Eski ou ‘war sa Enn ki envizib’?

‘I ti reste ferm konmsi i ti pe war sa Enn ki envizib.’​—EBR. 11:27.

KI MANNYER “WAR SA ENN KI ENVIZIB POU” . . .

protez ou kont lafreyer zonm?

motiv ou pour partisip plennman dan predikasyon?

ed ou reste ferm pandan gran ladetres?

1, 2. (a) Eksplike akoz Moiz ti paret an danze. (Vwar portre anler.) (b) Akoz Moiz pa ti per lakoler sa lerwa?

FARAON ti en gran lerwa e en bondye vivan pour bann Ezipsyen. Sa liv When Egypt Ruled the East i dir ki pour bann Ezipsyen, Faraon ti annan “plis lasazes ek pouvwar ki nenport ki.” Pour fer lepep per li, Faraon ti met en kouronn ki ti annan en kobra lo la ki konmsi i ti’n pare pour atake, sa ti fer bann lennmi lerwa mazinen ki zot ti pou ganny detri vitman. Imazinen ki mannyer Moiz ti santi kan Zeova ti dir li: “Mon pou anvoy ou kot Faraon e ou pou fer mon pep, bann Izraelit, sorti Lezip.”​—Egz. 3:10.

² Moiz ti al Lezip pour anons mesaz Bondye e sa ti provok lakoler Faraon. Apre ki nef fleo ti’n tap Lezip, Faraon ti averti Moiz: “Fer en mannyer ou pa esey vwar mon figir ankor, akoz zour ou pou vwar mon figir, ou pou mor.” (Egz. 10:28) Avan ki Moiz ti kit Faraon, i ti profetize ki premye ne lerwa ti pou mor. (Egz. 11:4-8) Finalman, Moiz ti demann tou fanmir Izraelit pour touy en kabri oubyen en mal mouton, en zannimo ki ti sakre pour sa bondye Ezipsyen ki ti apel Ra e fann son disan lo lankadreman zot laport. (Egz. 12:5-7) Ki mannyer Faraon ti pou  reakte? Moiz pa ti per. Akoz? Avek lafwa i ti obei Zeova, ‘san ki i ti per lakoler lerwa. I ti reste ferm konmsi i ti pe war sa Enn ki envizib.’​—Lir Ebre 11:27, 28.

3. Ki nou pou egzaminen konsernan lafwa Moiz dan ‘sa Enn ki envizib’?

³ Eski ou lafwa i sitan for konmsi ou ti kapab “war Bondye?” (Mat. 5:8) Pour ed nou vwar byen kler spirityelman pour ki nou vwar ‘sa Enn ki envizib,’ annou egzamin legzanp Moiz. Ki mannyer lafwa dan Zeova ti ed Moiz pour napa lafreyer zonm? Dan ki fason i ti demontre lafwa dan promes Bondye? Ki mannyer sa abilite pour vwar ‘sa Enn ki envizib’ ti fortifye li ler li ek son pep ti an danze?

I PA TI PER “LAKOLER LERWA”

4. Ler ou get Moiz, eski i ti posib pour li debout devan Faraon?

⁴ Si ou konpar Moiz avek Faraon, definitivman ou ti a krwar ki Faraon ti pli pwisan ki Moiz. I ti paret ki son lavi, byennet ek lavenir ti dan lanmen Faraon, parski menm Moiz ti demann Zeova: “Ki mwan, mon ete ki mon bezwen al kot Faraon e tir bann Izraelit Lezip?” (Egz. 3:11) Apepre 40 an avan sa, Moiz ti’n kit Lezip an tayan. I ti’n kapab mazinen, ‘Eski i vreman fer sans pour mwan retourn Lezip e petet fer lerwa ankoler?’

5, 6. Kwa ki ti ed Moiz annan lakrent pour Zeova e non pa pour Faraon?

⁵ Avan ki Moiz ti retourn Lezip, Bondye ti ansenny li en prensip enportan e pli tar Moiz ti ekrir sa menm prensip dan liv Zob: “Lakrent pour Zeova, sanmenm sa lasazes.” (Zob 28:28) Pour ed Moiz annan lakrent e azir avek lasazes, Zeova ti fer en kontras ant bann imen ek Bondye Tou Pwisan. I ti demande: “Lekel ki ti donn zonm labous, lekel ki fer zot kozpa oubyen sourd, vwar kler oubyen aveg? Eski se pa mwan Zeova?”​—Egz. 4:11.

⁶ Ki leson Moiz ti aprann? I pa ti bezwen per. Parski Zeova ki ti’n anvoy li, alor I ti pou ed li anons sa mesaz avek Faraon. An tou ka, Zeova ti definitivman pli pwisan ki Faraon. Apre tou, i pa ti fer premye fwa ki bann serviter Bondye ti an danze anba dominasyon Ezipsyen. Petet Moiz ti reflesir lo ki mannyer Zeova ti protez Abraam, Zozef e li menm kont bann Faraon dan lepase. (Zen. 12:17-19; 41:14, 39-41; Egz. 1:22–2:10) Parski i ti annan lafwa dan Zeova, ‘sa Enn ki envizib,’ Moiz ti kapab annan ase kouraz pour debout devan Faraon e anons li tou parol Zeova.

7. Ki mannyer lafwa dan Zeova ti protez en ser?

⁷ Pareyman, lafwa dan Zeova ti ed en ser ki apel Ella pour pa annan lafreyer zonm. An 1949, Ella ti ganny arete par KGB, Lestoni, kot zot ti tir li touni e apre bann zenn zofisye lapolis ti get li dan en fason pervers. I ti dir: “Mon ti santi mwan imilye, me apre ki mon ti’n priy Zeova, mon ti santi mwan anpe e kalm.” Apre sa, Ella ti ganny detenir dan en kaso li tousel pandan trwa zour. I rakonte: “Bann zofisye ti kriye: ‘Nou pou fer tou fason ki sa non Zeova i ganny oubliye Lestoni! Ou pou ganny anvoye dan en kan e lezot pe al Siberi!’ Zot ti sikann mwan e dir, ‘Oli ou Zeova?’” Eski Ella ti pou annan lafreyer zonm oubyen annan konfyans dan Zeova? Kan i ti ganny kestyonnen, i ti koz san lafreyer e dir avek sa bann ki ti pe boufonn li: “Mon’n reflesir byen lo mon sityasyon e mon plifere al dan prizon e gard mon relasyon avek Bondye ki annan laliberte e perdi son laprouvasyon.” Pour Ella, Zeova ti reel zis parey sa bann zonm ki ti pe debout la devan li. Gras a son lafwa, i ti gard son lentegrite.

8, 9. (a) Ki sa remed pour lafreyer zonm? (b) Lo lekel ou devret port ou latansyon si zanmen lafreyer zonm i afekte ou?

⁸ Lafwa dan Zeova pou ed ou sirmont  ou lafreyer. Si bann ki annan lotorite i esey anpes ou ador Zeova, petet i paret ki ou lavi, byennet ek lavenir i dan lanmen bann imen. Ou menm kapab mazinen, eski i fer sans pour kontinyen servi Zeova e provok lakoler bann ki annan lotorite? Rapel byen: Remed pour lafreyer zonm i lafwa dan Bondye. (Lir Proverb 29:25. *) Zeova i demande: “Akoz ou devret per en zonm mortel ki pou mor e akoz ou devret per garson en zonm ki pou sek parey zerb ver?”​—Iza. 51:12, 13.

⁹ I enportan pour port ou latansyon lo ou Papa tou pwisan. I vwar, i konn douler son bann serviter e i azir an faver bann ki pe ganny oprimen par bann dirizan enzis. (Egz. 3:7-10) Menm si zot bezwen defann zot lafwa devan bann ki annan lotorite, “pa bezwen trakase ki zot pou dir e ki mannyer zot pou dir li, sa ki zot devre dir, zot pou ganny li dan sa moman menm.” (Mat. 10:18-20) Zeova i definitivman pli pwisan ki bann dirizan ek bann zofisye gouvernman. Par ranforsi ou lafwa konmela menm, ou pou arive vwar Zeova konman en Personnaz reel ki vreman anvi ed ou.

I TI DEMONTRE LAFWA DAN BANN PROMES BONDYE

10. (a) Ki Zeova ti demann bann Izraelit pour fer pandan mwan Nizan lannen 1513 A.N.L.? (b) Akoz Moiz ti obei Bondye?

¹⁰ Mwan Nizan 1513 A.N.L., Zeova ti demann Moiz ek Aaron pour fer pase bann lenstriksyon ki ti en pe drol avek bann Izraelit: Pran en mal mouton oubyen kabri ki an bonn sante, touy li e fann son disan lo lankadreman zot laport. (Egz. 12:3-7) Ki Moiz ti fer? Zapot Pol ti dir sa pli tar konsernan li: “Par lafwa, i ti selebre [“Lapak,” NW] e i ti donn lord pour aroz disan lo laport, pour ki lanz ki donn lanmor pa touy bann premye-ne parmi pep Izrael.” (Ebr. 11:28) Moiz ti konnen ki Zeova i diny konfyans e i ti demontre lafwa dan Son promes pour met amor bann premye ne Ezipsyen.

11. Akoz Moiz ti averti lezot?

¹¹ Aparaman bann garson Moiz ti dan pei Madyann, lwen avek sa “lanz ki donn lanmor.” * (Egz. 18:1-6) Pourtan, i ti obei lenstriksyon ki i ti’n ganny demande pour donn tou fanmir Izraelit konsernan zot bann garson premye ne ki ti an danze. Lavi dimoun ti dan risk e Moiz ti kontan son bann konpatriyot. Labib i dir: “Desito, Moiz ti apel tou bann ansyen Izrael e dir zot: . . . ‘Touy sakrifis Lapak.’”​—Egz. 12:21.

12. Ki mesaz enportan Zeova in demann nou pour anonse?

¹² Anba direksyon bann lanz, pep Zeova pe anons en mesaz enportan: “Donn Bondye loner e rann li glwar, parski ler son zizman in arive. Ador sa Enn ki’n fer lesyel, later, lanmer ek bann sours delo!” (Rev. 14:7) La i sa letan pour anons sa mesaz. Nou bezwen averti nou prosen pour sorti dan Gran Babilonn pour ki zot pa resevwar “en par son bann fleo.” (Rev. 18:4) “Lezot mouton” i zwenn ansanm avek bann Kretyen swazir pour sipliy bann dimoun ki elwannyen avek Bondye pour “rekonsilye” avek li.​—Zan 10:16, NW; 2 Kor. 5:20.

13. Kwa ki pou devlop nou dezir pour anons sa bon nouvel?

¹³ Nou konvenki ki “ler son zizman” in vreman arive. Nou osi annan lafwa dan sa mesaz ki Zeova pa pe egzazere ler i dir ki i irzan pour prese e fer disip. Dan en vizyon, zapot Zan ti vwar “kat lanz pe debout dan kat kwen later; zot ti pe tenir sa kat divan . . . lo later.” (Rev. 7:1)  Par lafwa, eski ou pe vwar sa bann lanz ki’n pare pour les sa divan soufle, setadir pare pour anmenn sa gran ladetres lo sa lemonn? Si ou vwar sa bann lanz avek ou lizye lafwa, ou pou kapab partaz sa bon nouvel avek konfyans.

14. Kwa ki motiv nou pour “averti sa enn mesan pour sorti dan son move semen”?

¹⁴ Bann vre Kretyen pe deza rezouir en lanmitye avek Zeova e zot annan sa lespwar lavi eternel. Kantmenm sa, nou rekonnet ki i nou responsabilite pour “averti sa enn mesan pour sorti dan son move semen, pour li reste vivan.” (Lir Ezekyel 3:17-19. *) Byensir, nou pa prese zis pour evite koupab pour lanmor bann dimoun. Nou kontan Zeova e nou prosen. Zezi ti donn en bon legzanp lo ki savedir lanmour ek mizerikord dan son parabol bon Samariten. Nou kapab demann nou lekor, ‘Eski mon parey sa bon Samariten, “ki ti ganny pitye” e pare pour donn en temwannyaz?’ Apre tou, nou pa ti pou zanmen anvi vin parey sa pret ek Levit dan sa parabol ki ti ekskiz zot lekor e pas “lot kote” semen. (Lik 10:25-37) Lafwa dan bann promes Bondye ek lanmour pour nou prosen pou motiv nou pour fer nou maksimonm dan predikasyon avan lafen i arive.

 “ZOT TI TRAVERS LANMER ROUZ”

15. Akoz bann Izraelit ti santi konmsi zot ti dan en pyez?

¹⁵ Lafwa Moiz dan sa ‘Enn ki envizib’ ti ed li kan bann Izraelit ti an danze apre ki zot ti’n kit Lezip. Labib i dir: “Bann Izraelit ti gete e zot ti vwar bann Ezipsyen pe vini deryer zot. Bann Izraelit ti vreman per e zot ti konmans kriy Zeova.” (Egz. 14:10-12) Eski zot ti devret soke par sa ki zot ti’n vwar? Pa ditou. Zeova ti’n predir: “Mon pou les leker Faraon vin dir e i pou tay deryer zot e mon pou glorifye mwan menm atraver Faraon ek tou son larme e bann Ezipsyen pou sirman konnen ki mwan mon Zeova.” (Egz. 14:4) San dout, bann Izraelit ti vwar zis sa ki ti devan zot lizye, setadir Lanmer Rouz ki zot pa ti pou kapab traverse lanmenm devan zot, bann saret lager Faraon ki ti pe vitman apros zot ek en berze 80 an ki ti pe gid zot. Zot ti santi konmsi zot ti dan en pyez.

16. Ki mannyer lafwa ti fortifye Moiz kot Lanmer Rouz?

¹⁶ Pourtan, Moiz pa ti per. Akoz? Parski son lizye lafwa ti vwar en keksoz ki pli pwisan ki sa lanmer oubyen en larme. I ti vwar “delivrans ki Zeova pou realize” e i ti konnen ki Zeova ti pou lager pour bann Izraelit. (Lir Egzod 14:13, 14. *) Lafwa Moiz ti ankouraz pep Bondye. “Par lafwa, pep Izrael ti travers lanmer Rouz konmsi later sek, me kan bann Ezipsyen ti esey fer parey, zot tou ti noye.” (Ebr. 11:29) Apre sa, “lepep ti konmans annan lakrent pour Zeova e annan lafwa dan Zeova ek son serviter Moiz.”​—Egz. 14:31.

17. Ki sa levennman dan lavenir ki pou teste nou lafwa?

¹⁷ Byento, nou lavi pou paret an danze. Kan gran ladetres pou lo son pik, bann gouvernman sa lemonn pou’n fini devaste e konpletman detri tou sa bann fo larelizyon ki ti pli gran e ki ti plis ki nou. (Rev. 17:16) Zeova in profetiz e dekrir kondisyon san defans ki nou pou ladan, konmsi nou pou dan “en pei kot bann vilaz pa ganny proteze . . . par bann miray, bar oubyen baro.” (Eze 38:10-12, 14-16) Avek nou lizye fizik, i pou paret konmsi nou pou napa okenn sans pour sirviv. Ki mannyer ou pou reazir?

18. Eksplike akoz nou kapab reste ferm pandan gran ladetres.

¹⁸ Nou pa devret tranble avek lafreyer. Akoz? Parski Zeova pa’n zis predir sa latak lo pep Bondye me i’n osi predir rezilta. “Souvren Senyer Zeova i dir: ‘Sa zour, sa zour kan Gog i anvair pei Izrael, mon gran lakoler pou monte. Dan mon devouman, dan mon gran lakoler, mon pou koze.’” (Eze 38:18-23) Zeova pou detri tou bann ki anvi fer ditor Son pep. Ou lafwa dan sa ki pou arive apre “gran zour efreyan Zeova” pou ed ou pour “vwar delivrans Zeova” e gard ou lentegrite.​—Yoel 2:31, 32.

19. (a) Ki degre pros Moiz ti pros avek Zeova? (b) Si ou pran Zeova an konsiderasyon dan tou ou semen, ki benediksyon ou pou gannyen?

¹⁹ Prepar la konmela pour sa bann levennman eksitan par kontinyen ‘reste ferm konmsi ou pe war sa Enn ki envizib’! Fodre ou ranforsi ou lanmitye avek Zeova par priye e etidye regilyerman. Moiz ti en zanmi sitan pros avek Zeova e telman ganny servi par li dan bann fason ekstraordiner ki Labib i dir Zeova ti konn Moiz “fas a fas.” (Det. 34:10) Moiz ti en profet ekstraordiner. Me ou osi, par lafwa, ou kapab annan en relasyon pros avek Zeova parey ou ti pou annan si ou ti pe aktyelman vwar li. Si ou kontinyen pran li an konsiderasyon “dan tou ou semen,” parey Parol Bondye i ankouraz ou pour fer, “i pou fer drwat ou bann santye.”​—Prov. 3:6.

[Not anba lo paz]

[Kestyon]

[Portre lo paz 11]

Lafwa dan bann promes Zeova pou devlop ou dezir pour anons sa bon nouvel (Vwar paragraf 13)