2 Bondye pa enterese avek nou—Eski i vre?
2 Bondye pa enterese avek nou—Eski i vre?
Sa ki petet ou’n tande: “Si Bondye ti enterese avek limanite, i ti pou’n retir tou lemal ek soufrans dan lemonn. Menm si petet i enterese avek bann dimoun an zeneral, an tou ka, i pa enterese avek mwan.”
Ki Labib i dir: Pa Zeova ki responsab lemal. (Zak 1:13) Menm si i kapab elimin lemal nenport ki ler, i pe les bann move dimoun egziste pour ki serten kestyon ki ti ganny souleve o konmansman limanite i ganny reponn. I pou finalman delivre bann imen e retir tou lemal ki sa bann ki rezet son lotorite in fer.—Zenez 3:1-6; Izai 65:17. *
Bondye pa zis enterese avek bann imen an zeneral, me i osi demontre en gran lentere pour sakenn ant nou konman bann endividi. Matye 10:29-31 i montre nou ki i konn serten keksoz lo nou ki nou menm nou pa konnen: “Eski de pti sren pa i vann pour en sou? Me en sel pa tonm ater san [“ki zot Papa i konnen,” NW]. Me menm, bann bren seve lo zot latet in konte. Alor pa bezwen per, zot vo bokou plis ki en kantite sren!”
Konn laverite i kapab ed ou: Labitid nou tant pour evit bann dimoun ki brit ouswa ki pa enterese avek nou. I pa drol ki sa mansonz konmkwa Bondye pa enterese avek nou in fer bokou dimoun pa fatig zot pour rod li ouswa zot apros li zis ler zot santi ki zot napa okenn swa. Ler nou realize ki Zeova i vreman enterese avek nou, sa i kapab fer nou anvi konn plis lo li e devlop en lanmitye avek li.
Par egzanp, petet ou’n priy Bondye me ou’n demann ou lekor si i’n ekout ou ouswa si i pou reponn ou lapriyer. Labib i asir nou ki sa Enn “ki ekout lapriyer” i toultan pare pour kominik avek nenport ki ki apros li avek senserite.—Psonm 65:2.
Bondye i envit ou pour ‘desarz tou ou sousi lo li, parski li menm ki pran swen avek ou.’ (1 Pyer 5:7) Menm dan bann moman vreman vreman difisil, nou kapab depan lo Bondye akoz i enterese avek nou. Anfet, son Parol i dir: “Zeova i pre avek sa bann ki annan leker brize; e i sov bann ki zot lespri i fatige.”—Psonm 34:18.
[Not anba lo paz]
^ par. 3 Pour plis lenformasyon konsernan akoz Bondye i les nou soufer, vwar sapit 11 dan liv Ki Labib i vreman dir?
[Ekstre lo paz 5]
Si Bondye pa enterese avek nou, akoz i envit nou pour priy avek li?
