Viv selon lespri sen e ou pou ganny lavi ek lape

‘Nou nepli viv selon nou prop natir, me selon Lespri.’ ​—ROM. 8:4.

1, 2. (a) Ki i arive si en dimoun pa get son semen ler i dray? (b) Ki danze i kapab annan si spirityelman nou pe ganny distrer?

SEKRETER divizyon transpor Leta-z-ini ti dir: “I deplizanpli komen ki bann drayver i fer lezot keksoz anmezir zot pe dray zot transpor, e o firamezir letan i pase, i vin pli pir.” Telefonn mobil i enn parmi bann keksoz ki kapab anpes bann dimoun konsantre letan zot pe dray. Plis ki en tyer bann dimoun ki ti ganny entervyou dan en serve ti dir ki zot in deza ganny tape oubyen pros pour ganny tape avek en transpor akoz son drayver ti lo telefonn. Bokou i krwar ki i pa en problenm pour fer detrwa keksoz anmezir en dimoun i dray, me son konsekans i kapab danzere.

² Pareyman, nou relasyon avek Zeova i kapab an danze. Zis parey en drayver ki ganny distrer i kapab pa reisi vwar en danze, en dimoun ki ganny distrer spirityelman i kapab fasilman met son lavi dan risk. Si nou ptitapti aret viv konman en Kretyen e aret fer bann keksoz spirityel,  nou pou perdi lafwa parey en bato ki’n rann lapel lo brizan. (1 Tim. 1:18, 19) Zapot Pol ti averti nou konsernan sa danze kan i ti averti son bann frer ek ser Kretyen Ronm. I ti dir: “Les nou preokipasyon ganny kontrole par natir imen i anmenn lanmor, me si nou les nou lespri ganny kontrole par Lespri, sa i anmenn lavi ek lape.” (Rom. 8:6) Ki Pol ti oule dir par sa? Ki mannyer nou kapab evite “les nou preokipasyon ganny kontrole par natir imen” e “les nou lespri ganny kontrole par Lespri [sen]”?

Zot “nepli annan okenn kondannasyon”

3, 4. (a) Ki lalit personnel Pol ti bezwen fer fas avek? (b) Akoz sityasyon Pol i merit enteres nou?

³ Dan son let pour bann Romen, Pol ti koz konsernan en lalit ant son lespri ek son lekor. (Lir Romen 7:21-23.) Pol pa ti pe esey zistifye son lekor oubyen rod leskiz konmsi i ti enposib pour li fer sa ki byen. Apre tou, i ti en Kretyen swazir matir e osi en “zapot pour bann pep non-Zwif.” (Rom. 1:1; 11:13) Alor, akoz Pol ti koz lo son lalit personnel?

⁴ Pol ti rekonnet ki lo li menm i pa ti pou kapab fer lavolonte Bondye parey i ti a voudre. Akoz? Parski “tou dimoun in fer pese e pa’n arive ganny laglwar Bondye.” (Rom. 3:23) Konman en desandans Adan, Pol ti enparfe e i ti annan sa tandans pour fer pese. Nou kapab konpran ki mannyer i ti santi akoz nou osi nou enparfe e tou le zour nou bezwen lalit avek nou bann move dezir. Deplis, i annan en kantite keksoz ki kapab distrer nou e fer nou sorti lo sa ‘semen difisil ki anmenn dan lavi.’ (Mat. 7:14) Kantmenm sa, Pol ti annan en lespwar e nou osi parey.

5. Kote Pol ti ganny led ek soulazman?

⁵ Pol ti ekrir: “Lekel ki pou delivre mwan . . . ? Gran mersi Bondye par Zezi-Kri nou Senyer!” (Rom. 7:24, 25) Apre sa, i ti koz avek sa bann “ki ini avek Kris-Zezi,” andotmo, bann Kretyen swazir. (Lir Romen 8:1, 2.) Atraver son lespri sen, Zeova in adopte zot konman son bann garson e i dir ki zot bann “zeritye ansanm avek Kris.” (Rom. 8:14-17) Lespri sen Bondye ek lafwa dan sakrifis Zezi i ed zot pour ranport laviktwar dan sa lalit ki Pol ti dekrir e dan sa fason zot “nepli annan okenn kondannasyon.” Zot ganny libere avek “lalwa pese ek lanmor.”

6. Akoz tou bann serviter Bondye i devret pran aker konsey Pol?

⁶ Pol ti pe adres bann Kretyen swazir, me sa ki i ti dir konsernan lespri sen Bondye ek sakrifis Zezi i aplik pour tou bann serviter Zeova, ki swa zot annan lespwar pour viv lo later ouswa dan lesyel. Menm si Pol ti’n ganny enspire pour donn sa konsey bann Kretyen swazir, i enportan ki tou bann serviter Bondye i konpran e fer zefor pour benefisye avek sa ki i ti ekrir.

Lafason ki Bondye ti “kondann pese dan natir imen”

7, 8. (a) Dan ki sans “natir imen ti rann lalwa feb”? (b) Ki Bondye in akonplir atraver son lespri sen ek sakrifis Zezi?

⁷ Dan Romen sapit 7, Pol ti montre ki lefe pese i annan lo nou lekor enparfe. Dan wityenm sapit, i ti fer komanter lo pwisans lespri sen. Zapot Pol ti eksplike ki mannyer lespri sen i kapab ed bann Kretyen dan zot lalit avek pese pour ki zot kapab viv an armoni avek lavolonte Zeova e ganny son laprouvasyon. Pol ti osi montre ki atraver lespri sen Bondye ek sakrifis son Garson, Bondye ti’n akonplir sa ki Lalwa Moiz pa ti kapab.

⁸ Bann komannman ki ti dan Lalwa ti kondann bann peser. Deplis, bann gran  pret Izrael ki ti pe servi anba Lalwa ti enparfe e pa ti kapab ofer en sakrifis ki ti pou fer pese disparet konpletman. Dan sa sans, “natir imen ti rann lalwa feb.” Me, “an anvoyan son prop Garson dan en natir parey natir pese” e ofer li konman en sakrifis, Bondye in “kondann pese dan natir imen,” andotmo i’n “fer sa ki lalwa pa ti kapab.” Akoz sa, bann Kretyen swazir i ganny konsidere konman drwat parski zot annan lafwa dan sakrifis Zezi. Zot “nepli viv selon [zot] prop natir, me selon Lespri.” (Lir Romen 8:3, 4.) Anfet, zot bezwen fer li fidelman ziska lafen zot lavi lo later pour ki zot kapab ganny “kouronn lavi.”​—Rev. 2:10.

9. Ki sa mo “lalwa” ki dan Romen 8:2 i vedir?

⁹ Apard ki “lalwa,” Pol ti osi koz lo “lalwa Lespri” ek “lalwa pese ek lanmor.” (Rom. 8:2) Ki sa bann lalwa? Sa mo “lalwa” ki ganny servi la pa pe refer avek serten lareg parey i ti le ka dan Lalwa Moiz. En spesyalis Labib i dir ki sa mo Grek ki’n ganny tradwir “lalwa” dan sa konteks pe refer avek en keksoz ki byen ouswa ki mal ki pous dimoun pour azir konmsi i ti en lalwa. I osiz kapab refer avek en prensip ki diriz zot lavi.

10. Dan ki fason nou anba lotorite lalwa pese ek lanmor?

¹⁰ Zapot Pol ti ekrir: “Pese in antre dan lemonn par en sel zonm, e pese in anmenn lanmor, e lanmor in pas avek tou dimoun, parski tou dimoun in konmet pese.” (Rom. 5:12) Nou bann desandans Adan e pour sa rezon nou tou nou anba lalwa pese ek lanmor. Nou lenperfeksyon i toultan pous nou pour fer bann keksoz ki Zeova pa kontan ki anmenn ver lanmor. Dan son let pour bann Galat, Pol ti koz lo bann move tre ek aksyon konman “bann aktivite natir imen.” I ti azoute: “Bann ki pratik sa bann keksoz koumsa pa pou erit Rwayonm Bondye.” (Gal. 5:19-21) Sa bann dimoun ki Pol ti koz lo la i sanmenm sa bann ki pe “viv selon [zot] prop natir.” (Rom. 8:4) Zot fer zis sa ki zot lenperfeksyon i motiv zot pour fer. Me, eski zis bann ki pratik limoralite seksyel, ador zidol e pratik bann keksoz demonyak ouswa fer lezot pese grav ankor ki pe viv selon zot prop natir enparfe? Non, parski bann aktivite natir imen i osi enplik bann move laspe dan nou personnalite parey divizyon, zalouzi, pran lakoler, dispit ek groker. Eski  i annan en dimoun ki kapab dir ki i nepli viv selon son prop natir enparfe?

11, 12. Ki Zeova in fer pour ed nou sorti anba lalwa pese ek lanmor, e ki nou bezwen fer pour ganny faver Bondye?

¹¹ Pa nou vreman kontan ki Zeova in fer li posib pour nou kapab sorti anba lalwa pese ek lanmor! Zezi ti dir: “Parski Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.” Kan nou les Bondye demontre son lanmour anver nou e nou demontre lafwa dan sakrifis Zezi Kri, nou kapab ganny libere avek sa kondannasyon ki nou’n erite akoz pese. (Zan 3:16-18) Alor, parey Pol, nou kapab ganny pouse pour nou dir: “Gran mersi Bondye par Zezi-Kri nou Senyer!”

¹² Nou sityasyon i preski parey ki si nou’n ganny geri avek en maladi grav. Si nou anvi byen rekipere, nou bezwen fer sa ki dokter i dir nou. Menm si demontre lafwa dan sakrifis Zezi i kapab liber nou avek lalwa pese ek lanmor, nou kontinyen reste enparfe e fer pese. Nou bezwen fer lezot keksoz osi pour arive annan en bon lasante spirityel e annan faver Bondye ek son benediksyon. An rapor avek “bann egzizans lalwa,” Pol ti osi koz konsernan viv selon lespri.

Konman pour viv selon lespri?

13. Ki savedir mars oubyen viv selon lespri?

¹³ “Viv selon lespri,” oubyen dapre langaz Grek “mars selon lespri” i donn lide en dimoun ki pe marse oubyen ki al dan en serten direksyon ouswa destinasyon. Savedir, en dimoun ki pe viv oubyen mars dapre lespri pe progrese spirityelman, me i pa vedir ki i parfe. (1 Tim. 4:15) Zour apre zour, nou devret fer nou mye pour nou viv selon lespri, andotmo, viv annakor avek gidans ki lespri sen i donn nou. Nou pou ganny laprouvasyon Bondye ler nou “les Lespri diriz [nou] lavi.”​—Gal. 5:16.

14. Ki tandans bann dimoun ki ‘viv selon zot natir’ i annan?

¹⁴ Dan son let pour bann Romen Pol i koz lo de group dimoun, sakenn i annan son fason panse. (Lir Romen 8:5.) Sa lekspresyon “natir” imen ki Pol ti pe koz lo la i reprezant leta enparfe e peser ki nou ladan. Sa i fer ki i annan en lalit ant nou natir enparfe ek nou lespri. Pol ti lalit avek son lenperfeksyon, me bann ki “viv selon zot prop  natir” pa pe fer okenn zefor pour zot lalit. Olye pran an konsiderasyon sa ki Zeova i ekspekte avek zot e aksepte led ki i fourni, “zot sel preokipasyon i sa ki zot natir i demann zot.” Laplipar di tan, zot zis pe mazin satisfer dezir zot natir imen, andotmo zot bann dezir fizik. De lot kote, bann ki “viv selon Lespri zot preokipasyon i ganny kontrole par sa ki Lespri i demande” setadir bann keksoz spirityel ek nou servis pour Zeova.

15, 16. (a) Ki lefe sa ki nou preokip nou avek i kapab annan lo nou leta lespri? (b) Ki nou kapab dir lo sa ki dimoun i preokip zot avek denozour?

¹⁵ Lir Romen 8:6. Pour nou fer en keksoz, ki swa i bon oubyen i move, nou bezwen preokip nou avek sa keksoz, andotmo, konsantre lo la. Dimoun ki tou lazournen pe preokip zot avek bann keksoz zot natir enparfe, pa pou tarde pour devlop en move fason panse ouswa dezir pour sa bann move keksoz. Zot telman preokipe avek sa bann keksoz ki zot santiman, lentere e sa ki zot kontan i ganny afekte par sa bann keksoz.

¹⁶ Kwa ki preokip bokou dimoun ozordi? Zapot Zan ti ekrir: “Tou sa ki dan lemonn: dezir natir imen, dezir atraver nou lizye ek lorgey dan lavi toulezour, tousala pa sorti kot nou Papa me i sorti dan lemonn.” (1 Zan 2:16) Sa bann dezir i enplik en lavi dezordonnen, pozisyon dan lasosyete ek posesyon materyel. Bann liv, magazin, zournal, film, progranm televizyon ek Internet i ranpli avek sa bann keksoz degoutan, sirtou akoz sanmenm sa ki bann dimoun pe rode e ki pe preokip zot. Me, “les nou preokipasyon ganny kontrole par natir imen i anmenn lanmor,” savedir, i kapab gat nou relasyon avek Bondye la konmela e a lavenir anmenn lanmor. Akoz? “Si en dimoun i les li ganny kontrole par son natir imen i vin lennmi Bondye, parski i pa soumet li avek lalwa Bondye e i enkapab fer li; e bann ki anba kontrol son prop natir pa kapab fer plezir Bondye.”​—Rom. 8:7, 8.

17, 18. Ki mannyer nou kapab reste konsantre lo bann keksoz ki relye avek lespri e ki i pou arive si nou fer li?

¹⁷ De lot kote, letan nou “les nou lespri ganny kontrole par Lespri, sa i anmenn lavi ek lape,” setadir lavi eternel a lavenir ensi ki lape lespri ek lape avek Bondye. Ki mannyer nou kapab “les nou lespri ganny kontrole par Lespri” sen? Ler nou reste konsantre lo bann keksoz ki annan pour fer avek lespri sen, e devlop en leta lespri ek latitid spirityel. Si nou fer sa, se konmsi nou pe “soumet [nou lespri] avek lalwa Bondye” e nou pans parey li i panse. Kan nou fer fas avek tantasyon, nou pou konnen ki pour fer. Nou pou fer sa bon swa, sa enn ki annakor avek lespri sen.

¹⁸ Pour sa rezon, i vreman enportan ki nou konsantre lo bann keksoz ki relye avek lespri sen. Nou fer sa kan nou ‘gard nou lespri touzour alert,’ par organiz nou lavi pour fer bann keksoz spirityel parey lapriyer, lektir Labib ek letid, asiste renyon e prese. (1 Pyer 1:13) Olye les bann preokipasyon lespri distrer nou, annou konsantre lo bann keksoz ki annakor avek lespri sen. Dan sa fason, nou pou viv selon lespri. Si nou fer sa, nou pou ganny bokou benediksyon, akoz viv selon lespri i “anmenn lavi ek lape.”​—Gal. 6:7, 8.

Eski ou kapab eksplike?

• Kwa ki ‘lalwa pa ti kapab fer’ e ki Bondye ti fer pour sirmont sa?

• Ki si sa “lalwa pese ek lanmor” e ki mannyer nou nepli anba son lotorite?

• Ki nou devret fer pour “les nou lespri ganny kontrole par Lespri” sen?

[Kestyon]

[Portre lo paz 16]

Eski ou viv selon natir imen ouswa selon lespri?