Ou zanfan i kot lakour e i napa nanryen pour fer. I dir mon napa nanryen pour fer. Avan ki i ouver televizyon oubyen sizere ki i zwe son zwe video prefere, la detrwa keksoz pour mazin lo la.

•   Lakantite ek kalite divertisman i kapab anmenn plis problenm. En papa ki apel Robert i dir: “Pour serten zanfan lavi toulezour i kapab paret annwiyan si zot pa pe get televizyon oubyen zwe bann zwe video. Bann aktivite ordiner i zis paret pa gou pour zot.”

   Son madanm Barbara i dakor avek sa ki Robert i dir: “Dan lavi nou bezwen reflesir e for zefor e i pa anmenn bon rezilta deswit. Zanfan ki kontan get televizyon oubyen zwe bann zwe video i trouv sa bann zefor annwiyan.”

•   Pas en ta letan lo rezo sosyal i kapab fer zot fer bann konparezon ki dekourazan. En zenn i kapab santi ki son lavi pa gou ler i get bann aktivite ki son bann zanmi i fer. En fiy ki apel Beth i dir: “Tou dimoun pe anmize tandis ki mwan mon kot lakour.”

   Deplis en dimoun ki pas en kantite letan lo rezo sosyal, sa i kapab fer li santi li vid setadir i santi li annwiye. En garson ki apel Chris i dir: “I kapab ki i fer ou santi okipe me ler ou’n fini lo rezo sosyal, ou pa santi ki ou’n akonpli nanryen.”

•   Ler ou napa nanryen pour fer sa i kapab vin en loportinite. En manman ki apel Katherine i dir: “Zanfan ki annwiye i kapab servi sa letan pour devlop son kreativite. I dir: “Par egzanp en zanfan i kapab fer en senp bwat vin en loto, en bato ouswa en navet spasyal. I tal en tapi lo meb e sa i vin en latant pour zwe anba la.

   I pour sa rezon ki Sherry Turkle en psikolog i dir, “Ler en dimoun i annwiye i konmsi son abilite pe demann li pour fer en keksoz.” a Alor en dimoun pa devret a tou pri evite ki i annwiye. Sa liv ki annan pour tit Disconnected i fer resorti, “Zis parey ler ou lev pwa sa i fer travay ou bann misk ler ou annwiye sa i fer travay ou lespri.”

 Leson: I enportan alor ki ler ou zanfan i annwiye i pa vwar sa konman en problenm me konman en loportinite pour ed zot devlop zot kreativite.

•   Les li al zwe deor si sirkonstans i permet. Barbara ki nou ti mansyonnen pli boner i dir, “I enkrwayab ki mannyer soley ek bon ler deor i kapab fer en zanfan nepli annwiye. Enn fwa ki zot konmans zwe deor zot lespri i konmans travay.”

   Prensip Labib: “I annan en letan apropriye pour tou keksoz, . . . en letan pour riye [e] en letan pour sotaye.”​—Eklezyast 3:1, NWT, not anba paz.

   Mazin lo la: Ki mon kapab fer pour ki mon zanfan i profite pour zwe deor pli souvan? Si i pa posib pour al zwe deor, ki bann aktivite zot kapab fer anndan kot zot kapab servi zot kreativite?

•   Ed ou zanfan pour mazin lezot. En manman ki apel Lillian i donn sa sizesyon: “Ou kapab al koup zerb kot en zanmi ki pli aze ouswa anmas fey, swa kwi manze pour zot oubyen pase pour dir bonzour. Ler ou fer keksoz pour lezot sa i anmenn vre lazwa.”

   Prensip Labib: “Sa enn ki zenere pour viv dan lopilans, sa enn ki donn delo pa pour zanmen swaf.”​—Proverb 11:25.

   Mazin lo la: Ki mannyer ou kapab ed ou zanfan pour fer keksoz pour lezot?

•   Donn legzanp. Lafason ki ou koz lo ou bann aktivite toulezour i kapab annan en lefe lo ou bann zanfan. En manman ki apel Sarah i dir: “Si ler nou koze nou donn zot lenpresyon ki nou lavi pa gou, nou pe ansenny zot osi ki lavi pa gou. Me ler nou demontre lentere dan sa ki nou fer, nou pe ed zot pour fer parey.”

   Prensip Labib: “Me sa en ki annan lazwa dan son leker i toultan fer festen.”​—Proverb 15:15.

   Mazin lo la: Ki mon zanfan i tann mwan dir lo bann aktivite toulezour? Ki mannyer zot vwar mwan reazir ler mon annwiye?

 Sizesyon: Ed ou zanfan pour fer en lalis bann aktivite kot zot servi zot kreativite. En manman ki apel Alison i dir: “Nou’n fer en bwat kot tou dimoun dan lafanmir i kapab met zot sizesyon ladan.”