Bann mirak ki pe al arive

METON ou bezwen fer en gran loperasyon me ou’n tande ki sa dokter ki sipoze oper ou pa’n zanmen fer sa kalite loperasyon. Ki mannyer ou ti pou santi? Pa ou ti pou per? Par kont, si ou ti tande ki i sa pli bon dokter pour sa kalite loperasyon e ki i’n sonny en kantite dimoun avek sa menm maladi ki ou, ki mannyer ou ti pou santi? Pa ou ti pou annan plis konfyans ki i ti pou geri ou?

Sa move lemonn ki nou pe viv ladan i osi bezwen en bon gerizon. Dan son Parol Labib, Bondye in promet ki i pou fer later revin en Paradi. (2 Pyer 3:13) Me pour later revin en Paradi, bann move dimoun pou bezwen ganny retire enn fwa pour tou. (Psonm 37:9-11; Proverb 2:21, 22) Tou bann problenm ki nou vwar tout otour nou pou bezwen ganny eliminen avan ki later i ganny transformen dan en paradi. I pou bezwen en mirak pour sa arive!​—Revelasyon 21:4, 5.

Temwen Zeova i krwar ki sa bann mirak pou arive tre byento. Akoz? Parski bann mirak ki Zeova in deza fer i prouve ki i annan pouvwar pour akonplir son bann promes. Annou konpar bann promes ki i’n fer avek sis mirak ki’n ganny rikorde dan Labib.

 Nou ankouraz ou pour kontinyen aprann atraver Labib sa ki Bondye in promet nou. Anmezir ki ou fer sa, ou lafwa pou vin pli for e ou pou annan lespwar ki ou osi ou pou kapab benefisye avek sa bann mirak ki Zeova pou fer.

[Bwat lo paz 7]

MIRAK:

ZEZI TI NOURI PLIZYER MIL DIMOUN AVEK ZIS DETRWA DIPEN EK PWASON.​—MATYE 14:13-21; MARK 8:1-9; ZAN 6:1-14.

PROMES:

“Later pou sirman donn son prodwi; Bondye, nou Bondye pou beni nou.”​—PSONM 67:6.

BYENFE POUR NOU:

PERSONN PA POU ZANMEN MOR LAFEN ANKOR.

MIRAK:

ZEZI TI FER BANN AVEG VWAR KLER.​—MATYE 9:27-31; MARK 8:22-26.

PROMES:

“Lizye bann aveg pou ouver.”​—IZAI 35:5.

BYENFE POUR NOU:

TOU DIMOUN AVEG POU VWAR KLER.

MIRAK:

ZEZI TI GERI BANN DIMOUN AVEK DEZABILITE.​—MATYE 11:5, 6; ZAN 5:3-9.

PROMES:

“Sa enn ki bwate pou grenpe parey en serf.”​—IZAI 35:6.

BYENFE POUR NOU:

TOU DIMOUN AVEK DEZABILTE POU GANNY GERI.

MIRAK:

ZEZI TI GERI DIFERAN KALITE MALADI.​—MARK 1:32-34; LIK 4:40.

PROMES:

“Okenn zabitan pa pou dir: ‘Mon malad.’”​—IZAI 33:24.

BYENFE POUR NOU:

TOU MALADI POU GANNY RETIRE. NOU POU ANNAN EN LASANTE PARFE.

MIRAK:

ZEZI TI KONTROL LANATIR.​—MATYE 8:23-27; LIK 8:22-25.

PROMES:

“Zot pou konstri lakaz e zot pou reste ladan; wi, zot pou plant pye rezen e zot pou manz son fri. Zot pa pou rente pour nanryen.”​—IZAI 65:21, 23.

“Ou pou lwen avek lopresyon akoz ou pa pou per narnyen e ou pou lwen avek okenn keksoz ki fer per akoz i pa pou apros ou.”​—IZAI 54:14.

BYENFE POUR NOU:

I POU NEPLI ANNAN DEZAS NATIREL.

MIRAK:

ZEZI TI RESISIT BANN DIMOUN MOR.​—MATYE 9:18-26; LIK 7:11-17.

PROMES:

“Tou bann mor ki dan tonbo pou . . . sorti.”​—ZAN 5:28, 29.

“Lanmer ti rann son bann mor ki ti ladan. Lanmor ek lemonn lanmor ti rann son bann mor.”​—REVELASYON 20:13.

BYENFE POUR NOU:

BANN DIMOUN KI NOU KONTAN KI’N MOR POU RESISITE.