Akfer dedye ou lavi avek Zeova?
Akfer dedye ou lavi avek Zeova?
“Pandan lannwit, en lanz mon Bondye ki mon servi ti apros mwan.”—AKT 27:23.
1. Ki pa bann ki prezant zot lekor pour ganny batize in deza fini pran e ki kestyon ki ganny souleve konsernan sa?
“LO BAZ sakrifis Zezi Kri, eski ou’n repantir ou bann pese e dedye ou lekor avek Zeova pour fer son lavolonte?” Sa i enn parmi sa de kestyon ki bann kandida batenm i reponn a lafen diskour batenm. Akoz bann Kretyen i merit dedye zot lavi avek Zeova? Ki byenfe nou gannyen ler nou dedye nou lavi avek Bondye? Akoz en dimoun ki pa’n dedye son lavi avek Bondye pa kapab ador li dan en fason akseptab? Pour konpran larepons sa bann kestyon, premyerman nou devret vwar ki si sa dedikasyon.
2. Ki savedir dedye nou lekor avek Zeova?
2 Ki savedir dedye ou lavi avek Bondye? Remarke konman zapot Pol ti dekrir son relasyon avek Bondye. Devan en kantite dimoun ki ti abor en bato ki ti an danze, i ti apel Zeova “mon Bondye ki mon servi” ouswa orizinalman dan langaz Grek “sa Bondye ki mon pour li.” (Lir Akt 27:22-24.) Tou vre Kretyen i pour Zeova. Sa i lekontrer avek lemonn an zeneral ki “dan pouvwar dyab.” (1 Zan 5:19) Bann Kretyen i vin pour Zeova kan zot dedye zot lavi dan en fason akseptab avek li dan lapriyer. Sa kalite dedikasyon i en ve personnel. Apre, sa dimoun i ganny batize dan delo.
3. Ki batenm Zezi ti senbolize e ki mannyer son bann disip i kapab imit son legzanp?
3 Zezi ti kit en legzanp pour nou kan i ti personnelman swazir pour fer lavolonte Bondye. Vi ki i ti ne dan nasyon Izrael ki ti deza en pep dedye, li osi i ti deza dedye avek Bondye. Kantmenm sa, zour son batenm, i ti fer en keksoz an plis ki sa ki lalwa ti demande. Parol Bondye i montre ki i ti dir: “La mon la, mon vin fer ou volonte, mon Bondye.” (Ebr. 10:7; Lik 3:21) Alor batenm Zezi ti pe senboliz son dedikasyon personnel avek Bondye pour fer lavolonte son Papa. Son bann disip i imit son legzanp kan zot ofer zot lekor pour ganny batize. Par kont, dan zot ka, batenm dan delo i en laprev devan piblik ki zot in personnelman dedye zot lavi avek Bondye dan lapriyer.
Konman dedikasyon i benefisye nou?
4. Ki sa lanmitye ant David ek Yonatann i ansenny nou lo langazman?
4 Dedikasyon en Kretyen i en keksoz vreman serye. I plis ki en senp langazman. Me ki mannyer dedye nou lavi i kapab benefisye nou? Pour pli byen konpran, annou egzaminen ki mannyer langazman dan relasyon ant bann imen i anmenn byenfe. Lanmitye i en legzanp. Pour apresye sa privilez pour annan en zanmi, ou bezwen aksepte sa responsabilite pour ou menm vin en zanmi. Sa i enplik en langazman, ou santi ou oblize pour pran swen avek ou zanmi. Enn parmi bann lanmitye pli remarkab ki ganny dekrir dan Labib i sa enn ant David ek Yonatann. Zot ti menm fer en lalyans lanmitye avek kanmarad. (Lir 1 Samyel 17:57; 18:1, 3. *) Menm si lanmitye avek sa kalite langazman i vreman rar, laplipar lanmitye i vin solid kan sa de dimoun i devoue anver kanmarad ouswa santi en lobligasyon pour sa lot dimoun.—Prov. 17:17; 18:24.
5. Ki mannyer en lesklav ti kapab benefisye dan en fason permanan kan i ti vin pour en bon met?
5 Lalwa ki Bondye ti donn Izrael i dekrir en lot relasyon kot bann dimoun ti benefisye kan zot ti fer en langazman. Si en lesklav ti anvi reste avek en bon met pour touzour akoz i oule benefisye avek sekirite ki sa i anmennen, i ti kapab fer en lagreman permanan avek li. Lalwa ti dir: “Si sa lesklav i ensiste an dizan, ‘Mon vreman kontan mon met, mon madanm ek mon bann garson; Mon pa anvi ganny libere,’ alor, son met i devret anmenn li devan sa vre Bondye e i devret anmenn li o bor laport oubyen o bor lankadreman laport. Son met i devret pers son zorey avek en keksoz pwent, e i devret vin son lesklav pour en letan endefini.”—Egz. 21:5, 6.
6, 7. (a) Ki mannyer langazman i benefisye en dimoun? (b) Ki sa i endike lo nou relasyon avek Zeova?
6 Maryaz i en relasyon ki enplik en langazman serye. I en langazman ki ganny fer avek en dimoun e non pa avek en bout papye. De dimoun ki senpleman reste ansanm san marye pa pou zanmen kapab annan vre sekirite; ni menm zot zanfan. Me de dimoun ki fer en langazman ansanm atraver en maryaz onorab, zot annan tou rezon dapre Labib pour fer bokou zefor pour rezourd bann problenm avek lanmour kan problenm i leve.—Mat. 19:5, 6; 1 Kor. 13:7, 8; Ebr. 13:4.
7 Dan letan lontan, bann dimoun ti benefisye kan zot ti fer en kontra valid dan biznes ouswa dan lanplwa. (Mat. 20:1, 2, 8) Ozordi osi i leka. Par egzanp, nou benefisye kan nou siny en lagreman oubyen kontra avan konmans en biznes ouswa konmans travay konman en anplwaye dan en lakonpannyen. Alor, si lagreman i ranforsi lanmitye, maryaz ek relasyon dan domenn lanplwa, eski pa en dedikasyon san kondisyon avek Zeova pou benefisye nou dan nou relasyon avek li! Annou aprezan vwar ki mannyer bann dimoun dan lepase ti benefisye ler zot ti dedye zot lavi avek Zeova e konman sa ti plis ki zis en lagreman.
Dedikasyon avek Bondye ti benefisye Izrael
8. Ki dedikasyon avek Bondye ti vedir pour Izrael?
8 Nasyon Izrael an zeneral ti vin en pep dedye avek Zeova kan zot ti fer en ve avek Li. Zeova ti fer zot rasanble pros avek Montanny Sinai e dir zot: “Si zot pou strikteman obeir mon lavwa e pou vreman gard mon lalyans, alor zot pou sirman vin mon propriyete spesyal parmi tou lezot pep.” Lepep antye ti dakor e dir: “Tou sa ki Zeova in dir nou pare pour fer.” (Egz. 19:4-8) Dedikasyon Izrael ti enplik plis ki dakor pour fer en serten keksoz. I ti vedir ki zot ti pour Zeova e Zeova ti tret zot konman son “propriyete spesyal.”
9. Ki mannyer bann Izraelit ti benefisye lefet ki zot ti dedye zot lekor avek Bondye?
9 Bann Izraelit ti benefisye lefet ki zot ti pour Zeova. I ti fidel e pran swen avek zot parey en paran ki annan lanmour i pran swen avek son zanfan. Bondye ti dir Izrael: “Eski en madanm i kapab oubliy son pti baba, e i pa ava pran pitye pour garson sorti dan son vant? Kantmenm sa bann madanm i kapab oubliye, me mwan mon pa pou oubliy ou.” (Iza. 49:15) Zeova ti gid zot atraver Lalwa, i ti anvoy bann profet pour ankouraz zot ek bann lanz pour protez zot. En psalmis ti ekrir: “I pe dir Zakob son parol, e Izrael son bann regilasyon ek son zizman. I pa’n fer sa ni pour lezot nasyon.” (Ps. 147:19, 20; lir Psonm 34:7, 19; 48:14. *) Zeova ti pran swen avek sa nasyon ki ti pour li dan lepase e pareyman i pou pran swen avek sa bann ki dedye zot lavi avek li ozordi.
Akoz nou devret dedye nou lavi avek Bondye
10, 11. Eski nou’n ne dan fanmir iniversel Bondye? Eksplike.
10 Ler pe mazin lo dedikasyon en Kretyen ouswa batenm, serten i kapab demande: ‘Akoz mon pa kapab servi Bondye san ki mon dedye mon lavi avek li?’ Larepons i vin pli kler kan nou egzamin larealite konsernan nou pozisyon devan Bondye. Mazinen, akoz pese Adan, nou tou nou’n ne an deor lafanmir Bondye. (Rom. 3:23; 5:12) Dedye nou lavi avek Bondye i en rekomandasyon enportan pour ganny aksepte dan sa fanmir iniversel. Annou vwar akoz.
11 Napa enn parmi nou ki annan en papa ki kapab donn nou lavi eternel parey Bondye ti’n plàn. (1 Tim. 6:19) Nou pa’n ne konman bann garson Bondye, akoz kan premye koup imen ti fer pese, bann imen ti ganny separe avek zot Papa lanmour ek Kreater. (Konpar Deterononm 32:5.) Depi sa letan, bann imen an zeneral ki elwannyen avek Bondye in viv an deor lafanmir iniversel Zeova.
12. (a) Ki mannyer bann imen enparfe i kapab vin en manm dan fanmir Bondye? (b) Ki pa ki devret ganny pran avan batize?
12 Toutfwa, endividyelman Bondye i kapab aksepte nou dan son fanmir konman son serviter ki annan son laprouvasyon. * Ki mannyer sa i posib pour nou bann imen ki fer pese? Zapot Pol ti ekrir: “Kan nou ti ankor lennmi Bondye, nou ti ganny rekonsilye avek li par lanmor son Garson.” (Rom. 5:10) Zour batenm, nou fer en demann avek Bondye pour annan en konsyans kler pour ki nou akseptab devan li. (1 Pyer 3:21) Me avan batenm, i annan bann pa ki merit ganny pran. Nou devret aprann konn Bondye, aprann annan konfyans dan li, repantir e sanz nou mannyer viv. (Zan 17:2, 3; Akt 3:19; Ebr. 11:6) I annan ankor en lot keksoz ki devret ganny fer avan nou kapab ganny aksepte dan fanmir Bondye. Kwa sa?
13. Akoz i byen pour en dimoun dedye son lavi atraver en ve pour li kapab form parti fanmir bann adorater Bondye?
13 Avan ki en dimoun ki elwannyen avek Bondye i kapab vin en manm fanmir Bondye konman en serviter ki’n ganny son laprouvasyon, premyerman i pou bezwen fer en promes serye avek Zeova. Pour konpran akoz, mazin en papa respektab ki demontre lentere dan en zenn orfelen e swete pour adopte li konman en manm son fanmir. Sa zonm i renonmen konman en bon dimoun. Kantmenm sa, avan aksepte sa zenn konman son garson, sa zonm i anvi ki sa garson i fer en promes. Alor sa zonm i dir: “Avan mon aksepte ou konman mon garson, mon bezwen konnen si ou pou kontan mwan e respekte mwan konman ou papa.” Pour sa zenn kapab ganny aksepte dan fanmir sa zonm, i pou bezwen pare pour fer en promes serye. Eski pa sa i rezonnab? Pareyman, Zeova i aksepte dan son fanmir sa bann ki pare pour dedye zot lavi atraver en ve. Labib i dir: “Ofer ou lekor avek li: en sakrifis vivan, dedye e ki i kapab aksepte.”—Rom. 12:1, The New English Bible.
Lanmour ek lafwa i prouv nou dedikasyon
14. Dan ki fason dedikasyon i en fason pour demontre lanmour?
14 Dedye nou lavi avek Bondye atraver en ve i en fason pour demontre nou lanmour senser pour Zeova. Dan serten fason i parey en ve maryaz. En nouvo marye ki en Kretyen i eksprim son lanmour par fer en ve pour reste fidel avek son madanm malgre nenport kwa ki arive. I en serman avek en dimoun olye zis en promes pour fer en keksoz. En nouvo marye ki en Kretyen i konpran ki i pa pou kapab reste avek son madanm san ki i fer en ve maryaz. Pareyman, nou pa kapab apresye tou byenfe pour form parti fanmir Bondye san ki nou dedye nou lavi avek Bondye atraver en ve. Alor nou dedye nou lavi avek Bondye akoz nou annan sa dezir pour vin pour li e determinen pour reste fidel avek li malgre nou lenperfeksyon e nenport kwa ki kapab arive.—Mat. 22:37.
15. Dan ki fason dedikasyon i en fason pour demontre lafwa?
15 Kan nou dedye nou lavi avek Bondye, nou montre ki nou annan lafwa. Ki mannyer? Nou lafwa dan Zeova i fer nou annan konfyans ki apros avek Bondye i bon pour nou. (Ps. 73:28) Nou konnen ki i pa pou touzour fasil pour mars avek Bondye anmezir ki nou viv parmi “en zenerasyon koronpi e visye,” me nou annan konfyans dan promes ki Bondye in fer pour siport nou dan nou zefor. (Fili. 2:15; 4:13) Nou konnen nou enparfe, me nou konfidan ki Zeova pou demontre mizerikord anver nou kan nou fer bann fot. (Lir Psonm 103:13, 14 *; Romen 7:21-25.) Nou annan konfyans ki Zeova pou rekonpans nou si nou determinen pour gard nou lentegrite.—Zob 27:5.
Dedikasyon avek Bondye i anmenn boner
16, 17. Akoz dedye nou lavi avek Zeova i anmenn lazwa?
16 Dedye nou lavi avek Bondye i anmenn lazwa akoz i enplik ofer li nou lekor. Zezi ti koz lo sa laverite debaz kan i ti dir: “I annan plis lazwa pour donnen ki pour resevwar.” (Akt 20:35) Pandan son minister lo later, Zezi ti totalman eksperyans sa lazwa. Kan i ti neseser, i pa ti repoze, manze e refiz konfor pour li kapab ed lezot pour trouv sa semen lavi. (Zan 4:34) Zezi ti trouv plezir pour rezwir leker son Papa. Zezi ti dir: “Mon touzour fer sa ki fer li plezir.”—Zan 8:29; Prov. 27:11.
17 Zezi ti pe koz lo en lavenir satisfezan pour son bann disip kan i ti dir: “Si en dimoun i oule vin avek mwan, fodre ki i aret mazin zis li menm.” (Mat. 16:24) Si nou fer sa nou pou vin pli pros avek Zeova. Eski nou kapab plas nou lekor dan lanmen en lot dimoun ki pou pli byen pran swen avek nou avek lanmour?
18. Akoz viv an armoni avek nou dedikasyon avek Zeova i anmenn plis lazwa ki dedye nou lavi avek en keksoz ouswa en lot dimoun?
18 Dedye nou lavi avek Zeova e apre sa viv an armoni avek nou dedikasyon par fer son lavolonte pou anmenn plis lazwa ki kan nou dedye nou lekor avek en keksoz ouswa en lot dimoun. Par egzanp, bokou dimoun i dedye zot lavi pour pourswiv larises materyel san ganny sa vre boner ek satisfaksyon. Par kont, sa bann ki dedye zot lavi avek Zeova zot ganny en lazwa ki dirab. (Mat. 6:24) Sa loner ki zot annan pour “travay ansanm avek Bondye” i fer zot ere e deplis zot pa pe dedye zot lekor pour en travay, me zot dedye zot lekor avek Bondye. (1 Kor. 3:9, NW) Napa personn ankor ki pli apresye zot sakrifis ki li. I pou menm fer son bann serviter fidel revin zenn ankor pour ki zot benefisye avek son swen pour touzour.—Zob 33:25; lir Ebre 6:10.
19. Ki privilez sa bann ki’n dedye zot lavi avek Zeova i annan?
19 Dedye ou lavi avek Zeova i fer ou annan en relasyon pli pros avek Li. Labib i dir: “Apros avek Bondye, e i ava apros avek zot.” (Zak 4:8; Ps. 25:14) Dan lartik ki swiv, nou pou vwar akoz nou kapab annan konfyans kan nou swazir pour vin pour Zeova.
[Not anba lo paz]
^ par. 4 1 Samyel 17:57; 18:1, 3: “Desito ki David ti retournen apre ki i ti’n ranport laviktwar lo bann Filisten dan lager, Abner ti pran li e anmenn li devan Sail; dan son lanmen i ti annan latet en Filisten.” “Yonatann ti vin atase avek David e Yonatann ti konmans kontan David parey li menm. Alor, Yonatann ek David ti fer en lalyans, akoz i ti kontan li parey li menm.”
^ par. 9 Psonm 34:7, 19; 48:14: “Lanz Zeova pe kanpe toultour bann ki annan lakrent pour li, e i sov zot. En dimoun drwat i rankontre bokou maler, me Zeova i delivre li dan tou sa bann maler.” “Parski sa Bondye i nou Bondye pour en letan endefini, wi pour touzour. Li menm ki pou gid nou ziska nou lanmor.”
^ par. 12 “Lezot mouton” Zezi pa pou vin bann garson Bondye ziska lafen sa mil an. Par kont, vi ki zot in dedye zot lavi avek Bondye, zot kapab adres Bondye dan en fason apropriye konman “Papa” e kapab ganny konsidere konman bann manm lafanmir bann adorater Zeova.—Zan 10:16, NW; Iza. 64:8; Mat. 6:9; Rev. 20:5.
^ par. 15 Psonm 103:13, 14: “Parey en papa i demontre mizerikord anver son bann garson, Zeova in demontre mizerikord anver bann ki annan lakrent pour li. Parski li i konn byen avek ki nou’n ganny formen, i mazinen ki nou lapousyer.”
Ki ou pou reponn?
• Ki savedir dedye nou lavi avek Zeova?
• Ki mannyer nou benefisye kan nou dedye nou lavi avek Bondye?
• Akoz bann Kretyen i bezwen dedye zot lavi avek Zeova?
[Kestyon]
[Portre lo laz 12]
Viv an armoni avek nou dedikasyon i anmenn lazwa eternel