Sant pour Zeova!
Sant pour Zeova!
“Mon anvi loue mon Bondye osi lontan ki mon ankor la.”—PS. 146:2.
1. Kwa ki ti motiv David sa zennonm pour konpoz serten son bann psonm?
LER i ti ankor en zennonm, David ti pas bokou letan dan lakanpanny o bor Betleenm pour vey mouton son papa. Anmezir i ti vey mouton, David ti kapab obzerv bann mervey dan kreasyon Zeova, parey lesyel ranpli avek zetwal, “zannimo sovaz” ek “bann zwazo lesyel.” Sa ki i ti vwar ti telman annan en lefe lo li, ki finalman i ti ganny pouse pour konpoz bann kantik tousan pour loue sa enn ki’n kree sa bann zoli keksoz. Bokou parmi bann kantik ki David ti konpoze i kapab ganny trouve dan liv Psonm. *—Lir Psonm 8:3, 4, 7-9. *
2. (a) Ki lefe lanmizik i annan lo en dimoun? Donn en legzanp. (b) Ki nou kapab aprann konsernan relasyon ant David ek Zeova dan Psonm 34:7, 8 ek Psonm 139:2-8?
2 I tre probab ki i ti dan sanmenm sa letan dan lavi David kot i ti devlop pli byen son bann talan konman en mizisyen. Anfet, i ti sitan talante dan lanmizik ki i ti ganny envite pour zwe larp pour Lerwa Sail. (Prov. 22:29) Zis parey lefe ki bann bon lanmizik i annan lo bann dimoun denozour, sa lanmizik ki David ti zwe ti annan en bon lefe lo sa lerwa ki ti trouble en kantite. Nenport ler ki David ti pran son lenstriman lanmizik, “sa ti soulaz Sail e tou ti al byen pour li.” (1 Sam. 16:23) Bann kantik ki sa konpoziter ki ti annan lakrent pour Bondye ti ekrir, in annan en kantite valer ziska nou letan. Zis mazin sa! Ozordi, plis ki 3,000 an apre nesans David, plizyer milyon dimoun ki annan diferan ran sosyal partou dan lemonn i souvan lir psonm David pour zot ganny rekonfor ek lespwar.—2 Kron. 7:6; lir Psonm 34:7, 8; 139:2-8 *; Amos 6:5.
Rol lanmizik dan vre ladorasyon
3, 4. Ki laranzman konsernan sant kantik ti ganny fer dan letan David?
3 David ti annan talan e i ti servi son talan dan sa pli bon fason posib, setadir pour glorifye Zeova. Apre ki i ti’n vin lerwa Izrael, David ti fer laranzman pour ki dan servis ki ganny fer kot tabernak, i annan bann zoli lanmizik. Plis ki en dizyenm parmi bann Levit ki ti partisip dan servis kot tabernak, andotmo apepre 4,000 zot, ti annan sa privilez “pour loue” Bondye e 288 ti’n ganny “formen pour sant kantik pour Zeova, tousala bann ki konn sante.”—1 Kron. 23:3, 5; 25:7.
4 David li menm ti konpoz en kantite kantik ki bann Levit ti zwe e sante. Dwatet nenport Izraelit ki ti annan sa privilez pour la sa bann moman kan bann psonm David ti ganny sante ti ganny touse par sa ki zot ti tande. Pli tar, kan lars lalyans ti ganny anmennen Zerizalenm, “David ti dir bann sef parmi bann Levit pour fer zot frer debout, bann santer, avek lenstriman lanmizik, lenstriman avek lakord, larp ek senbal, zwe for pour fer sonnen bann lanmizik zwaye.”—1 Kron. 15:16.
5, 6. (a) Akoz bokou lenportans ti ganny mete lo lanmizik pandan renny David? (b) Ki mannyer nou konnen ki lanmizik ti annan en plas enportan dan ladorasyon dan ansyen Izrael?
5 Akoz bokou lenportans ti ganny mete lo lanmizik dan letan David? Eski i ti zis akoz lerwa li menm ti en mizisyen? Non, i ti annan en lot rezon e sa ti ganny revele plizyer syek plitar ler Izkiya, sa bon lerwa ti reetablir bann servis kot tanp. Dan 2 Kronik 29:25, nou lir: “I [setadir Izkiya] ti fer bann Levit debout kot lakaz Zeova, avek senbal, lenstriman avek lakord ek larp, dapre komannman David ek Gad vizyoner lerwa ek profet Natann, akoz Zeova ki ti par deryer bann komannman ki ti ganny donnen atraver son bann profet.”
6 Wi, atraver son bann profet, Zeova ti donn lord son bann adorater pour loue li avek bann kantik. Bann santer dan tribi Levi pa ti fer serten louvraz ki lezot Levit ti devret fer pour ki zot kapab pas ase letan pour konpoz bann lanmizik e tre probab fer bann repetisyon.—1 Kron. 9:33.
7, 8. An rapor avek sant kantik Rwayonm, kwa ki pli enportan ki abilite?
7 Petet ou kapab dir: “Kot i konsern sante, mwan sirman mon pa ti pou parmi bann ki ti konn sante kot tabernak!” Me pa tou mizisyen Levit ki ti konn sante. Dapre 1 Kronik 25:8, i ti osi annan ‘bann ki ti aprann’ sante. I osi enteresan pour note ki tre probab i ti annan bann mizisyen ek santer byen talante dan lezot tribi Izrael, me Zeova ti’n donn bann Levit sa responsabilite an rapor avek lanmizik. Nou kapab asire ki, ki swa zot ti bann ki ti “konn sante” ouswa ‘bann ki ti aprann’ sante, tou bann Levit fidel ti desarz zot responsabilite avek tou zot leker.
8 David ti kontan lanmizik e i ti zwe byen lanmizik. Eski zis talan ki konte pour Bondye? Dan Psonm 33:3, David ti ekrir: “Fer ou mye pour zwe lenstriman lakord e osi kriye dan lazwa.” Sa mesaz i kler: Sa ki pli enportan se ki nou ‘fer nou mye’ pour loue Zeova.
Rol lanmizik apre lepok David
9. Dekrir sa ki petet ou ti pou vwar e tande si ou ti la zour inogirasyon tanp pandan renny Salomon.
9 Pandan renny Salomon, lanmizik ti vreman enportan dan vre ladorasyon. Zour inogirasyon tanp, i ti annan en lorkes konplet e lo en kote 120 tronpet. (Lir 2 Kronik 5:12. *) Labib i dir nou ki “bann ki soufle tronpet [ki zot tou ti bann pret] ek bann santer ti ini ansanm pour form en sel son pour loue e remersye Zeova, . . . ‘akoz i bon e son labonte leker i pour en letan endefini.’” Desito ki sa zoli lanmizik ti vin pli for, “lakaz li menm ti ranpli avek en nyaz” e sa ti endik laprouvasyon Zeova. Manke i ti vreman eksitan e gou pour tann tapaz tou sa bann tronpet e sa plizyer milye santer pe sant ansanm dan en larmoni ekstraordiner. Pa i vre!—2 Kron. 5:13.
10, 11. Kwa ki montre ki bann premye Kretyen ti servi lanmizik dan vre ladorasyon?
10 Bann premye Kretyen osi ti servi lanmizik dan ladorasyon. Byensir, bann adorater dan premye syek pa ti zwenn dan tabernak oubyen dan tanp, zot ti zwenn dan bann lakour prive. Me akoz persekisyon ek lezot fakter ankor, kondisyon ki zot ti zwenn ansanm pa ti touzour favorab. Me kantmenm sa, sa bann Kretyen ti loue Bondye atraver bann kantik.
11 Zapot Pol ti ankouraz son bann frer ek ser Kretyen Kolos pour kontinyen “averti kanmarad . . . [avek] bann psonm, kantik ek sanson spirityel.” (Kol. 3:16) Apre ki Pol ek Silas ti’n ganny met dan prizon, zot ti konmans “priye e . . . sant kantik pour rann glwar Bondye,” menm si zot ti napa liv kantik pour swiv ladan. (Akt 16:25) Si ou ti’n ganny met dan prizon, konbyen kantik ou ti pou kapab sant parker?
12. Ki mannyer nou kapab demontre lapresyasyon pour bann kantik Rwayonm?
12 Vi ki lanmizik i annan en plas vreman enportan dan nou ladorasyon, nou devret demann nou lekor: ‘Eski mon demontre sa lapresyasyon ki i merite? Eski mon fer bokou zefor pour ariv renyon ek bann lasanble aler pour kapab sant premye kantik ansanm avek mon bann frer ek ser? Eski mon sant sa bann kantik avek santiman? Eski mon ankouraz mon zanfan pour pa pran sa kantik ki ganny zwe ant Lekol Minister Teokratik ek Renyon Servis ek sa enn ant diskour piblik ek Letid Latour Veyer konman en loportinite pour zot kit zot plas, petet zis pour al degourdi zot lazanm?’ Sant kantik i form parti nou ladorasyon. Wi, ki swa nou “konn sante” ouswa nou pe “aprann” sante, nou tou nou kapab e devret ini nou lavwa ansanm avek lezot pour loue Zeova.—Konpar 2 Korentyen 8:12.
Letan i sanze, nou bezwen i sanze
13, 14. Akoz i enportan pour sant avek tou nou leker dan renyon? Donn legzanp.
13 Plis ki 100-t-an pase, Zion’s Watch Tower ti eksplik en rezon akoz nou bann kantik Rwayonm i vreman enportan. I ti dir: “Ler nou sant kantik, sa i en bon fason pour ki laverite i antre dan nou leker ek lespri.” Bokou parol dan nou bann kantik i baze lo bann verse Labib, alor ler nou aprann parol serten kantik, sa i en bon fason pour ki laverite i antre dan nou leker. Souvandfwa dimoun in santi zot touse ler zot in tann kongregasyon pe sante avek tou zot leker kan zot ti vin renyon pour premye fwa.
14 En zour swar, an 1869, Charles Russell ti pe retourn kot li apre travay kan i ti tann sante dan en lasal anba dan en batiman. Sa moman dan son lavi, i ti’n konvenki ki i pa ti pou zanmen konn laverite lo Bondye. Alor, i ti deside pour pas tou son letan dan son biznes e mazinen ki si i ganny ase larzan, i ti pou kapab ed bann dimoun materyelman menm si i pa ti kapab ed zot spirityelman. Frer Russell ti antre dan sa lasal sal e sonm e dekouver ki en servis relizye ti pe ganny fer laba. I ti asize e ekoute. Pli tar i ti ekrir ki sa zour swar i ti’n tann “ase keksoz, anba gidans Bondye pour rebatir son lafwa dan Labib ki’n ganny enspire par Bondye, ki ti pe afeblir.” Remarke ki se sa kantik ki ti pe ganny sante ki ti atir Frer Russell renyon.
15. Ki azisteman dan nou konprenezon ki’n fer li neseser pour annan en nouvo liv kantik?
15 Anmezir letan i pase, bann azisteman i ganny fer lo nou konprenezon lo Lekritir. Proverb 4:18 i dir: “Santye bann dimoun drwat i parey sa lalimyer briye ki pe vin deplizanpli kler ziska gran lizour.” Lefet ki i annan nouvo leklersisman, alor i neseser ki i annan azisteman dan lafason nou ‘sant kantik’ laverite. Pour sa 25 dernyen lannen, Temwen Zeova dan plizyer pei ti vreman kontan pour servi sa liv kantik ki annan pour tit Sing Praises to Jehovah. * Depi ki sa liv kantik ti ganny enprimen pour premye fwa, lalimyer in vin deplizanpli pli kler lo diferan size e serten lekspresyon ki ti ganny servi dan sa liv kantik nepli ganny servi konmela. Par egzanp an Angle, nou nepli koz lo “new order” me nou koz lo “new world.” Konmela nou dir ki non Bondye pou ganny “sanktifye” e non pa “zistifye.” I kler alor ki lo kote nou bann krwayans, i’n annan sa nesesite pour met nou liv kantik azour.
16. Ki mannyer nou nouvo liv kantik pou ed nou swiv konsey Pol dan Efezyen 5:19?
16 Pour sa rezon e pour lezot rezon ankor, Konsey Direkter in dakor pour ki en nouvo liv kantik avek tit Sant pour Zeova i ganny pibliye. I annan zis 135 kantik dan sa liv. Lefet ki i annan mwens kantik, nou kapab aprann parol omwen serten nouvo kantik parker. Sa i anliny avek konsey Pol dan Efezyen 5:19.—Lir.
Ou kapab demontre ou lapresyasyon
17. Ki pwennvi ki pou ed nou sirmont lakanmizri pour sante dan renyon?
17 Eski nou devret les lakanmizri anpes nou sant for dan renyon? Get li koumsa: Eski pa i vre ki ler nou koze, “nou komet lerer dan plizyer mannyer”? (Zak 3:2) Pourtan, nou pa les sa anpes nou loue Zeova portanport. Be alor, menm si nou napa en zoli lavwa, eski nou devret les sa anpes nou loue Bondye atraver bann kantik? Zeova, sa enn ki’n “donn zonm labous” i kontan kan i ekout nou anmezir nou servi nou lavwa pour sant pour li.—Egz. 4:11.
18. Kwa ki pou ed nou aprann parol kantik parker? Donn serten sizesyon.
18 Dan plizyer langaz, i annan bann CD Sing to Jehovah—Vocal Renditions ki disponib. Lo la i annan bann nouvo kantik ki ganny sante par en lakoral e zwe par en lorkes. Sa laranzman mizikal i gou pour ekoute. Ekout zot detanzaot, koumsa ou pou kapab fasilman aprann parol omwen serten bann nouvo kantik. Parol dan sa bann kantik in ganny konpoze dan en fason ki ler ou pe sant en laliny, an zeneral ou pou konnen kwa ki vin apre. Alor, kan ou pe zwe sa CD, akoz ou pa esey sant refren ou osi? Si ou familyariz ou avek parol ek ler sa bann kantik kot ou, sirman kan ou pou kot Lasal Rwayonm ou pou pli konfidan pour sante.
19. Ki preparasyon ki ganny fer pour sa bann laranzman mizikal pour nou bann kantik?
19 I fasil pour pa konsider konman enportan sa laranzman mizikal ki ganny zwe dan lasanble spesyal, rezyonal e distrik. En kantite travay i ganny fer pour prepar zot. Apre ki bann kantik in ganny swazir, laranzman mizikal i ganny ekrir pour sa 64 manm lorkes Watchtower. Apre sa, sa bann mizisyen i pran en kantite letan pour pas lo sa bann kantik. Epi zot fer repetisyon e rikorde dan nou bann stoudyo lanrezistreman ki Patterson, New York. Dis parmi sa bann frer ek ser pa reste Leta-z-ini. Zot tou zot vwar li konman en privilez pour annan en rol pour zwe pour prodwir sa zoli progranm mizikal pour bann levennman teokratik. Nou kapab demontre nou lapresyasyon pour zot zefor ranpli avek lanmour. Kan tyermenn kot lasanble i envit nou pour pran nou plas, annou fer li e ekout trankilman sa laranzman mizikal ki’n ganny prepare avek lanmour.
20. Ki ou determinen pour fer?
20 Zeova i ekout nou kantik louanz. Zot enportan pour li. Nou kapab fer son leker kontan si nou sant avek tou nou leker kan nou zwenn pour ador li. Wi, ki swa nou konn sante ouswa nou pe aprann sante, annou “sant pour Zeova”!—Ps. 104:33.
[Not anba lo paz]
^ par. 1 I enteresan pour note ki dis syek apre lanmor David, en group lanz ti anons nesans Mesi avek bann berze ki ti pe vey zot mouton dan lakanpanny o bor Betleenm.—Lik 2:4, 8, 13, 14.
^ par. 1 Psonm 8:3, 4, 7-9: “Kan mon vwar ou lesyel, travay ou ledwa, lalin ek zetwal ki ou’n fer, 4 Ki imen i ete ki ou gard li antet, e en senp imen ki ou pran swen avek li?” “Mouton, kabri ek toro, zot tou, e osi bann zannimo sovaz. 8 Bann zwazo lesyel ek pwason dan lanmer. Nenport kwa ki pe naze dan lanmer. 9 O Zeova nou Senyer, pa ou non i vreman gran lo later antye!”
^ par. 2 Psonm 34:7, 8; 139:2-8: “Lanz Zeova pe kanpe toultour bann ki annan lakrent pour li, e i sov zot. 8 O zot lepep, goute e vwar konman Zeova i bon. Ere sa zonm kosto ki pran refiz dan li.” “Ou’n arive konnen ler mon asize e ler mon leve. Depi dan lwen ou’n obzerv mon panse. 3 Kan mon vwayaze e kan mon alonze, tousala ou’n obzerve. Ou’n abitye avek tou mon bann fason. 4 Tou parol ki ankor lo mon lalang, ou’n deza konnen ki mon pe al dir, O Zeova. 5 Par devan e par deryer ou’n antour mwan. Avek ou lanmen ou protez mwan. 6 I vreman difisil pour mwan konn tou sa bann keksoz. Parski mon pa kapab konpran, telman zot ekstraordiner. 7 Kote mon pou ale ki mon pou lwen avek ou lespri sen, e kote mon pou ale ki mon pa pou devan ou figir? 8 Si mon ti al dan lesyel, ou ti pou laba. E si mon ti met mon lili dan Seol, gete! ou ti pou la.”
^ par. 9 2 Kronik 5:12: “E bann Levit ki ti bann santer sorti parmi zot, setadir Azaf, Emann ek Yedoutoun e osi zot garson ek zot frer ti’n met lenz avek en zoli latwal, avek senbal ek lenstriman avek lakord ek larp, ti pe debout kote les lotel, e avek zot i ti annan san ven pret ki ti pe soufle tronpet.”
^ par. 15 Sa liv antye ek son 225 kantik ti disponib dan plis ki 100 langaz.
Ki ou panse?
• Ki legzanp dan letan lontan ki montre ki lanmizik i annan en rol enportan pour zwe dan vre ladorasyon?
• Ki konneksyon ou vwar ant obeir lord Zezi dan Matye 22:37 e sant kantik avek tou ou leker?
• Ki serten fason nou kapab demontre lapresyasyon apropriye pour nou bann kantik?
[Kestyon]
[Portre lo paz 31]
Eski ou dekouraz ou zanfan pour kit zot plas si i pa neseser kan kantik pe zwe?