Ki kantite letan i reste pour later?

Ki mannyer ou ti pou reponn sa kestyon swivan?

Eski byento bann kondisyon lo later pou

(a) amelyore?

(b) reste parey?

(c) vin pli pir?

ESKI ou esey gard en pwennvi pozitif lo lavenir? I anmenn en kantite byenfe kan nou fer sa. Plizyer letid in montre ki dimoun ki annan pwennvi pozitif lo lavenir i pli byen reisi akademikman e kan zot angaz zot dan domenn fizik. En letid ki’n ganny fer pour en pe letan in menm prouve ki bann zonm ki annan pwennvi pozitif lo lavenir i annan mwens risk pour soufer avek maladi leker ki bann ki annan pwennvi negatif lo lavi. Rezilta sa letid i annakor avek sa deklarasyon ki’n ganny fer dan Labib plizyer lannen pase: “En leker ki zwaye i en bon latizann, me en moral ki ba i fer lezo sek.”—Proverb 17:22, The Holy Bible—New International Version.

Parkont, an rapor avek sa ki bann syantis in predir konsernan sa ki pou arive avek later, bokou dimoun i vwar li difisil pour reste pozitif e zwaye. Annou egzamin serten sa bann prediksyon enkyetan ki nou souvan tande denozour.

En plannet an danze

An 2002, en lenstitisyon ki byen ganny respekte, Stockholm Environment Institute, ti averti ki si nou pa arive redwir lefe advers ki limanite in anmennen lo lanvironnman parski nou zis anvi protez devlopman lekonomi, sa i kapab fini par anmenn “bann levennman ki pou fer sa plannet eksperyans bann gran sanzman dan son klima ek ekosistenm.” Sa rapor i al pli lwen pour dir ki lapovrete, lenzistis ki pe  kontinyen ek labi bann resours dan lanvironnman dan lemonn antye i kapab fer ki lasosyete i sorti “dan en kriz pour al dan en lot kriz, dan domenn sosyal, sekirite ek lanvironnman.”

An 2005, Nasyon-z-ini ti fer resorti rezilta en letid ki zot ti fer pour kat-r-an lo lanvironnman dan lemonn antye ki apel Millennium Ecosystem Assessment. Sa letid profon, ki enplik 1,360 eksper sorti dan 95 pei ti kontyen en lavertisman serye ki ti dir: “Akoz sa ki imen pe fer, sa i fer ki later pe travay plis ki i fodre, alors sa i fer ki nou nepli kapab pran alalezer sa ki pe arive avek nou ekosistenm pour soutenir bann zenerasyon alavenir.” Sa rapor i dir ki pour anpes sa danze, i demann “bann gran sanzman dan bann polisi, lenstitisyon ek fason fer keksoz, me sa bann sanzman pa ankor konmanse ziska prezan.”

Anna Tibaijuka, direkter egzekitif United Nations Human Settlements Programme, in fer resorti kwa ki bann serser pe deplizanpli krwar. I dir: “Si nou kontinyen les sityasyon parey i ete san fer plis ki sa pour amelyore, en lavenir efreyan i devan nou.”

Rezon pour annan en pwennvi pozitif lo lavenir

Bann Temwen Zeova, ki pibliy sa magazin, i osi krwar ki byento later pou eksperyans bann levennman ki pou anmenn bann gran sanzman. Me parkont, zot konvenki ki olye anmenn en lavenir katastrofik, sa bann levennman pou anmenn bann kondisyon pli meyer ki lemonn pa’n zanmen deza eksperyanse. Akoz ki zot annan en tel pwennvi pozitif lo lavenir? Sa i akoz zot annan konfyans dan bann promes ki ganny trouve dan Parol Bondye, Labib. Remark enn sa bann promes: “Dan ankor en ptigin letan, move dimoun pou nepli la; ou pou al get dan son landrwa e i pa pou la. Me bann dimoun ki annan limilite pou posed later, e zot pou vreman tir bokou plezir dan labondans lape.”—Psonm 37:10, 11.

Eski en tel lespwar i zis en rev? Avan ki nou reponn sa kestyon, annou konsider seryezman sa parol: Plizyer milye lannen davans, Labib ti predir egzakteman ki ti pou annan sa bann plizyer gro problenm ki pe afekte later ek limanite orzordi. Silvouple, lir sa bann verse ki’n ganny site dan sa lartik swivan e konpar sa ki zot dir avek sa ki ou vwar pe arive dan sa lemonn. Anmezir ki ou fer sa, ou pou annan plis konfyans ki Labib i kapab predir bann levennman dan lavenir dan en fason egzakt.