“Pasyans en msye ek en madanm i ganny teste toulezour. Ler ou pa ankor marye, ou kapab mazinen ki pasyans pa telman enportan, me ou bezwen annan pasyans pour ou maryaz reisi.”​—John.

•  Akoz ou bezwen annan pasyans?

•  Ki mannyer ou kapab demontre pasyans?

•  “I enportan pour annan pasyans”

•   Lavi maryaz i fer ou remark bann defo ou konzwen plis.

   “Apre ki ou’n marye pour en pe letan, i fasil pour konsantre lo bann move tre ki ou konzwen i annan. Ler ou konmans annan sa bann panse negatif, i fasil pour ou pasyans sape.”​—Jessena.

•   Si ou mank pasyans, sa i kapab fer ou koz san reflesi.

   “Mon eksprim mon santiman vit, menm tro vit. Si mon ti annan plis pasyans, mon ti pou kapab vwar keksoz dan en lot fason e menm pa ni bezwen dir nanryen.”​—Carmen.

   Labib i dir: “Lanmour i pasyan e i bon.” (1 Korentyen 13:4) Nou kapab krwar ki de dimoun ki kontan kanmarad pou demontre pasyans anver kanmarad. Me sa pa touzour leka. John, ki’n ganny mansyonnen pli boner i dir: “Parey nenport bon kalite, i pli fasil pour perdi pasyans ki demontre pasyans. I demann zefor pour kontinyen devlop plis pasyans.”

•   Ler en keksoz ki ou pa ti pe ekspekte i arive.

   Legzanp: Ou konzwen i dir ou en parol blesan. Ou tant pour anvi dir li en keksoz blesan an retour.

   Prensip Labib: “Pa pran lakoler tro vit akoz bann sot ki gard rankin.”​—Eklezyast 7:9.

   Konman pour demontre pasyans: Tyonbo en kou. Avan ou reponn, dir ou lekor ki ou konzwen pa ti pe esey bles oubyen ensilte ou par ekspre. Liv Fighting for Your Marriage i dir: “Laplipar nou, nou reazir anver sa ki nou nou’n konpran par sa ki nou partner in dir, olye sa ki i’n dir e pe esey dir.”

   Menm si ou konzwen ti pe esey provok ou, si ou demontre pasyans e pa tret li dan menm fason, sa i kapab pez tansyon olye fer li pli grav. Labib i dir: “Ler napa dibwa, dife i tennyen.”​—Proverb 26:20, NWT.

   “Ler ou konmans santi ki ou madanm pa lo menm tim avek ou, tyonbo en kou, mazin lo akoz ou kontan li e deswit esey fer en keksoz ki i kontan pour li.”​—Ethan.

   Reflesir:

  •  Ki mannyer ou reazir ler ou konzwen i dir oubyen fer en keksoz ki pa zantiy?

  •  Ki mannyer ou kapab demontre plis pasyans laprosenn fwa ki sa i arive?

•   Ler ou konzwen i kontinyen fer menm keksoz ki irit ou.

   Legzanp: Ou konzwen i toultan an retar, prezan ou bezwen espere ziska ou konmans bwi.

   Prensip Labib: “Kontinyen siport kanmarad e pardonn kanmarad volonterman.”​—Kolosyen 3:13.

   Konman pour demontre pasyans: Esey met ou maryaz avan ou prop lentere. Demann ou lekor, ‘Si mon fer problenm akoz sa, eski i pou amelyor nou relasyon oubyen gat nou relasyon?’ Deplis, gard antet ki “nou tou nou souvan fer fot.” (Zak 3:2) Savedir ou osi ou annan serten keksoz ki ou bezwen travay lo la.

   “Parfwa mon annan plis pasyans avek en zanmi ki avek mon msye. Mon krwar sa i akoz mon pas plis letan avek mon msye e mon vwar tou sa ki i fer mal. Me si mon demontre pasyans anver li, mon pe montre ki mon kontan li e annan respe pour li, alor pasyans i vreman enportan dan mon maryaz.”​—Nia.

   Reflesir:

  •  Ki kantite pasyans ou demontre anver ou konzwen ler i fer en keksoz ki irit ou?

  •  Ki mannyer ou kapab demontre plis pasyans laprosenn fwa?