DETRWA lannen pase, Cesar ek son madanm Rocio, ti pe viv en lavi konfortab dan en lavil California. Cesar ti travay a plen tan dan sofaz, vantilasyon ek erkonn e Rocio ti travay a mitan kot en dokter. Zot ti annan zot prop lakaz e zot ti napa zanfan. Me en keksoz ti arive ki ti sanz zot lavi. Ki ti arive?

An Oktob 2009, biro brans Leta-z-ini ti anvoy en let dan tou kongregasyon sa pei pour envit bann volonter kalifye dan Betel pour ede agrandir biro brans Wallkill, New York. Menm bann ki ti’n desot laz limit pour servi dan Betel ti ganny ankouraze pour fer laplikasyon. Cesar ek Rocio i rakonte: “Akoz nou laz, nou ti konnen ki servi dan Betel ti en loportinite ki nou pa ti pou zanmen ganny ankor. Nou pa ti oule les nanryen fer nou perdi sa loportinite!” Deswit sa koup ti fer laplikasyon.

Plis ki enn an ti’n pase, me Cesar ek Rocio ti ankor pe espere pour ganny envite Betel. Pandan sa letan, zot ti profite pour fer lezot sanzman pour senplifye zot lavi pour arive atenn zot lobzektif. Cesar i dir: “Nou ti aranz nou garaz e fer li vin en bedsiter pour nou kapab lwe nou lakaz avek en lot dimoun. Apre sa, nou ti kit nou gran lakaz 200 met kare, ki nou ti’n toultan reve annan e ki nou ti’n konstri zis detrwa lannen avan pour al reste dan nou pti apartman 25 met kare. Par fer sa sanzman, sa ti pou permet nou aksepte al Betel si nou ti ganny envite pour fer li.” Ki ti arive apre? Rocio i rakonte, “En mwan pli tar, apre ki nou ti’n al reste dan nou pti apartman, nou ti ganny en lenvitasyon pour servi konman volonter tanporer Wallkill. I ti kler pour nou ki lefet ki nou ti’n senplifye nou lavi, nou ti’n donn Zeova en keksoz pour beni.”

Parey Cesar ek Rocio, i annan plizyer santenn frer ek ser ki’n fer bann sakrifis pour kapab partisip dan travay konstriksyon ki pe ganny fer dan Leta  New York. I annan en kantite ki pe siport sa travay pour agrandi Wallkill e lezot ankor in ganny sa privilez pour ede konstri biro prensipal Temwen Zeova Warwick. * Bokou in kit zot zoli lakaz, zot bon travay e menm zot bann zannimo pour kapab servi Zeova plis ankor. Eski Zeova in beni en tel leta lespri? Byensir!

Par egzanp, Way en elektrisyen ek Debra, zot tou le de zot ti pros pour ganny swasant an. Zot ti vann zot lakaz ek laplipar zot bann byen ki zot ti annan Kansas pour al reste Wallkill pour zot kapab al travay dan Betel toulezour. * Menm si zot ti bezwen fer serten azisteman dan zot lavi, zot santi ki i ti vreman vo lapenn fer sa bann sakrifis. Konsernan son travay dan Betel, Debra i dir: “Par ler mon santi konmsi mon dan enn sa bann portre Paradi ki nou vwar dan nou bann piblikasyon!”

Melvin ek Sharon ki sorti South Carolina ti vann zot lakaz ek zot bann keksoz pour zot kapab al ede Warwick. Menm si i pa ti fasil pour fer sa bann sakrifis, sa koup i santi ki i en privilez pour partisip dan sa proze enportan dan listwar pep Bondye. Zot dir: “Sa lakontantman ki nou annan lefet ki nou konnen ki nou pe akonpli en keksoz ki pou benefisye lorganizasyon dan lemonn antye, i vreman ekstraordiner.”

Kenneth en travayer konstriksyon ki’n pran son retret ek Maureen son madanm ki dan zot 55 an an montan ti kit California pour al servi lo sa proze Warwick. Pour kapab al laba, zot ti fer laranzman avek en ser dan zot kongregasyon pour okip zot lakaz e demann zot fanmir pour pran swen avek papa Ken ki aze. Eski zot regrete ki zot in fer sa bann sakrifis pour al servi Betel? Non! Ken i dir: “Nou pe ganny en kantite benefis. Eski sa i vedir ki napa okenn defi? Byensir i annan, me nou viv en lavi ki vreman gou ki anmenn satisfaksyon e nou ankouraz lezot avek tou nou leker pour gout sa servis.”

Laplipar frer ek ser ki’n fer zot disponib pour servi, in bezwen sirmont serten lobstak. Par egzanp, William ek Sandra, ki dan zot 60 an an montan ti pe viv zot lavi konfortab Pennsylvania. Zot ti annan en lakonpanni ki fabrik bann pyes masin ki ti pe mars byen e zot ti annan 17 anplwaye. Zot ti dan menm kongregasyon depi ki zot ti zanfan e laplipar zot fanmir ti reste dan sa menm rezyon. Alor ler zot ti ganny sa loportinite pour al servi Wallkill, zot ti konnen ki zot ti pou bezwen dir  orevwar preski tou dimoun ek tou keksoz ki zot ti’n abitye avek. William i dir: “San okenn dout sa pli gro defi ti pour kit la kot nou ti santi nou alez.” Me apre ki zot ti’n priy bokou lo la, sa koup ti deside pour al annavan e zot napa okenn regre pour sa desizyon ki zot in fer. William i dir: “Lefet ki nou direkteman enplike e pe travay kot a kot avek lafanmir Betel, sa i en lazwa ki pa kapab ganny konpare. Nou de Sandra nou pli ere ki zanmen oparavan!”

Ricky, en manedyer proze konstriksyon Hawaii, ti ganny envite pour al servi Betel pour ede lo proze Warwick. Son madanm Kendra, ti anvi ki i aksepte sa lenvitasyon. Me, i ti normal ki zot ti en pe enkyet pour byennet Jacob, zot pti garson 11 an. Zot ti pe mazinen si i ti saz pour al reste Leta New York e si zot garson ti pou kapab adapte dan en lanvironnman konpletman diferan.

Ricky i dir: “Enn parmi nou priyorite ti pour al dan en kongregasyon kot i annan bann zenn ki ti pe byen fer spirityelman. Nou ti anvi ki Jacob i ganny en kantite bon zanmi.” Anfet, sa kongregasyon kot nou ti ale ti annan en ptigin zanfan me en bon pe Betelit. Ricky i dir: “Apre nou premye renyon laba, mon ti demann Jacob ki mannyer i ti santi konsernan sa nouvo kongregasyon, vi ki i ti napa bokou zenn son laz. I ti reponn: ‘Pa trakase Dadi. Bann zenn frer Betelit pou vin mon bann zanmi.’”

Zis parey i ti’n dir, bann zenn Betelit ti fer zanmi avek Jacob. Ki lefe sa ti annan lo Jacob? Ricky i rakonte, “En zour swar ler mon ti pe pas o bor son lasanm mon ti vwar ki lalimyer ti ankor alimen. Mon ti ekspekte vwar li pe zwe bann zwe elektronik, me i ti pe lir son Labib! Ler mon ti demann li ki i ti pe fer, Jacob ti reponn, ‘Mon pe fer konmsi mon en zenn Betelit e mon pou lir Labib dan enn an.’” Ricky ek Kendra i kontan, pa zis akoz Ricky i kapab partisip dan konstriksyon Warwick me osi akoz sa pe ed zot garson progrese spirityelman.—Prov. 22:6.

Sa proze konstriksyon Wallkill ek Warwick pou terminen en zour, alor sa bann ki’n ganny envite pour vin ede i realize ki zot servis dan Betel i tanporer. Eski sa bann frer ek ser pe trakas en kantite konsernan kote zot pou ale oubyen ki zot pou fer? Pa ditou! En kantite i annan menm santiman ki sa de koup ki dan zot 55 an an montan sorti Florida. John, en manedyer konstriksyon  ek son madanm Carmen, ki servi konman volonter Warwick i dir: “Nou’n vwar ki mannyer Zeova in pran swen avek nou bann bezwen spesifik ziska aprezan. Nou asire ki Zeova pa’n anmenn nou isi zis pour abandonn nou pli tar.” (Ps. 119:116) Luis, ki fer plan bann sistenm tenny dife ek son madanm Quenia, i servi Wallkill. Zot dir: “Nou deza annan laprev ki Zeova i zenere akoz i’n donn nou sa ki nou bezwen. Menm si nou pa konnen konman, kan oubyen kote, nou annan konfyans ki i pou kontinyen pran swen avek nou.”—Ps. 34:10; 37:25.

Laplipar frer ek ser ki’n ede dan travay konstriksyon New York ti pou’n kapab trouv rezon pour pa fer sa servis volonter. Me, zot ti teste Zeova zis parey i anvi nou tou nou fer li: “Teste mwan, silvouple, . . . gete si mon pa ava ouver baro lapli dan lesyel lo zot e si mon pa ava devid en benediksyon lo zot ziska ki personn pa mank nanryen.”—Mal. 3:10.

Eski ou osi ou pou teste Zeova e gout son bann benediksyon? Dan lapriyer, demann Zeova kwa ki ou kapab fer pour partisip dan sa travay eksitan ki pe ganny fer la konmela, ki swa New York oubyen dan lezot proze konstriksyon Temwen Zeova e vwar pour ou menm ki mannyer Zeova pou rekonpans ou.—Mark 10:29, 30.

Dale, en enzenyer dan konstriksyon ek Cathy ki sorti Alabama e ki servi Wallkill, i ankouraz lezot pour partisip dan sa kalite servis. Zot dir: “Si ou annan sa kouraz pour kit sa lavi kot ou santi ou konfortab, ou pou ganny sa loportinite pour vwar ki mannyer lespri sen Zeova pou beni ou.” Ki ou bezwen fer pour fer ou disponib? Dale i dir: “Senplifye, senplifye e kontinyen senplifye ou lavi. Ou pa pou zanmen regrete!” Gary, sorti North Carolina, i annan 30 an leksperyans lo konman pour organiz travay konstriksyon. Li ek son madanm Maureen i dir ki enn parmi bann benediksyon ki zot in gannyen Warwick i lefet ki zot in “zwenn e travay avek bann frer ek ser ekstraordiner ki’n pas zot lavi dan servis Zeova dan Betel.” Gary i azoute: “Pour servi dan Betel, ou bezwen viv en lavi senp e sa i sa pli bon lavi pour viv dan nou letan.” Jason, ki ti travay pour en kontrakter elektrik ek Jennifer ki sorti Illinois i dir ki travay Wallkill lo en proze Betel i “enn parmi bann keksoz ki fer ou santi pli pros avek lavi dan nouvo lemonn.” Jennifer i azoute: “I tousan pour santi ki Zeova i apresye tou sa ki ou fer e sa travay i itil pour sa lavenir ki i pe prepare pour nou. Zeova i fer sir ki ou ganny en kantite byenfe.”