Eski kelken i ekout lapriyer?

“Mon pa ti asire si Bondye i vreman egziste. Kantmenm sa, parler mon ti priye. Mon pa ti tro konnen si i ti annan kelken ki pe ekoute, me mon bezwen admet ki mon ti swete ki sa ti le ka. Mon ti malere e mon ti napa en bi dan mon lavi. Mon ti per pour krwar dan Bondye akoz mon ti panse ki zis bann dimoun ki fay fay ki ti krwar dan li.”​—PATRICIA, * IRLANN.

ESKI ou’n deza santi parey Patricia? Eski ou priye menm si ou pa tro asire si Bondye i vreman egziste? Si wi, ou pa tousel. Annou vwar akoz.

▪ En serve ki ti ganny fer Langleter avek 2,200 dimoun i montre ki zis 22 poursan parmi zot i krwar ki i annan en Bondye ki’n kre lemonn e ki ekout lapriyer. Pourtan, 55 poursan dan sa menm group i priye omwen detanzaot.

▪ En serve ki ti ganny fer dan kat kontinan avek 10,000 dimoun i montre ki parmi bann ki dir zot pa krwar dan Bondye, preski 30 poursan i priye.

Akoz zot annan dout?

En msye Angle ki apel Allan i dir: “Mon ti abitye dir ki mon pa krwar dan Bondye akoz mon ti panse ki larelizyon ti’n ganny envante pour kontrol dimoun e fer larzan. Mon ti osi krwar ki si i ti annan en Bondye, i ti pou napa sitan bokou lenzistis. Pourtan, parler mon ti asize trankil e koz avek ‘en keksoz.’ Mon ti osi demann mon lekor: ‘Ki mannyer mon’n vin an egzistans?’”

Sak dimoun ki santi koumsa i annan son prop rezon pour doute si lapriyer i ganny reponn. Dan bokou ka, zot kapab doute akoz serten kestyon parey sa bann pa’n ganny reponn:

▪ Eski i annan en Kreater?

▪ Akoz larelizyon i souvan motiv dimoun pour fer sa ki mal?

▪ Akoz Bondye i les nou soufer?

Si ou kapab ganny larepons sa bann kestyon, eski i pou pli fasil pour ou priye?

[Not anba lo paz]