Apros avek Bondye

“Ou pou vreman anvi”

I FERMAL pour vwar en dimoun ki nou kontan soufer e mor. I normal pour nou sagren kan sa i arive. Par kont, i rekonfortan pour konnen ki nou Kreater, Zeova i konpran konman nou santi. An plis ki sa, i anvi servi son gran pouvwar pour redonn lavi bann ki’n mor. Remark sa lespwar ki Zob ti koz lo la ki’n ganny rikorde dan Zob 14:13-15.

Egzamin konteks sa bann verse. Zob, en zonm ki ti annan en lafwa ekstraordiner ti fer fas avek en kantite leprev. I ti perdi tou son bann byen materyel, tou son bann zanfan ki i ti byen kontan dan lanmor e i ti ganny en maladi ki ti vreman fermal. Dan son douler i ti dir avek Bondye: “A! Si ou kasyet mwan dan Seol [latonm bann imen an zeneral]!” (Verse 13) Pour Zob, Seol ti sa sel landrwa kot i ti pou ganny soulaze avek son bann soufrans. Laba, i ti pou parey en trezor ki Bondye ti’n kasyet kot i ti pou nepli pas dan okenn difikilte ek douler. *

Eski Zob pou reste dan Seol pour touzour? Zob pa ti krwar sa. I ti kontinyen dir dan son lapriyer: “A! . . . si ou fikse en letan pour mwan e mazin mwan!” Avek konfyans, Zob ti annan lespwar ki i ti pou reste dan Seol pour zis en pe letan e ki Zeova pa ti pou oubliy li. Zob ti konpar sa letan ki i ti pou pase dan Seol konman en “korve,” setadir en peryod letan kot i ti pou napa swa me zis espere. Me pour konbyen letan? I ti dir: “Ziska mon soulazman i arive.” (Verse 14) Sa soulazman i vedir kan i pou sorti dan Seol, andotmo kan i pou ganny resisite!

Akoz Zob ti annan lasirans ki i ti pou ganny sa soulazman? I ti konnen ki mannyer nou Kreater ki annan bokou lanmour i santi anver Son bann serviter fidel ki’n mor. I ti dir: “Ou pou apel mwan, e mon pou reponn ou. Ou pou vreman anvi vwar travay ou lanmen.” (Verse 15) Zob ti rekonnet ki i ti’n ganny fer par Bondye. Sa Enn ki donn lavi e ki ti responsab pour devlopman Zob dan matris son manman, i sertennman kapab redonn li lavi apre ki i’n mor.​—Zob 10:8, 9; 31:15.

Parol Zob i ansenny nou en leson lo sa gran konpasyon ki Zeova i annan: I annan en latasman spesyal avek tou bann, parey Zob, ki met zot lavi dan son lanmen e les li moul e form zot pour vin sa dimoun ki fer li bokou plezir. (Izai 64:8) Bann adorater fidel i annan bokou valer dan lizye Zeova. I “vreman anvi” redonn lavi tou bann ki’n reste fidel anver li ziska lanmor. En profeser Labib ti alor dir ki sa term dan langaz Ebre i “san okenn dout enn parmi bann lekspresyon ki pli for pour eksprim en gran dezir.” Wi, Zeova pa zis rapel son bann adorater me i osi annan en gran dezir pour redonn zot lavi.

Erezman, Zeova in vwar li neseser pour fer nou konn son plan pour resisit bann dimoun mor dan liv Zob, enn parmi bann premye liv Labib pour ganny ekrir. * I anvi ki nou revwar bann dimoun ki nou ti kontan ki nou’n perdi dan lanmor. Sa panse i kapab fer li pli fasil pour fer fas avek en lanmor. Akoz ou pa aprann plis lo sa Bondye ki ranpli avek lanmour e lo ki mannyer ou kapab les li moul ou pour vin enn sa bann dimoun ki pou vwar Son plan vin en realite?

[Not anba lo paz]