Nou Sef pe kontinyen gid nou dan bann dernyen zour

“I ti ale konman en venker e pour ganny laviktwar.”—REV. 6:2.

1, 2. (a) Ki mannyer Labib i dekrir aksyon Zezi konman lerwa depi 1914? (b) Ki Kris in fer depi ki i ti ganny kouronnen konman lerwa?

KRIS ti ganny kouronnen konman Lerwa dan Rwayonm Zeova ki dan lesyel an 1914. Dan nou lespri, ki mannyer nou pe imazin li la konmela? Eski nou pe vwar li konman en lerwa ki pe asize lo son tronn dan gran refleksyon, de tanzantan pe zet en pti koudey lo later pour vwar ki mannyer kongregasyon i ete? Si wi, nou devret sanz nou pwennvi. Bann Psonm ek liv Revelasyon i dekrir li konman en lerwa ranpli avek lenerzi lo en seval, ki pe galope “konman en venker e pour ganny laviktwar.” I kontinyen fer li ziska ki i konpletman reisi.—Rev. 6:2; Ps. 2:6-9; 45:1-4.

² Premye aksyon ki Kris ti pran apre ki i ti’n ganny kouronnen konman lerwa se ki i ti ranport laviktwar lo “Dragon avek son bann lanz.” Konman Misel, sa arkanz ki pe komann son bann lanz, Kris ti retir Satan ek son bann demon dan lesyel sen e zet zot lo later. (Rev. 12:7-9) Apre sa, dan son rol konman “mesaze lalyans” Zeova, Zezi ansanm avek son Papa ti enspekte tanp spirityel. (Mal. 3:1) I ti ziz bann swadizan Kretyen, ki sa parti pli koupab dan “Gran Babilonn” e trouv li responsab pour versman disan ek adilter spirityel avek sistenm politik sa lemonn.—Rev. 18:2, 3, 24.

Kris i pirifye son lesklav lo later

3, 4. (a) Ki travay Kris in akonplir konman “mesaze” Zeova? (b) Ki lenspeksyon tanp in revele e konman Sef kongregasyon ki Zezi in fer?

³ Sa lenspeksyon ki Zeova ek son “mesaze” ti fer ti osi montre ki dan lakour sa tanp  spirityel lo later, i ti annan en group vre Kretyen ki pa ti form parti avek bann legliz swadizan Kretyen. Par kont, sa bann Kretyen swazir ouswa “garson Levi” osi ti devret ganny pirifye. I ti zis parey profet Malaki ti’n predir: “[Zeova] i devret asiz konman enn ki rafinen e netway larzan e i devret pirifye bann garson Levi, e i devret filtre zot parey lor e zot a vin pour Zeova konman bann ki prezant en lofrann avek ladrwatir.” (Mal. 3:3) Zeova ti servi Kris Zezi, sa “mesaze lalyans,” pour pirifye sa bann Izraelit spirityel.

⁴ Me kantmenm sa, Kris ti vwar ki sanmenm sa bann Kretyen swazir fidel ti pe fer tou sa ki zot kapab pour fourni nouritir spirityel aler pour bann frer ek ser dan lafwa. Depi 1879 anmontan, ki swa dan botan oubyen dan movetan, zot in pibliy laverite sorti dan Labib konsernan Rwayonm Bondye dan sa piblikasyon. Zezi ti profetize ki “ler i arive” pour enspekte son bann serviter pandan “konklizyon sa sistenm,” i ti pou vwar en lesklav ki ti pou donn son bann serviter “manze kan i ler.” I pou deklar sa lesklav ere e “met li ansarz tou son byen” lo later. (Mat. 24:3, NW, 45-47) Konman Sef kongregasyon Kretyen, Kris in servi sa “lesklav fidel e pridan” (NW) pour pran ka avek bann keksoz ki relye avek lentere Rwayonm lo later. I’n donn “lezot serviter” swazir ek zot konpanyon ‘lezot mouton’ gidans atraver Konsey Direkter.—Zan 10:16.

Fer rekolt lo later

5. Dan en vizyon, ki Zan ti vwar Lerwa Rwayonm Bondye pe fer?

⁵ Zapot Zan ti ganny en vizyon kot i ti vwar en lot keksoz ki sa Lerwa dan Rwayonm Bondye ti pou fer pandan “Zour Senyer,” apre ki I ti ganny kouronnen konman lerwa an 1914. Zan ti ekrir: “Mon ti regarde e la mon ti war en nyaz blan, e lo sa nyaz ti annan en personaz ki ti annan resanblans en Garson zonm. I ti annan en kouronn an-or lo son latet e en fosiy byen koupe dan son lanmen.” (Rev. 1:10; 14:14) Zan ti tann en lanz sorti kot Zeova dir avek sa Zouvriye rekolt anvoy son fosiy akoz “rekolt later in mir.”—Rev. 14:15, 16.

6. Ki Zezi ti dir pou arive avek letan?

⁶ Sa “rekolt later” i fer nou rapel parabol Zezi konsernan dible ek move zerb. Zezi ti konpar son lekor avek en zonm ki ti senm lagrenn dible dan son plantasyon avek lentansyon pour ganny en rekolt konplet sa bon dible ki ti pe reprezant bann “[“garson,” NW] Rwayonm,” setadir, bann vre Kretyen ki ganny swazir ki pou dirize ansanm avek li dan son Rwayonm. Me pandan lannwit, en lennmi, setadir “dyab,” ti senm move zerb ki reprezant bann “[“garson,” NW] dyab” dan sa plantasyon. Sa senmer ti enstrir son bann serviter pour les dible ek move zerb pous ansanm ziska letan larekolt, ki tonm pandan “konklizyon sa sistenm.” (NW) Sa letan, i pou anvoy son bann lanz separ dible ek move zerb.—Mat. 13:24-30, 36-41.

7. Dan ki fason Kris pe fer “rekolt later”?

 ⁷ Pour akonplir sa vizyon ki Zan ti gannyen, Zezi pe diriz sa travay rekolt ki pe ganny fer dan lemonn antye. “Rekolt later” ti konmans avek rasanbleman bann dernyen parmi sa 144,000 “garson rwayonm” ki reprezant sa “dible” dan parabol Zezi. Sa diferans ant bann vre Kretyen ek sa ki fo ti’n telman vin pli evidan apre Premye Lager Mondyal ki sa ti kontribye pour ki dezyenm parti sa “rekolt later” i ganny fer, setadir ki lezot mouton i ganny rasanble. Sa group pa “bann garson rwayonm” me plito, zot “en gran lafoul” ki volonterman pare pour vin sitwayen anba dominasyon sa Rwayonm. Zot ganny rekolte dan en sans senbolik sorti dan tou “pep, kominote nasyonal ek bann langaz.” Zot soumet anba dominasyon Rwayonm Bondye ki Kris Zezi konman dirizan ek sa 144,000 “sen” ki pou diriz ansanm avek li dan sa gouvernman dan lesyel.—Rev. 7:9, 10; Dan. 7:13, 14, 18.

I diriz bann kongregasyon

8, 9. (a) Kwa ki montre ki Kris pa zis get sa ki pase dan kongregasyon an zeneral me ki i obzerv kondwit sak manm dan kongregasyon? (b) Parey i montre dan sa portre lo paz 29, ki “bann profon sekre satan” nou merit atoupri evite?

⁸ Dan lartik avan, nou ti vwar ziska ki degre Kris ti obzerv kondisyon spirityel sak kongregasyon dan premye syek N.L. Dan nou letan, konman sa Lerwa ki pe rennyen e avek “pouvwar” ouswa lotorite ki i’n gannyen “dan lesyel ek lo later,” Kris nou Sef pe kontinyen egzers son lotorite lo bann kongregasyon ek sirveyan dan lemonn antye. (Mat. 28:18; Kol. 1:18) Zeova in “etabli li konman pli gran sef lo tou keksoz [“kongregasyon,” NW]” bann Kretyen swazir. (Efe. 1:22) Dan sa fason, napa nanryen ki arive dan sa plis ki 100,000 kongregasyon Temwen Zeova ki i pa okouran.

⁹ Zezi ti anvoy sa mesaz pour kongregasyon Tyatir dan lepase: “La sa ki Garson Bondye i dir, sa enn ki annan lizye ki konman laflanm dife, . . . ‘Mon konn tou sa ki ou fer.’” (Rev. 2:18, 19) I ti reprimann bann manm sa kongregasyon pour zot lavi imoral kot zot ti pe atoupri anvi satisfer zot dezir fizik. I ti dir zot: “Mwan, mon konn tou mazinasyon ek dezir zonm, e mon pou pey sakenn dapre sa ki i’n fer.” (Rev. 2:23) Sa parol i montre ki Kris pa zis get sa ki pe pase dan en kongregasyon an zeneral, me plito i get fason viv sak dimoun dan kongregasyon. Zezi ti felisit bann Kretyen Tyatir “ki pa [ti] atas zot avek sa move lansennyman ki parey serten i dir, pou konn bann profon sekre satan.” (Rev. 2:24) Ozordi osi, i apresye bann zenn konman vye ki pa rod lenformasyon lo “bann keksoz profon satan” atraver Internet, bann zwe video vyolan ouswa bann rezonnman imen. Eski pa i vreman kontan pour vwar sa zefor ek sakrifis ki bokou Kretyen ozordi pe fer pour fer tou sa ki zot kapab pour swiv son gidans dan tou laspe zot lavi?

10. Ki mannyer nou konnen Kris pe gid bann ansyen dan kongregasyon e ki zot devret konnen?

¹⁰ Kris i servi bann ansyen ki’n ganny apwente pour diriz kongregasyon avek lanmour lo later. (Efe. 4:8, 11, 12) Dan premye syek, tou ansyen ti bann Kretyen swazir. Dan Revelasyon zot ganny dekrir konmsi zot bann zetwal dan lanmen drwat Kris. (Rev. 1:16, 20) Ozordi, laplipar ansyen dan kongregasyon i form parti lezot mouton. Avan ki en frer i ganny apwente konman ansyen, bann ansyen i priye e demann gidans lespri sen. Alor sa bann ansyen osi i kapab ganny konsidere konman bann ki dan lanmen Kris oubyen anba son gidans. (Akt 20:28) Par kont, zot rekonnet ki Kris i servi en pti group Kretyen swazir lo Konsey Direkter pour responsab e donn gidans son bann disip lo later.—Lir Akt 15:6, 28-30.

 “Vini, Senyer Zezi!”

11. Akoz nou vreman anvi vwar nou Sef vin deswit?

¹¹ Dan sa vizyon ki zapot Zan ti gannyen, plizyer fwa Zezi ti dir ki i pou vini byento. (Rev. 2:16; 3:11; 22:7, 20) San okenn dout, i ti pe koz konsernan sa letan ki i pou vini kot i pou anmenn zizman lo Gran Babilonn e larestan sa move lemonn Satan. (2 Tesa. 1:7, 8) Telman i ti enpasyan pour vwar lakonplisman sa bann levennman merveye ki ti’n ganny predir, zapot Zan ti kriye: “Amenn! Vini, Senyer Zezi!” Konman sa bann ki pe viv dan letan lafen sa move lemonn, nou osi nou vreman anvi vwar nou Sef ek Lerwa vini pour sanktifye non son Papa e zistifye Son souvrennte.

12. Ki travay Kris pou fer avan ki bann divan destriksyon i ganny large?

¹² Avan ki Zezi i vini pour detrir lorganizasyon Satan ki lo later, dernyen manm sa 144,000 Izraelit spirityel i devret ganny sele konpletman. Labib i fer resorti klerman ki sa bann divan ki pou detrir lemonn Satan pa pou ganny large avan ki sa 144,000 Kretyen swazir i fini ganny sele.—Rev. 7:1-4.

13. Ki mannyer prezans Kris pou vin evidan pandan premye parti “gran ladetres”?

¹³ Laplipar dimoun lo later pa pe remark prezans Kris ki’n konmanse depi 1914. (2 Pyer 3:3, 4) Par kont, byento tou dimoun pou vwar son prezans ler i pou egzekit zizman Zeova lo diferan eleman lemonn Satan. Destriksyon “sa Gran Rebel,” setadir bann sef relizye bann legliz swadizan Kretyen, pou donn ‘levidans son prezans.’ (Lir 2 Tesalonisyen 2:3, 8. *) Sa pou donn laprev konkret ki Kris pe azir konman sa Ziz ki Zeova in swazir. (Lir 2 Timote 4:1.) Bann larelizyon ki pli koupab dan Gran Babilonn ki pou ganny detrir premye e sa pou swiv par destriksyon total tou bann fo larelizyon. Zeova pou servi bann dirizan politik pour detrir sa prostitye senbolik. (Rev. 17:15-18) Se sa ki pou arive dan premye parti sa “gran ladetres.”—Mat. 24:21, NW.

14. (a) Akoz premye parti sa gran ladetres pou ganny akoursi? (b) Ki “siny Fis-de-Lonm” i vedir pour pep Zeova?

¹⁴ Zezi ti dir ki sa gran ladetres pou akoursi “akoz son pep ki in swazir,” andotmo, bann Kretyen swazir ki ankor lo later. (Mat. 24:22) Zeova pa pou permet ki sa latak lo larelizyon i detrir bann Kretyen swazir ek zot konpanyon lezot mouton. Zezi ti osi azoute ki “apre sa letan ladetres,” i pou annan siny dan soley, lalin ek zetwal, e “siny Fis-de-Lonm pou aparet dan lesyel.” Sa bann levennman pou fer bann nasyon lo later “lamante.” Me sa pa pou leka pour bann Kretyen swazir ki annan lespwar pour viv dan lesyel e zot konpanyon lezot mouton ki annan lespwar pour viv lo later. Zot pou “dres zot e lev zot latet anler, akoz zot delivrans i ava pe aprose.”—Mat. 24:29, 30; Lik 21:25-28.

15. Ki travay Kris pou fer ler i vini?

¹⁵ Avan ki i ranport laviktwar konplet, Fis-de-Lonm pou vin dan ankor en lot fason. I ti profetize: “Kan Fis-de-Lonm pou vini dan son laglwar avek tou son bann lanz, i pou asiz lo son tronn laglwar. Tou nasyon pou  ganny rasanble devan li e i pou separ zot an de group parey en berze i separ son mouton ek bann kabri. I pou met bann mouton lo son kote drwat e bann kabri lo son kote gos.” (Mat. 25:31-33) Sa pe refer avek ler Kris pou vini konman Ziz pour li separ bann dimoun dan “tou nasyon” dan de group: “bann mouton,” setadir sa bann ki’n aktivman siport son bann frer spirityel (bann Kretyen swazir lo later) e “bann kabri,” setadir sa “bann ki pa obei levanzil ki konsern nou Senyer Zezi.” (2 Tesa. 1:7, 8) Bann mouton, ki ganny dekrir konman “bann bon,” pou ganny “lavi eternel” lo later, me “bann kabri” zot, zot “pou al dan pinisyon eternel” ouswa ganny detrir konpletman.—Mat. 25:34, 40, 41, 45, 46.

Zezi i ranport laviktwar final

16. Dan ki fason Kris nou Sef pou konplet son laviktwar?

¹⁶ Kris pou kapab ale pour “ganny laviktwar” letan ki tou bann pret ek lerwa ki pou diriz ansanm avek li pou’n fini ganny sele e son bann mouton pou’n ganny plase dan son kote drwat pour ganny delivrans. (Rev. 5:9, 10; 6:2) Konman sa enn ki pou gid sa larme lanz pwisan e tre probab son bann frer ki pou’n ganny resisite, i pou detrir tou sistenm politik, militer e komersyal ki pour Satan isi lo later. (Rev. 2:26, 27; 19:11-21) Kris pou ranport laviktwar konplet kan i pou detrir move lemonn Satan. Apre sa, i pou met Satan ek son bann demon dan labim pour mil an.—Rev. 20:1-3.

17. Kote Kris pou diriz lezot mouton pandan sa Mil An ki i pou dirize e ki nou determinen pour fer?

¹⁷ Ler i ti pe koz lo sa “gran lafoul” lezot mouton ki pou sirviv gran ladetres, zapot Zan ti profetize ki “Lanyo ki omilye tronn pou vin zot berze e i pou gid zot kot sours delo ki donn lavi.” (Rev. 7:9, 17) Wi, pandan sa Mil An ki i pou rennyen, Kris pou kontinyen gid lezot mouton, ki vreman ekout son lavwa e donn zot lavi eternel. (Lir Zan 10:16, 26-28.) Annou touzour fidelman swiv nou Sef rwayal, la konmela e dan nouvo lemonn ki Zeova in promet!

[Not anba lo paz]

Revizyon

• Ki aksyon Zezi ti pran apre ki i ti’n ganny kouronnen?

• Lekel ki Zezi pe servi pour gid kongregasyon lo later?

• Ki lot fason ankor Kris nou Sef pou vini?

• Ki mannyer Kris pou kontinyen gid nou dan nouvo lemonn?

[Kestyon]

[Portre lo paz 32]

Destriksyon move lemonn Satan pou donn levidans prezans Kris