Eski ou pe les lespri sen Bondye gid ou?

“Ou lespri sen i bon; ki i gid mwan dan pei ladrwatir.”​—PS. 143:10.

1, 2. (a) Nonm serten moman kot Zeova ti servi son lespri sen pour ed son bann serviter. (b) Eski lespri sen i azir zis dan bann moman spesyal? Eksplike.

KWA ki vin dan ou lespri ler ou mazin aksyon lespri sen? Eski ou vwar sa senn dan ou lespri kot Gideonn ek Sanmson ti fer bann keksoz ekstraordiner? (Ziz 6:33, 34; 15:14, 15) Petet ou mazin lardyes ki bann premye Kretyen ti annan oubyen Etyenn ler i ti reste kalm devan Sannedren. (Akt 4:31; 6:15) Me ki nou pou dir dan nou letan lo sa lazwa ki egziste dan nou bann lasanble enternasyonal, lentegrite nou bann frer ki ganny anprizonnen akoz zot pa pran kote dan bann zafer sa lemonn e sa logmantasyon remarkab dan travay predikasyon? Tou sa bann legzanp i donn levidans aksyon lespri sen.

² Eski lespri sen i azir zis dan bann moman spesyal oubyen bann sirkonstans ekstraordiner? Non. Parski Parol Bondye i dir ki bann Kretyen i “mars dapre lespri,” “les Lespri diriz zot lavi” e “viv par Lespri.” (Gal. 5:16, NW, 18, 25) Sa bann lekspresyon i endike ki lespri sen i toultan kapab enfliyans nou lavi. Sak zour, nou devret enplor Zeova pour gid nou panse, nou parol ek aksyon atraver son lespri sen. (Lir Psonm 143:10. *) Si nou les lespri sen enfliyans nou, i pou fer nou raport fri ki rekonfort lezot e anmenn laglwar pour Bondye.

3. (a) Akoz nou bezwen les lespri sen gid nou? (b) Ki kestyon nou pou egzaminen aprezan?

³ Akoz i enportan pour les lespri sen gid nou? Parski i annan en lot lafors ki anvi kontrol nou, en lafors ki opoz aksyon lespri sen. Labib i servi sa lekspresyon “natir imen” pour dekrir sa lafors oubyen tandans ki nou annan pour fer pese akoz lenperfeksyon ki nou’n erite konman bann desandans Adan. (Lir Galat 5:17.) Alor, ki mannyer nou kapab les lespri sen Bondye gid nou? Eski i annan serten keksoz ki nou kapab fer pour lalit avek nou tandans pour fer pese? Annou egzamin sa bann kestyon anmezir ki nou koz lo sa sis lezot laspe “fri Lespri,” ki “pasyans, [“fer dibyen lezot,” NW], labonte, [“lafwa,” NW], ladouser, kontrol lo son prop lekor.”​—Gal. 5:22, 23.

Ladouser ek pasyans i promot lape dan kongregasyon

4. Ki mannyer ladouser ek pasyans i kontribye pour ki i annan lape dan kongregasyon?

⁴ Lir Kolosyen 3:12, 13. Ladouser ek pasyans i mars ansanm pour promot lape dan kongregasyon. Sa de laspe fri lespri i ed nou pour tret lezot byen, reste kalm ler serten i provok nou e pa rann laparey ler lezot i dir oubyen fer bann move keksoz kont nou. Si nou annan en problenm avek en konpanyon Kretyen, pasyans pou ed nou kontinyen fer tou sa ki nou kapab pour reetablir lape avek nou frer oubyen ser. Eski i vreman neseser pour demontre ladouser ek pasyans dan kongregasyon? Wi, akoz nou tou nou enparfe.

5. Ki ti arive ant Pol ek Barnabas e ki sa i montre?

⁵ Annou egzamin sa ki ti arive ant Pol ek Barnabas. Zot ti’n travay avek kanmarad pour plizyer lannen pour propaz sa bon nouvel. Zot tou le de zot ti annan bann kalite  egzanpler. Me en fwa, zot ti ganny “en largiman byen serye ki ti fer zot separe.” (Akt 15:36-39) Sa lensidan i montre ki menm parmi bann serviter Bondye ki devoue, i pou arive parfwa kot zot pa pou tonm dakor avek kanmarad. Si en Kretyen i annan en problenm avek en lot, ki i kapab fer pour evite ki sa sityasyon i vin pli pir e fini par en gro dispit ki kapab andomaz en kantite sa relasyon?

6, 7. (a) Ki konsey Labib nou kapab swiv avan ki en gro dispit i leve avek en konpanyon Kretyen? (b) Ki byenfe nou gannyen ler nou ‘pare pour ekoute, pran letan avan koze, avan pran lakoler’?

⁶ I paret ki sa “largiman byen serye” ant Pol ek Barnabas ti en gro dispit kot zot ti pran lakoler en sel kou. Si en Kretyen i santi son lakoler pe monte ler i pe diskit en keksoz avek en lot, i saz pour li swiv sa konsey dan Zak 1:19, 20: “Tou dimoun i devre pare pou ekoute, me pran letan avan koze, avan pran lakoler. Parski lakoler en dimoun pa realiz plan lazistis Bondye.” Depandan lo sirkonstans, i kapab esey sanz topik konversasyon, anvoy sa konversasyon pour pli tar, oubyen dan en fason poli, ale avan ki en gro dispit i leve.​—Prov. 12:16; 17:14; 29:11.

⁷ Ki byenfe i annan pour swiv sa konsey? Si en Kretyen i pran letan pour kalme son lakoler, priy lo sa sityasyon e reflesir lo sa pli bon fason pour reponn, i pou les lespri sen Bondye gid li. (Prov. 15:1, 28) Lespri sen pou ed li demontre ladouser ek pasyans. Alor i pou pare pour swiv sa konsey dan Efezyen 4:26, 29: “Si zot pran lakoler fer atansyon pour zot pa tonm dan pese . . . Pa les bann move parol sorti dan zot labous, me koz zis bann parol itil ki kapab ed lezot pour progrese dan zot lafwa e kan i neseser pour fer dibyen sa ki ekoute.” An realite, ler nou demontre ladouser ek pasyans, nou kontribye anver lape ek linite dan kongregasyon.

Fer dibyen e demontre labonte pou batir ou fanmir

8, 9. Ki i enplike dan sa de laspe, fer dibyen lezot e demontre labonte e ki lefe i annan dan en lakour?

⁸ Lir Efezyen 4:31, 32; 5:8, 9. Kan nou fer dibyen lezot e demontre labonte, sa i annan en bon lefe lo lezot zis parey en pti labriz oubyen en ver delo byen fre ki rafresi nou ler i fer so. Ler nou demontre sa de kalite dan fanmir, sa i kontribye pour ki i annan en bon latmosfer. Fer dibyen lezot i en keksoz atiran, i ganny demontre par lentere senser ki nou annan dan lezot ler nou ed zot ouswa dir zot bann parol rekonfortan. Labonte i osi en kalite pozitif ki ganny demontre par  bann aksyon pratik ki benefisye lezot. Par egzanp, i evidan kan en dimoun i zenere. (Akt 9:36, 39; 16:14, 15) Me demontre labonte i enplik pli ki sa.

⁹ Labonte i vedir ler en keksoz i byen moralman. I pa enplik zis sa ki nou fer, me pli enportan ankor, sa ki nou ete. Zis mazin en manman ki pe prepar fri pour son fanmir, anmezir ki i koup zot an morso i gete si zot dou, mir e napa okenn bout pouri anndan oubyen deor. Pareyman, labonte ki lespri sen i prodwir i annan lefe lo en Kretyen dan tou laspe son lavi.

10. Ki bann manm fanmir i kapab fer pour devlop fri lespri?

¹⁰ Kwa ki kapab ed bann manm fanmir pour tret kanmarad avek labonte e fer zot dibyen? Konnesans egzakt lo Parol Bondye i zwe en rol enportan. (Kol. 3:9, 10) Serten sef fanmir i enkli etidye fri lespri pandan Ladorasyon an fanmir sak semenn. I pa difisil pour fer sa. Par servi bann zouti pour fer resers ki egziste dan ou langaz, ou kapab swazir bann lenformasyon lo sak laspe fri lespri. Ou kapab egzamin zis detrwa paragraf sak semenn, e pran plizyer semenn pour get sak laspe. Anmezir ki ou etidye sa lenformasyon, lir e diskit lo bann verse ki’n ganny mete konman referans. Rod bann loportinite pour aplik sa ki ou’n aprann e priye pour ki Zeova i beni ou zefor. (1 Tim. 4:15; 1 Zan 5:14, 15) Eski en tel letid i vreman kapab annan en lefe dan lafason ki bann manm fanmir i tret kanmarad?

11, 12. Ki byenfe de koup Kretyen ti gannyen lefet ki zot ti etidye fri lespri?

¹¹ En zenn koup ki ti oule reisi dan zot lavi maryaz ti deside pour etidye fri lespri o profon. Ki byenfe zot ti gannyen? Sa madanm i dir: “Lefet ki mon ti aprann ki fer dibyen lezot i enplik fidelite e osi lwayote, sa in anmenn en diferans dan lafason ki nou tret kanmarad ziska ozordi. Nou’n aprann pour pare pour sede e pardonnen. I ed mwan pour aprann dir ‘mersi’ e ‘eskiz mwan’ kan i neseser.”

¹² En lot koup Kretyen ki ti eksperyans bann problenm dan zot lavi maryaz ti realize ki zot ti napa labitid fer dibyen kanmarad. Zot ti deside pour etidye lo sa size ansanm. Ki rezilta sa ti anmennen? Sa msye i dir: “Nou letid ti ed nou pour pa ziz motivasyon kanmarad, me plito pour rod sa ki bon dan kanmarad. Nou ti konmans fer plis  pour konble bezwen nou tou le de. Pour azir dan en fason zantiy avek mon madanm, mon ti ankouraz li pour eksprim li fransman, san ki mon ofanse akoz sa ki i ti dir mwan. Pour arive fer sa, mon ti bezwen anval mon lorgey. Anmezir ki nou ti konmans aplik sa ki nou’n aprann dan nou maryaz, ptitapti nou ti rezet sa labitid pour zistifye nou lekor. Sa ti anmenn en gran sanzman dan nou lavi.” Eski ou fanmir ti pou kapab benefisye si zot ti etidye fri lespri?

Demontre lafwa an prive

13. Kont ki danze nou bezwen protez nou spirityalite?

¹³ Bann Kretyen i bezwen les lespri sen gid zot dan zot lavi prive e an piblik osi. I annan bokou plis portre ek divertisman degradan dan lemonn Satan ozordi. Sa i kapab vin en danze pour nou spirityalite. Ki en Kretyen i bezwen fer? Parol Bondye i donn nou sa konsey: “Rezet tou bann salte dan zot lavi e tou bann move mannyer viv. Aksepte avek douser laparol ki Bondye i’n plant dan ou leker, e ki kapab sov ou.” (Zak 1:21) Annou vwar ki mannyer lafwa, en lot laspe fri lespri i kapab ed nou pour reste pir devan Zeova.

14. Si nou lafwa i feb, ki mannyer sa i kapab fer nou fer sa ki mal?

¹⁴ Si nou annan vre lafwa savedir nou krwar ki Zeova i reel pour nou. Si Bondye pa reel pour nou, i pou fasil pour nou fer sa ki mal. Annou vwar sa ki ti arive avek pep Bondye dan letan pase. Zeova ti revel avek profet Ezekyel ki i ti annan bann keksoz detestab ki ti pe ganny fer an kasyet. I ti dir: “O garson zonm, eski ou’n vwar sa ki bann aze parmi pep Izrael pe fer dan fernwanr, sakenn dan son lasanm dekore avek stati? Zot pe dir, ‘Zeova pa vwar nou. Zeova in kit pei.’” (Ezek. 8:12) Eski ou remarke kwa ki’n fer sa problenm leve? Zot pa ti krwar ki Zeova ti okouran sa ki zot ti pe fer. Zeova pa ti reel pour zot.

15. Ki mannyer en lafwa for dan Zeova i kapab protez nou?

¹⁵ De lot kote, annou vwar legzanp Zozef. Menm si i ti lwen avek son fanmir ek son pep, Zozef ti refize komet adilter avek madanm Potifar. Akoz? I ti dir: “Ki mannyer mon kapab fer sa gran keksoz mal e vreman fer pese kont Bondye?” (Zen. 39:7-9) Wi, Zeova ti reel pour li. Si Bondye i reel pour nou, nou pa pou get bann divertisman imoral oubyen fer okenn keksoz an kasyet ki nou konnen pa pou fer li plezir. Nou determinen pour fer parey sa psalmis ki ti sante: “Mon pou mars avek en leker san defo dan mon lakaz. Mon pa pou met devan mon lizye  okenn keksoz ki pa vo nanryen.”​—Ps. 101:2, 3.

Protez ou leker par annan kontrol lo ou lekor

16, 17. (a) Parey i’n ganny dekrir dan liv Proverb, ki mannyer “en zenn onm ki napa bon motivasyon” ti tonm dan pese? (b) Parey sa portre lo paz 30 i montre, ki mannyer en keksoz parey i kapab arive ozordi, nenport ki laz nou annan?

¹⁶ Kontrol lo nou lekor, sa dernyen laspe fri lespri i ed nou pour rezet bann keksoz ki Bondye i defann. I kapab ed nou pour protez nou leker. (Prov. 4:23) Annou egzamin sa resi dan Proverb 7:6-23 ki dekrir ki mannyer “en zenn onm ki napa bon motivasyon” ti tonm dan pyez en prostitye. I ti tonm dan son latrap akoz i ti “pe mars dan semen pros o bor semen sa madanm.” Petet i ti pas dan sa zanmirant zis par kiryozite. Me i pa ti tarde pour tonm dan en pyez bet ki ti’n kapab “met son lavi an danze.”

¹⁷ Ki mannyer sa zenn onm ti’n kapab evit sa gro fot? Par swiv sa konsey: “Pa pas dan son semen.” (Prov. 7:25) I annan en leson pour nou: Si nou anvi ki lespri sen Bondye i gid nou, nou bezwen evite met nou lekor dan bann sityasyon kot nou kapab ganny tante. En dimoun ki toultan pas son letan zis pe sanz progranm televizyon oubyen get get lo Internet pe swiv move semen sa “zenn onm ki napa bon motivasyon.” Ki swa i fer li par ekspre ouswa non, i kapab san ekspekte tonm lo bann portre ki pou fer li devlop bann dezir seksyel imoral. Ptitapti i kapab devlop sa move labitid pour get pornografi ki pou finalman annan en move lefe lo son konsyans ek son relasyon avek Bondye. Sa i kapab kout li son lavi.​—Lir Romen 8:5-8.

18. Ki prekosyon en Kretyen i kapab pran pour protez son leker e ki mannyer sa i enplik annan kontrol lo nou lekor?

¹⁸ An realite, nou kapab e devret annan kontrol lo nou lekor par azir vitman si nou tonm lo en portre endesan. Me, pa i pou pli meyer evit sa sityasyon! (Prov. 22:3) I demann kontrol lo nou lekor pour pran bann prekosyon apropriye e swiv zot. Par egzanp, i pou en proteksyon, si nou met konpiter dan en landrwa kot lezot i kapab vwar. Serten in vwar li pli byen pour servi konpiter oubyen televizyon zis ler lezot i la. Lezot in deside pour pa ganny akse avek Internet. (Lir Matye 5:27-30.) Annou pran tou prekosyon neseser pour protez nou lekor ek nou fanmir pour ki nou kapab ador Zeova avek “en leker pir, en bonn konsyans ek en lafwa senser.”​—1 Tim. 1:5.

19. Ki byenfe nou gannyen ler nou les lespri sen gid nou?

¹⁹ Fri lespri ki ganny prodwir atraver lespri sen i anmenn en kantite byenfe. Ladouser ek pasyans i fer annan lape dan kongregasyon. Kan nou fer dibyen lezot e demontre labonte, sa i anmenn boner dan fanmir. Lafwa ek kontrol lo nou lekor i ed nou pour reste pros avek Zeova e pir devan li. Deplis, Galat 6:8 i donn nou sa lasirans: “Me si i senm sa ki fer plezir Lespri, i pou rekolte sorti kot Lespri, lavi eternel.” Wi, par mwayen sakrifis Zezi, Zeova pou servi lespri sen pour donn lavi eternel bann ki les zot ganny gide par lespri sen.

[Not anba lo paz]

Ki ou pou reponn?

• Ki mannyer ladouser ek pasyans i promot lape dan kongregasyon?

• Kwa ki kapab ed bann Kretyen pour demontre labonte e fer dibyen lezot kot lakour?

• Ki mannyer lafwa ek kontrol lo nou lekor i kapab ed en Kretyen pour protez son leker?

[Kestyon]

[Portre lo paz 28]

Ki mannyer ou kapab evit en gro diskisyon?

[Portre lo paz 29]

Etidye fri lespri i kapab anmenn byenfe pour ou fanmir

[Portre lo paz 30]

Ki danze nou evite kan nou demontre lafwa ek kontrol lo nou lekor?