Ansenny ou zanfan

Zeremi pa ti abandonnen

ESKI parfwa ou santi ou dekouraze e anvi aret dan semen?— * Bokou dimoun i santi koumsa. Zeremi ti en zenn ki ti santi koumsa. Me i pa ti les sa ki lezot ti fer ouswa dir fer li abandonnen. Annou vwar konman ki Zeremi ti en dimoun spesyal pour Bondye, me pourtan li osi i ti santi ki i ti anvi abandonnen.

Avan ki Zeremi ti ne, Zeova, sa vre Bondye ti swazir li pour vin en profet pour ki i kapab averti lepep ki zot pa ti pe fer plezir Bondye. Eski ou konnen ki Zeremi ti dir Zeova detrwa lannen pli tar?— “Vreman, mon pa konn koze, akoz mon ankor tro zenn.”

Ki ou krwar Zeova ti dir Zeremi?— Dan en fason byen zantiy e ferm, i ti dir: “Pa dir, ‘mon ankor zenn.’ Me kot tou sa bann ki mon pou anvoy ou, ou pou ale e tou sa ki mon pou dir ou, ou pou dir. Pa per.” Akoz? Zeova ti dir: “Mon avek ou pour delivre ou.”—Zeremi 1:4-8.

Me kantmenm sa, parey nou’n vwar pli boner, Zeremi ti dekouraze pli tar. Sa ti akoz i ti ganny sikannen akoz i ti pe servi Bondye. I ti dir: ‘Tou dilon lazournen bann dimoun i riy mwan e sikann mwan.’ Alor i ti deside pour abandonnen. I ti dir: “Mon pa pou mansyonn [Zeova], e mon pa pou koz ankor lo son non.” Me eski i ti vreman abandonnen?

Zeremi ti dir: ‘Dan mon leker, parol Zeova ti parey en dife ki pe brile anndan dan mon lezo, e mon ti fatige gard anndan.’ (Zeremi 20:7-9) Menm si parler Zeremi ti per, i pa ti abandonnen akoz lanmour ki i ti annan pour Zeova. Annou vwar ki mannyer Zeremi ti ganny proteze lefet ki i pa ti abandonnen.

Zeova ti dir Zeremi averti bann dimoun ki Zerizalenm ti pou ganny detrir si zot pa ti sanz zot move mantalite. Kan Zeremi ti donn sa lavertisman, bann dimoun ti ankoler e dir: “Zizman pour sa zonm se lanmor.” Me Zeremi ti sipliy zot pour “obeir lavwa Zeova.” Apre sa i ti dir:  ‘Zot devret konnen ki si zot touy mwan, zot pe touy en zonm inosan akoz Bondye ki’n anvoy mwan pour koz avek zot.’ Ou konnen ki ti arive apre?—

Labib i dir: “Bann prens ek lepep antye ti dir bann pret ek profet: ‘Sa zonm pa merit en santans lanmor akoz i’n koz avek nou o non Zeova nou Bondye.’” Sa i montre ki Zeova ti protez Zeremi ler i pa ti les lafreyer fer li abandonnen. Aprezan, annou vwar ki ti arive avek Ouriya, en lot profet Zeova ki pa ti azir parey.

Labib i dir: ‘Ouriya ti kontinyen profetiz kont Zerizalenm par servi menm parol avek Zeremi.’ Eski ou konnen ki Ouriya ti fer kan Lerwa Yeoyakim ti ankoler avek li?— I ti per, aret fer lavolonte Bondye, sove e al Lezip. Alor lerwa ti anvoy bann zonm laba pour rod li e retourn avek li. Ou konnen ki sa move lerwa ti fer ler zot ti retourn avek Ouriya?— I ti touy li avek en lepe!—Zeremi 26:8-24.

Akoz ou krwar Zeova ti protez Zeremi me i pa ti protez Ouriya?— Bon, i kapab ki Zeremi osi ti per parey Ouriya, me Zeremi pa ti aret servi Zeova e sove. I pa ti abandonnen. Ki leson ou krwar nou kapab aprann avek legzanp Zeremi?— I kapab arive parler kot nou vwar li difisil pour fer sa ki Bondye i demande, me nou devret touzour annan konfyans dan li e obeir li.

[Not anba paz]

KESTYON:

▪ Ki travay Bondye ti swazir pour Zeremi?

▪ Akoz Zeremi ti santi i anvi abandonnen?

▪ Akoz Zeremi ti ganny proteze me Ouriya pa ti ganny proteze?

▪ Ki ou’n aprann avek legzanp Zeremi?