Trouv lazwa dan ou maryaz
Trouv lazwa dan ou maryaz
“Par lasazes en fanmir i ganny batir e par disernman i pou ganny etablir solidman.”—PROV. 24:3.
1. Ki mannyer Zeova ti demontre lasazes dan desizyon ki i ti pran an rapor avek sa premye zonm?
NOU Papa dan lesyel ki annan lasazes i konnen kwa ki byen pour nou. Par egzanp, i ti realize pour ki Son plan i vin en realite, i pa ti pou “bon pour zonm kontinyen reste li tousel” dan zarden Edenn. En keksoz tre enportan pour ki sa plan ti ganny realize, se ki ti pou bezwen annan bann koup marye pour fer zanfan e “ranpli later.”—Zen. 1:28; 2:18.
2. Ki laranzman Zeova ti fer pour ki imen i benefisye apre?
2 Zeova ti dir: “Mon pou fer en led pour li, enn ki pou al byen avek li.” Apre Bondye ti fer li tonm dan en profon sonmey e i ti pran en kot avek sa zonm ki ti parfe e I ti servi sa kot pour kree en madanm. Kan Zeova ti anmenn sa madanm parfe, ki ti apel Ev, kot Adan, Adan ti dir: “La la anfen lezo sorti dan mon lezo e laser sorti dan mon laser. Sa enn pou ganny apele Fanm, akoz i’n ganny tire avek zonm.” Ev ti vreman al byen avek Adan. Tou le de ti pou kapab annan en personnalite ek bann kalite diferan, me toudmenm zot ti parfe e zot ti’n ganny kree dan resanblans Bondye. Alors, Zeova ti entrodwir sa premye maryaz. Adan ek Ev pa ti vwar li en problenm pour aksepte sa laranzman Bondye akoz sa ti en led ek sipor pour zot tou le de.—Zen. 1:27; 2:21-23.
3. Ki mannyer bokou dimoun ozordi i vwar maryaz, e ki kestyon sa i fer nou demande?
3 I fer lapenn pour dir ki ozordi partou dan lemonn dimoun i pare pour rebele. E bann problenm koze par rebelyon pa sorti kot Bondye. Bokou dimoun ozordi i rezet sa laranzman maryaz ki en kado sorti kot Bondye, akoz zot panse ki maryaz son letan in fini e i anmenn fristrasyon oubyen konfli. E parmi bann ki marye, bokou i divorse. Bann zanfan i kapab pa ganny sa lafeksyon e kan problenm dan maryaz i leve serten paran i kapab servi zanfan pour ganny serten benefis. En kantite paran i refize pour sede oubyen korpere afen pour kapab gard lape ek linite. (2 Tim. 3:3) Ki mannyer bann koup ki’n marye i kapab gard sa lazwa dan zot lavi maryaz menm si letan ki nou pe viv ladan i difisil? Ki mannyer ler bann koup i pare pour soumet avek direksyon Zeova sa i kapab ed zot pour evite annan sa nide pour separe? Ki nou kapab aprann avek bann koup ozordi ki’n kapab gard sa lazwa dan zot maryaz?
Toultan soumet avek gidans Zeova
4. (a) Ki gidans zapot Pol ti donnen konsernan maryaz? (b) Ki mannyer bann Kretyen ki obeisan i aksepte gidans ki Pol ti donnen?
4 Kan i ti pe ganny enspire, zapot Pol ti dir bann vev ki si zot deside pour remarye zot devret fer li “selon Senyer.” (1 Kor. 7:39) Sa pa ti en keksoz drol pour bann Kretyen ki ti dan larelizyon Zwif avan sa. Lalwa ki Bondye ti donn bann Izraelit ti dir klerman ki zot pa ti “devret form en lalyans maryaz” avek okenn dimoun sorti dan bann nasyon dan zalantour ki pa ti servi Bondye. Apre Zeova ti azout en keksoz anplis ki met lanfaz lo danze ki i annan pour inyor son standar. I ti dir: “Akoz [en non Zwif] pou fer ou garson aret swiv mwan, e sirman zot pou servi lezot bondye; e lakoler Zeova pou monte kont zot, e san okenn dout i pa pou tarde pour detrir ou.” (Det. 7:3, 4) Eski son standar pour son bann serviter ozordi in sanze dan sa domenn? I kler ki en serviter Bondye i devret marye avek en dimoun “selon Senyer,” setadir en frer oubyen ser ki’n dedye son lavi e ki’n batize. Kan en dimoun i aksepte gidans Zeova ler i pe rod en dimoun pour li marye, i pe azir dan en fason saz.
5. Konman Zeova ek bann Kretyen ki’n marye i vwar ve maryaz?
5 Ve ki en dimoun i fer dan maryaz i sakre dan lizye Bondye. Kan i ti pe koz lo sa premye maryaz, Zezi, Garson Bondye ti dir: “Sa ki Bondye in ini ansanm zonm pa devre separe.” (Mat. 19:6) En psalmis i fer nou mazinen ki ve maryaz i vreman serye: “Konman ou sakrifis pour Bondye, remersye li. E reste fidel avek sa enn Tre O.” (Ps. 50:14) Menm si maryaz i kapab anmenn en kantite lazwa pour en koup, ve ki zot fer zour zot maryaz i pa en zwe e i enkli responsabilite.—Det. 23:21.
6. Ki nou kapab aprann avek legzanp Yifta?
6 Pran par egzanp Yifta, ki ti ziz an Izrael dan douzyenm syek avan nou lepok. I ti fer en ve avek Zeova: “Si ou vreman les mwan ranport laviktwar lo bann garson Amonn, sa enn ki pou sorti devan laport mon lakaz pour vin zwenn mwan apre ki mon pou’n sorti kot bann garson Amonn dan lape, pou osi vin pour Zeova, e mon pou ofer li konman en lofrann brile.” Eski Yifta ti esey kas son ve kan i ti vwar son fiy, sa enn menm ki i ti annan, vin zwenn li ler i ti pe retourn se li Mizpa? Non. I ti dir: “Mon’n fini koze avek Zeova, e mon pa kapab retourn an aryer.” (Ziz 11:30, 31, 35) Yifta ti gard son promes ki i ti’n fer avek Zeova, menm si i pa ti pou annan okenn desandans ki ti pou port son non. Sa ve ki Yifta ti fer ti diferan avek ve maryaz, me lefet ki i ti gard son ve, sa i en bon legzanp pour bann msye ek madanm ki’n marye.
Kwa ki fer maryaz reisi?
7. Ki sanzman bann ki’n marye i bezwen fer?
7 Kan bokou koup marye i mazin lepok ki zot ti pe pwente, zot ankor santi sa lazwa. Pa i ti gou ler zot ti pe aprann konn sa enn ki zot ti pou marye avek! Pli zot ti pas letan avek kanmarad pli zot ti konn kanmarad. Ki swa zot ti pwente pour en serten letan oubyen zot maryaz ti ganny aranze, a lafen de fen kan zot ti vin msye ek madanm, i ti tre enportan ki zot ti fer bann sanzman. En msye ki’n marye i dir fransman: “Pour realize ki nou ti nepli selibater, sa ti pli gro problenm ki nou ti annan o konmansman nou maryaz. Pour en pe letan nou ti vwar li difisil pour pas mwens letan avek nou bann zanmi ek nou fanmir.” En lot msye ki’n marye pour 30 an, ti realize ki pour li kapab annan en balans ler i ti’n fek marye, i ti bezwen mazinen ki i annan “de zot.” Avan ki i aksepte en lenvitasyon oubyen angaz li dan nenport aktivite, i pou get avek son madanm e apre i pou deside, par pran an konsiderasyon santiman kanmarad. Dan en sitiasyon koumsa, kan tou le de i pare pour sede sa pou ede.—Prov. 13:10.
8, 9. (a) Akoz i enportan pour bann koup marye koz fran avek kanmarad? (b) Dan ki laspe bann ki’n marye i bezwen pare pour adapte e akoz?
8 Parler de dimoun ki marye i annan diferan kiltir. Dan en tel sitiasyon i tre enportan pour koz fran. Sakenn pou eksprim li dan diferan fason. Kan ou obzerv lafason ki ou msye oubyen madanm i koze avek son fanmir sa i kapab ed ou pour konpran li pli byen. Parler se pa sa ki’n ganny dir li menm ki fer ou konnen ki en dimoun pe mazinen, me plito se lafason ki i’n ganny dir. E nou kapab aprann bokou lo santiman en dimoun menm si i pa’n dir li. (Prov. 16:24; Kol. 4:6) Disernman i en kalite ki tre enportan pour anmenn lazwa dan lavi maryaz.—Lir Proverb 24:3.
9 Bokou in vwar li tre enportan pour pare pour adapte ler zot pe swazir ki zot pou fer dan zot pastan oubyen ki kalite detant zot pou swazir. Petet avan ki ou marye ou msye ouswa madanm ti fer sport oubyen lezot aktivite rekreasyonnel. Eski i pou neseser fer serten sanzman aprezan? (1 Tim. 4:8) Nou kapab demann menm kestyon an rapor avek lakantite letan ki zot pase avek fanmir. I toutafe normal ki en koup i pas letan ansanm pour fer bann keksoz spirityel ek lezot aktivite.—Mat. 6:33.
10. Ki mannyer ler bann paran ek zot zanfan ki’n marye i pare pour sede, sa pou favoriz en bon relasyon antre zot?
10 Kan en zonm i marye, i kit son papa ek manman e i menm zafer pour en madanm ki pa ankor marye. (Lir Zenez 2:24.) Menm si en zanfan in marye i ankor bezwen swiv sa komannman pour onor son papa ek manman. Alors, menm apre ki en koup in marye, zot pou pas letan avek zot paran ek bann ki’n vin zot fanmir par alyans. En msye ki’n marye pour 25 an i dir: “Parler i difisil pour fer plezir tou dimoun, enkli ou konzwen, paran, frer ek ser e osi ou fanmir par alyans. Zenez 2:24 in ed mwan pour azir dan sa pli bon fason. I vre ki en dimoun i bezwen fidel e desarz son responsabilite anver son fanmir, me sa verse in fer mwan konpran ki mon madanm i vin premye.” Pareyman bann paran Kretyen ki pare pour sede, pou aksepte ki aprezan zot zanfan i annan zot prop fanmir e ki premyerman en msye i annan sa responsabilite pour gid son fanmir.
11, 12. Akoz letid fanmir ek lapriyer i enportan dan lavi en koup?
11 I endispansab ki lafanmir i annan en labitid pour etidye an fanmir. Bokou fanmir in eksprimen ki sa i vreman vre. I kapab pa fasil pour annan en letid fanmir oubyen pour kontinyen fer li toultan. En msye dan en fanmir i dir: “Si nou ti kapab retourn an aryer e sanz okenn keksoz, nou ti pou fer sir ki nou toultan gard sa labitid pour etidye an fanmir depi konmansman nou lavi maryaz.” I azoute: “Mon kapab dir i en kado merveye pour get mon madanm eksprim sa lazwa ki i gannyen ler nou dekouver serten laverite enteresan ansanm dan nou letid.”
12 Fer lapriyer ansanm i en lot keksoz ki ede. (Rom. 12:12) Kan en koup i ini ansanm pour ador Zeova, sa relasyon pros ki zot annan avek Bondye i kapab fer sa relasyon ki zot rezwir dan maryaz vin pli for. (Zak 4:8) En msye Kretyen i dir: “Deswit demann lekskiz pour fot ki ou’n fer e kan zot pe priye ansanm mansyonn sa bann fot, sa pou montre ki ou vreman sagren, menm si i ti en pti fot, akoz i kapab fer sa lot pa kontan.”—Efe. 6:18.
Pare pour sede dan maryaz
13. Ki konsey zapot Pol ti donnen an rapor avek bann relasyon seksyel dan maryaz?
13 Bann koup Kretyen ki’n marye i bezwen evit okenn keksoz ki kapab abes maryaz, tel parey bann aksyon ki komen dan sa lemonn ki mazin zis seks. Pol ti donn sa konsey lo sa size: “En mari i devre ranpli son devwar konman mari anver son madanm e demenm en madanm i devre fer parey anver son mari. En madanm napa drwa fer sa ki oule avek son lekor, i pour son mari, demenm en mari napa drwa fer sa ki i oule avek son prop lekor, i pour son madanm.” Apre zapot Pol i dir klerman: “Pa bezwen priv kanmarad amwen ki par konsantman kanmarad.” Akoz? “Pour ganny letan pour lapriyer. Apre retourn ansanm pour ki satan pa profite pour tant zot e fer zot mank kontrol.” (1 Kor. 7:3-5) Lefet ki Pol ti mansyonn lapriyer sa i montre kwa ki devret vin premye dan lavi en Kretyen. Me i ti osi fer kler ki sak koup Kretyen ki’n marye i bezwen pran an konsiderasyon lemosyon ek dezir seksyel son konzwen.
14. Ki mannyer bann prensip Labib i kapab ede an rapor avek bann relasyon pli entim dan maryaz?
14 Msye ek madanm i bezwen koz fran lo sa size e zot devret realize ki si avek tandres zot pa pran kont santiman kanmarad an rapor avek sa, sa i kapab anmenn problenm dan lavi maryaz. (Lir Filipyen 2:3, 4; konpar Matye 7:12.) Sa i leka osi pour bann fanmir ki napa menm krwayans. Menm si zot annan diferan krwayans, sa enn ki Temwen i kapab fer keksoz mars pli byen si i annan en bon kondwit, labonte e si i pare pour korpere. (Lir 1 Pyer 3:1, 2.) Lanmour ki en dimoun i annan pour Zeova e pour son konzwen, e lefet ki i pare pour sede, sa pou ed zot dan sa laspe zot lavi maryaz.
15. Ki rol respe i annan pour ki en koup i rezwir zot lavi maryaz?
15 I annan lezot domenn kot en msye pou tret son madanm avek respe. Par egzanp, i pran an konsiderasyon son santiman menm dan bann pti keksoz. En msye ki annan 47 an i dir: “Sa i en keksoz ki mon ankor pe aprann.” Bann madanm Kretyen i ganny ankouraze pour byen respe zot msye. (Efe. 5:33) Zot pa pe montre respe si zot kritik zot msye oubyen fer resorti zot defo devan lezot. Proverb 14:1 i fer nou mazinen: “En madanm ki vreman saz in batir son lakaz, me sa enn ki bet i kas sa lakaz avek son prop lanmen.”
Pa sede avek Dyab
16. Ki mannyer bann koup i kapab aplik Efezyen 4:26, 27 dan zot lavi maryaz?
16 “Si zot pran lakoler fer atansyon pour zot pa tonm dan pese, e fer atansyon pa les zot lakoler dire ziska aswar. Pa les dyab pran lavantaz lo zot.” (Efe. 4:26, 27) Kan nou aplik sa bann parol, sa i kapab ed nou pour rezourd oubyen evit bann dispit dan lavi maryaz. En ser i dir: “Mon pa rapel si i annan okenn dezakor ki nou ti gannyen ki mon pa ti koz lo la avek mon msye, menm si nou ti bezwen pran plizyer erdtan pour rezourd sa problenm.” Depi o konmansman zot lavi maryaz, sa ser ek son msye ti determinen pour pa les en zour pase san ki zot rezourd bann problenm. “Nou ti deside ki nenport ki kalite problenm nou ti rankontre, nou pou pardonnen e oubliye, koumsa tou le zour ti pou en nouvo konmansman.” Dan sa fason, zot “pa ti les Dyab pran lavantaz lo zot.”
17. Menm si serten i kapab santi ki zot pa’n byen marye, kwa ki kapab ed zot?
17 Me ki ou pou fer si ou’n marye avek en dimoun ki finalman ou santi i pa sa enn ki ou ti devret marye avek? Petet ou kapab santi ki ou relasyon avek ou msye ouswa madanm pa paret sitan romantik parey pour lezot. Me kantmenm sa, kan ou mazinen konman Zeova i vwar maryaz, sa pou ed ou. Zapot Pol ti ganny enspire pour donn sa konsey bann Kretyen: “Ki maryaz i ganny onore par tou dimoun, e ki bann ki’n marye i reste fidel avek kanmarad. Bondye pou ziz bann ki anmenn en lavi dezordonnen e adilter.” (Ebr. 13:4) E sirtou nou pa devret oubliy sa bann parol: “En lakord ki’n tres an trwa pa fasil pour kas an de.” (Ekle. 4:12) Kan tou le de, msye ek madanm i telman anvi ki non Zeova i ganny sangtifye, sa i kree en lyen ant zot de e avek zot Kreater. Zot bezwen travay pour ki zot maryaz i enn ki reisi, akoz zot konsyan ki sa pou fer plezir Zeova, sa Enn ki ti enstitye maryaz.—1 Pyer 3:11.
18. Ki nou kapab asire an rapor avek maryaz?
18 Byensir, i posib pour Kretyen trouv lazwa dan zot lavi maryaz. Me i demann zefor e ou bezwen annan bann kalite ki fer plezir Bondye, enn parmi se pare pour sede. Ozordi, dan bann kongregasyon Temwen Zeova atraver lemonn, i annan en kantite koup marye ki pe montre ki i posib pour sa arive.
Ki ou pou reponn?
• Akoz i pa enposib pour trouv lazwa dan lavi maryaz?
• Kwa ki kapab fer en maryaz reisi?
• Ki kalite bann ki’n marye i bezwen devlope?
[Kestyon]
[Portre lo paz 15]
Bann koup marye pou diskite avek kanmarad avan ki zot aksepte en lenvitasyon oubyen angaz zot dan nenport aktivite
[Portre lo paz 16]
Fer bokou zefor pour rezourd bann dezakor menm zour, ‘pa les Dyab pran lavantaz’