Vin pros avek sa Enn ki ekout lapriyer

BOKOU dimoun ki dir i krwar dan Bondye pa kapab eksplik zot lafwa. Zot pa kapab ni eksplike akoz souvan larelizyon i fer bann move keksoz oubyen akoz Bondye i permet soufrans. Zot zis kapab priy avek en Bondye ki zot pa konnen.

Me ou, ou kapab vin pli pros avek Bondye. Si ou aprann konn Bondye, sa pou batir ou lafwa, fer ou kontan e apresye li. Vre lafwa i baze lo levidans. (Ebre 11:1) Si ou aprann laverite lo Bondye, ou kapab konn li e koz avek li parey en zanmi. Annou vwar legzanp serten ki ti abitye priye menm si zot ti annan dout lo legzistans Bondye.

▪ La sa ki Patricia, ki’n ganny mansyonnen dan sa premye lartik i dir: “En zour, mon ti avek en group dis zanmi kan zot ti konmans diskit lo larelizyon. Mon ti’n deza dir zot ki mon ti’n sorti dan lakour pour sov en diskisyon ant mon papa ki pa ti krwar dan Bondye ek en Temwen Zeova ki ti’n vin kot nou. Enn mon bann zanmi ti dir: ‘Petet Temwen Zeova i annan rezon.’

“En lot ti dir: ‘Akoz nou pa al asiste enn zot bann renyon pour nou konnen?’ Sanmenm sa ki nou ti fer. Menm si nou ti annan nou bann dout, serten parmi nou ti kontinyen asiste zis akoz bann Temwen ti byen amikal.

“Me en zour Dimans, mon ti tann en keksoz ki ti fer mwan sanz mon pwennvi. Sa orater ti eksplike akoz dimoun i soufer. Mon pa ti’n zanmen reflesir lo lefet ki o konmansman zonm ti parfe e ki pese ek lanmor in antre dan lemonn par en sel zonm. Sa orater ti osi eksplike akoz lanmor Zezi ti neseser pour ki limanite i reganny sa ki sa premye zonm ti’n perdi. * (Romen 5:12, 18, 19) En sel kou, tou keksoz ti fer sans pour mwan. Mon ti mazinen: ‘I vreman annan en Bondye ki enterese avek nou.’ Mon ti kontinyen etidye Labib e pa lontan apre, pour premye fwa dan mon lavi, mon ti santi ki mon ti kapab priy avek en personnaz ki reel.”

▪ Allan ki’n osi ganny mansyonnen dan premye lartik, ti dir: “En zour Temwen Zeova ti pas kot nou lakour e mon madanm ti envit zot anndan akoz i ti enterese avek sa ki zot ti dir konsernan lavi eternel lo later. Zot ti agas mwan. Alor mon ti kit bann viziter  dan salon e fer mon madanm vin dan lakwizin. Mon ti dir li: ‘Ase bet don. Ou pa kapab krwar bann zafer koumsa!’

“I ti reponn: ‘Dan sa ka alor, retourn dan salon e montre zot ki zot mal.’

“Byensir, mon pa ti kapab prouve ki zot ti mal. Me zot ti vreman zantiy e zot ti kit en liv ki koz lo si lavi in konmans par kreasyon oubyen par evolisyon. Dan sa liv, i ti annan laprev vreman lozik e kler. Alor, mon ti deside pour aprann konn Bondye pli byen. Mon ti konmans etidye Labib avek bann Temwen e pa lontan apre mon ti realize ki sa ki Labib i dir i konpletman diferan avek sa ki mon ti krwar lo larelizyon. Anmezir mon ti aprann konn Zeova, mon ti konmans priy li dan en fason pli spesifik. Mon ti annan serten latitid ki pa ti apropriye, alor mon ti demann led dan lapriyer. Mon asire ki Zeova ti reponn mon lapriyer.”

▪ Andrew ki reste Langleter i dir: “Menm si mon ti annan mon bann lopinyon pour mwan e en gran lentere dan lasyans, mon ti krwar dan sa teori evolisyon zis akoz lezot dimoun ti dir i vre. Mon pa ti krwar dan Bondye akoz tou bann move keksoz ki arive.

 “Me parler mon ti mazinen: ‘Si i annan en Bondye anler laba, mon ti a voudre konnen ki tousala i vedir. Akoz i annan sitan bokou krim ek lager?’ Ler mon ti rankontre problenm, parler mon ti priye me mon pa ti konnen avek ki mon ti pe koze.

“En zour en dimoun ti donn mon madanm en trak pibliye par Temwen Zeova avek tit: Will This World Survive? Sanmenm sa kestyon ki’n toultan fatig mwan. Sa trak ti fer mwan reflesir lo Labib: ‘Eski son bann larepons i vo lapenn egzaminen?’ Plitar ler mon ti dan vakans, en dimoun ti donn mwan sa liv The Bible​—God’s Word or Man’s? * Ler mon ti realize ki Labib i an armoni avek vre lasyans, mon ti anvi konn plis lo la. Alor, ler en Temwen Zeova ti ofer pour etidye Labib avek mwan mon ti aksepte. Anmezir mon ti konpran plan Zeova, mon ti santi ki mon ti konn li konman en personnaz reel, enn ki mon ti kapab koz avek dan lapriyer.”

▪ Jan ki’n ganny elve konman en Protestan Lonn, Langleter ti dir: “Lipokrizi dan larelizyon ek sa kantite soufrans partou ti fer mwan abandonn larelizyon. Mon ti osi aret liniversite e konmans sante e zwe gitar pour larzan. Lanmenm ler mon ti zwenn Pat. I ti’n ganny elve konman en Katolik me i ti nepli en krwayan parey mwan menm.

“Nou ti reste dan en lakaz abandonnen ansanm avek plizyer lezot dimoun ki ti’n kit lekol e ki ti enterese avek bann larelizyon Azyatik. Nou ti pas en kantite letan dan bann diskisyon entans lo bi lavi ziska tar dan lannwit. Menm si nou de Pat nou pa ti krwar dan Bondye, nou ti santi ki i bezwen annan kek ‘lafors’ dan liniver.

“Apre ki nou ti’n al reste dan nor Langleter pour rod louvraz konman mizisyen, nou ti ganny en pti garson. En zour swar nou pti garson ti tonm malad e mon ti vwar mwan pe priy avek sa Bondye ki mon ti krwar pa egziste. Pa tro lontan apre, mon relasyon avek Pat ti deteryore e mon ti pran nou pti baba e ale. Ankor enn fwa, mon ti demann led dan lapriyer zis an ka i ti annan kelken ki ti pe ekoute. Mon pa ti konnen, me Pat osi ti fer parey.

“Plitar sa zour, de Temwen Zeova ti tap laport kot Pat e montre li serten konsey pratik dan Labib. Pat ti telefonn mwan e demann mwan si mon ti a kontan nou etidye Labib avek bann Temwen. Apre, nou ti aprann ki pour nou fer Bondye plezir, nou ti pou bezwen marye legalman. Lefet ki nou relasyon ti deza pa tro term, sa ti paret enposib pour fer.

“Nou ti anvi konn plis konsernan lakonplisman bann profesi Labib, akoz nou soufer e ki si sa Rwayonm Bondye. Avek letan, nou ti realize ki Bondye i enterese avek nou e nou ti anvi fer sa ki i demann nou. Nou ti marye. Lasazes ki ganny trouve dan Parol Bondye in ed nou elve nou trwa zanfan. Nou asire ki Bondye ti ekout nou lapriyer.”

Egzamin levidans pour ou menm

Parey plizyer milyon lezot, sa bann dimoun ki’n donn zot leksperyans dan sa lartik ti vwar bann mansonz ki fo larelizyon ti pe ansennyen e zot ti aprann akoz Bondye i les nou soufer. Eski ou’n remarke ki a sak fwa se sa konnesans egzakt lo Labib ki ti konvenk sa bann dimoun ki Zeova i vreman ekout lapriyer?

Eski ou ti a kontan egzamin levidans ki Bondye i vreman egziste? Bann Temwen Zeova pou byen kontan pour ed ou aprann laverite lo Zeova e konman pour vin pros avek sa “Enn ki ekout lapriyer.”​—Psonm 65:2.

[Not anba lo paz]

[Ekstre lo paz 10]

“Anmezir mon ti konpran plan Zeova, mon ti santi ki mon ti konn li konman en personnaz reel, enn ki mon ti kapab koz avek dan lapriyer”

[Portre lo paz 9]

Vre lafwa i baze lo levidans e dezir pour konn laverite lo Bondye