˗ man ꞊dhɛ ˈwɔn ˈˈgbɩɩ˗ ˗nu ˗wa nu kwa ꞊dhegblü ˗nu ˗ta, kwa ˗de ˈpö kwa ꞊mɔɔn˗ ˗bha ˈkwa˗ ˗zɔn ꞊dhɛ ˗an ˗wëë ˗yö kwa ˗kë, ˈö ˈkwa ˗an ˗takun. Kwa ꞊mɔɔn˗ ˗bha ˈkwa mɛn zii ˗nu dhɛɛˈˈ kpɔ ˗kɔ ˈkwa dho ˗a kë˗ ˈka kö ˈkwa nu ˗an ˗dhɛ, ˗a ˈka. Kwa ꞊mɔɔn˗ ˗bha ˈzü ˈkwa gbɔɔdhe ˗nu ˗kë ɛɛnˈˈ ˈkwa ꞊bhɛɛ kwa ꞊dhegblü ˗nu ˈwo ˈˈdhʋ̈ ˗an ˗bha ˈka. b (Prov. 17:17) ˗A ˈwɔnzuan ˈnën ˗tɔ ˗kwɛ 2020 ˈgü, kwa ꞊dhegblü ˗nu ˗wo ˗numɛndhɛmɛn ˗nu kpö ˈö ˗ʒiö 950 ˗ta ˗an ˗ya ˈˈkpɔnŋtaadhɛ ˗todhʋ̈sü ˈgü, kö ˗wo wo ˗zokë mɛn ˗nu ˈö Kolona virisö ˗yö ˈwɔn ˈˈgbɩɩ˗ ˗wɔ ˗an ˗ta, ˗an ˈˈpiʋ̈. Kwa ꞊dhegblü ˗nu ˈwo ˗numɛndhɛmɛn ˗nu ˈka ˈˈdhʋ̈, kwa ˗an ˈˈnuɛ ˗bho ꞊dedewo. ˈDhɛ ˗kë ꞊dhɛ ˗an ꞊dhegblü ˗nu ˗wëë ˗yö ˗an ˗kë bhë, ˗wo ˗an ˗bhawɔnyëëpë ˗nu ˈˈɲan ˗bhɔ, ˈwo ˗an ˗takun kö ˗wo Zoova ˗dhɔkë ˗kplawo. ˗Wa mɛn ˈbha ˗nu ˗bha ˈkɔ ˗nu ˗dɔ, ɛɛnˈˈ ˗wo ˗an ꞊baa ɛɛnˈˈ ˈzü ˗wo ˗an ˗bha ˗Zlan ˗dhɔkëgükɔ ˗nu dɔ.—2 Ko. 8:1-4.
11. Mɛn ˗nu ˗wëë ˗ya kwa kë, kwa Dë ˈö dhaŋ˗ ˈgü bhë ˗ya ˈtɔ ˗bhɔ ˗kɔ ˗kë ꞊dhɛ?
11 ˈˈTʋ̈ŋ ˈˈgbɩɩ˗ ˗nu ˈgü kwa ꞊dhegblü ˗nu ˗wëë ˗ya kwa kë, mɛn ˈˈwɛɛ ˗nu ˗wa ˗dhɛ ˗yö. ˗A ˈwɔnzuan ˈnën ˗tɔ ˗kwɛ 2019 ˈgü, ˈˈtee ˈˈgbɩɩ˗ ˈwo˗ ˗dhɛ Dorianö bhë, ˗yö kwa ˗bha ˗Zlan ˗dhɔkëgükɔ do ˗shiʋ̈ Baamasö. Kwa ꞊dhegblü ˗nu ˈwo kun ˈkɔ ˈö ˈˈdhʋ̈ ˗a gbɛ˗ dɔ ˗ni ˈgü, ˗wa ˗pö mɛn do ˈbha ˈö ˈyaa Zoova ˗dhɔkëmɛn ˈka ˗a ˗dhɛ ꞊dhɛ ˗yö ö ˗kɔ ˗da wo ˗dhɛ. ˈˈKɛɛ ˈdhɛ ˈwo˗ dhɛɛˈˈ kpɔ ˗a ꞊saa ˈka, ˗ya ˗pö ˗an ˗dhɛ: «N ˗man ˗yökë ˗a ˈka ꞊kwɛɛ˗ ˗nu, n ꞊faan waa ˈkɔ ˗dɔ ˗a ˈka ꞊kwɛɛ˗ ˗nu bhë ˈman ˗an ꞊gban kë gbɔɔdhe ˈka. A˗ ˈˈpiʋ̈ kö ˈa n ˗kɔ ˗da ka ˗bha ˗kɔlokota ˗dhɛ. ˗Kɔ ˈö ˈka ka ˈˈtɔŋdë ˗nu ˗takun ˗ni ˈgü ˗a ˈka bhë, ˗yö ˗pa n ˈka ꞊dedewo.» Mɛn ˗nu ˈwo ˈˈkpɔnŋ ꞊taa, ˗an ꞊vadhɛ ˈwaa Zoova dɔ. ˈˈKɛɛ ˗a mɛn ˈbha ˗nu ˗wa ˗dhɔkëmɛn ˗nu ˗yö. Mɛn ˗nu ˗wëë ˗ya kwa kë ˈkwa ˗an ˗takun, mɛn ˈˈwɛɛ ˗nu ꞊waa˗ yö, ˗yö ꞊mɔɔn˗ ˗bha ˈö ˗an ˗blü Zoova ˈö mɛn ˗nu «˗wëë ˗ya ˗kë ꞊dedewo» bhë ˗a dɔ ˗sü ˗bha. ˗A ˈwɔn ˗dɔ ˈˈdhʋ̈ ˗sü ˗yö kwa zuʋ̈ˈˈ ˈˈgblü ˗dhi.—Efɛ. 2:4.
12. Mɛn ˗nu ˗wëë ˗bha kwa kë ˗sü ˈö ꞊dɛɛ, ˗yö ˗dho kwa ˗takun ˈˈklʋʋbhɔdhe ˈkpii˗ ˈˈtʋ̈ŋ ˈgü ˗kɔ ˗kë ꞊dhɛ? (˗Dhɛkpaɔ dhiaˈˈ ˈsëëdhɛ 13:16, 17)
12 ˈMën ˗kë ˈkwa dho ˗a ˗zɔn ꞊dhɛ mɛn ˗nu ˗wëë ˗yö kwa kë ˈˈklʋʋbhɔdhe ˈkpii˗ ˈˈtʋ̈ŋ ˈgü? Biblö ˗ya ˗pö ꞊dhɛ mɛn ˗nu ˈö ˈwii ˗dho wo ˗kɔ ˗da ˈˈsɛkɔɔnmɛn ˗nu ˗dhɛ, ˈwɔn ˈˈgbɩɩ˗ ˗dho nu ˗an ˗ta ꞊dɛɛ, ˈö dho nu ˗an ˗ta ˈzü ˈˈklʋʋbhɔdhe ˈkpii˗ ˈˈtʋ̈ŋ ˈgü. (˗Dhɛkpaɔ dhiaˈˈ ˈsëëdhɛ 13:16, 17 ˗wo pö.) Kwa ꞊dhegblü ˗nu ˗bhawɔn ˗dho yö pë ˗nu ˈwo dho ˗tosɛta kë ˗an ˗ta, ˗an ˗bha. Kwa ˗bha ˗Gblüdë Yesu Klito ˗ya nu za ˗dɔ ˈˈkpɔnŋtaamɛn ˗nu ˗bha ˗yi ˈka, kwa˗ ˈˈpiʋ̈ kö ˗yö kwa yö kö mɛn ˗nu ˗wëë ˗yö kwa kë ˗ni ˈgü, ˗ya pö: ‹˗Ka nu ˗yɛa ˈö n Dë ˗ya ˗pë ˗kë ö ˗bha ˗gblüdëdhɛkëdhɛ ˈka bha, ˈka ˗ya ˈgü.›—Mat. 25:34-40.
KWA ꞊DHEGBLÜ ˗NU ˗DHƆ ˈÖ KWA ˈGÜ ˗KWAA ˗DADHIƲ̈
13. ˈKwa ˗dhɛ ˗ga Wlɔmö 15:7 ˈgü, ˗kɔ ˗mɛɛn ˈö kletiɛn ˗blɛɛsü ˗nu ˗wo ˗dhɔ ˈö kun ˗an ꞊zinŋgü ˗a ˗gɛn ˗gban ˗a ˈka?
13 ˗Dhɔ ˈnën kun kletiɛn ˗blɛɛsü ˗nu ꞊duaa ˈka. ˈˈKɛɛ ˗dhɔ ˗zɔn ˗sü ˗kun ˗an ˗kɔa ˈˈplëëplë ˗ee? ˗Zlanwokɔdhi ˈö kun Wlɔmö, ˗kwaa ˗bha ˈwɔnzuan ˗ga. Mɛn ˗nu ˗wo kun mü bhë ˗an ˈgodhɛ ɛɛnˈˈ ˗an wɔkɔ ˗nu ˈwaa do. ˗A mɛn ˈbha ˗nu ˗kun Zuifö ˗nu ˈka, ˈö ˈwo ˗an ˗to ˈtɔŋ˗ ˈö Moizö ˗ya ˗bɛn zë ˗a ˗ya ꞊bhlëë ˈgü ˗sü ˈka. ˗A mɛn ˈbha ˗nu ˗kun ˈpö ˈˈsɛ ˈˈwɛɛ ˈgümɛn ˗nu ˈö ˗an ˗bha wɔkɔ ˈyaa ꞊dhɛ Zuifö ˗nu ˗bha ˈdhö, ˗an ˈka. Kletiɛn ˈbha ˗nu ˗kun ꞊dhuëŋ ˈka, ˈö˗ mɛn ˈbha ˗nu ˈwaa kun ˗a ˈka. ˗A mɛn ˈbha ˗nu ˗de ˈpö ꞊dhuëŋ ˗nu ˗kun ˗an ˗gɔ. Mɛn suu ˗nu ˈwo ˈˈdhʋ̈, ˗wo ˗dho ˗dhɔ ˗zɔn wo ˈko ˗nu ˗dhɛ ˗kɔ ˗kë ꞊dhɛ? Bɔmɛn Pɔdhö ˗yö ˗an ꞊faanmën kö ˗wo wo ‹˗kɔ ˗ya wo ˈko ˗nu ˗wɔn ˗bha.› (Wlɔmö 15:7 ˗wo pö.) ˈMën kun ˗a ˈˈpiʋ̈ ˈö˗ pö? ˗Wo kpö ˈwo˗ ꞊dhiëëta ˈö ˗kë ‹˗kɔ ˗ya ö ˈko ˗nu ˗wɔn ˗bha› ˗sü ˈka bhë ˗a ˗gɛn ˈnën ˗tɔ ˗kɔ ˗ya mɛn ˈbha ˗dhɛŋ ˗gɔ ˗sü, ˈwo ˈˈgblüsë ˗kë ˗a ˈka ɛɛnˈˈ ˈwo ˗wɩ ˗a ˗bha kö ˗yö kë mɛn ˈˈtɔŋdë ˈka. ˗A ˈwɔnzuan ˈnën ˗tɔ Pɔdhö ˗ya ˗pö Fidhemɔn ˗dhɛ ꞊dhɛ ˗yö ö ˗kɔ ˗ya ˗a ˗bha ꞊dhuëŋ Onezimö ˈö ꞊duëë bhë, ˗a ˗gɔ. ˗Ya ˗pö: ‹˗Bhö i ˗kɔ ˗ya ˗a ˗dhɛng ˗bha [˗së ˈka].› (Fi. 17) ˈKö ˗kë ꞊dhɛ Apodhɔsö ˈyaa kun pë ˈbha ˗nu dɔ ˗ni ˈgü kletiɛn ˗nu ˗bha ˗zlanwo ˗bha, Plisidhö waa Akidhasö ˗wo wo ˗kɔ ˗ya ˗a ˗gɔ ˗së ˈka, «ˈwo˗ ˗dhɛ wo ˗gɔ ˈkɔɔdhö.» (Këw. 18:26) Kletiɛn ˗nu ˈwo bhë ˈwii wo ꞊kwaa wo ˈgodhɛ waa wo wɔkɔ ˗nu ˗zü ko ˗wo wo ˈˈkan ˈkwëë˗. ˗Wo wo ˗kɔ ˗ya ꞊ʒiaan wo ˈko ˗nu ˗gɔ ˗së ˈka.
˗DHƆ
Kwa ꞊dhegblü ˗nu ˗wa ˗dhɔ ˗zɔn kwa ˗dhɛ, ˗ya ˗kë ˈkwa kwa ˗bha ˈwɔn ˈˈgbɩɩ˗ ˗nu bun. (Kpɔɔˈˈ ˗wo ˗bhüöö kpö 15 ˈgü.)
14. Ana waa ö ꞊gɔɔn ˗wo ˗dhɔ ˗zɔn wo ꞊dhegblü ˗nu ˗dhɛ ˗kɔ ˗kë ꞊dhɛ?
14 Kwa ꞊mɔɔn˗ ˗bha ˈpö ˈkwa ˗dhɔ ˗zɔn kwa ꞊dhegblü ˗nu ˗dhɛ ˈˈtɔŋdhɛ ˗kun ˗an ˗bha ˗sü ˈka. ˈKwa˗ kë ˈˈdhʋ̈, kwa ˗dhɔ ˗dho ˗an kë ˈpö. (2 Ko. 6:11-13) Ana waa ö ꞊gɔɔn, ˗kwa ˗an ˗bha ˈwɔnzuan ˗ga. ˈDhɛ ˈwo ˗kë bɔmɛn ˗nu ˈka ˈˈsɛ do ˈbha ˈgü Aflikö ˈɲënŋ˗ ˗pö ˗ʒian ˈka, ˗a ˗dhɛ ˈti ꞊gwëë ˈö Kolona virisö ˗yö ˗pɛn. ˗A ˗wɔn ˈgü, ˈwaa kun ˗mɔn ˗ni ˈgü ˗a ˗bha kö waa wo ꞊dhegblü ˗nu ˈwo kë ˗dhɛ do ˈgü, kö ˗wo wo ˈko dɔ ˗së ˈka. ˈDhɛ ˗kë ˈˈdhʋ̈, ˈmën ˈwo˗ ˗kë kö ˈwo wo ˗bha ˗dhɔ ˗zɔn? ˗Wo wo ꞊dhegblü ˗nu ˗dhɛ video ˈˈdhiʋ̈, ˈwo˗ pö ˗an ˗dhɛ wo˗ ˈˈpiʋ̈ kö waa˗ ˗nu ˈwo wo ˈko dɔ. ˗Yö ˗pa ˗an ꞊dhegblü ˗nu ˈwo ˈˈdhʋ̈ ˗an zuʋ̈ˈˈ ˈka ꞊dedewo, ˈö ˈwo ˗ya bɔmɛn ˗nu bhë ˗an ˗dhɛ ˗sü ˗bha zoodhö zoodhö, ˈwo nɔɔn˗ ˗nu bɔ ˗an ˗dhɛ. ˈMën ˗kë ˈwo kun ˗a ˈˈpiʋ̈ kö ˈwo wo ꞊dhegblü ˗nu dɔ? Ana ˗ya ˗pö: «Kwa ꞊dhegblü ˗nu ˗bha ˗dhɔ ˗zɔn yaa n ˗man ˈkɔdhigümɛn ˗nu yi ˗dhɛ ˗sü ˈö ˈˈtʋ̈ŋ ˗së waa ˈˈtʋ̈ŋ ˈˈgbɩɩ˗ ˈgü bhë, ˗ya ˗kë ˈö man ˗de ˈpö ˈa ˗dhɔ ˗zɔn n ꞊dhegblü ˗nu ˗dhɛ.»
15. ˗Gleŋ ˗mɛɛn ˈö Vanesa ˗ya ˗da kwa ˗bha ˈö ˗gban ˗dhɔ ˗zɔn kwa ꞊dhegblü ˗nu ˈˈpɛpɛ ˗dhɛ ˗sü ˗bha? (Kpɔɔˈˈ ˈzü pë ˈˈbin ˗bha.)
15 Kwa ˗bha ˗zlanwokɔdhi ꞊vadhɛ ˈgü, mɛn ˗nu ˈö ˗an ˈgodhɛ, ˗an wɔkɔ waa ˗an ˗bha ˈwɔn kë ˗kɔ ˗nu ˈwaa do ˗wo mü. ˈKwa kwa ˈˈtʋ̈ŋ kë ˗an ˗bha ˈˈklʋʋsë ˗nu ˈgü, ˗an ˗dhɔ ˈö kwa ˈgü ˗yö ꞊mɔɔn˗ ˗bha ˈö ˗kë ˈˈgbɩɩ˗. ˈˈTɔŋdhɛ ˗kun ö ˗bha ˗zlanwokɔdhigümɛn ˗nu ˗bha ˗sü ˗kë kwa ꞊dhegblüdhe do ˈwo˗ ˗dhɛ Vanesa ˈö ˗Zlan ˗bha ˈˈtʋ̈ŋ ꞊gban ˈgü ˗yö ˈgü Nuvɛlö Zelandö, ˗a ˗kɔa ˈˈgbɩɩ˗. ˈˈKɛɛ mɛn ˗nu ˈö ˗an ˈwɔn kë ˗kɔ kun ˗shiö ˗ni ˈgü ˗a ˗dhɛ ˗be bhë, ˗yö ˗ya ˗nënŋ ˗an ˗bha ˗sü ˗bha ˈö waa˗ ˗nu ˈwo ˈˈtʋ̈ŋ ꞊va ˗kë wo ˈkwëë˗. ˗A ˗kë ˈˈdhʋ̈ ˗sü ˗ya ˗takun ˈö ˈpë ˗kë ˈö ˗an ˗dhɔ Zoova ˗kë ˈö˗ dɔ. ˗Ya ˗pö: «ˈDhɛ ˗kë ꞊dhɛ n ꞊gɔɔn ˗yö ˗kun ˈˈpian do ˈˈpiʋ̈ ˗maankëmɛn ˈka, yaa kwa ꞊dhegblü ꞊vadhɛ ˈö ˗an ˈwɔn kë ˗kɔ ˗nu ˈwaa do yi ˈˈtʋ̈ŋ ˗kë yi ˈkwëë˗, ˈö ˈˈtɔŋdhɛ ˗kun ˗an ˗bha ˗sü ˗kë n ˗kɔa ˈˈplëëplë. Mɛn ˗nu ˈö ˗an ˈgodhɛ ˈyaa do ˗an ˗bha ˗kë wo ˈko ˈˈpiʋ̈ ˗sü ˗ya kë n ˗dhɛ ˗së. A˗ ˈwɔn ˗dɔ ꞊dhɛ ˗yö Zoova ˗dhɛ ˗së ˈpö, ˈyö ˗tɔ ꞊dhɛ yö ˈnën ˗an ˗gan ö ˗bha kö ˗wo ö ˗dhɔkë.» ˈKwa mɛn ˈˈwɛɛ ˗nu yö ꞊dhɛ ˗kɔ ˈö Zoova ˗yö ˗an yö ˗a ˈka ˗a ˈdhö, kö kwa˗ ˗zɔn ꞊dhɛ ˗an ˗dhɔ ˗yö kwa ˗kë.—2 Ko. 8:24.
ˈˈKlʋʋbhɔdhe ˈkpii˗ ˈˈtʋ̈ŋ ˈgü, Zoova ˗ya ˗pö ˈkwa ö ˗dhɔkë kwa ˈko ꞊bhaa ö ˗dho kwa ˗takpa. (Kpɔɔˈˈ ˗wo ˗bhüöö kpö 16 ˈgü.)
16. ˈˈKlʋʋbhɔdhe ˈkpii˗ ˈˈtʋ̈ŋ ˈgü, ˗dhɔ ˗kë kwa ꞊dhegblü ˗nu ˈka ˗sü ˈwɔn ˗dho kë ˈˈgbɩɩ˗. ˈMën ˗kë? (Kpɔɔˈˈ ˈzü pë ˈˈbin ˗bha.)
16 ˈˈKlʋʋbhɔdhe ˈkpii˗ ˈˈtʋ̈ŋ ˈgü, ˗yö ˗dho kë ˗së kö kwa ꞊dhegblü ˗nu ˗dhɔ ˗yö kwa kë. ˗A zü ˗ya dɔ, Zoova ˗dho kwa ˗takpa ˗kɔ ˗kë ꞊dhɛ? ˈDhɛ ˈwo nu Babidhɔnö ˗dhɛ ˗gɔ ꞊kwɛŋzü, Zoova ˗ya ˗pö ö ˗dhɔkëmɛn ˗nu ˗dhɛ: «N ˗man ˈˈsɛgümɛn ˗nu, ˗ka ˈdho ka ˗bha ˈkɔ ꞊duudhö kö ˈka ˈˈkwɛɛ ta ka ˗blü ˈˈtʋ̈ŋ ˈdɛdɛ ˈˈpiʋ̈ kö ˗yö yö˗ ˈka ˗naanzuëëdhe ˗bha ɲën ˗sü ˗bha.» (Is. 26:20) ˈˈKlʋʋbhɔdhe ˈkpii˗ ˈˈtʋ̈ŋ ˈka, ˗a ˈbha ˗ya kë ˗wo ˈö bhë ˗yö ˗dho ˗gban kwa ˗bha ˈpö. Kwa ˗bha ˗zlanwokɔdhi ˗nu ꞊mɔɔn˗ ˗bha ˈwo ˗kë kwa ˗bha ˈkɔ ‹꞊duudhɛ› ˈka. Zoova ˗ya ˗pö ꞊dhɛ ˈˈtʋ̈ŋ ˈö bhë ˗a ˈka, kwaa kwa ꞊dhegblü ˗nu ˈkwa ˈto ö ˗dhɔkësü ˗bha kwa ˈkwëë˗, ˈyö dho kwa ˗takpa. ˗Dhɛ ˈö ˈˈdhʋ̈ ꞊dɛɛ, ˗kwa kwa ˈgü dɔ ˈˈgbɩɩ˗ kö ˈkwa kwa ꞊dhegblü ˗nu ˗bhawɔn ˈto, kö ˗an ˗dhɔ ˗yö kwa kë ꞊dedewo, ˈyo ˗tɔ ꞊dhɛ kwa ˗bha dhasü ˗yö ˗gban ˗a ˗bha.
˗KWA KWA ˗DE BAAˈˈ ꞊DƐƐ
17. ˈKwa kwa ˗de baaˈˈ ꞊dɛɛ, ˈmën kwa ˗kɔ dho ˗mɔn ˗a kë ˗sü ˗bha ˈˈklʋʋbhɔdhe ˈkpii˗ ˈˈtʋ̈ŋ ˈgü?
17 «Zoova ˗bha ˗dhɛkpaɔyi ˈkpii˗» ˗dho kë ˈˈtʋ̈ŋ ˈˈgbɩɩ˗ ꞊dede ˈka mɛnbhɩɩdhe ˗nu ˗bha ˈka. (Soph. 1:14, 15) Saanˈˈ ˗dho wɔ Zoova ˗dhɔkëmɛn ˗nu ˗ta ˈpö. ˈˈKɛɛ ˈkwa kwa ˗de baaˈˈ ꞊dɛɛ, kwa zuʋ̈ˈˈ ˗dho kë ˗saa, ˈkwa mɛn ˈˈwɛɛ ˗nu ˗takun. ˈWɔn ˈˈgbɩɩ˗ suu ˈˈoo ˗su ˈö dho nu kwa ˗ta, kwa ˗dho ˗a bun zuʋ̈saadhɛ ˈka. Kwa ꞊dhegblü ˗nu ˗wo saanˈˈ ˗ni ˈgü, ˗an ˗wëë ˗dho kwa kë ˈö ˈkwa pë ˈˈpɛpɛ ˗kë ˈkwa ˗an ˗takun. ˗An ˗dhɔ ˗ya kwa kë ꞊dɛɛ, kwa ˗dho ˗dhɔ ˗zɔn ˗an ˗dhɛ ˈpö ˗dhɛkpaɔ dhiʋ̈ˈˈ ˈgü. ˈKwa˗ kë ˈˈdhʋ̈, Zoova ˗dho kwa gba ˗tosɛta ˈö ˈyaa ɲën ˗a ˈka ˈˈkpɔnŋtaadhɛ ˈö ˈwɔn ˈˈgbɩɩ˗ gbɛ˗ ˈyii ˗dho kë mü ˈzü, ˗a ˈgü. Kwa ˗zo ˗dho bhɔ ˈˈklʋʋbhɔdhe ˈˈpɛpɛ ˈka mü.—Is. 65:17.
ˈˈTAN 144 Kwa ˈˈɲan ˗yö kwa ꞊saa ˈö kwa ˈˈdhiʋ̈ ˗a ˗bha!
a ˗A ˈˈtʋ̈ŋ ˈyaa ꞊gblɛɛn ˈzü kö ˈˈklʋʋbhɔdhe ˈkpii˗ zü ˗yö dɔ. ˈWɔn ˈˈgbɩɩ˗ ˗nu ˗kun ö ˗bha ˗sü, mɛn ˗nu ˗wëë ˗bha kwa kë ˗sü waa ˗dhɔ ˗wo ˗dho kwa ˗takun kö ˈkwa kwa ˗de baaˈˈ ˈwɔn ˈˈgbɩɩ˗ ˈö˗ suu ˈyii kë mɛnbhɩɩdhe ˗nu ˈka do ˈö nu ˗ni ˈgü bhë, ˗a ˗bha. ˗Kɔ ˈö kletiɛn ˗blɛɛsü ˗nu ˗wo ˈˈklʋʋsë ˗nu ˈwo bhë ˗an ꞊draan ˗a ˈka, ˗kɔ ˈö ˈkwa ˗dho ˗an draanˈˈ ˗a ˈka ˈpö ꞊dɛɛ waa ˗kɔ ˈwo dho kwa ˗takun ˗a ˈka ˈˈklʋʋbhɔdhe ˈkpii˗ ˈˈtʋ̈ŋ ˈgü, kwa ˗dho ˗an yö.
b Mɛn ˗nu ˈwo˗ ˈˈpiʋ̈ kö ˈwo wo ˗kɔ ˗da ˗numɛndhɛmɛn ˗nu ˗dhɛ, ˗an dua ˗mü kö ˗wo pë ˗ya Demande d’admission comme volontaire local développement/construction (DC-50) ɛɛnˈˈ Demande d’admission comme volontaire temporaire (A-19) ˗ta. ˗Ya ˈgo mü kö ˗wo ˗dhɛ ˈˈdhiʋ̈ ˈˈgan kö ˗wo ˗an ˗dhɛ.