Zezi Kri larepons nou kestyon

“Ki dimoun i dir mon ete?”​—LIK 9:18.

ZEZI ti demann son bann disip sa kestyon akoz i ti konnen ki dimoun ti annan diferan pwennvi lo li. Pourtan zot ti napa okenn rezon pour konfize. Zezi pa ti zanmen fer keksoz an kasyet. O kontrer, i ti en dimoun ki ti kontan asosye avek lezot. I ti abitye pas letan avek dimoun dan zot lavil ek vilaz. I ti prese e ansenny an piblik akoz i ti anvi ki dimoun i konn laverite lo li.​—Lik 8:1.

Nou kapab konn laverite lo Zezi atraver son parol ek aksyon. Sa i ganny rikorde dan sa kat Levanzil Labib: Matye, Mark, Lik ek Zan. Labib i en liv ki’n ganny enspire par Bondye e se ladan ki nou pou trouv larepons pour nou bann kestyon lo Zezi. *​—Zan 17:17.

KESTYON: Eski Zezi ti vreman egziste?

LAREPONS: Wi. Bann istoryen dan premye syek tel ki Josephus ek Tacitus ti koz lo Zezi konman en personnaz ki ti vreman egziste. Me sa ki pli enportan, Levanzil i donn nou laprev ki Zezi pa ti en personnaz ki’n ganny envante me enn ki reel. Landrwa ek letan ki bann levennman ki’n ganny rikorde dan Levanzil ti arive i spesifik e byen detaye. Par egzanp Lik, en ekriven Levanzil ti mansyonn set dirizan pour endik ki lannen ki Zezi ti konmans prese. Bann istoryen i dakor ki sa bann zonm ti pe dirize dan sa peryod letan.​—Lik 3:1, 2, 23.

Sa bann levidans lo Zezi i konvenk nou ki i ti vreman egziste. Liv Evidence for the Historical Jesus i fer sa komanter: “Laplipar spesyalis Labib i admet ki i ti annan en zonm koni konman Zezi sa zonm sorti Nazaret ki ti viv dan premye syek.”

KESTYON: Eski Zezi i Bondye?

LAREPONS: Non. Zezi pa ti zanmen konsider li egal avek Bondye. O kontrer, Zezi in montre plizyer  fwa ki i soumet avek Zeova. * Par egzanp, Zezi ti refer avek Zeova konman “Mon-dye” e “sel vre Bondye.” (Matye 27:46; Zan 17:3, nou ki’n met an italik.) Zis en dimoun ki konsider li mwen enportan ki en lot ki pou servi sa bann lekspresyon. Kan en travayer i refer avek son anplwayer konman “mon bos” oubyen “mon siperyer,” pa sa i montre klerman ki sa lot dimoun i dan en pozisyon pli o ki li?

Zezi ti osi montre ki i pa ti menm personnaz avek Bondye. En fwa i ti dir sa avek bann dimoun ki pa ti kontan li kan zot ti pe koz kont son lotorite: “Dan zot Lalwa i’n ekrir ki depozisyon [oubyen “levidans,” NW] de temwen i vre. Mon koz lo mwanmenm e mon Papa ki’n anvoy mwan i koz dan mon faver.” (Zan 8:17, 18) Alor Zezi ek Zeova i bezwen de diferan personnaz, si non, ki mannyer i ti pou annan de temwen? *

KESTYON: Eski Zezi ti zis en bon dimoun?

LAREPONS: Non, i ti bokou plis ki zis en bon dimoun. Zezi ti konnen ki i ti annan plizyer rol enportan pour zwe dan lakonplisman lavolonte Bondye. La serten sa bann rol:

● “Sel Garson Bondye.” (Zan 3:18) Zezi ti konnen kote i ti sorti. Annefe, son lavi ti’n konmanse menm avan ki i ti ne lo later. I ti eksplike ki i ti “sorti dan lesyel.” (Zan 6:38) Zezi ti premye kreasyon Bondye e i ti ede pour kre tou lezot keksoz. Akoz i ti sa sel personnaz ki Bondye ti kre li tousel, Zezi ti kapab apel son lekor “sel Garson Bondye.”​—Zan 1:3, 14; Kolosyen 1:15, 16.

● “Fis-de-Lonm.” (Matye 8:20) Plizyer fwa Zezi ti refer avek son lekor konman “Fis-de-Lonm.” Sa lekspresyon ki aparet apepre 80 fwa dan bann Levanzil i montre ki i ti en zonm e non pa en Bondye dan lekor en imen. Ki mannyer sel Garson Bondye ti ne konman en imen? Atraver lespri sen, Zeova ti transfer lavi son Garson dan vant en vyerz Zwif ki ti apel Mari e Mari ti ansent. Dan sa fason, Zezi ti ne parfe e san pese.​—Matye 1:18; Lik 1:35; Zan 8:46.

● “Met” oubyen ansenyan. (Zan 13:13) Zezi ti fer kler ki Bondye ti’n anvoy li lo later pour “ansenny bann dimoun . . . e anons Bonn Nouvel.” (Lik 20:1; Lik 4:43) I ti eksplike dan en fason tre senp e kler ki si sa Rwayonm Bondye e ki sa Rwayonm pou fer pour akonplir lavolonte Zeova.​—Matye 6:9, 10.

● “Laparol.” (Zan 1:1) Zezi ti Portparol Bondye, savedir Bondye ti servi li pour pas bann lenformasyon ek lenstriksyon avek lezot. Zeova ti servi Zezi pour pas Son mesaz avek bann imen lo later.​—Zan 7:16, 17.

KESTYON: Eski Zezi ti sa Mesi ki ti’n ganny promet?

LAREPONS: Wi. Bann profesi Labib ti predir ki i ti pou annan en Mesi oubyen Kris ki ti pou vini. Sa de term i vedir “sa Enn ki’n ganny swazir.” Sa Enn ki ti’n ganny promet ti pou zwe en rol enportan dan lakonplisman plan Zeova. En fwa en madanm Samariten ti dir avek Zezi: “Mon konnen ki Mesi pou vini sa ki apel Kris.” Zezi ti reponn: “Mwanmenm li, mwan ki pe koz avek ou.”​—Zan 4:25, 26.

Eski i annan okenn laprev ki Zezi ti vreman sa  Mesi? Nou pou egzamin trwa levidans ki pou definitivman idantifye zis Zezi konman sa Mesi.

● Son laliny desandans. Zeova ti predir ki Mesi ti pou enn bann desandans Abraam dan laliny David. (Zenez 22:18; Psonm 132:11, 12) Zezi ti en desandans tou le de zonm.​—Matye 1:1-16; Lik 3:23-38.

● Bann profesi ki’n ganny akonplir. I annan plizyer douzenn profesi konsernan lavi Mesi lo later ki’n ganny ekrir dan Lekritir Ebre e sa i enkli bann detay lo son nesans ek lanmor. Zezi ti akonplir tou sa bann profesi. La serten parmi sa bann profesi: I ti pou ne Betleem (Mika 5:2; Lik 2:4-11), i ti ganny demande pour sorti Lezip (Osea 11:1; Matye 2:15) e i ti ganny egzekite me son bann lezo pa ti ganny kase (Psonm 34:20; Zan 19:33, 36). I ti napa okenn fason ki Zezi ti pou kapab viv son lavi dan en fason ki sa bann profesi lo Mesi ti pou ganny akonplir lo li. *

● Temwannyaz Bondye. Zour ki Zezi ti ne, Bondye ti anvoy bann lanz kot bann berze pour dir zot ki Mesi in ne. (Lik 2:10-14) I ti annan plizyer lokazyon pandan ki Zezi ti pe akonplir son minister kot Bondye li menm ti koze dan lesyel e eksprim son laprouvasyon pour Zezi. (Matye 3:16, 17; 17:1-5) Zeova ti donn Zezi pouvwar pour fer bann gran mirak e sa i donn nou plis laprev ki Zezi ti sa Mesi.​—Akt 10:38.

KESTYON: Akoz Zezi ti bezwen soufer e mor?

LAREPONS: Zezi ti en zonm ki pa’n zanmen fer okenn pese, alor i pa ti merite mor. I pa ti ni menm devret ganny kloute lo en poto parey en dernyen kriminel e mor dan en fason ki anmenn laont. Me kantmenm sa, Zezi ti konnen ki i ti pou pas atraver tou sa bann leprev e i ti pare pour fer fas avek tousala.​—Matye 20:17-19; 1 Pyer 2:21-23.

Bann profesi baze lo Mesi i dir ki Mesi ti pou bezwen soufer e mor pour efas pese lezot. (Izai 53:5; Danyel 9:24, 26) Zezi li menm ti dir ki i ti’n vin pour “donn son lavi konman pri pour liberasyon bokou dimoun.” (Matye 20:28) Bann ki krwar dan valer son sakrifis pou ganny libere avek pese ek lanmor e annan sa posibilite pour viv pour touzour lo later ki pou vin en Paradi. *​—Zan 3:16; 1 Zan 4:9, 10.

KESTYON: Eski nou kapab vreman krwar ki Zezi ti resisite?

LAREPONS: Wi. Zezi ti konnen ki i ti pou ganny resisite. (Matye 16:21) I enportan pour note ki ni Zezi, ni okenn ekriven Labib pa’n zanmen dir ki Zezi ti pou resisite atraver en prosesis natirel. Sa lide pa ti pou fer sans. O kontrer, Labib i dir: “Me Bondye ti resisit li, e delivre li dan soufrans lanmor.” (Akt 2:24) Si nou dakor ki i annan en Bondye ki’n kre tou keksoz, alor nou annan tou rezon pour krwar ki i kapab resisit son Garson.​—Ebre 3:4.

Eski i annan okenn laprev konkret ki Zezi in ganny resisite? Annou egzamin sa bann levidans swivan:

● Temwannyaz bann ki ti vwar avek zot prop lizye. Apepre 22 z-an apre ki Zezi ti’n mor, zapot Pol ti ekrir ki i ti annan plis ki 500 dimoun ki ti vwar Zezi apre son rezireksyon e ki laplipar zot ti ankor vivan kan Pol ti pe ekrir son let. (1 Korentyen 15:6) Nou kapab rezet levidans enn oubyen de temwen, me eski ou kapab rezet temwannyaz 500 dimoun?

● Bann temwen ki diny konfyans. Bann premye disip Zezi ti dan sa pli bon pozisyon pour konn laverite konsernan rezireksyon Zezi e zot ti pres avek lardyes ki i ti’n resisite. (Akt 2:29-32; 3:13-15) Anfet, pour zot, krwayans dan son rezireksyon ti en laspe enportan zot lafwa konman Kretyen. (1 Korentyen 15:12-19) Sa bann disip ti pli vomye mor ki abandonn zot lafwa dan Zezi. (Akt 7:51-60; 12:1, 2) Eski ou konn okenn dimoun ki ti pou pare pour mor pour en mansonz?

Nou’n egzamin larepons ki Labib i donnen pour sis kestyon lo Zezi. Sa bann larepons i dir nou byen klerman lekel li Zezi. Me, eski i enportan pour konn larepons sa bann kestyon? Andotmo, eski krwayans ki en dimoun i annan lo Zezi i fer en diferans?

[Not anba lo paz]