Abraam en zonm ki ti annan lafwa

Abraam pe debout dan en fernwanr kot napa en mous vole. Anmezir i get dan en lesyel kler, ranpli avek zetwal, i mazin sa promes ki Bondye ti fer avek li konsernan son desandans ki ti pou vin bokou parey sa kantite zetwal. (Zenez 15:5) Sa bann zetwal i en laprev vizib ki fer Abraam rapel promes Zeova. Zot konman en lasirans. Apre tou, si Zeova in annan sa pouvwar pour kre sa gran liniver ek tou sa ki i annan ladan, eski pa i pou osi kapab fer Abraam ek Sara ganny en zanfan? Sanmenm sa kalite lafwa ki Abraam ti annan.

KI SI SA LAFWA? Parey i ganny servi dan Labib, “lafwa” i en lasirans konplet dan en keksoz ki ou pa vwar e ki baze lo en laprev solid. En dimoun ki annan lafwa dan Bondye i konsantre lo realizasyon son bann promes, pour li i konmsi sa bann promes in fini ganny realize.

DAN KI FASON ABRAAM TI DEMONTRE LAFWA? Abraam ti montre ki i ti krwar dan bann promes Bondye. Par lafwa, Abraam ti kit son pei natal, i ti asire ki Zeova ti pou gard Son promes pour montre li en lot pei. Par lafwa, Abraam ti ale vini dan pei Kanaan, i ti asire ki son desandans ti pou finalman pran sa pei. Par lafwa, Abraam ti obeir kan Zeova ti demann li pour sakrifye son garson, avek konfyans ki si i ti neseser, Zeova ti pou resisit Izaak. ​—Ebre 11:8, 9, 17-19.

Abraam ti konsantre lo lavenir olye lepase. Menm si Abraam ek Sara ti annan en lavi pli konfortab dan lavil Our konpare avek sa kalite lavi ki zot ti annan Kanaan, “zot pa ti kontinyen mazin sa pei ki zot ti’n kit deryer.” (Ebre 11:15, Today’s English Version) Plito, zot ti konsantre lo lafason ki Bondye ti pou beni zot ek zot desandans a lavenir. ​—Ebre 11:16.

Eski Abraam ti annan rezon pour annan lafwa dan Bondye? Definitivman wi. Zeova ti akonplir tou son promes. Desandans Abraam ti finalman miltipliye pour vin en nasyon ki ti renonmen konman nasyon Izrael. Avek letan, bann Izraelit ti al reste Kanaan, sa menm pei ki Zeova ti promet Abraam. ​—Zozye 11:23.

KI LESON NOU TIRE? Nou kapab asire ki Zeova pou gard tou son promes. Menm si dapre pwennvi en imen, serten sa bann promes i kapab paret enposib, nou annan konfyans ki “pour Bondye tou i posib.” ​—Matye 19:26.

Legzanp Abraam i osi ansenny nou pour reste konsantre lo bann keksoz ki nou pou rezwir a lavenir e non pa lo lafason ki keksoz ti ete dan  lepase. Sanmenm ki en zonm ki apel Jason ti aprann fer. Jason i annan en maladi ki a lafen dizour in fer li paralize konpletman. I dir: “Mon kapab dir ki i annan bann moman ki mon mazin lepase. Mon plizoumwen mank bann senp pti keksoz parey may mon madanm Amanda.”

Kantmenm sa, Jason i annan lafwa total ki Zeova pou akonplir son bann promes, enkli sa promes ki tre byento later pou vin en paradi e bann imen fidel pou ganny lavi eternel avek en lasante parfe. * (Psonm 37:10, 11, 29; Izai 35:5, 6; Revelasyon 21:3, 4) Jason i eksplike an dizan: “Mon touzour rapel mon lekor ki bann pli bon moman nou pou ganny li a lavenir. Tre byento tou sa bann presyon, lenkyetid, latristes, remordkonsyans pou nepli, i pou’n disparet pour touzour.” Eski pa sa frer i en bon legzanp lafwa remarkab parey Abraam?

[Not anba lo paz]