Ki mannyer Zezi ti konsider politik?

BANN ekriven Levanzil in dekrir plizyer sirkonstans pandan minister Zezi kot i ti fas a fas avek bann sityasyon ki ti enplik politik. Par egzanp, zis apre son batenm kan i ti annan apepre 30 an, Dyab ti ofer li sa pozisyon pour vin dirizan lemonn. Pli tar dan son minister, en lafoul ti anvi fer li vin zot lerwa. En pe letan apre, serten dimoun ti anvi fer li vin en aktivis politik. Ki mannyer Zezi ti reakte? Annou vwar ki ti arive dan sa bann lokazyon pli an detay.

Dirizan lemonn. Levanzil i dir ki Dyab ti ofer Zezi pour vin dirizan “tou bann rwayonm partou lo later.” Imazin sa kantite dibyen ki Zezi ti pou’n kapab fer pour limanite ki pe soufer si zis i ti dirizan lemonn! Lekel sa dimoun ki kontan politik e ki senserman enterese avek fer lemonn progrese ki ti pou reziste sa lof? Me Zezi pa ti aksepte.​—Matye 4:8-11.

Lerwa. I ti annan bokou dimoun dan letan Zezi ki ti anvi en dirizan ki ti pou kapab rezourd zot bann problenm ekonomik e politik. Zot ti telman enpresyonnen avek son bann abilite ki zot ti anvi ki i ti mel dan politik. Ki mannyer Zezi ti reakte? Zan, en ekriven Levanzil ti dir: “Zezi ti realize ki zot ti a pe vin pran li pardfors pour fer li lerwa. Alor i ti al ankor dan montanny li tousel.” (Zan 6:10-15) I kler ki Zezi ti refize pour pran par dan politik.

Aktivis politik. Remark sa ki ti arive detrwa zour avan ki Zezi ti ganny met amor. Disip bann Farizyen ti zwenn ansanm avek bann siporter Erod pour vin demann Zezi si bann Zwif ti devret pey Ronm larzan taks. Zot ti annan lentansyon fors Zezi pour pran kote avek en parti politik akoz disip bann Farizyen ti anvi ganny zot lendepandans avek Lanpir Romen me kant a bann siporter Erod, zot zot ti kontan gouvernman Romen.

Mark ti rikord larepons ki Zezi ti donnen: “‘Akoz zot pe met mwan dan en pyez? Anmenn en pyes larzan isi, e les mwan gete.’ Zot ti anmennen, e i ti demann zot, ‘Figir ek non ki sennla ki lo la?’ Zot ti reponn li, ‘Se figir ek non Sezar.’ Zezi ti reponn zot, ‘Alor, rann Sezar sa ki pour Sezar, e Bondye sa ki pour Bondye.’” (Mark 12:13-17) Liv Church and State​—The Story of Two Kingdoms i fer en komanter lo sa larepons ki Zezi ti donnen an dizan ki i ti refize pour vin en dimoun enportan dan  politik e i ti montre byen kler diferans ant Sezar ek Bondye.

Kris ti vreman ganny touse par bann problenm parey lapovrete, koripsyon ek lenzistis. Anfet, Labib i montre byen kler lafason ki i ti santi kan i ti vwar sa kondisyon deplorab ki dimoun ti ladan tout otour li. (Mark 6:33, 34) Me kantmenm sa, Zezi pa ti esey konmans en kanpanny pour retir lenzistis dan sa lemonn menm si i ti annan serten ki ti esey zot mye pour enplik li dan zot bann problenm politik ki zot ti pe rankontre sa letan.

Atraver sa bann legzanp, i byen kler ki Zezi ti refize pour pran par dan politik. Me ki nou pou dir konsernan bann Kretyen dan nou letan? Ki pozisyon zot devret pran an rapor avek politik?