Aprann avek Parol Bondye

Lekel Zezi Kri?

Sa lartik i soulev bann kestyon ki petet ou’n deza demande e i montre kote ou kapab trouv larepons sa bann kestyon dan ou Labib. I pou en plezir pour Temwen Zeova ed ou pour trouv larepons sa bann kestyon.

1. Lekel Zezi Kri?

Kontrerman avek lezot imen, Zezi ti pe viv konman en lespri dan lesyel avan ki i ti ne konman en imen lo later. (Zan 8:23) I ti premye kreasyon Bondye e i ti donn lanmen kree tou lezot keksoz. Zis li tousel ki’n ganny kree direkteman par Zeova e i pour sa rezon ki i ganny apele “sel Garson” Bondye. Zezi ti Portparol Bondye e alor i osi ganny apele “Laparol.”​—Zan 1:1-3, 14; lir Proverb 8:22, 23, 30; Kolosyen 1:15, 16.

2. Akoz Zezi ti vin lo later?

Bondye ti anvoy son Garson ki ti dan lesyel lo later par transfer son lavi dan vant en vyerz Zwif ki ti apel Mari. Alor, papa Zezi pa ti en imen. (Lik 1:30-35) Zezi ti vin lo later (1) pour ansenny nou laverite lo Bondye, (2) pour kit en legzanp lo ki mannyer pour fer lavolonte Bondye e (3) pour donn son lavi parfe konman “pri [oubyen “ranson,” NW] pour liberasyon bokou dimoun.”​—Lir Matye 20:28; Zan 18:37.

3. Akoz nou bezwen en ranson?

En ranson i sa pri ki ganny peye pour liber en dimoun. Lanmor ek lavyeyes pa ti dan plan Bondye pour limanite. Ki mannyer nou konn sa? Bondye ti dir avek Adan, sa premye zonm, ki si i fer sa ki Labib i apel pese i pou mor. Si Adan pa ti fer pese, i pa ti pou zanmen mor. Menm si Adan ti kontinyen viv pour plizyer syek, i ti konmans mor depi sa zour ki i ti dezobeir Bondye. (Zenez 2:16, 17; 5:5) Adan ti pas pese ek santans lanmor avek tou son desandans. Alor lanmor in “antre” dan lemonn par Adan. Se pour sa rezon ki nou bezwen en ranson.​—Lir Romen 5:12; 6:23.

  4. Akoz Zezi ti mor?

Lekel ki ti kapab pey sa ranson pour liber nou avek lanmor? Ler nou mor, nou pey santans pour zis nou pese. Napa okenn imen ki kapab pey pese en lot dimoun.​—Lir Psonm 49:7-9.

Lefet ki papa Zezi pa ti en imen, i pa ti erit lenperfeksyon e alor i pa ti mor akoz son prop pese me akoz pese lezot. Bondye in demontre Son lanmour ekstraordiner pour limanite par anvoy son Garson pour mor pour nou. Zezi osi ti demontre lanmour pour nou par obeir son Papa e donn son lavi pour nou pese.​—Lir Zan 3:16; Romen 5:18, 19.

5. Ki Zezi pe fer aprezan?

Kan Zezi ti geri bann malad, resisit bann mor e donn son lavi pour sov bann dimoun dan pese ek lanmor, i ti demontre sa ki i pou fer dan lavenir pour tou imen obeisan. (Lik 18:35-42; Zan 5:28, 29) Apre ki Zezi ti mor, Bondye ti resisit li konman en lespri. (1 Pyer 3:18) Apre sa, Zezi ti espere lo kote drwat Bondye ziska ki Zeova ti donn li pouvwar konman Lerwa lo later. (Ebre 10:12, 13) Aprezan Zezi pe dirize konman Lerwa dan lesyel e son bann disip lo later pe anons sa bon nouvel dan lemonn antye.​—Lir Danyel 7:13, 14; Matye 24:14.

Byento, Zezi pou servi son pouvwar konman Lerwa pour elimin tou soufrans ek bann dimoun ki fer lezot soufer. Plizyer milyon dimoun ki annan lafwa dan Zezi e ki obeir li pou rezwir lavi dan paradi lo later.​—Lir Psonm 37:9-11.

Pour plis lenformasyon, vwar sapit 4 dan liv Ki Labib i vreman dir? pibliye par Temwen Zeova.

[Portre lo paz 11]

Plizyer milyon dimoun ki annan lafwa dan Zezi e ki obeir li pou rezwir lavi dan paradi lo later