LO KOUVERTIR | AKOZ MOVE KEKSOZ I ARIV AVEK BANN BON DIMOUN?

Ki Bondye pou fer avek lemal?

Labib i dir nou klerman ki Zeova ek son garson Zezi Kri pou fer konsernan soufrans ki Dyab in anmenn lo later. Labib i dir: “La rezon akoz Garson Bondye [Zezi] in aparet, se zisteman pour detri bann travay dyab.” (1 Zan 3:8) Sa move lemonn ozordi kot i annan vorasite, laenn ek move keksoz pou ganny detrir. Kant a “sef lemonn,” Dyab, Zezi in promet ki i pou “ganny zet deor.” (Zan 12:31) San lenfliyans Satan, en lemonn kot i annan lazistis ek lape pou ganny etablir.​—2 Pyer 3:13.

Me ki pou arive avek bann ki kategorikman refize pour sanz zot fason e ki kontinyen fer sa ki mal? Reflesir lo sa promes senp e kler: “Zis bann ki drwat ki pou reste lo later e bann ki san repros ki pou reste lo la. Bann mesan zot, zot pou ganny retire lo later e bann tret pou ganny eliminen.” (Proverb 2:21, 22) Lenfliyans bann move dimoun pou disparet. Anba en tel kondisyon kot i pou annan lape, bann dimoun obeisan pou gradyelman vin parfe.​—Romen 6:17, 18; 8:21.

Dan sa nouvo lemonn, ki mannyer Bondye pou elimin lemal? I pa pou retir nou laliberte pour swazir e fer bann imen vin parey bann robot. O kontrer i pou ansenny bann dimoun obeisan son bon gidans e ed zot pour reziste bann move panse ek aksyon.

Ki Bondye pou fer konsernan bann maler ki san ekspekte? I’n promet ki son Rwayonm pou byento kontrol later. Sa lerwa ki Bondye in apwente dan sa Rwayonm i Zezi Kri e i annan sa pouvwar pour geri bann malad. (Matye 14:14) Zezi i osi annan sa pouvwar pour kontrol bann lafors lanatir. (Mark 4:35-41) Alor, soufrans ki koze par “letan ek levennman san ekspekte” pou disparet. (Eklezyast 9:11) Anba dominasyon Kris, okenn maler pa pou ariv lo limanite.​—Proverb 1:33.

Ki nou pou dir konsernan sa plizyer milyon dimoun inosan ki’n soufer avek en lanmor trazik? Zis avan ki i ti resisit son zanmi Lazar, Zezi ti dir: “Mwanmenm, larezireksyon ek lavi.” (Zan 11:25) Wi, Zezi i annan pouvwar pour resisit bann ki’n mor!

Si sa nide pour viv dan en lemonn kot move keksoz pou nepli arive avek bon dimoun i enteres ou, akoz ou pa fer li ou lobzektif pour aprann plis konsernan sa vre Bondye ek son plan par etidye Labib? Temwen Zeova dan ou kominote pou byen kontan pour ed ou pour ganny sa konnesans. Nou envit ou pour kontakte bann Temwen Zeova oubyen ekri lo sa ladres dan sa magazin.

[Portre lo paz 7]

Bondye pou retir tou sa ki anmenn soufrans