Toultan met Zeova devan nou
Toultan met Zeova devan nou
“Mon’n toultan met Zeova devan mwan.”—PS. 16:8.
1. Ki lefe bann zistwar ki ganny rakonte dan Labib i kapab annan lo nou?
DAN Labib i annan en zoli resi ki montre ki mannyer Bondye i azir anver bann imen. I mansyonn en kantite dimoun ki’n annan en rol pour zwe dan lakonplisman plan Bondye. Byensir, zot parol ek sa ki zot in fer pa’n ganny mete dan Labib zis konman bann zistwar pour fer nou plezir. O kontrer sa bann resi i kapab fer nou vin pli pros avek Bondye.—Zak 4:8.
2, 3. Ki mannyer nou merit konpran sa bann parol dan Psonm 16:8?
2 Nou tou nou kapab aprann en kantite atraver leksperyans bann personnaz dan Labib ki nou konn byen, tel parey Abraam, Sara, Moiz, Rit, David, Ester, zapot Pol ek lezot ankor. Me nou osi kapab benefisye ler nou lir bann resi konsernan serten endividi ki pa tro renonmen. Par medit lo sa bann resi Labib sa i kapab ed nou pour azir an armoni avek parol sa psalmis: “Mon’n toultan met Zeova devan mwan. Parski i dan mon kote drwat, mon pa pou drive.” (Ps. 16:8) Ki sa bann parol i vedir?
3 Normalman en solda i servi son lepe avek son lanmen drwat e sa kote drwat pa ganny proteze vi ki i pe tenir son boukliye avek son lanmen gos. Me kantmenm sa, i ti ganny proteze si en zanmi ti lager obor li lo son kote drwat. Si nou toultan mazin Zeova e fer son lavolonte, i pou protez nou. Alors annou vwar ki mannyer bann resi Labib i kapab ranforsi nou lafwa pour ki nou “toultan met Zeova devan [nou].”—Byington.
Zeova i reponn nou lapriyer
4. Donn en legzanp dan Labib ki montre ki Bondye i reponn lapriyer.
4 Si nou met Zeova devan nou, i pou reponn nou lapriyer. (Ps. 65:2; 66:19) Nou annan laprev dan sa domenn, sa i konsernan sa pli vye serviter Abraam, petet Eliezer. Abraam ti anvoy li Mezopotami pour rod en madanm ki annan lakrent pour Bondye pour Izaak. Eliezer ti priye pour ganny gidans Bondye e i ti rekonnet ki se Zeova ki ti pe gid sa sitiasyon kan Rebeka ti donn delo son bann samo. Akoz i ti persevere dan lapriyer, Eliezer ti trouv sa enn ki ti vin sa madanm ki Izaak ti byen kontan. (Zen. 24:12-14, 67) I vre ki serviter Abraam ti lo en misyon spesyal. Eski pa nou devret annan sa menm konfyans ki Zeova i ekout nou lapriyer?
5. Akoz nou kapab dir ki menm en lapriyer kourt ki ganny fer an silans i kapab efikas?
5 Parfwa, i kapab annan bann sitiasyon kot nou bezwen priy vitman pour demann Bondye son led. En fwa, Lerwa Pers Artakzerses ti remarke ki son serviter Neemya ti vreman tris. Lerwa ti demande: “Ki ou ti oule fer?” “Deswit [Neemya] ti priy Bondye lesyel.” Neemya ti bezwen fer en lapriyer kourt ki aparaman i ti fer an silans. Kantmenm sa, Bondye ti reponn son lapriyer, akoz Neemya ti ganny sipor lerwa pour rebatir miray Zerizalenm. (Lir Neemya 2:1-8.) Wi, menm en lapriyer kourt ki ganny fer an silans i kapab efikas.
6, 7. (a) Ki legzanp Epafras in kite konsernan lapriyer? (b) Akoz nou devret priy pour lezot?
6 Nou’n ganny ankouraze pour “priy pour kanmarad,” menm si nou pa touzour ganny levidans deswit ki sa bann lapriyer in ganny reponn. (Zak 5:16) Epafras, “en fidel serviter Kris” ti priy bokou pour bann ki ti annan menm lafwa avek li. Ler i ti Ronm, Pol ti ekrir an dizan: “Epafras osi ki sorti kot zot [bann Kolosyen] i fer zot konpliman; sa serviter Kris Zezi pa zanmen aret lite pour zot dan lapriyer, pour ki zot reste ferm, konman bann dimoun mir, dan lobeisans konplet lavolonte Bondye. Annefe, mon kapab dir personnelman ki in travay dir pour zot ek pour bann ki reste Laodise ek Hierapolis.”—Kol. 1:7; 4:12, 13.
7 Lavil Kolos, Laodise ek Hierapolis ti sitye dan menm rezyon Lazi Miner. Bann Kretyen Hierapolis ti pe viv parmi bann adorater bondye Sibel, tandis ki materyalis ti en pyez pour bann Kretyen an Laodise, e lafwa bann Kolosyen ti kapab afeblir akoz bann filozofi imen. (Kol. 2:8) I pa etonan ki Epafras ki ti sorti Kolos, ‘ti lite dan lapriyer’ pour bann krwayan dan sa lavil! Labib pa eksplike ki mannyer lapriyer Epafras ti ganny reponn, me i pa ti aret priye pour son bann frer ek ser Kretyen. Nou osi nou pa devret aret priye pour nou bann frer ek ser. Menm si nou pa ‘mel nou dan zafer lezot’ petet nou konn manm en fanmir oubyen en zanmi ki pe fer fas avek en leprev difisil. (1 Pyer 4:15) Pa i ti pou byen pour nou priy pour li dan nou lapriyer personnel! Pol ti ganny led par siplikasyon ki lezot ti fer e pareyman nou lapriyer i kapab fer otan dibyen.—2 Kor. 1:10, 11.
8. (a) Ki mannyer nou konnen ki bann ansyen sorti Efez ti bann zonm ki ti kontan priye? (b) Ki latitid nou devret annan an rapor avek lapriyer?
8 Eski lezot i vwar nou konman bann dimoun ki kontan priye? Apre ki Pol ti zwenn bann ansyen sorti Efez i “ti azenou avek zot tou e i ti priye.” Apre “tou dimoun ti plere e ser Pol dan zot lebra e anbras li pour fer zot adye. Zot ti tris sirtou akoz i ti’n dir zot sa parol konmkwa zot pa pou war son figir ankor.” (Akt 20:36-38) Nou pa konn non tou sa bann ansyen, me i evidan ki zot ti bann zonm ki ti apresye sa privilez pour priye. Sirman nou devret seri sa privilez ki nou annan pour priy Bondye e nou devret priy li “an levan [nou] lanmen” avek fidelite par annan konfyans ki nou Papa dan lesyel pou reponn nou.—1 Tim. 2:8.
Obeir Bondye dan tou keksoz
9, 10. (a) Ki legzanp bann fiy Zelofead in kite? (b) Ki mannyer legzanp sa bann fiy Zelofead i kapab annan lenpak lo fason en Kretyen selibater i konsider maryaz?
9 Ler nou toultan met Zeova dan nou lespri, sa pou ed nou obeir li e nou pou resevwar bann benediksyon an retour. (Det. 28:13; 1 Sam. 15:22) Pour arive fer sa nou pou bezwen pare pour obeir. Annou egzamin latitid sa senk ser, bann fiy Zelofead ki ti viv dan letan Moiz. Dapre koutim Izraelit, bann garson ki ti resevwar leritaz avek zot papa. Kan sa zonm ki ti apel Zelofead ti mor i ti napa okenn garson e Zeova ti donn lord ki sa senk fiy i resevwar tou leritaz, lo en kondisyon. Zot ti bezwen marye avek bann garson Manase pour ki bann propriyete ki zot ti’n erite i reste dan sa menm tribi.—Nom. 27:1-8; 36:6-8.
10 Bann fiy Zelofead ti annan konfyans ki keksoz ti pou mars byen si zot ti obeir Bondye. Labib i dir: “Bann fiy Zelofead ti fer egzakteman parey Zeova ti’n komann Moiz. Alors, Mala, Tirtsa, Ogla, Milka ek Noa, bann fiy Zelofead, ti vin madanm bann garson frer zot papa. Zot ti vin madanm serten fanmir bann garson Manase ki ti garson Zozef, pour ki zot leritaz i kapab kontinyen reste dan tribi fanmir zot papa.” (Nom. 36:10-12) Sa bann madanm obeisan ti fer sa ki Zeova ti komann zot pour fer. (Zoz. 17:3, 4) Bann Kretyen selibater ki spirityelman matir e annan menm kalite lafwa parey bann fiy Zelofead, i obeir Bondye par marye “selon Senyer.”—1 Kor. 7:39.
11, 12. Ki mannyer Kaleb ti montre ki i ti annan konfyans dan Bondye?
11 Nou bezwen obeir Zeova dan tou keksoz, parey Kaleb sa Izraelit ti fer. (Det. 1:36) Apre ki bann Izraelit ti’n ganny delivre Lezip dan sezyenm syek A.N.L., Moiz ti anvoy 12 espyon Kanaan, me zis de parmi sa bann espyon, setadir Kaleb ek Zozye, ki ti ankouraz lepep pour annan konfyans total dan Bondye e antre dan sa pei. (Nom. 14:6-9) Apepre 40 an pli tar, Zozye ek Kaleb ti ankor vivan e touzour pe swiv tou sa ki Zeova ti dir zot. Bondye ti servi Zozye pour gid bann Izraelit dan Later Promiz. Me i paret ki sa dis espyon enfidel ti mor pandan sa karant an ki bann Izraelit ti pase dan dezer.—Nom. 14:31-34.
12 Konman en sirvivan ki ti aze apre ki i ti’n reste dan dezer tou sa letan ansanm avek bann Izraelit, Kaleb ti kapab debout devan Zozye e dir: “Mon’n swiv Zeova mon Bondye plennman.” (Lir Zozye 14:6-9.) Dan son katreven senkyenm lannen Kaleb ti demande pour ganny sa rezyon ki Bondye ti’n promet li, kantmenm dan sa rezyon ti annan bann lennmi ki ti pe reste dan bann lavil byen barikade.—Zoz. 14:10-15.
13. Malgre difikilte, ki nou bezwen fer pour ganny beni?
13 Parey Kaleb ki ti fidel e obeisan, nou pou ganny benediksyon Bondye si nou ‘swiv Zeova plennman.’ Si nou fer fas avek bann gro lobstak, nou pou ganny beni anmezir ki nou ‘swiv Zeova plennman.’ Me pour fer sa tou dilon nou lavi parey Kaleb ti fer, i kapab en defi. Menm si Lerwa Salomon ti byen swiv Zeova ler i ti konmans dirize, son bann madanm ti nobou antrenn li pour servi bann fo bondye dan son vye zour e kontrerman avek “son papa David, i pa ti swiv Zeova plennman.” (1 Rwa. 11:4-6) Nenport ki leprev nou fer fas avek, fotespere nou obeir Bondye dan tou keksoz e met li devan nou toultan.
Pa zanmen perdi konfyans dan Zeova
14, 15. Dapre leksperyans Naomi, ki ou’n aprann konsernan konfyans ki nou bezwen annan dan Zeova?
14 Nou bezwen annan konfyans dan Bondye sirtou ler nou dekouraze akoz lavenir i paret san okenn lespwar. Pran legzanp Naomi en madanm a laz ki bann lennmi ti’n touy son msye ek son de garson. Kan i ti retourn Zida sorti Moab, i ti plennyen: “Pa apel mwan Naomi [“Agreab,” not anba lo paz.]. Apel mwan Mara [“Anmer,” not anba lo paz.], akoz Tou Pwisan in fer keksoz vin vreman anmer pour mwan. Ler mon ti ale mon ti annan en kantite, me Zeova in fer mwan retourn lanmen vid. Akfer zot bezwen apel mwan Naomi, kan sa ler Zeova ki’n imilye mwan e Tou Pwisan ki’n fer mon maler?”—Rit 1:20, 21.
15 Malgre Naomi ti dekouraze, ler nou lir atantivman liv Rit nou vwar ki i ti kontinyen annan konfyans dan Zeova. Me en sel kou son sitiasyon ti sanze. Rit belfiy Naomi, ki ti osi en vev ti vin madanm Boaz e i ti ganny en pti garson. Naomi ti pran swen avek sa zanfan e sa resi i dir: “Alors bann vwazen ti donn li en non, an dizan: ‘Naomi in ganny en garson.’ E zot ti apel li Obed. I papa Zese ki trouv papa David.” (Rit 4:14-17) Kan Naomi pou resisite lo later, i pou aprann ki Rit, ki pou osi ganny resisite, ti vin en zanset Zezi, sa Mesi. (Mat. 1:5, 6, 16) Parey Naomi, nou pa kapab konnen ki mannyer bann move sitiasyon pou fini. Alors, annou touzour annan konfyans dan Bondye, zis parey Proverb 3:5, 6 i ankouraz nou: “Met ou konfyans dan Zeova avek tou ou leker e pa apiy lo ou prop konprenezon. Dan tou ou semen pran li an konsiderasyon, e li i pou fer drwat ou bann santye.”
Depan lo lespri sen
16. Ki mannyer lespri sen Bondye in ed serten ansyen dan Izrael dan lepase?
16 Si nou toultan met Zeova devan nou, i pou gid nou par mwayen son lespri sen. (Gal. 5:16-18) Bondye ti donn son lespri sen avek sa 70 ansyen ki ti ganny swazir pour ed Moiz “anmenn fardo pep” Izrael. Zis Eldad ek Medad ki’n ganny mansyonnen, me lespri sen ti permet zot tou akonplir zot travay. (Nom. 11:13-29) San okenn dout, zot ti bann zonm kalifye ki ti annan lakrent pour Bondye, bann zonm diny konfyans e onnet parey sa bann zonm ki ti ganny swazir pli boner. (Egz. 18:21) Bann ansyen ozordi i demontre menm kalite.
17. Ki mannyer Zeova ti servi son lespri sen dan konstriksyon tabernak?
17 Lespri sen Zeova ti zwe en rol enportan dan konstriksyon tabernak dan dezer. Zeova ti apwent Betsalel konman sa artizan prensipal e konman sa konstrikter tabernak. I ti promet pour “donn li lespri Bondye pour li annan lasazes, konprenezon, konnesans e pour annan sa abilite dan tou kalite travay en artizan.” (Egz. 31:3-5) Bann zonm ki ti “saz” ti travay avek Betsalel ek son asistan Ooliyab pour akonplir sa travay ekstraordiner. Deplis, lespri sen ti pous bann dimoun ki ti annan “sa bon leker” pour fer bann kontribisyon. (Egz. 31:6; 35:5, 30-34) Sa menm lespri sen i motiv bann serviter Bondye dan nou letan pour fer tou sa ki zot kapab pour fer avanse lentere Rwayonm. (Mat. 6:33) Nou kapab annan serten abilite, me nou bezwen priye pour ganny lespri sen e les li diriz nou si nou oule akonplir sa travay ki Zeova in donn son pep pour fer dan nou letan.—Lik 11:13.
Annou touzour annan en gran respe pour Zeova bann larme
18, 19. (a) Ki kalite latitid lespri sen Bondye i prodwir dan nou? (b) Ki ou’n aprann atraver legzanp Simeon ek Ann?
18 Lespri sen i fer nou devlop en latitid kot nou demontre en gran respe ki fer nou toultan met Zeova devan nou. Profet Izai ti dir pep Bondye dan letan lontan: “Zot devret annan en gran respe pour Zeova bann larme konman sa enn ki sen.” (Iza. 8:13, Byington) Simeon ek Ann ti de dimoun a laz ki ti annan gran respe pour Bondye dan premye syek, Zerizalenm. (Lir Lik 2:25-38.) Simeon ti annan lafwa dan bann profesi konsernan Mesi e i ti “pe esper konsolasyon pep Izrael.” Bondye ti donn Simeon son lespri sen e i ti asir li ki i pa ti pou mor avan ki i vwar Mesi. E sanmenm sa ki ti arive. En zour, dan lannen 2 A.N.L., Mari manman Zezi ek son papa adoptif, Zozef, ti anmenn li kot tanp. Pouse par lespri sen, Simeon ti anons bann parol profetik konsernan Mesi e i ti predir sagrinasyon ki Mari ti pou santi, li ki ti sagren en kantite kan Zezi ti ganny kloute lo en poto martir. Me zis mazin sa gran lazwa ki Simeon ti santi ler i ti pran ‘Mesi ki’n ganny promet par Zeova’ dan son lebra! Pa sa gran respe ki Simeon ti annan pour Bondye i en bon legzanp pour bann serviter Bondye ozordi!
19 Ann en vev 84-r-an ki ti annan gran respe pour Bondye pa ti zanmen “kit tanp.” I ti ofer Zeova en servis sakre lannwit konman lizour par fer “lapriyer [oubyen “siplikasyon,” NW]” e osi zennen. Ann tou ti la ler Zezi ki ti en pti baba ti ganny anmennen kot tanp. Pa i ti bezwen vreman rekonesan pour vwar sa enn ki ti pou vin Mesi pli tar! Anfet, i “ti rann glwar Bondye, e koz lo sa zanfan avek tou bann ki ti pe esper delivrans Zerizalenm.” Ann ti santi li pouse pour partaz sa bon nouvel avek lezot. Parey Simeon ek Ann, bann Kretyen aze ozordi i vreman kontan ki zot touzour kapab servi Zeova konman son bann Temwen malgre zot laz.
20. Malgre nou laz, ki nou bezwen fer e akoz?
20 Nenport ki laz ki nou annan, nou bezwen toultan met Zeova devan nou. I pou alor beni nou bann zefor lefet ki nou demontre limilite par koz avek lezot konsernan son Rwayonm ek son bann travay merveye. (Ps. 71:17, 18; 145:10-13) Me si nou oule onor Zeova, nou bezwen demontre bann bon kalite Kretyen. Ki nou kapab aprann konsernan sa bann kalite ler nou egzamin bann resi Labib?
Ki ou pou reponn?
• Ki mannyer nou konnen ki Zeova i ekout lapriyer?
• Akoz nou devret obeir Bondye dan tou keksoz?
• Menm si nou dekouraze, akoz nou devret touzour annan konfyans dan Zeova?
• Ki mannyer lespri sen Bondye i ed son pep?
[Kestyon]
[Portre lo paz 8]
Lapriyer Neemya ti efikas
[Portre lo paz 9]
Ler nou mazinen ki mannyer sitiasyon ti sanze pour Naomi, sa pou ed nou annan konfyans dan Zeova