Resevwar benediksyon atraver Lerwa ki ganny gide par lespri sen!
Resevwar benediksyon atraver Lerwa ki ganny gide par lespri sen!
“Lespri Zeova pou bezwen lo li.”—IZA. 11:2.
1.Ki lenkyetid serten in eksprimen an rapor avek bann problenm sa lemonn?
“DAN en lemonn ki ranpli avek problenm politik, sosyal ek lanvironnman, ki mannyer imen pou kapab sirviv ankor 100-t-an?” Sa i kestyon ki en syantis ki apel Stephen Hawking ti demande an 2006. En lartik dan zournal New Statesman ti dir: “Nou pa’n elimin lapovrete e anmenn lape dan lemonn antye. O kontrer, i paret ki nou’n fer tou lekontrer. I pa konmsi nou pa’n eseye. Nou’n esey tou keksoz, ki swa sistenm kominis, marse lib, kree Lasosyete bann Nasyon oubyen anmas zarm nikleer pour anpes lager. Nou’n tro fer ‘lager pour aret lager’ pour nou krwar ki nou konnen konman pour elimin lager.”
2. Ki mannyer Zeova pou byento egzers son souvrennte lo later?
2 Sa parol pa sirprann bann serviter Zeova ditou. Labib i dir nou ki bann imen pa ti ganny kree pour diriz zot lekor. (Zer. 10:23) Zis Zeova ki nou Souvren. Dan sa fason, i annan sa drwa pour etablir bann standar pour nou swiv, pour determinen ki bi nou lavi i devret annan e gid nou ver sa bi. An plis ki sa, byento i pou servi son lotorite pour met en lafen avek tou bann gouvernman ki imen in esey etablir lo zot menm. An menm tan, i pou detrir tou bann ki’n rezet son souvrennte e fer lezot imen vin lesklav pese, lenperfeksyon ek Satan, “bondye . . . sa syek.”—2 Kor. 4:4.
3. Ki Izai ti predir konsernan Mesi?
3 Dan nouvo lemonn ki pou en Paradi, Zeova pou demontre son souvrennte ranpli avek lanmour anver limanite atraver son Rwayonm kot Kris i dirize konman lerwa. (Dan. 7:13, 14) Izai ti profetiz sa konsernan Lerwa sa Rwayonm: “I pou annan en pti brans ki’n pouse avek siko Zese, e dan son rasin en pti bourzon pou raport fri. E lespri Zeova pou bezwen lo li, lespri lasazes ek konprenezon, lespri konsey ek lafors, lespri konnesans ek lakrent pour Zeova.” (Iza. 11:1, 2) Dan ki fason spesyal Bondye in servi son lespri sen pour ed Zezi Kri, sa “pti brans ki’n pouse avek siko Zese,” kalifye pour diriz limanite? Ki benediksyon pou annan anba son dominasyon? Ki nou bezwen fer pour ganny sa bann benediksyon?
Bondye i ed Zezi kalifye pour dirize
4-6. Ki konnesans enportan ki pou ed Zezi desarz son rol konman en Lerwa, Gran Pret ek Ziz ki ranpli konpasyon ek lasazes?
4 Zeova i anvi ki bann sitwayen imen i ptitapti vin parfe anba gidans en Lerwa, Gran Pret ek Ziz ki ranpli avek konpasyon ek lasazes. Sanmenm sa rezon ki Bondye ti swazir Zezi Kri e i ti ed li kalifye atraver son lespri sen pour sa bann responsabilite vreman enportan. Egzamin serten rezon akoz Zezi pou akonplir sa rol ki Bondye in donn li dan en fason parfe.
5 Zezi i konn son Papa pli byen ki nenport ki. Garson byenneme Bondye in konn son Papa pli lontan ki nenport ki, petet menm pour plizyer bilyon lannen. Pandan sa bann letan, Zezi ti telman ganny en konnesans profon lo Zeova ki i ti kapab dir ki i “resanblans vizib Bondye ki envizib.” (Kol. 1:15) Zezi li menm ti dir: “Sa ki’n war mwan in osi war mon Papa.”—Zan 14:9.
6 Apard Zeova, Zezi i annan sa pli gran konnesans lo kreasyon, enkli bann imen. Kolosyen 1:16, 17 i dir: “Par [Garson Bondye], Bondye in kre tou sa ki egziste dan lesyel ek lo later, sa ki vizib ek sa ki envizib . . . Kris i egziste avan tou keksoz, e dan li, tou keksoz i reste anplas.” Zis mazin sa! Zezi, konman “zouvriye abil” Bondye ti ede dan tou lezot laspe kreasyon. Alor, i konpran tou pti detay lo liniver antye, depi bann pli ptipti atonm ziska laservel imen ki vreman ekstraordiner. Wi, Kris i vreman sa enn ki annan lasazes parfe.—Prov. 8:12, 22, 30, 31.
7, 8. Ki mannyer lespri sen Bondye ti ed Zezi dan son minister?
7 Zezi ti ganny swazir par lespri sen Bondye. Zezi ti dir: “Lespri Senyer i lo mwan, akoz in konsakre mwan pour anons Bonn Nouvel pour bann pov. I’n anvoy mwan pour proklanm delivrans pour bann prizonnyen, e fer bann aveg war kler, pour donn laliberte bann ki ganny oprimen, pour proklanm en lannen kot Senyer pou montre son faver.” (Lik 4:18, 19) Kan Zezi ti batize, i paret ki lespri sen ti fer li rapel bann keksoz ki i ti’n aprann avan vin lo later konman en imen, enkli sa ki Bondye ti anvi i akonplir pandan son minister lo later konman Mesi.—Lir Izai 42:1 *; Lik 3:21, 22; Zan 12:50.
8 Vi ki i ti ganny pouvwar atraver lespri sen e i ti annan en lekor ek lespri parfe, Zezi pa ti zis sa pli gran zonm ki’n deza egziste lo later, me i ti osi sa pli gran Ansenyan. Anfet, bann ki ti ekout li ti “etonnen par mannyer ki i ti ansennyen.” (Mat. 7:28) En keksoz nou kapab asire se ki Zezi ti kapab konpran kote problenm limanite i sorti, setadir pese, lenperfeksyon ek mankman konnesans lo Bondye. Epi osi i ti vwar e tret sa bann dimoun dapre sa ki zot ti vreman ete anndan.—Mat. 9:4; Zan 1:47.
9. Ki mannyer ou konfyans dan Zezi konman Dirizan i ogmante kan ou reflesir lo son leksperyans lo later?
9 Zezi ti viv konman en imen. Son prop leksperyans konman en imen ek son relasyon pros avek bann imen enparfe in ed Zezi en kantite pour kalifye konman Lerwa. Zapot Pol ti ekrir: “I ti neseser ki [Zezi] i vin parey son bann frer dan tou fason, pour ki i vin zot Gran-Pret fidel, ranpli avek labonte dan son servis devan Bondye pour ki lepep i ganny pardonnen. Parski i’n soufer limenm, e i’n ganny tante, alor i aprezan kapab vin an ed tou sa ki ganny tante.” (Ebr. 2:17, 18) Vi ki Zezi ti “ganny tante” oubyen teste, i kapab senpatiz avek sa bann ki pe fer fas avek leprev. Konpasyon Zezi ti vreman evidan pandan son minister lo later. Bann dimoun malad, andikape, bann ki ti pe ganny abize, e menm bann zanfan ti santi zot alez pour apros li. (Mark 5:22-24, 38-42; 10:14-16) Bann dimoun ki annan limilite e ki ti anvi konn plis lo Bondye ti ganny atire ver li. De lot kote, bann dimoun fyer, arogan ek bann ki “lanmour Bondye pa [ti] dan zot” ti rezet li, ay li e opoz li.—Zan 5:40-42; 11:47-53.
10. Dan ki pli gran fason Zezi ti prouv son lanmour pour nou?
10 Zezi ti donn son lavi pour nou. Lefet ki i ti pare pour mor pour nou, sa i petet pli gran laprev ki napa okenn pli bon dirizan ki Zezi. (Lir Psonm 40:6-10. *) Kris ti dir: “Pli gran lanmour ki en dimoun i kapab posede: se donn son lavi pour son bann zanmi.” (Zan 15:13) Wi, lekontrer avek bann dirizan imen, ki souvan viv bann lavi byen konfortab avek larzan zot sitwayen, Zezi ti donn son prop lavi pour limanite.—Mat. 20:28.
Bondye i donn Zezi lotorite pour nou benefisye avek ranson
11. Akoz nou kapab annan konfyans total dan Zezi konman nou ranson?
11 Eski pa i apropriye alor ki Zezi konman Gran Pret i sa enn ki pran linisyativ pour donn nou bann benediksyon ki son ranson in fer posib! Anfet, pandan son minister lo later, Zezi ti donn nou en avangou bann keksoz ki i ti pou fer pandan sa Rwayonm Mil An konman sa ranson, si nou reste fidel. I ti geri bann malad ek andikape, resisit bann mor, nouri lafoul e menm kontrol bann eleman natirel. (Mat. 8:26; 14:14-21; Lik 7:14, 15) An plis ki sa, i pa ti fer sa bann keksoz pour demonstre ki i annan lotorite ek pouvwar, me plito pour demontre son lanmour ek konpasyon. I ti dir en lepre ki ti sipliy li pour geri li: “Mon oule.” (Mark 1:40, 41) Zezi pou demontre sa menm konpasyon dan lemonn antye pandan sa Mil An ki i pou dirize.
12. Ki mannyer Izai 11:9 pou ganny akonplir?
12 Kris ek bann ki pou diriz ansanm avek li pou kontinyen vey lo sa travay lansennyman ki Zezi ti konmanse 2,000 an pase. Dan sa fason, sa parol dan Izai 11:9 i ava ganny akonplir: “Later pou vreman ranpli avek konnesans Zeova zis parey delo i kouver lanmer.” Sa lansennyman sorti kot Bondye pou san okenn dout enplik sa lenstriksyon konsernan mannyer pour pran swen avek later ek tou bann zannimo ki lo la, zis parey Adan ti ganny demande pour fer o konmansman. A lafen sa 1,000 an, plan Bondye dan Zenez 1:28 pou’n ganny akonplir e sakrifis Zezi pou’n ganny son lakonplisman final.
Bondye i donn Zezi lotorite pour zize
13. Dan ki fason Zezi ti demontre son lanmour pour ladrwatir?
13 Kris, “se limenm ki Bondye in etabli pour ziz bann vivan ek bann mor.” (Akt 10:42) Alor, pa i rekonfortan pour konnen ki personn pa kapab anbet Zezi, ki ladrwatir ek fidelite i parey en sang otour son leren! (Iza. 11:5) I ti annan laenn pour vorasite, lipokrizi ek lezot move keksoz ankor, e i ti reprimann sa bann ki ti kontan ler lezot ti pe soufer. (Mat. 23:1-8, 25-28; Mark 3:5) An plis ki sa, Zezi ti montre ki i pa ti les laparans anbet li, “akoz i ti konnen ki i annan dan leker dimoun.”—Zan 2:25.
14. Dan ki fason Zezi pe demontre son lanmour pour ladrwatir ek lazistis la konmela e ki nou devret demann nou lekor?
14 Zezi i ankor pe kontinyen demontre son lanmour pour ladrwatir ek lazistis akoz i pe sirvey sa pli gran travay predikasyon ek lansennyman ki’n ganny fer dan listwar. Napa okenn zonm, ni gouvernman imen ouswa move lespri ki kapab anpes sa travay ganny akonplir ziska ki Bondye i konpletman satisfe avek. Alor, nou kapab asire ki kan Armagedon pou’n fini, lazistis Bondye pou partou kote. (Lir Izai 11:4 *; Matye 16:27.) Demann ou lekor: ‘Eski mon annan menm latitid avek Zezi anver bann dimoun ki mon zwenn dan predikasyon? Eski mon donn Zeova mon meyer menm si mon lasante ouswa sirkonstans personnel i kapab limit sa ki mon kapab fer?’
15. Ki nou devret gard antet ki pou ed nou donn Bondye nou meyer?
15 Nou kapab ganny led pour servi Bondye avek tou nou leker si nou gard antet ki predikasyon i son travay. I ti donn lord pour fer sa travay e atraver son Garson, i diriz predikasyon e donn lespri sen sa bann ki partisip ladan. Eski ou kontan sa privilez ki ou annan pour travay ansanm avek Bondye ek son Garson ki’n ganny gide par lespri sen? Lekel, apard Zeova ki kapab motiv sa plis ki set milyon dimoun, ki laplipar i ganny konsidere konman bann zonm “senp san gran ledikasyon,” pour anons mesaz Rwayonm avek bann dimoun dan 236 pei?—Akt 4:13.
Atraver Kris, nou ganny beni!
16. Zenez 22:18 i dir kwa konsernan benediksyon Bondye?
16 Zeova ti dir Abraam: “Atraver ou desandans tou nasyon lo later pou sirman ganny beni, parski ou’n ekout mwan.” (Zen. 22:18) Sa i montre ki sa bann ki apresye sa privilez pour servi Bondye ek son Garson, i kapab esper avek konfyans ek enpasyans bann benediksyon ki Desandans Rwayonm Bondye pou anmennen. Denozour zot vreman okipe pe fer sa travay e gard antet sa bann benediksyon.
17, 18. Ki promes Zeova ti fer dan Deterononm 28:2 e ki i vedir pour nou?
17 En fwa Bondye ti dir avek desandans Abraam, setadir pep Izrael: “Tou sa bann benediksyon [ki dan lalyans Lalwa] pou bezwen vin pour ou, e i pou zwenn ou, akoz ou kontinyen ekout lavwa Zeova ou Bondye.” (Det. 28:2) Menm parol i kapab aplik avek bann serviter Bondye ozordi. Si ou anvi resevwar bann benediksyon Zeova, “kontinyen ekout” son lavwa. Koumsa, son bann benediksyon pou “vin pour ou, e i pou zwenn ou.” Me, ki savedir ‘ekoute’?
18 Ekoute i sirman enplik pran aker sa ki ganny dir dan Parol Bondye e dan sa nouritir spirityel ki i donnen. (Mat. 24:45) I osi vedir obeir Bondye ek son Garson. Zezi ti dir: “Pa tou sa ki apel mwan Senyer, Senyer ki pou antre dan Rwayonm lesyel, me zis bann ki fer lavolonte mon Papa ki dan lesyel.” (Mat. 7:21, nou ki’n met an italik.) Ekout Bondye i vedir soumet avek sa laranzman ki i’n met an plas, setadir soumet avek bann “kado zonm” andotmo, bann ansyen dan kongregasyon.—Efe. 4:8.
19. Ki nou bezwen fer pour resevwar en benediksyon?
19 Bann manm Konsey Direkter i parmi sa bann “kado,” e zot azir konman bann reprezantan kongregasyon Kretyen an antye. (Akt 15:2, 6) Anfet, nou latitid anver bann frer spirityel Kris i en fakter vreman enportan ki pou determinen ki mannyer nou pou ganny zize pandan sa gran ladetres ki pe vini. (Mat. 25:34-40) Alor, en fason nou kapab resevwar en benediksyon Bondye i kan nou fidelman soumet avek sa bann ki Bondye in swazir.
20. (a) Ki responsabilite pli enportan bann “kado zonm” i annan? (b) Ki mannyer nou kapab montre ki nou apresye sa bann frer?
20 Bann manm Komite Brans, bann sirveyan rezyonal e distrik ek bann ansyen dan kongregasyon osi i bann “kado” e zot tou zot in ganny swazir par lespri sen. (Akt 20:28) Responsabilite prensipal ki sa bann frer i annan se pour batir pep Bondye ziska ki zot “ariv dan linite nou lafwa ek dan konnesans Garson Bondye; [pour ki nou] a vin bann adilt e nou a konn en devlopman konplet parey Kris.” (Efe. 4:13) I vre, zot osi zot enparfe parey nou menm. Kantmenm sa, nou ganny beni kan nou apresye zot gidans ranpli avek lanmour e swiv zot konsey.—Ebr. 13:7, 17.
21. Akoz i irzan pour nou obeir Garson Bondye?
21 Byento Kris pou detrir move lemonn Satan. Kan sa pou arive, nou lavi pou dan lanmen Zezi akoz i’n ganny lotorizasyon avek Bondye pour gid sa “gran lafoul” ki’n ganny predir, ver “sours delo ki donn lavi.” (Rev. 7:9, 16, 17) Alor, annou fer tou sa ki nou kapab pour soumet volonterman e apresye sa Lerwa ki ganny gide par Zeova.
[Not anba lo paz]
^ par. 7 Izai 42:1: “Gete! Mon serviter ki mon pe donn mon sipor! Sa enn ki mon’n swazir, e ki mon’n aprouve! Mon’n met mon lespri dan li. I pou anmenn lazistis lo tou nasyon.”
^ par. 10 Psonm 40:6-10: “Ou pa ti pran plezir dan sakrifis ek lofrann. Ou’n ouver mon zorey. Ou pa ti demann lofrann brile ek lofrann pour pese. 7 Se pour sa rezon ki mon ti dir: ‘La mon’n vini, dan roulo en liv in ganny ekrir lo mwan.’ 8 O mon Bondye, mon’n pran plezir pour fer ou lavolonte, e ou lalwa i o profon dan mwan. 9 Mon’n anons sa bon nouvel lo ladrwatir dan sa gran lasanble. Gete! Mon pa ferm mon labous. O Zeova, ou menm ou konn sa byen. 10 Ou ladrwatir mon pa’n kouver dan mon leker. Mon’n anons ou fidelite ek delivrans. Mon pa’n kasyet ou labonte leker ek ou laverite dan sa gran lasanble.”
^ par. 14 Izai 11:4: “I pou vreman ziz bann dernyen dimoun dan en fason zis, e i pou koriz bann dimoun dous lo later dan en fason ki drwat.”
Ki ou’n aprann atraver . . .
• Izai 11:1-5?
• Akt 10:42?
• Zenez 22:18?
[Kestyon]
[Portre lo paz 25]
Konpasyon Zezi ti evidan kan i ti resisit fiy Zairis