“Lizye kler” Zeova i egzamin tou keksoz
“Lizye kler” Zeova i egzamin tou keksoz
“Lizye kler [Zeova] i egzamin bann garson zonm.”—PS. 11:4.
1. Anver ki kalite dimoun nou santi nou pli atire?
KI MANNYER ou santi anver bann dimoun ki pran en lentere senser dan ou? Zot reponn onnetman kan ou demann zot lopinyon. Kan ou bezwen led zot touzour pare pour ed ou. Kan ou bezwen konsey zot donn ou sa konsey avek lanmour. (Ps. 141:5; Gal. 6:1) Pa ou vreman santi ou atire anver bann tel dimoun? Zeova ek son Garson i koumsa. Anfet, zot demontre plis lentere dan ou ki okenn imen e kan zot ed ou zot fer li san okenn dezir egois akoz zot anvi ed ou “ganny vre lavi.”—1 Tim. 6:19; Rev. 3:19.
2. Ziska ki degre Zeova i enterese avek son bann serviter?
2 Psalmis David ti eksprim lentere senser ki Zeova i annan dan nou kan i ti dir: “Lizye [Zeova] i gete, son lizye kler i egzamin bann garson zonm.” (Ps. 11:4) Wi, Bondye pa zis get nou me i egzamin nou. David ti osi ekrir: “Ou’n egzamin mon leker, ou’n fer lenspeksyon dan lannwit. . . . Ou pou vwar ki mon pa’n fer konplo.” (Ps. 17:3) I kler ki David ti konnen ki Zeova ti annan en lentere senser dan li. I ti konnen ki si i nouri son lespri avek bann move panse ouswa devlop en leker ki fer konplo sa ti pou fer Zeova soufer e i pa ti pou ganny Son laprouvasyon. Eski Zeova i osi reel pour ou zis parey i ti ete pour David?
Zeova i egzamin leker
3. Ki mannyer Zeova i montre ki i pran an konsiderasyon nou lenperfeksyon?
3 Zeova i premyerman enterese avek sa dimoun ki nou ete dan nou leker setadir sa dimoun ki nou ete anndan. (Ps. 19:14; 26:2) Akoz lanmour ki i annan i pa konsantre lo bann pti keksoz ki nou fer mal. En legzanp i kan Sara, madanm Abraam pa ti telman koz laverite avek en lanz ki ti aparet avek li. I evidan ki sa lanz ti vwar ki Sara ti per e anbarase alor i pa ti reprimann li severman. (Zen. 18:12-15) Menm si patrias Zob ti’n konsider li “pli drwat ki Bondye,” Zeova ti kontinyen beni li akoz i ti konsyan ki Zob ti’n soufer en kantite dan lanmen Satan. (Zob 32:2; 42:12) Pareyman, Zeova pa ti ankoler akoz parol fran ki sa vev sorti Tsarfat ti dir avek profet Eliya. I ti konpran ki sa vev ti dan latristes akoz i ti’n perdi son sel zanfan.—1 Rwa. 17:8-24.
4, 5. Ki mannyer Zeova ti montre konsiderasyon par lafason i ti azir avek Abimelek?
4 Lefet ki Zeova i egzamin leker sa i fer ki i menm demontre konsiderasyon pour bann ki pa ador li. Egzamin sa resi lo Abimelek, lerwa Filisten dan lavil Gerar. Abimelek pa ti konnen ki Abraam ek Sara ti’n marye alor i ti pran Sara pour vin son madanm. Me avan ki Abimelek ti kapab al pli lwen, Zeova ti dir li dan en rev: “Mwan osi mon konnen ki ou’n fer sa avek en leker onnet e se mwan menm ki pe anpes ou fer pese kont mwan. Se pour sa rezon ki mon pa’n les ou tous li. Me aprezan rann sa zonm son madanm akoz i en profet e i pou fer siplikasyon pour ou. Alors kontinyen viv.”—Zen. 20:1-7.
5 Vi ki Abimelek ti ador bann fo Bondye, sirman Zeova ti’n kapab azir severman avek li. Me Bondye ti vwar ki dan sa moman sa zonm ti onnet. Zeova ti pran sa an konsiderasyon e i ti dir sa lerwa ki mannyer i ti pou ganny pardonnen e “kontinyen viv.” Eski pa Zeova i sa kalite Bondye ki ou anvi adore?
6. Dan ki fason Zezi ti imit son Papa?
6 Zezi ti imit son Papa dan en fason parfe akoz i ti konsantre lo bann bon kalite dan son bann disip e i ti pare pour pardonn zot kan zot ti fer fot. (Mark 10:35-45; 14:66-72; Lik 22:31, 32; Zan 15:15) Latitid Zezi ti an armoni avek son parol dan Zan 3:17: “Bondye pa’n anvoy son garson dan lemonn pour kondann lemonn, me pour ki par li lemonn i a ganny sove.” Wi, lanmour ki Zeova ek Zezi i annan pour nou i senser e dirab. Nou kapab vwar sa dan sa dezir ki zot annan pour nou ganny lavi. (Zob 14:15) Sa kalite lanmour i eksplike akoz Zeova i egzamin nou, ki mannyer i vwar nou e ki mannyer i azir an rapor avek sa ki i vwar.—Lir 1 Zan 4:8, 19.
I egzamin nou avek lanmour
7. Akoz Zeova i egzamin nou?
7 Pa i mal alor pour panse ki Zeova i en lapolis dan lesyel, ki pe veye anler laba pour li atrap nou dek ki nou fer pese! Satan i sa enn ki akiz nou e dir ki nou egois. (Rev. 12:10) I menm pretann ki nou servi Bondye avek en move lentansyon alor ki i pa vre. (Zob 1:9-11; 2:4, 5) En psalmis ti dir sa lo Bondye: “Si ou ti vey bann fot, O Ya, O Zeova, lekel ki ti pou kapab debout devan ou?” (Ps. 130:3) Personn! (Ekle. 7:20) O kontrer Zeova i get nou avek mizerikord ek labonte, parey en bon paran ki anvi protez son zanfan ki i kontan kont okenn danze. Pour evite fer ditor nou lekor, Zeova i souvan averti nou an rapor avek nou lenperfeksyon ek febles.—Ps 103:10-14; Mat. 26:41.
8. Ki mannyer Zeova i enstrir e disiplin son bann serviter?
8 Bondye i eksprim son lanmour pour nou atraver lenstriksyon ek disiplin ki i donn nou dan Labib ensi ki dan bann piblikasyon baze lo Labib ki “lesklav fidel e pridan” i fourni nou. (Mat. 24:45, NW; Ebr. 12:5, 6) Zeova i menm ed nou atraver kongregasyon ek ‘bann zonm ki i donn konman kado.’ (Efe. 4:8, NW) Deplis, Zeova i obzerve pour vwar ki mannyer nou reazir anver sa formasyon ki i donn nou konman en Papa lanmour e i vreman anvi ed nou plis ki sa. Psonm 32:8 i dir: “Mon pou fer ou annan bon zizman e mon pou enstrir ou dan sa semen ki ou devret pran. Mon lizye pou lo ou pour konsey ou.” Alor pa i vreman enportan ki nou ekout Zeova! Nou devret touzour abes nou devan li e rekonnet ki i nou Ansennyan ek Papa ranpli avek lanmour.—Lir Matye 18:4.
9. Ki move tre nou merit evite e akoz?
9 De lot kote, fotespere ki nou pa zanmen les lorgey domin nou pour ki nou arive mank lafwa oubyen les nou ganny “tronpe par pese.” (Ebr. 3:13; Zak 4:6) Souvandfwa sa bann tre i konmanse ler en dimoun i devlop bann panse ek dezir imoral. I menm kapab ariv ziska en degre ki i rezet bann konsey sorti dan Labib ki apropriye. Pli pir ankor, i menm kapab sitan enplike dan son move latitid ki i menm fer son prop lekor vin lennmi Bondye. Pa sa sityasyon i vreman enkyetan! (Prov. 1:22-31) Egzamin legzanp Kaen, premye ne Adan ek Ev.
Zeova i vwar tou e i azir dapre sa ki i vwar
10. Akoz Zeova pa ti aksepte lofrann Kaen e ki mannyer Kaen ti reazir?
10 Kan Kaen ek Abel ti prezant sakenn en lofrann avek Zeova, I pa ti zis enterese avek zot kado me i ti enterese avek zot motivasyon. Vi ki i ti konn sa ki ti dan zot leker, Bondye ti eksprim son laprouvasyon pour lofrann ki Abel ti fer akoz i ti annan lafwa, me i pa ti aksepte sa ki pour Kaen akoz dan en fason ou en lot son lafwa ti limite. (Zen. 4:4, 5; Ebr. 11:4) Olye aprann en leson avek sa sityasyon e sanz son latitid, Kaen ti vreman ankoler avek son frer.—Zen. 4:6.
11. Ki mannyer Kaen ti montre ki i ti annan en leker tret e ki leson nou kapab aprann?
11 Zeova ti konsernen avek latitid Kaen akoz i ti vwar ki son latitid ti danzere, alor i ti koz avek li. I ti fer li vwar ki si i ti fer sa ki byen sirman i ti pou annan rezon pour li rezwir. Malerezman, Kaen ti inyor konsey son Kreater e i ti touy son frer. Zeova ti demann Kaen: “Oli ou frer Abel?” Par lafason Kaen ti reponn sa kestyon ki Zeova ti demann li, nou kapab remarke ki i ti napa okenn respe e i ti annan en move leker akoz i ti dir: “Mon pa konnen. Mon gardyen mon frer mwan?” (Zen. 4:7-9) Pa leker i vreman tret, menm ziska i kapab fer en dimoun rezet konsey ki Bondye i donnen personnelman! (Zer. 17:9) Annou alor aprann en leson avek bann resi parey e deswit rezet bann move panse ek dezir. (Lir Zak 1:14, 15.) Si nou ganny okenn konsey sorti dan Labib, fotespere ki nou apresye zot e vwar zot konman en fason ki Zeova i prouv son lanmour pour nou.
Napa pese ki sekre
12. Ki mannyer Zeova i reazir anver bann ki fer bann keksoz mal?
12 Serten i kapab panse ki si personn pa vwar zot ler zot fer sa ki mal, alor zot pa pou bezwen ganny pinisyon. (Ps. 19:12) Dan en sans, napa okenn pese ki sekre akoz “tou lansanm kreasyon i ekspoze devan lizye sa enn avek ki nou bezwen rann kont.” (Ebr. 4:13) Zeova i en Ziz ki egzamin an detay nou bann lentansyon e i reazir anver bann move keksoz ki nou fer dan en fason ki reflekte son lazistis ki parfe. I “en Bondye ki annan mizerikord ek konpasyon, ki pa ankoler vitman, e ki annan en kantite labonte leker ek laverite.” Parkont anver bann ki pa repantir ouswa bann ki “kontinyen pese” oubyen demontre en latitid malonnet e fer trik “dan okenn ka i pa pou akord gras pour pinisyon.” (Egz. 34:6, 7; Ebr. 10:26) Sa ti vre dan lafason Zeova ti reazir avek Akann, Ananyas ek Safira.
13. Ki mannyer fason panse Akann ti fer li annan en move konportman?
13 Akann ti direkteman dezobeir komannman Zeova kan i ti pran serten keksoz ki ti pour bann zabitan Zeriko. I ti anmenn sa bann keksoz dan son latant e i paret ki son fanmir osi ti bann konplis. Kan son pese ti ganny devwale, Akann ti montre ki i ti’n realize ki sa ki i ti’n fer ti serye akoz i ti dir: “Mwan menm ki’n fer pese kont Zeova.” (Zoz. 7:20) Parey Kaen, Akann ti montre ki i ti’n devlop en move leker. Parkont, vorasite ti rezon pour son aksyon e sa ti fer li vin malonnet. Vi ki sa bann keksoz sorti Zeriko ti pour Zeova alor Akann ti pe vol sa ki ti pour Bondye e sa ti kout li ek son fanmir vreman ser.—Zoz. 7:25.
14, 15. Akoz Ananyas ek Safira pa ti ganny laprouvasyon Bondye e ki leson nou kapab aprann?
14 Ananyas ek son madanm Safira ti parmi bann manm kongregasyon bann premye Kretyen Zerizalenm. Apre Lapannkot lannen 33 N.L., en fon ti ganny etablir pour pran swen avek bezwen fizik bann nouvo krwayan ki ti sorti aletranze e ki ti ankor Zerizalenm. Sa fon ti ganny siporte par kontribisyon volonter. Ananyas ti vann son propriyete. I ti ofer en porsyon sa larzan pour sa fon e son madanm ti okouran tou keksoz. Me i ti fer krwar ki i ti’n donn tou sa ki i ti’n gannyen avek lavant son propriyete. San okenn dout sa koup ti anvi ganny en loner spesyal dan kongregasyon. Me zot aksyon ti malonnet. Atraver en mirak Zeova ti revel sa frod avek zapot Pyer ki apre sa, ti demann Ananyas akoz i ti’n fer sa frod. Deswit apre, Ananyas ti tonm ater e mor. En pe letan plitar Safira osi ti mor.—Akt 5:1-11.
15 Ananyas ek Safira pa ti tonm dan sa latrap en sel kou akoz en febles. Zot ti fer en konplo e koz manti pour zot kapab anbet bann zapot. Pli pir ankor, zot ti esey anbet Bondye ek lespri sen. Reaksyon Zeova ti montre klerman ki i ti pare pour protez kongregasyon kont bann ipokrit. Pa i vre ki “i en keksoz terib pour tonm dan lanmen Bondye vivan”!—Ebr. 10:31.
Toultan gard nou fidelite
16. (a) Ki mannyer Satan pe esey tronp pep Bondye? (b) Ki metod Satan i servi pour tronp bann dimoun dan ou rezyon?
16 Satan pe fer tou sa ki i kapab pour tronp nou e fer nou perdi laprouvasyon Zeova. (Rev. 12:12, 17) Sa lemonn i klerman reflekte bann move lentansyon Dyab akoz zot obsede avek kondwit seksyel imoral ek vyolans. En dimoun i kapab fasilman ganny akse avek pornografi lo konpiter ek lezot lekipman elektronik. Fotespere ki nou pa zanmen tonm dan latrap Satan. O kontrer, fotespere ki nou annan sa menm santiman avek psalmis David ki ti ekrir: “Mon pou azir dan en fason pridan e san defo. . . . Mon pou mars avek en leker san defo dan mon lakaz.”—Ps. 101:2.
17. (a) Akoz avek letan Zeova i devwal bann pese ki’n ganny kasyet? (b) Ki nou determinen pour fer?
17 Ozordi Zeova pa fer mirak pour devwal bann pese grav ek bann konportman malonnet parey i ti fer dan lepase. Kantmenm sa, i vwar tou keksoz e dan son letan apropriye e dan son fason i pou anmenn sa keksoz o kler. Pol ti dir: “Pese serten i fasil war avan menm ziz zot, tandis ki pour serten dimoun, zot pese i ganny dekouver plitar.” (1 Tim. 5:24) I akoz lanmour ki Zeova i annan ki fer li devwal sa bann move keksoz. I kontan kongregasyon e i anvi ki i reste pir. Deplis, i demontre mizerikord pour tou bann ki senserman repantir apre ki zot in fer en pese grav. (Prov. 28:13) Alor annou fer tou nou mye pour servi Bondye avek tou nou leker e rezet tou bann move lenfliyans.
Servi Bondye avek tou ou leker
18. Ki mannyer Lerwa David ti anvi son garson i santi anver Bondye?
18 David ti dir son garson Salomon: “Aprann konn Bondye ou papa e servi li avek tou ou leker e avek lazwa; parski Zeova pe egzamin tou leker, e i konn tou panse.” (1 Kron. 28:9) David ti anvi ki son garson i fer plis ki zis krwar dan Bondye. I ti anvi ki Salomon i apresye lentere senser ki Zeova i annan dan son bann serviter. Eski ou apresye ki Zeova i annan en lentere senser dan son bann serviter?
19, 20. Dapre Psonm 19:7-11 kwa ki ti ed David pour apros avek Bondye e ki mannyer nou kapab imit legzanp David?
19 Zeova i konnen ki bann ki annan leker senser pou ganny atire ver li e ki ler zot aprann lo son bann zoli kalite sa pou fer zot santi pli pros avek li. Zeova i anvi nou konn li e i anvi ki nou familyariz nou avek son personnalite merveye. Ki mannyer nou kapab fer sa? Kan nou etidye Labib e ler nou ganny bann benediksyon ki sorti kot li.—Prov. 10:22; Zan 14:9.
20 Eski ou lir Labib sak zour avek lapresyasyon e priye pour aplik li dan ou lavi? Eski ou vwar lenportans pour viv dapre bann prensip Labib? (Lir Psonm 19:7-11.) Si wi, ou lafwa dan Zeova ek lanmour ki ou annan pour li pou kontinyen ogmante. An retour i pou apros avek ou e i pou mars lanmen dan lanmen avek ou. (Iza. 42:6; Zak 4:8) Wi, Zeova pou prouv son lanmour pour ou par beni ou e protez ou spirityelman anmezir ki ou mars lo sa semen ki difisil ki anmenn ver lavi.—Ps. 91:1, 2; Mat. 7:13, 14.
Ki mannyer ou pou reponn?
• Akoz Zeova i egzamin nou?
• Kwa ki ti fer serten dimoun vin lennmi Bondye?
• Ki mannyer nou kapab montre ki Zeova i reel pour nou?
• Ki mannyer nou kapab kontinyen servi Zeova avek tou nou leker?
[Kestyon]
[Portre lo paz 9]
Ki mannyer Zeova i egzamin nou avek lanmour parey en paran?
[Portre lo paz 10]
Ki leson nou aprann avek legzanp Ananyas?
[Portre lo paz 11]
Kwa ki pou ed nou kontinyen servi Zeova avek tou nou leker?