Ki bi lavi?

AKOZ LAREPONS I ENPORTAN? Parmi bann keksoz ki fer dimoun pli dezespere dan lavi se sa krwayans ki lavi napa en sinifikasyon oubyen en bi. De lot kote, en dimoun ki annan en vre bi dan lavi pou kapab sirmont bann sitiasyon difisil pli vit. Viktor Frankl ki en spesyalis dan sistenm nerf e ki ti en viktim Olokos, ti dir: “Napa nanryen dan lemonn mon kapab dir ki pou vreman ed en dimoun sirviv bann pli move sitiasyon apard ki ler i konsyan ki lavi i annan en bi.”

Anfet, i annan en kantite diferan lopinyon lo sa size. Bokou i santi ki i responsabilite en endividi li menm pour li deside ki bi lavi. De lot kote, bann ki krwar dan evolisyon i ansennyen ki lavi napa en vre bi.

Alors en pli meyer fason pour konnen ki bi lavi se pour konn pwennvi sa Enn ki donn Lavi, e sa se Zeova. Annou vwar ki Parol Bondye i annan pour dir lo sa size.

Ki Labib i dir

Labib i ansenny nou ki Zeova ti annan en plan spesifik pour zonm ek fanm kan i ti kree zot. Zeova ti donn sa konmann swivan avek nou premye paran.

Zenez 1:28. “Fer zanfan e vin bokou, ranpli later e domin li. Annan kontrol lo bann pwason dan lanmer ek bann kreatir ki anvole dan lesyel ek tou kreatir vivan ki pe marse lo later.”

Bondye ti annan plan fer Adan, Ev ek zot zanfan fer later antye vin en paradi. I ti napa lentansyon fer imen vyeir e mor, ni menm anvi ki limanite i andomaz lanvironnman. Parkont, vi ki nou paran ti fer en move swa nou’n erit pese ek lanmor. (Zenez 3:2-6;  Romen 5:12) Kantmenm sa, plan Zeova pa’n sanze. Byento later pou vin en paradi.—Izai 55:10, 11.

Pour arive akonplir son plan Zeova in kree nou avek sa abilite fizik e mantal. I pa ti kree nou pour viv endepandan. Remarke ki mannyer sa bann verse swivan i dekrir plan Bondye pour nou.

Eklezyast 12:13. “Konklizyon apre ki tou keksoz in ganny tande, i: Annan lakrent pour sa vre Bondye e gard son bann komannman. Akoz sa i tou lobligasyon zonm.”

Mika 6:8. “Ki Zeova pe demann ou an retour apard ki demontre lazistis, kontan labonte, e mars dan en fason modes avek ou Bondye?”

Matye 22:37-39. “Kontan Senyer ou Bondye avek tou ou leker, avek tou ou lam, e avek tou ou lespri. Sa se premye e pli gran konmannman. E dezyenm konmannman i parey li: ‘Kontan ou prosen parey ou kontan ou prop lekor.’”

Konman larepons Labib i donn vre lape lespri?

Pour ki en nenport masin konplike i mars byen, sa masin i devret ganny servi pour fer travay ki son fabrikan ti’n plàn pour fer avek e ganny byen itilize. Pareyman, si nou pa anvi fer nou lekor dimal ki swa spirityelman, mantalman, emosyonnelman oubyen fizikman, nou devret viv nou lavi lafason ki nou Kreater i anvi nou viv. Remarke ki mannyer annan konnesans lo plan Bondye i kapab donn nou lape lespri dan lavi dan sa bann domenn swivan.

Kan pe etablir bann priyorite, bokou ozordi i pas tou zot lavi pour rod en ta keksoz materyel. Parkont, Labib i averti nou ki “bann ki oule vin ris i tonm dan tantasyon e dan pyez en kantite dezir bet e move.”—1 Timote 6:9, 10.

De lot kote, bann ki aprann pour kontan Bondye olye larzan i dekouver sa sekre ki fer en dimoun ere dan lavi. (1 Timote 6:7, 8) Zot konpran lenportans travay dir e zot konnen ki zot annan sa responsabilite pour pran swen avek zot prop bezwen fizik. (Efezyen 4:28) Me zot osi pran oserye lavertisman Zezi: “Personn pa kapab servi de met; parski swa i pou deteste enn e kontan lot; swa i pou devoue anver enn e mepriz lot. Ou pa kapab servi Bondye ek larises an menm-tan.”—Matye 6:24.

Alors, olye met zot travay oubyen fer bann keksoz materyel vin zot priyorite, bann ki kontan Bondye i fer son lavolonte vin premye keksoz dan zot lavi. Zot konnen ki si pour zot, fer lavolonte Bondye i sa keksoz pli enportan dan zot lavi, Zeova pou pran swen avek zot. Anfet, Zeova i santi li oblize pour fer li.—Matye 6:25-33.

Dan relasyon avek lezot, bokou i mazin zot lekor premye. Ozordi, napa lape dan lemonn akoz bokou dimoun i “egois, . . . [e] annan leker dir.” (2 Timote 3:2, 3) Kan en dimoun i dezapwent zot ouswa pa dakor avek zot pwennvi, zot eksprim zot lekor par “lakoler . . . kriye ek lensilt.” (Efezyen 4:31) Olye ganny lape lespri ler nou mank kontrol lo nou prop lekor sa i “ankouraz dispit.”—Proverb 15:18.

Konpare avek zot, bann ki obeir komannman Bondye pour kontan zot prosen parey zot menm, zot “bon, ranpli avek lafeksyon pour kanmarad; e pardonn kanmarad.” (Efezyen 4:32; Kolosyen 3:13) Menm kan bann dimoun pa tret zot byen, zot fer bokou zefor pour imit Zezi ki “pa ti reponn par lensilt.” (1 Pyer 2:23) Parey Zezi, zot rekonnet ki servi lezot i anmenn sa vre satisfaksyon, menm anver bann ki pa apresye sa ki pe ganny fer pour zot. (Matye 20:25-28; Zan 13:14, 15; Akt 20:35) Zeova i donn bann ki imit son Garson son lespri sen e son lespri sen i fer zot annan vre lape dan zot lavi.—Galat 5:22.

Ki mannyer ou pwennvi lo lavenir i kapab annan lefe lo ou lape lespri?