Konman lanmor Zezi i kapab sov ou?

APEPRE 2,000 an pase, zour Lapak lannen 33 N.L., en zonm inosan ti donn son lavi pour ki lezot i kapab ganny sove. Lekel sa zonm? Sa zonm ti Zezi ki ti sorti Nazaret. E lekel ki pou kapab benefisye avek sa sakrifis vreman remarkab? Tou dimoun i kapab benefisye. En verse ki petet bokou dimoun i konnen, i dekrir sa sakrifis ki sov lavi dan sa fason: “Parski Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.”—Zan 3:16.

Menm si petet bokou dimoun i konn sa verse, zis en pti minorite ki vreman konpran ki sa i vedir. Zot demann zot lekor: ‘Akoz nou bezwen sakrifis Kris? Ki mannyer lanmor en sel zonm i kapab sov limanite dan lanmor?’ Labib i donn en larepons kler e satisfezan pour sa bann kestyon.

Ki mannyer lanmor in arive pran kontrol lo limanite

Serten dimoun i krwar ki imen in ganny kree pour viv lo later pour zis en pti pe letan, pas dan problenm, pas serten bon moman, apre mor e al reviv dan en lot landrwa pli meyer. Dapre sa kalite rezonnman, lanmor i form parti lavolonte Bondye pour imen. Me o kontrer Labib i donn en lot rezon akoz ki imen i mor. I dir: “Annou konsider aprezan ki mannyer pese in antre dan lemonn par en sel zonm, e pese in anmenn lanmor, e lanmor in pas avek tou dimoun, parski tou dimoun in konmet pese.” (Romen 5: 12) Sa verse i montre ki dimoun i mor akoz pese. Alors, lekel sa “sel zonm” ki akoz konsekans son pese, in anmenn lanmor lo limanite?

World Book Encyclopedia in fer sa remark ki laplipar syantis i krwar ki tou imen i sorti dan menm lorizin e Labib i klerman idantifye sa lorizin, setadir sa “sel zonm.” Zenez 1:27 i dir: “Bondye ti kree zonm dan son resanblans, dan resanblans Bondye i ti kree li; I ti kree zonm ek fanm.” Alors Labib i dir ki sa premye koup imen ti sa travay pli merveye parmi tou kreasyon Bondye Tou pwisan.

Sa resi dan Zenez i donn plis detay lo lavi imen apre ki Zeova ti kree premye imen. I enportan pour note ki dan sa resi an antye, napa okenn par ki Bondye ti mansyonn lanmor, eksepte kan i ti pe refer avek konsekans dezobeisans. (Zenez 2:16, 17) I ti anvi ki bann imen i viv dan en zoli paradi lo later, ere e an bonn sante pour touzour. I pa ti anvi ki zot soufer avek lefe lavyeyes e evantyelman mor. Alors, ki mannyer lanmor in pran kontrol lo tou imen?

Zenez sapit 3 i rakonte ki mannyer sa premye koup ti volonterman fer sa desizyon pour dezobeir Zeova, sa Enn ki donn lavi. Alors, Bondye ti pas son santans lo zot parey i ti’n averti zot. I ti dir Adan: “Parski ou lapousyer e ou pou retourn an lapousyer.” (Zenez 3:19) Zis parey i ti’n dir, sa de imen dezobeisan ti finalman mor.

Annefe pa zis sa premye koup imen ki ti ganny afekte, me i ti al pli lwen ki sa. Zot dezobeisans ti fer zot desandans perdi sa posibilite pour rezwir en lavi parfe. Zeova ti’n fini deza enkli zot bann desandans dan son plan menm avan zot legzistans, kan i ti dir avek Adan ek Ev: “Fer zanfan e vin bokou, ranpli later e domin li. Annan kontrol lo bann pwason dan lanmer ek bann kreatir ki  anvole dan lesyel ek tou kreatir vivan ki pe marse lo later.” (Zenez 1:28) Avek letan, lafanmir imen ti pou’n ranpli later e vreman rezwir lavi san bezwen mor. Me zot zanset Adan, setadir sa “sel zonm,” ti vann zot konman lesklav pese ek lanmor, ki nou pa kapab evite. Zapot Pol, enn parmi desandans sa premye zonm, ti ekrir: “Mon zis en dimoun avek en lekor mortel ki’n ganny vann konman en lesklav pese.”—Romen 7:14.

Pese ki Adan ti fer ti vreman andomaz kreasyon merveye Bondye, zis parey dimoun ti andomaz bann travay lar ki annan bokou valer. Zanfan Adan ti fer zanfan, apre zot ti annan pti zanfan, e sa ti kontinyen. Sak zenerasyon ki vini, i grandi, fer zanfan e evantyelman mor. Akoz zot tou zot in mor? Akoz zot tou zot sorti dan desandans Adan. Labib i dir: “Bokou dimoun in mor par fot en sel zonm.” (Romen 5:15) Maladi, lavyeyes, tandans pour fer sa ki mal e lanmor li menm i bann move konsekans ki’n arive akoz Adan in trai son prop fanmir. Sa fanmir i enkli nou tou.

Dan son let pour bann Kretyen an Ronm, zapot Pol ti ekrir konsernan kondisyon deplorab bann imen enparfe, enkli li osi e sa gro lalit kont move lefe pese. I ti dir: “Malere! La sa ki mon ete! Lekel ki pou delivre mwan avek sa lekor lanmor?” Pa sa i en kestyon vreman enportan? Lekel ki pou pare pour liber Pol, ek tou bann ki pe espere avek enpasyans, dan lesklavaz pese ek lanmor? Pol li menm ti reponn sa kestyon: “Gran mersi Bondye par Zezi-Kri nou Senyer!” (Romen 7:14-25) Wi, nou Kreater in fer sa provizyon pour liber nou atraver son Garson, Zezi Kri.

Rol Zezi dan laranzman Bondye pour liber limanite

Zezi ti dekrir son rol dan sa laranzman pour delivre imen dan lesklavaz pese. I ti dir: “Dan menm fason ki Fis-de-Lonm . . . [in] vin pour donn son lavi konman pri pour liberasyon bokou dimoun.” (Matye 20:28) Dan ki fason Zezi ti ofer son lavi konman en sakrifis? Ki mannyer son lanmor i benefisye nou?

Labib i dekrir Zezi konman enn ki “san pese” e “separe avek tou bann peser.” Tou dilon son lavi, Zezi ti parfetman obeir Lalwa  Bondye. (Ebre 4:15; 7:26) Alors, Zezi pa ti mor akoz konsekans pese ek dezobeisans, parey ti leka avek Adan. (Ezekyel 18:4) O kontrer Zezi ti aksepte pour fer fas avek en lanmor ki i pa ti merite pour li kapab fer lavolonte son Papa pour liber bann imen dan pese ek lanmor. Parey in ganny mansyonnen dan paragraf avan, Zezi ti volonterman vin “donn son lavi konman pri pour liberasyon bokou dimoun.” Motive par en lanmour ki pa’n zanmen ganny demontre tou dilon listwar imen, Zezi ti pare pour ‘gout lanmor pour tou dimoun.’—Ebre 2:9.

Sa lavi ki Zezi ti sakrifye ti ekivalan avek sa lavi ki Adan in perdi kan i ti fer pese. Ki rezilta lanmor Zezi in anmennen? Zeova ti aksepte sa sakrifis konman “en pri pour sov limanite.” (1 Timote 2:6) Annefe, Bondye ti servi valer ki lavi Zezi ti annan pour liber oubyen sov limanite dan lesklavaz pese ek lanmor.

Plizyer fwa Labib i mansyonn sa pli gran akt lanmour ki nou Kreater ti demontre. Pol ti rapel bann Kretyen ki “zot in ganny aste pour en pri.” (1 Korentyen 6:20; 7:23) Pyer ti ekrir ki Bondye pa’n servi lor oubyen larzan, me disan Zezi pour liber bann Kretyen. (1 Pyer 1:18, 19) Atraver sakrifis Zezi, Zeova in fer laranzman pour sov bann imen dan lanmor.

Eski ou pou benefisye avek sakrifis Zezi?

Konsernan degre ki imen pou benefisye avek sakrifis Kris, zapot Zan ti ekrir: “[Zezi-Kri] viktim sakrifis ki permet nou ganny pardon nou pese, pa zis pour nou, me osi pour pese lemonn antye.” (1 Zan 2:2) Wi, sakrifis Kris i ganny fourni pour tou limanite. Eski sa i vedir ki otomatikman tou dimoun pou benefisye avek sa provizyon ki annan en kantite valer? Non. Mazin sa loperasyon sekour ki’n ganny mansyonnen dan sa lartik presedan. Sa lekip sovtaz ki ti pe esey sov lavi sa bann miner ti fer desann sa bwat anba kot zot, me sakenn ant zot ti pou bezwen antre dan sa bwat. Dan sa menm fason, bann ki anvi benefisye avek sakrifis Zezi pa kapab senpleman esper benediksyon Bondye. Zot bezwen fer aksyon.

Ki Bondye i ekspekte nou fer? Zan 3:36 i dir nou: “Tou dimoun ki krwar dan son Garson i ganny lavi eternel. Tou dimoun ki pa obei son Garson pa pou war lavi, me i ekspoz li anba lakoler Bondye.” Bondye i eksepte ki nou annan lafwa dan sakrifis Kris, me i enkli plis ki sa. Nou lir: “An gardan son komannman nou rekonnet ki nou konn li.” (1 Zan 2:3) I kler alor ki pour nou ganny libere avek pese ek lanmor i tre enportan ki nou annan lafwa dan sakrifis Zezi e obeir son bann komannman.

En fason enportan pour nou demontre la fwa dan sakrifis Zezi i par montre nou lapresyasyon par komemor son lanmor, parey in komande. Avan son lanmor, Zezi ti entrodwir en repa, ki ti pe reprezant sa ki ti pou arive avek li pli tar, avek son bann zapot fidel, e i ti dir zot: “Fer sa an mon memwar.” (Lik 22:19) Bann Temwen Zeova i vreman apresye zot relasyon avek Garson Bondye, e zot obeir sa lord. Sa lannen, Memoryal, setadir komemorasyon lanmor Zezi Kri pou ganny obzerve Sanmdi le 22 Mars, apre soley kouse. Nou kordyalman envit ou pour asiste sa rasanbleman spesyal pour obeir sa komannman. Bann Temwen Zeova dan ou teritwar pou kapab dir ou ler ek landrwa kot sa levennman pou deroule. Zour Memoryal ou pou kapab aprann plis konsernan ki ou bezwen fer pour ki sakrifis Kris i liber ou avek lanmor ki pese Adan in anmennen.

Ozordi i annan en pti group dimoun ki pe demontre en gran lapresyasyon pour sa gran sakrifis ki zot Kreater ek son Garson in fer pour ki nou pa ganny detrir. Bann ki egzers lafwa dan sa sakrifis zot vreman dan lazwa. Zapot Pyer ti ekrir konsernan son bann frer ek ser Kretyen: “Zot krwar dan [Zezi], . . . e zot dan en gran lazwa, si gran ki pa kapab ganny eksprimen par parol. E zot resevwar konman rekonpans delivrans pour zot lam.” (1 Pyer 1:8, 9) Par devlop lanmour pour Zezi Kri e met lafwa dan son sakrifis, ou kapab zwaye depi la konmela menm e espere avek enpasyans pour ganny libere avek pese ek lanmor.

[Portre lo paz 6]

Zezi ti donn son lavi pour retir bann move lefe ki pese Adan in anmennen

[Portre lo paz 7]

Memoryal pou ganny obzerve Sanmdi le 22 Mars 2008, apre soley kouse