LO KOUVERTIR | LAVI APRE LANMOR​—ESKI I POSIB?

Lespwar pour bann mor​—Ki mannyer ou kapab asire?

Eski i bet pour krwar ki bann mor pou viv ankor? Zapot Pol pa ti krwar sa. I ti ekri anba lenspirasyon, “Si nou lesperans dan Kris i valab zis pour sa lavi, dan sa ka, nou en bann dimoun pli malere ki egziste. Me Kris in resisite parmi bann mor. I [“premye fri,” NW] parmi bann mor.” (1 Korentyen 15:19, 20) Pol ti vwar rezireksyon konman en realite. Annefe rezireksyon Zezi ti en laprev. * (Akt 17:31) I pour sa rezon ki Pol ti apel Zezi “premye fri” parski i ti premye dimoun ki ti resisite pour viv eternelman. Alors si Zezi ti premye, i lozik ki ti pour annan lezot ankor.

I annan en lot rezon akoz ou kapab annan lespwar dan rezireksyon. Zeova i en Bondye laverite. “Bondye . . . pa zanmen manti.” (Tit 1:2) Zeova pa’n zanmen koz manti e i pa pou zanmen fer li. Eski Bondye ti pou donn sa lespwar rezireksyon, menm montre ki i kapab akonpli li, apre pa gard sa promes? Sirman sa ti pou enposib!

Akoz ki Zeova in fer sa promes rezireksyon? I akoz son lanmour pour nou. En zonm ki ti apel Zob ti demande, “Si en dimoun i mor, eski i kapab viv ankor? Ou pou apel mwan, e mon pou reponn ou. Ou pou vreman anvi vwar travay ou lanmen.” (Zob 14:14, 15) Zob ti konvenki ki son Papa dan lesyel ki ranpli avek lanmour ti pou vreman anvi resisit li. Eski Bondye in sanze? “Mwan mon Zeova, mon pa sanze.” (Malaki 3:6) Bondye i ankor vreman anvi vwar bann mor resisite pour viv ere e an bonn sante. Sa i zis parey nenport ki paran ki kontan son zanfan ti pou anvi fer apre ki i’n perdi son zanfan dan lanmor. Byensir konpare avek bann paran, Bondye i annan sa pouvwar pour fer sa ki i anvi.​—Psonm 135:6.

 Zeova pou donn son Garson pouvwar pour anmenn lazwa annabondans pour bann ki’n dan dey akoz zot in perdi en dimoun ki zot ti kontan dan lanmor. Ki mannyer Zezi i santi konsernan rezireksyon? Avan ki i ti resisit Lazar, Zezi ti vwar sagrinasyon bann ser ek zanmi Lazar e sa ti fer li “plere.” (Zan 11:35) En lot fwa, Zezi ti rankontre sa vev sorti Nain, ki ti’n fek perdi son sel garson dan lanmor. Zezi “ti pran pitye pour li e i ti dir, ‘Pa plere!’” Deswit i ti resisit son garson. (Lik 7:13) Alors Zezi ti vreman touse konsernan dey ek lanmor. Pa Zezi pou kontan ler i pou donn limanite en rezon pour zwaye olye dan dey!

Eski ou’n deza perdi en dimoun dan lanmor? Ou kapab santi ki lanmor i en problenm ki napa solisyon. Me i annan en solisyon, sa i rezireksyon ki Bondye pou fer par mwayen son Garson. Rapel ki Bondye i anvi ou vwar sa solisyon. I anvi ou la pour anmay bann ki ou’n deza perdi dan lanmor. Zis mazin zot ansanm pe fer bann plan pour leternite kot lanmor pa pou zanmen separ zot ankor!

Lionel ki ti ganny mansyonnen avan i dir: “Finalman mon ti aprann ki savedir rezireksyon. Premye kou i ti difisil pour krwar e mon pa ti fye sa dimoun ki ti pe eksplik mwan sa. Me kan mon ti al tyeke pour mwan menm dan Labib, mon ti vwar ki tou ti vre! Mon enpasyan pour vwar mon granpapa ankor.”

Eski ou ti pou kontan konn plis? Temwen Zeova pou byen kontan montre ou dan ou prop Labib akoz zot asire ki i pou annan rezireksyon a lavenir. *

[Not anba lo paz]

[Ekstre lo paz 8]

Lanmor i en gro problenm me Bondye i annan sa vre solisyon

[Portre lo paz 7]

Zob ti dir Bondye, “Ou pou vreman anvi vwar travay ou lanmen.”​—Zob 14:14, 15