Mars dan semen Zeova
Mars dan semen Zeova
“Ere tou dimoun ki annan lakrent pour Zeova, ki pe mars dan son semen.”—PS. 128:1.
1, 2. Akoz nou kapab asire ki i posib pour nou vreman ere?
ERE, sanmenm sa ki tou dimoun i oule. Me san dout ou pou dakor ki sa dezir pour vin ere oubyen esey rod pour vin ere, pa vedir ki nou ere.
2 Toudmenm, i posib pour nou vreman ere. Psonm 128:1 i dir: “Ere tou dimoun ki annan lakrent pour Zeova, ki pe mars dan son semen.” Nou kapab ere si nou ador Bondye e mars dan son bann semen par fer son lavolonte. Ki lefe sa i kapab annan lo nou kondwit e lo bann kalite ki nou demontre?
Prouve ki ou diny konfyans
3. Ki mannyer diny konfyans i relye avek nou dedikasyon anver Zeova?
3 Sa bann ki annan lakrent pour Zeova i diny konfyans, parey Zeova li menm. Zeova in akonplir tou bann promes ki i ti fer avek pep Izrael dan lepase. (1 Rwa. 8:56) Nou dedikasyon avek Bondye i sa promes pli enportan ki nou kapab fer e nou pou arive gard nou promes si nou priye regilyerman. Nou kapab priye parey psalmis David: “Ou menm, O Bondye, ou’n ekout mon bann ve. . . . Alors mon pou sant an loner ou non pour touzour, pour ki mon kapab akonplir mon bann ve zour apre zour.” (Ps. 61:5, 8; Ekle. 5:4-6) Pour vin bann zanmi Bondye nou bezwen diny konfyans.—Ps. 15:1, 4.
4. Ki mannyer Yifta avek son fiy ti konsider sa ve ki i ti fer anver Zeova?
4 Dan letan bann ziz an Izrael, Yifta ti fer en ve ki si Zeova i donn li laviktwar lo bann Amonit, i ti pou donn sa premye dimoun ki sorti pour rankontre li lo son retour apre lager, konman “en lofrann brile.” Sa dimoun pa ti lot ki son fiy, sa sel zanfan ki i ti annan. Akoz lafwa ki zot ti annan dan Zeova, Yifta e osi son fiy ki ti ankor selibater ti akonplir sa ve. Menm si maryaz e elve zanfan ti en keksoz vreman enportan dan Izrael, fiy Yifta ti volonterman reste selibater e i ti rezwir sa privilez pour akonplir son servis sakre dan tanp Zeova.—Ziz 11:28-40.
5. Dan ki fason Ana ti montre li diny konfyans?
5 Ana en madanm ki ti annan lakrent pour Zeova ti montre ki i ti diny konfyans. I ti reste dan rezyon kot i annan montanny avek son msye Levit Elkana e osi avek Penina lot madanm Elkana. Penina ti ganny plizyer zanfan e i ti sikann Ana sirtou ler zot ti al kot tabernak an fanmir akoz Ana ti napa zanfan. Lo enn sa bann lokazyon, Ana ti fer en ve ki si i ganny en garson, i ti pou donn li avek Zeova. Pa tro lontan plitar i ti tonm ansent e i ti donn nesans en pti garson ki ti apel Samyel. Apre ki Ana ti’n sevre Samyel, i ti ofer li avek Bondye kot Silo e ofer li avek Zeova “tou dilon son lavi.” (1 Sam. 1:11) I ti akonplir son ve menm si i pa ti konnen ki plitar i ti pou ganny lezot zanfan.—1 Sam. 2:20, 21.
6. Ki mannyer Tisik ti demontre ki i ti diny konfyans?
6 Tisik en Kretyen dan premye syek ti en zonm diny konfyans e en “travayer fidel.” (Kol. 4:7) Tisik ti vwayaz avek zapot Pol depi Lagres atraver Masedwann, Lazi Miner e petet ziska Zerizalenm. (Akt 20:2-4) I kapab ki ti li menm li “sa frer” ki ti ed Tit pour fer laranzman pour kolekte bann don pour ed bann frer ki ti dan bezwen Zide. (2 Kor. 8:18, 19; 12:18) Ler Pol ti ganny met dan prizon pour premye fwa Ronm, Tisik sa reprezantan diny konfyans ti anmenn bann let pour bann Kretyen dan lavil Efez ek Kolos. (Efe. 6:21, 22; Kol. 4:8, 9) Dezyenm fwa ki i ti ganny met dan prizon Ronm, Pol ti anvoy Tisik Efez. (2 Tim. 4:12) Si nou diny konfyans, nou osi nou pou rezwir bann benediksyon dan servis Zeova.
7, 8. Akoz nou kapab dir ki David ek Yonatann ti de vre zanmi?
7 Bondye i ekspekte nou pour vin bann zanmi ki diny konfyans. (Prov. 17:17) Yonatann, garson Lerwa Sail ti vin zanmi David. Ler Yonatann ti tande ki David ti’n touy Golyat, “Yonatann ti vin atase avek David e Yonatann ti konmans kontan David parey li menm.” (1 Sam. 18:1, 3) Yonatann ti menm averti David ler Sail ti oule touy li. Apre ki David ti’n sove, Yonatann ti zwenn li e fer en lalyans avek li. Letan Yonatann ti koz avek Sail konsernan David, sa ti pros pour kout li son lavi, me sa de zanmi ti rezwenn kanmarad ankor e zot lanmitye ti vin pli for. (1 Sam. 20:24-41) Sa dernyen fwa ki zot ti zwenn kanmarad, Yonatann ti ankouraz David “pour demann Bondye lafors.”—1 Sam. 23:16-18.
8 Yonatann ti mor dan en lager kont bann Filisten. (1 Sam. 31:6) Dan en sanson tris, David ti sante: “Mon dan langwas konsernan mon frer Yonatann, pour mwan ou ti vreman agreab. Ou lanmour ti pli siperyer ki lanmour sorti kot bann madanm.” (2 Sam. 1:26) Sa lanmour ti senpleman lafeksyon ant de zanmi e ti napa naryen pour fer avek relasyon seksyel. David ek Yonatann ti de vre zanmi.
Toultan annan “limilite”
9. Ki mannyer lenportans limilite i ganny demontre dan Ziz sapit 9?
9 Pour vin zanmi Bondye, nou bezwen annan “limilite.” (1 Pyer 3:8; Ps. 138:6) Ziz sapit 9 i montre nou lenportans pour annan limilite. Garson Yotam, Gideonn, ti dir: “Alors en zour bann pye dibwa ti swazir en lerwa pour zot.” Pye zoliv, pye fig, ek pye rezen ti ganny mansyonnen. Zot ti pe reprezant bann endividi ki pa ti anvi renny lo bann Izraelit. Me bann plant avek pikan ki ti zis bon pour fer pran dife, ti pe reprezant sa lerwa vantar Abimelek, ki ti en kriminel e ki ti oule domin lezot. Kantmenm i ‘ti vin prens pandan trwa-z-an,’ i ti mor avan son ler. (Ziz 9:8-15, 22, 50-54) Pa i pli bon pour annan “limilite”!
10. Ki ou’n aprann konsernan sa ki ti arive avek Erod lefet ki i “ti gard loner ki [ti] pour Bondye pour limenm”?
10 Dan premye syek N.L., problenm ti leve ant Lerwa Erod Agripa byen vantar sorti Zide ek bann zabitan sorti Tir ek Sidon, ki ti oule fer lape avek li. En fwa ler Erod ti pe adres manm piblik par en diskour, zot ti kriye: “Sa pa en zonm ki pe koze la, me en bondye!” Erod pa ti rezet sa bann parol ki ti pe zis flat li e lanz Zeova ti frap li par fer li sibir en lanmor terib “parski i ti gard loner ki pour Bondye pour limenm.” (Akt 12:20-23) Me si nou annan en bon talan konman en orater oubyen en ansennyan Labib ki latitid nou pou annan? Alors annou donn Bondye laglwar pour tou keksoz ki i permet nou fer.—1 Kor. 4:6, 7; Zak 4:6.
Pran kouraz e vin for
11, 12. Ki mannyer leksperyans Enok i montre ki Zeova i donn son bann serviter kouraz ek lafors?
11 Si avek limilite nou mars dan semen Zeova, i pou donn nou kouraz ek lafors. (Det. 31:6-8, 23) Avek kouraz, Enok, sa setyenm zonm ki ti sorti dan desandans Adan, ti mars avek Bondye. I ti anmenn en lavi drwat parmi bann move dimoun ki ti viv menm lepok avek li. (Zen. 5:21-24) Zeova ti donn Enok lafors pour anons sa mesaz pwisan avek zot akoz zot bann move parol ek aksyon kont li. (Lir Zid 14, 15.) Eski ou annan sa kouraz pour anons zizman Bondye?
12 Zeova ti egzekit zizman lo bann ki ti revolte kont li zour Deliz dan lepok Noe. Me profesi Enok i en lankourazman pour nou, akoz bann dimoun dan nou letan ki pa swiv Bondye pou ganny detrir byento par plizyer dizenn milye lanz sen Bondye. (Rev. 16:14-16; 19:11-16) Zeova i reponn nou bann lapriyer par donn nou kouraz pour anons son mesaz, ki relye swa avek son zizman oubyen bann benediksyon anba dominasyon son Rwayonm.
13. Akoz nou kapab asire ki Bondye i kapab donn nou sa kouraz ek lafors ki nou bezwen pour nou fer fas avek bann sitiasyon ki kapab dekouraz nou?
13 Nou bezwen kouraz ek lafors sorti kot Bondye pour fer fas avek bann sitiasyon ki kapab dekouraz nou. Kan Ezai ti pran de madanm Itit pour marye avek, “zot ti lakoz sagrinasyon pour [son paran] Izaak ek Rebeka.” Rebeka ti plennyen: “Mon’n ay mon lavi akoz sa bann fiy Et. Si [nou garson] Zakob i pran en madanm parmi bann fiy Et parey sa bann parmi bann fiy sa pei, akfer mon pou viv?” (Zen. 26:34, 35; 27:46) Izaak ti pran aksyon e i ti anvoy Zakob al rod en madanm parmi bann adorater Zeova. Menm si Izaak ek Rebeka pa ti kapab sanz sa ki Ezai ti’n fer, Bondye ti donn zot lasazes, kouraz ek lafors pour reste fidel anver Li. Si nou priye pour ganny led ki nou bezwen, Zeova pou fer parey pour nou.—Ps. 118:5.
14. Ki mannyer en pti fiy Izraelit ti demontre kouraz?
14 Plizyer syek plitar, en pti fiy Izraelit ti ganny anmennen konman lesklav par en group voler e i ti vin en servant dan lakaz en komandan larme Siryen ki ti apel Naamann. Sa zonm ti pe soufer avek lalep. Lefet ki i ti tann konsernan bann mirak ki profet Elisa ti fer, avek kouraz sa pti fiy ti dir avek madanm Naamann: ‘Si mon met ti al Izrael, profet Zeova ti pou geri son lalep.’ Naamann ti al Izrael e i ti ganny geri par en mirak. (2 Rwa. 5:1-3) Pa sa pti fiy i en bon legzanp pour bann zenn ki depan lo Zeova pour zot ganny kouraz pour rann temwannyaz avek bann ansennyan, kanmarad lekol ek lezot!
15. Ki aksyon ranpli avek kouraz Obadya sef serviter ti pran?
15 Kouraz ki Bondye i donnen i ed nou pour andir persekisyon. Pran legzanp Obadya sef serviter Lerwa Aab, ki ti viv menm lepok avek profet Eliya. Kan Larenn Zezabel ti donn lord pour touy bann profet Bondye, Obadya ti kasyet 100 profet “par group senkant dan en kavern.” (1 Rwa. 18:13; 19:18) Eski ou ti pou annan kouraz pour ed ou bann frer ek ser Kretyen ki ganny persekite parey Obadya ti ed bann profet Zeova?
16, 17. Ki mannyer Aristark ek Gayis ti reazir vizavi persekisyon?
16 Si nou ganny persekite, nou kapab annan konfyans ki Zeova pou avek nou. (Rom. 8:35-39) Dan en teat o plenner Efez, bann konpanyon travay Pol Aristark ek Gayis ti fer fas avek en lafoul kot petet ti annan apepre plizyer milye dimoun. En lorfev ki ti apel Demetriis ti pous lafoul pour fer en rayot. Ansanm avek bann lezot lorfev i ti fer bann pti tanp annarzan pour ladorasyon sa bondye Artemis. Sa travay ki ti anmenn en kantite profi ti pe ganny afekte akoz predikasyon Pol e sa ti fer en kantite dimoun ki ti reste dan sa lavil abandonn ladorasyon zidol. Sa lafoul ti trenn Aristark ek Gayis dan lasal teat e zot ti kontinyen kriye: “Viv gran Artemis bann Efezyen”! I posib ki Aristark ek Gayis ti ekspekte perdi zot lavi, me mer lavil ti reisi fer sa lafoul vin kalm.—Akt 19:23-41.
17 Si ou ti pas atraver en tel difikilte, eski ou ti pou rod en fason pour fer keksoz vin pli fasil pour ou? Napa nanryen ki montre ki Aristark ek Gayis ti perdi kouraz. Lefet ki i ti sorti Tesalonik, Aristark ti konnen ki anons sa bon nouvel ti pou kapab anmenn persekisyon. En pe pli boner, ti annan en rayot ler Pol ti prese laba. (Akt 17:5; 20:4) Akoz Aristark ek Gayis ti mars dan semen Zeova, zot ti ganny lafors ek kouraz sorti kot Bondye pour andir persekisyon.
Pran ka avek lentere lezot
18. Ki mannyer Prisil ek Akilas ti “pran ka” avek lentere lezot?
18 Ki swa nou pe ganny persekite oubyen non, nou devret enterese avek nou bann frer ek ser Kretyen. Prisil ek Akilas ti “pran ka” avek lentere lezot. (Lir Filipyen 2:4.) I kapab ki sa koup egzanpler ti donn Pol en plas reste ler i ti Efez, kan sa lorfev Demetriis ti okazyonn sa rayot ki ti ganny mansyonnen pli boner. I kapab ki sa sitiasyon ti pous Akilas ek Prisil pour ‘riske zot lavi’ pour Pol. (Rom. 16:3, 4; 2 Kor. 1:8) Dan nou letan, akoz nou konsernen avek nou bann frer ek ser ki ganny persekite sa i fer nou “pridan parey bann serpan.” (Mat. 10:16-18) Nou fer nou travay dan en fason pridan e refize pour trai zot par donn zot non oubyen lezot lenformasyon avek bann persekiter.
19. Ki bann bon keksoz Dorkas ti fer pour lezot?
19 I annan diferan fason pour pran ka avek lentere lezot. Serten Kretyen i dan bezwen e i posib ki nou kapab donn zot sa ki zot bezwen. (Efe. 4:28; Zak 2:14-17) Dan kongregasyon Zope dan premye syek, ti annan en madanm zenere ki ti apel Dorkas. (Lir Akt 9:36-42.) Dorkas “ti touzour okipe pe fer dibyen e pe ed bann pov” sa ti enkli fer lenz pour bann vev ki ti dan bezwen. Ler i ti mor lannen 36 N.L. bann vev ti sagren en kantite. Bondye ti servi zapot Pol pour resisit Dorkas, e i paret ki Dorkas ti pas larestan son lavi lo later pour anons sa bon nouvel avek lazwa e fer bann bon keksoz pour lezot. Pa nou kontan pour annan bann madanm Kretyen koumsa ozordi parmi nou, ki pa egois!
20, 21. (a) Ki mannyer lankourazman e pran ka avek bezwen lezot i relye ansanm? (b) Ki ou kapab fer pour vin en dimoun ankourazan?
20 Nou montre lentere dan lezot ler nou ankouraz zot. (Rom. 1:11, 12) Silas en konpanyon travay Pol ti en sours lankourazman. Apre ki zot ti tonm dakor konsernan sa kestyon lo sirkonsizyon ver lannen 49 N.L., konsey direkter ki ti sitye Zerizalenm ti anvoy bann reprezantan anmenn en let pour bann Kretyen dan bann lezot landrwa. Silas, Zida, Barnabas ek Pol ti anmenn sa let Antyos. Laba Silas ek Zida “ti koz lontan avek bann frer pour ankouraz zot e fortifye zot.”—Akt 15:32.
21 Plitar, Pol ek Silas ti ganny met dan prizon dan lavil Filip, me akoz sa sekous tranblemandter ki ti arive, i ti posib pour zot donn en temwannyaz e vwar sa gardyen prizon avek son fanmir vin bann Kretyen. Avan ki zot ti kit sa lavil, Silas ek Pol ti ankouraz bann frer. (Akt 16:12, 40) Parey Pol ek Silas, fer zefor pour ankouraz lezot par ou komanter, ou parol ek ou devouman dan predikasyon. E kan ou annan okenn parol “pour ankouraz” lezot, silvouple pa ezite pour [“dir li,” NW].—Akt 13:15.
Kontinyen mars dan semen Zeova
22, 23. Ki mannyer nou kapab vreman benefisye avek bann resi Labib?
22 Pa nou devret rekonesan pour sa bann resi baze lo bann vre zistwar ki’n ganny rikorde dan Parol Zeova, sa “Bondye ki donn lankourazman”! (2 Kor. 1:3, Byington) Si nou oule benefisye avek sa bann leksperyans, nou bezwen aplik sa bann leson ki ganny trouve dan Labib dan nou lavi e les nou ganny gide par lespri sen Bondye.—Gal. 5:22-25.
23 Par medit lo sa bann resi Labib sa pou ed nou demontre bann kalite Kretyen. Nou relasyon avek Zeova pou vin pli for, li ki donn nou “lasazes ek konnesans ek lazwa.” (Ekle. 2:26) An retour, nou pou fer leker Bondye kontan, li ki ranpli avek lanmour. (Prov. 27:11) Annou annan sa determinasyon pour fer sa par kontinyen mars dan semen Zeova.
Ki ou pou reponn?
• Ki mannyer ou kapab prouve ki ou diny konfyans?
• Akoz nou bezwen annan “limilite”?
• Ki mannyer bann resi Labib i kapab ed ou pour annan kouraz?
• Dan ki fason nou kapab pran ka avek bezwen lezot?
[Kestyon]
[Portre lo paz 12]
Yifta ek son fiy ki ti diny konfyans ti akonplir son ve, menm si i ti difisil
[Portre lo paz 14]
Bann zenn, ki zot kapab aprann atraver legzanp sa pti fiy Izraelit?
[Portre lo paz 15]
Ki mannyer Dorkas ti pran swen avek bezwen son bann frer ek ser Kretyen?