Parol agreab i promot bon relasyon

“Ki zot parol i touzour agreab.”—KOL. 4:6.

1, 2. Ki bon rezilta bon parol en frer ti anmennen?

EN FRER ti dir: “Pandan ki mon ti pe pres portanport, mon ti zwenn en msye ki ti vin sitan ankoler ki son lalev ek son lekor antye ti tranble. Byen kalm, mon ti esey rezonn avek li par servi Labib, me i ti vin pli ankoler ankor. Son madanm ek zanfan ti konmans ensilte mwan dan zot lakoler e mon ti konnen ki la ti lemoman pour mwan kit sa lakour. Avan ale, mon ti asir sa fanmir ki mon ti’n vin anpe e mon ti pou kontan al anpe. Mon ti montre zot sa verse dan Galat 5:22 ek 23 kot i koz lo lanmour, labonte, kontrol lo lekor ek lape. Apre sa, mon ti ale.

² “Pli tar ler mon ti pe vizit bann lakaz lot kote semen, mon ti vwar sa fanmir pe asize lo peron devan zot lakaz. Zot ti kriy mwan. Mon ti mazinen: ‘La ki arive ankor?’ Sa zonm ti annan en brok delo fre dan son lanmen e i ti ofer mwan pour bwar en pe. I ti demann leskiz pour son move konportman e felisit mwan pour mon lafwa for. Apre sa, nou ti fer sakenn pour li san gard okenn rankin.”

3. Akoz nou pa devret les lezot fer nou pran lakoler?

³ Dan sa lemonn konmela kot presyon i partou kote, i difisil pour pa zwenn bann dimoun ki ankoler, menm dan predikasyon. Me kan nou zwenn bann dimoun ki ankoler, i enportan ki nou demontre “labonte ek respe.” (1 Pyer 3:16) Si sa frer ki nou’n mansyonnen pli o ti les lakoler sa met lakour fer li pran lakoler li osi, eski latitid ek move konportman sa zonm ti pou’n sanze? Tre probab i ti pou’n vin pli pir. Lefet ki sa frer ti kontrol son lekor e koz bann parol agreab, sa ti anmenn bon rezilta.

Kwa ki fer en parol agreab?

4. Akoz i enportan pour servi parol agreab?

⁴ Ki swa nou pe koz avek bann dimoun an deor oubyen dan kongregasyon ouswa manm fanmir, i vreman enportan ki nou swiv konsey zapot Pol: “Ki zot parol i touzour agreab e enteresan.” (Kol. 4:6) Bann parol apropriye e enteresan koumsa i enportan pour ki i annan bon kominikasyon ek lape.

5. Ki bon kominikasyon pa vedir? Eksplike.

⁵ Bon kominikasyon pa zis vedir dir tou sa ki ou panse e santi nenport ki ler ou anvi, sirtou si ou ankoler. Labib i montre ki lakoler ki pa ganny kontrole pa pe endik en pwen for, me plito i en mark febles. (Lir Proverb 25:28; 29:11. *) En fwa, Moiz ki ti en “zonm ki ti annan plis limilite” parmi tou bann zonm ki ti egziste sa letan, ti les rebelyon nasyon Izrael fer li pran lakoler e pour fini kont i pa ti reisi rann glwar Bondye. Moiz ti fer kler son santiman, me sa pa ti fer plezir Zeova. Apre ki i ti’n gid bann Izraelit pour 40 an, Moiz pa ti ganny sa privilez pour fer zot antre dan Later Promiz.—Nom. 12:3; 20:10, 12; Ps. 106:32.

6. Akoz nou devret veye ki nou dir?

⁶ Labib i demann nou pour kontrol nou fason koze e veye ki nou dir ouswa koz avek bon zizman. “Dan en kantite parol sa ki mal  pa manke, me sa enn ki vey son labous i pridan.” (Prov. 10:19; 17:27) Par kont, sa pa vedir ki nou pa devret zanmen eksprim nou lekor. O kontrer nou devret koz dan en fason “agreab” e servi nou lalang pour geri e non pa pour fer ditor.—Lir Proverb 12:18; 18:21. *

“En letan pour reste trankil e en letan pour koze”

7. Kwa ki pa devret ganny dir e akoz?

⁷ Zis parey nou devret koz parol agreab e veye ki nou dir bann dimoun kot travay ouswa sa ki nou zwenn dan predikasyon, nou bezwen osi fer parey dan kongregasyon e kot lakour. Si nou tir lakoler san enterese avek lefe ki i kapab annan, sa i kapab afekte nou ek lezot spirityelman, emosyonnelman e fizikman. (Prov. 18:6, 7) Nou annan bann move santiman akoz nou enparfe, me zot devret ganny kontrole. Parol blesant, sikannri, laenn e abes lezot, i move. (Kol. 3:8; Zak 1:20) Zot kapab detrir sa relasyon presye ki nou annan avek lezot dimoun e Zeova osi. Zezi ti ansennyen: “Tou sa ki pran lakoler avek son frer pou ganny anmenn devan lakour; sa ki ensilte son frer pou ganny anmenn devan Konsey Siperyer; sa ki dir son frer: ‘Enbesil!’ i merit ganny pini dan dife [“zeen,” NW].”—Mat. 5:22.

8. Kan ki nou merit eksprim nou santiman e dan ki fason?

⁸ Me dan serten sirkonstans, bon kominikasyon i sa pli bon keksoz pour fer. Si en frer in dir ouswa fer en keksoz ki fatig ou ziska en degre ki ou pa pe kapab les pase; pa les laenn devlope dan ou leker. (Prov. 19:11) Si en dimoun i provok ou lakoler, kontrol ou santiman e apre sa, pran bann pa neseser pour regle sa problenm. Pol ti ekrir: “Pa les zot lakoler dire ziska aswar.” Vi ki sa problenm pou kontinyen fatig ou, regle li zantiman dan sa bon moman. (Lir Efezyen 4:26, 27, 31, 32.) Koz fran avek ou frer lo sa problenm, me fer li avek ladouser, avek bi pour zot rekonsilye.—Lev. 19:17; Mat. 18:15.

9. Akoz nou devret kontrol nou lemosyon avan apros lezot?

⁹ Byensir, ou bezwen fer sir ou byen swazir sa bon moman. I annan “en letan pour reste trankil e en letan pour koze.” (Ekle. 3:1, 7) Deplis, “leker sa enn ki drwat i reflesir pour kapab reponn.” (Prov. 15:28) Sa i kapab vedir ki ou pou bezwen esper en pe letan avan koz lo sa problenm. Si en dimoun i koz lo en problenm ler i ankor ankoler, sa i kapab fer keksoz vin pli pir, me i pa bon osi pour esper tro bokou letan.

Bon aksyon i promot bon relasyon

10. Ki mannyer bon aksyon i kapab amelyor bann relasyon?

¹⁰ Parol agreab ek bon kominikasyon i ede pour batir e gard lape. Anfet, si nou fer tou sa ki nou kapab pour amelyor nou relasyon avek lezot, nou pou annan en pli bon kominikasyon avek zot. Si nou senserman pran linisyativ pour fer bann bon keksoz anver lezot, setadir rod loportinite pour ede, donn zot en kado avek tou nou leker ouswa demontre lospitalite, sa i kapab ede pour devlop en bon kominikasyon avek sa dimoun. I kapab ede pour “met labrez” lo latet sa dimoun e fer sorti son bann bon kalite, e i pou pli fasil pour rezourd en problenm.—Rom. 12:20, 21, NW.

11. (a) Ki Zakob ti fer pour aranz keksoz avek Ezai? (b) Ki rezilta sa ti anmennen?

¹¹ Patrias Zakob ti konpran sa tre byen. Son frer zimo Ezai ti sitan ankoler avek li ki Zakob ti bezwen sove akoz i ti per pangar Ezai i touy li. Apre plizyer lannen Zakob ti retournen. Ezai ti vin zwenn li avek 400 zonm. Zakob ti priye pour ganny led Zeova. Apre sa i ti an voy zannimo pour Ezai konman kado. Sa ti anmenn bon rezilta. Kan zot ti zwenn kanmarad, latitid Ezai ti’n sanze, i ti taye e anmay Zakob.—Zen. 27:41-44; 32:6, 11, 13-15; 33:4, 10.

Ankouraz lezot avek parol agreab

12. Akoz nou devret servi parol agreab avek nou bann frer ek ser?

¹² Bann Kretyen i servi Bondye e pa lezot imen. Kantmenm sa, nou ti pou osi kontan ganny laprouvasyon lezot. Nou bann parol agreab i kapab fer fardo nou frer ek ser vin pli leze. Par kont, kritik i kapab fer zot fardo pli lour e menm fer serten mazinen si zot in perdi laprouvasyon Zeova. Alor, avek senserite annou koz bann keksoz ankourazan, “bann parol itil ki kapab ed lezot pour progrese dan zot lafwa e kan i neseser pour fer dibyen sa ki ekoute.”—Efe. 4:29.

13. Ki bann ansyen i devret gard antet (a) kan zot pe donn konsey? (b) kan pe ekrir en let?

¹³ Bann ansyen sirtou i devret demontre “labonte” e tret troupo avek ladouser. (1 Tesa. 2:7, 8) Kan i neseser pour bann ansyen donn konsey, zot bi se pour fer li “avek douser,” menm kan zot pe koz avek bann ki ‘opoz zot’ ouswa pa pare pour aksepte konsey. (2 Tim. 2:24, 25) Bann ansyen i devret osi demontre ladouser kan zot pe ekrir en lot konsey ansyen ouswa biro brans. Anliny avek sa ki nou lir dan Matye 7:12, zot devret zantiy e servi bon zizman.

Servi parol agreab dan fanmir

14. Ki konsey Pol i donn bann msye marye e akoz?

¹⁴ I fasil pour souzestim lefe ki nou parol, lekspresyon lo figir ek zes ki nou fer i kapab annan lo lezot. Par egzanp, serten zonm pa touzour konsyan ki kantite lefe zot parol i annan lo bann madanm. En ser ti dir: “Mon vreman per kan mon msye i kriy avek mwan.” Parol blesant i kapab annan en pli gro lefe lo en madanm ki lo en zonm e sa madanm i kapab rapel sa parol pour en bon pe letan. (Lik 2:19) Son lefe i pli for kan sa parol i ganny dir par en dimoun ki sa madanm i kontan e anvi respekte. Pol ti konsey bann msye marye pour kontinyen “kontan zot madanm e pa tret zot dir.”—Kol. 3:19.

15. Donn legzanp lo lafason ki en msye marye i devret tret son madanm.

¹⁵ Anliny avek sa parol, en frer eksperyanse ki’n marye i montre akoz en msye i devret tret son madanm zantiman konman en vesel pli feb. I ti dir: “Kan ou tyonbo en keksoz presye e delika, ou pa devret pez lo la tro for parski i pou fele. Menm si ou repar li, ou pou touzour remark sa fele. Si en msye i servi bann parol dir avek son madanm, i kapab bles li. Sa i kapab afekte zot relasyon.”—Lir 1 Pyer 3:7.

16. Ki mannyer en madanm i kapab batir son fanmir?

¹⁶ Bann zonm osi i kapab swa ganny ankouraze ouswa dekouraze avek parol ki lezot i dir, menm avek parol zot madanm. “En madanm pridan” ki son msye i kapab vreman “met konfyans” dan li i pran konsiderasyon santiman son msye, zis parey i ti pou anvi son msye i pran pour li. (Prov. 19:14; 31:11) Vreman alor, en madanm marye i annan en bon ouswa move lenfliyans lo en serten degre dan en fanmir. En proverb i dir: “En madanm ki vreman saz in konstrir son lakaz, me sa enn ki bet i kas sa lakaz avek son prop lanmen.”—Prov. 14:1.

17. (a) Ki mannyer bann zenn i devret adres zot paran? (b) Ki mannyer bann ki pli gran i devret adres bann zenn e akoz?

¹⁷ Pareyman, paran ek zanfan i devret koz avek kanmarad avek ladouser. (Mat. 15:4) Kan pe koz avek bann ki pli zenn, refleksyon avan koze pou anpese ki nou “provok zot” ouswa ‘eksit zot lakoler.’ (Kol. 3:21; Efe. 6:4) Menm si zanfan i merit ganny disiplinen,  paran ek ansyen i devret koz avek zot avek respe. Dan sa fason, zot pou fer li pli fasil pour bann zenn swiv sa bon semen e gard zot relasyon avek Bondye. Sa i pli bon ki donn lenpresyon ki zot pa pou zanmen kapab reisi e finalman i kapab ki zot pou santi koumsa zot osi. I kapab ki bann zenn pa pou rapel tou konsey ki zot gannyen, me zot pou sirman rapel lafason ki lezot ti koz avek zot.

Koz bon keksoz sorti dan leker

18. Ki mannyer nou kapab fer disparet bann move panse ek santiman?

¹⁸ Kontrol lakoler i pa zis en zafer aranz figir pour fer li paret kalm. Nou devret annan sa bi pour fer plis ki zis apez nou lakoler. Si nou esey reste kalm an deor me anndan nou nou pe bwi avek lakoler, sa pou met bokou presyon lo nou. I konmsi ou pe pez fren en transpor ansanm avek akselerasyon. Sa i met en kantite presyon lo sa loto e koz en kantite domaz. Alor, pa bezwen gard ou lakoler e les li eksploze pli tar. Priy Zeova pour li ed ou retir bann move santiman dan ou. Les lespri sen Zeova transform ou lespri ek leker pour ki i anliny avek son lavolonte.—Lir Romen 12:2; Efezyen 4:23, 24.

19. Kwa ki devret ganny fer pour ed nou evit bann konfrontasyon serye?

¹⁹ Pran aksyon. Si ou vwar ou dan en sityasyon kot ou santi ou irite e santi ki ou lakoler pe monte dan ou, i kapab ede si ou kit sa landrwa akoz sa pou donn ou letan pour kontrol ou santiman. (Prov. 17:14) Si sa dimoun ou pe koz avek i konmans ankoler, fer en zefor an plis pour koz avek ladouser. Mazin byen: “En larepons, letan i ganny donnen avek ladouser, i kalmi lakoler, me en parol ki koz douler i fer monte lakoler.” (Prov. 15:1) En move remark ouswa enn ki dir pou zis azout bennzin dan dife, menm si i ganny dir zantiman. (Prov. 26:21) Alor, kan en sityasyon i teste si ou annan kontrol lo ou lekor, “pran letan avan koze, avan pran lakoler.” Priye pour ki lespri sen Zeova i ed ou dir bann bon keksoz e non pa sa ki move.—Zak 1:19.

Pardonn avek tou ou leker

20, 21. Kwa ki pou ed nou pardonn lezot e akoz nou devret fer li?

²⁰ I malere pour dir ki napa enn parmi nou ki kapab kontrol son lalang dan en fason parfe. (Zak 3:2) Malgre sa kantite zefor ki zot fer, parfwa i kapab arive ki menm nou fanmir e nou bann frer ek ser spirityel i dir en keksoz ki bles nou santiman. Olye taye pour pran lakoler, analiz avek pasyans akoz zot in dir sa ki zot in dir. (Lir Eklezyast 7:8, 9. *) Eski zot ti anba presyon, per, pa santi zot byen ouswa pe lite avek en kek problenm?

²¹ Sa bann pwen pa pe eskiz bann tel aksyon, me si nou rekonnet zot, sa i kapab ede pour konpran akoz dimoun parfwa i dir oubyen fer bann keksoz ki zot pa devret, e sa pou pous nou pour pardonn zot. Nou tou nou’n dir e fer bann keksoz ki’n bles lezot e nou swete ki zot pardonn nou. (Ekle. 7:21, 22) Zezi ti dir ki pour nou ganny pardonnen avek Bondye fodre absoliman nou pardonn lezot. (Mat. 6:14, 15; 18:21, 22, 35) Alor, nou  devret deswit pare pour demann leskiz e vitman pardonn lezot, akoz sa pou mentenir lape “ki soud tou keksoz parfetman ansanm dan larmoni” dan fanmir e dan kongregasyon.—Kol. 3:14.

22. Akoz zefor pour koz parol agreab i vo lapenn?

²² Difikilte ki menas nou lazwa ek linite pou sirman ogmante anmezir sa lemonn kot dimoun i ankoler vitman i ariv ver son lafen. Si nou aplik bann prensip dan Parol Bondye, sa pou ed nou pour servi nou lalang dan en bon fason olye dan en move fason. Nou pou annan en relasyon pli anpe dan kongregasyon e dan fanmir, e nou legzanp pou rann en bon temwannyaz lo Zeova nou “Bondye ere.”—1 Tim. 1:11, NW.

[Not anba lo paz]

Eski ou kapab eksplike?

• Akoz i enportan pour swazir en bon moman pour diskit en problenm?

• Akoz manm lafanmir i devret touzour koz parol “agreab” avek kanmarad?

• Ki mannyer nou kapab evite dir bann parol blesant?

• Kwa ki pou ed nou pour pardonn lezot?

[Kestyon]