Tous leker bann manm fanmir ki pa Temwen

“RETOURN se ou kot ou fanmir e rakont zot tou sa ki Senyer in fer pour ou, e konman i’n pran pitye pour ou.” Kan Zezi ti dir sa parol i ti Gadara, en landrwa ki aparaman dan sides Lanmer Galile, pe koz avek en zonm ki ti anvi vin son disip. Parol Zezi i montre ki i ti konpran sa tandans ki imen i annan, setadir sa dezir pour rakont bann keksoz ki enteresan e enportan avek zot fanmir.​—Mark 5:19.

Nou souvan vwar sa tandans ozordi tou, menm si dan serten kiltir sa i pli aparan. Alor, kan en dimoun i vin en adorater Zeova, i souvandfwa anvi partaz son lafwa avek son fanmir. Me ki mannyer i kapab fer li? Ki mannyer i kapab tous leker son fanmir ki annan en lot larelizyon oubyen ki napa ditou lafwa? Labib i donn bann bon konsey pratik.

“NOU’N TROUV MESI”

Dan premye syek, Andre ti parmi bann premye pour idantifye Zezi konman Mesi. Avek lekel ki i ti dir premye ki i’n vwar Mesi? Andre “ti al rod son frer Simon e dir li, ‘Nou’n trouv Mesi’ (savedir Kris).” Andre ti anmenn Pyer kot Zezi, la i ti donn Pyer sa sans pour vin en disip Zezi.​—Zan 1:35-42.

Apepre si-z-an pli tar, kan Pyer ti pe reste Zope, i ti ganny envite pour vwayaz dan Nor Sezare pour vizit lakaz Korney en zofisye larme. Lekel ki Pyer ti vwar anndan? “Korney ti pe esper zot [Pyer ek bann ki ti pe vwayaze avek li] avek tou bann manm son fanmir ek zanmi entim ki i ti’n envite.” Alor Korney ti donn son bann fanmir sa sans pour tann Pyer koze e fer  en desizyon baze lo sa ki zot ti tande.​—Akt 10:22-33.

Ki nou kapab aprann dan lafason ki Andre ek Korney ti tret zot fanmir?

Ni Andre, ni Korney pa ti les keksoz koumsanmenm. Andre ki ti entrodwir Pyer avek Zezi e Korney ki ti fer laranzman pour ki son fanmir i tann sa ki Pyer ti annan pour dir. Me Andre ek Korney pa ti met zot fanmir anba presyon oubyen servi bann riz pour fer zot vin disip Zezi. Ki leson ou kapab tire ladan? I ti a byen nou fer parey. Nou kapab partaz serten pwen avek nou fanmir e kre bann loportinite pour zot konn laverite dan Labib avek bann Temwen. Kantmenm sa, nou respekte zot liberte pour swazir e evite met presyon lo zot. Pour donn en legzanp lo ki mannyer nou kapab ed nou fanmir, annou pran legzanp Jürgen ek Petra en koup sorti Lalmanny.

Petra in etidye Labib avek Temwen Zeova e avek letan i’n batize. Son msye Jürgen ti en zofisye dan larme. O konmansman, Jürgen pa ti dakor avek desizyon son madanm. Me avek letan, i ti realize ki bann Temwen i pres laverite dan Labib. Li osi i ti dedye son lavi avek Zeova e ozordi i en ansyen dan kongregasyon. Ki konsey Jürgen i donnen konsernan tous leker en fanmir ki pa partaz menm lafwa?

Jürgen i fer sa remark: “Nou pa devret fors zot oubyen bonbard zot avek bann keksoz spirityel. Sa i kapab fer zot pli pa aksepte nou. Alalonger ditan, pour ganny en pli bon rezilta, i ti a byen si nou dir zot bann pti keksoz enteresan lo Labib tanzantan. I ti a byen osi si nou fer nou fanmir ganny kontak avek bann frer ek ser ki annan preski menm laz avek zot e ki annan menm lentere. Si ou fer sa, sa i kapab toultan gard en laport ouver.”

Zapot Pyer ek fanmir Korney ti reazir vitman anver mesaz Labib. Lezot dan premye syek ki ti konn laverite ti bezwen plis letan pour fer en desizyon.

KI NOU POUR DIR LO BANN FRER ZEZI?

Detrwa fanmir Zezi ti demontre lafwa dan li pandan son minister lo later. Par egzanp, i paret ki zapot Zak ek Zan ti kouzen Zezi e zot manman Salome ti son tantin. I ti enn parmi ‘plen lezot madanm ankor, ki ti servi zot prop byen pour ed Zezi ek son bann disip.’​—Lik 8:1-3.

Me lezot manm dan fanmir Zezi pa ti demontre lafwa deswit. Par egzanp, plis ki enn an apre batenm Zezi, bann lafoul ti zwenn dan en lakaz pour ekout li. “Kan son fanmir ti tann sa, zot ti ale pour atrap li akoz dimoun ti pe dir, ‘I’n perdi latet.’” En pe letan plitar, kan bann demi frer Zezi ti demann li konsernan son plan pour son vwayaz, i pa ti reponn zot direkteman. Akoz? Parski “son bann frer pa ti krwar li.”​—Mark 3:21; Zan 7:5.

Ki nou kapab aprann lo lafason ki Zezi ti tret son fanmir? I pa ti ofanse kan serten ti dir ki i’n perdi latet. Menm apre son legzekisyon ek rezireksyon, Zezi ti donn lezot lankourazman avek son fanmir par aparet avek son demi frer Zak.  Sa laparisyon pa ti zis ede pour konvenk zis Zak me osi lezot demi frer Zezi ki I ti vreman Mesi. Bann lezot demi frer Zezi ti avek bann zapot e lezot ankor dan en lasanm anler Zerizalenm sa zour, alor zot ti ganny lespri sen. Avek letan, Zak ek Zid, de lezot demi frer Zezi ti ganny bann gran privilez.​—Akt 1:12-14; 2:1-4; 1 Kor. 15:7.

SERTEN I BEZWEN PLIS LETAN

Parey dan premye syek, serten manm fanmir ozordi i bezwen en pe letan pour zot vin dan laverite. Pran par egzanp Roswitha, ki ti en Katolik Romen ki ti byen aktif kan son msye ti batize konman en Temwen Zeova an 1978. Vi ki i ti senser dan son krwayans, premye kou, Roswitha ti opoz son msye. Me apre plizyer lannen, i ti konmans aret opoze e i ti vwar ki lansennyman bann Temwen i laverite. An 2003 i ti batize. Kwa ki ti ed li sanze? Dan plas ankoler akoz i ti opoze, son msye ti donn Roswitha sa sans pour sanz son lopinyon. Ki konsey Roswitha i donnen? “Ou kapab fer bokou keksoz si ou pasyante e pasyante e kontinyen pasyante.”

Monika ti batize an 1974 e son de zanfan ti vin Temwen apepre dizan pli tar. Menm si son msye Hans pa ti opoz zot, nek an 2006 ki i ti batize. Atraver zot leksperyans, ki konsey sa fanmir i donnen? “Reste atase avek Zeova e konsernan ou lafwa pa fer okenn konpromi.” Byensir, i ti enportan pour konstaman asir Hans ki zot ti kontan li. Zot pa ti zanmen perdi lespwar ki en zour i ti pou aksepte laverite.

GANNY RAFRESI PAR DELO LAVERITE

En fwa Zezi ti dekrir sa mesaz laverite parey delo ki donn lavi eternel. (Zan 4:13, 14) Nou anvi nou fanmir i ganny rafresi par bwar sa delo pir laverite. Sirman, nou pa pou anvi touf zot par fors zot pour bwar tro bokou delo vitman. Pour ki zot santi zot rafresi ouswa toufe, sa i tou depan lo lafason ki nou eksplik zot laverite. Labib i dir: “Leker sa enn ki drwat i medite pour reponn” e “leker en dimoun saz i fer li koz avek bon zizman ek konviksyon.” Ki mannyer nou kapab aplik sa konsey?​—Prov. 15:28; 16:23.

En madanm i kapab anvi koz lo son lafwa avek son msye. Si i “medite pour reponn,” i pou vey byen ki parol i servi e pran letan avan koze. I pa devret donn lenpresyon ki i tro zis oubyen pli siperyer. Son bann parol ki’n ganny byen swazir i kapab rafresi e promot lape. Kan ki son msye i kalm e abordab? Ki bann topik i kontan koze oubyen lir lo la? Eski i enterese avek lasyans, politik oubyen sport? Ki mannyer sa madanm i kapab evey lentere son msye lo Labib e an menm tan respekte son bann santiman ek lopinyon? Si i servi sa bann fason panse, sa pou ed li koz e azir avek bon zizman.

Pour tous leker nou fanmir ki pa ankor vin Temwen, i pa zis neseser pour ptitapti eksplik nou lafwa avek zot, me sa ki nou dir i devret osi annakor avek nou kondwit.

TOULTAN ANNAN EN BON KONDWIT

Jürgen ki nou’n mansyonnen avan i eksplike: “Pa aret aplik bann prensip Labib dan ou lavi tou le zour. Sa i en bon fason pour evey lentere ou fanmir e fer zot remarke ki sa i laverite, menm si zot pa pou aksepte.” Hans, ki ti batize 30 an apre son madanm i dakor pour dir: “Bon kondwit en Kretyen i enportan, sa i fer ki sa manm fanmir i vwar lefe pozitif ki laverite i fer dan nou lavi.” Dan bann ka kot nou lafwa i fer nou diferan avek lezot, nou bann manm fanmir i devret vwar sa diferans konman en keksoz pozitif, non pa negatif oubyen move.

Zapot Pyer ti donn bann konsey avek bann madanm ki zot msye i pa annan menm krwayans avek zot: “Demenm, zot bann madanm, soumet sakenn avek son msye, pour ki, par zot kondwit, si serten parmi zot msye pa obei parol Bondye, zot a kapab kanmenm aksepte lafwa san laparol. Sa bann zonm i a war ki zot kondwir zot dan en fason drwat e avek respe. Zot pa devre rod montre zot labote par zot laparans: avek seve trese, bann bizou an-or, zoli lenz ki kout ser. Me zot labote i devret en labote  enteryer, dan leker e ki pa kapab disparet, labote en lespri bon e trankil ki annan en gran valer devan Bondye.”​—1 Pyer 3:1-4.

Pyer ti ekri konsernan en msye ki kapab aksepte laverite akoz bon kondwit son madanm. Apre son batenm an 1972, Christa ti pran aker sa konsey e esey tous leker son msye atraver son bon kondwit. Menm si son msye ti’n deza etidye avek bann Temwen, i pa ankor pran laverite o serye. I’n asiste detrwa renyon e fer zanmi avek bann dimoun dan kongregasyon. An retour, zot respekte son drwa pour fer son prop desizyon. Ki mannyer Christa i esey tous son leker?

I dir: “Mon determinen pour reste lo sa semen ki Zeova i anvi mwan mars lo la. An menm tan, mon esey fer mon msye aksepte laverite “san laparol” atraver mon bon kondwit. Mon fer tou sa ki mon kapab pour fer li plezir tan ki i pa an konfli avek bann prensip Labib. Byensir mon aksepte son drwa pour fer son prop desizyon e kit keksoz dan lanmen Zeova.”

Legzanp Christa i montre nou lenportans pour pare pour adapte. I annan en bon progranm spirityel ankourazan ki enkli regilyerman asiste renyon e partisip dan predikasyon. Par kont, i konpran e realize ki son msye i bezwen son lanmour, letan ek latansyon. Kan nou pare pour adapte e konpran bezwen lezot, sa i montre ki nou saz dan lafason ki ou azir avek bann manm fanmir ki pa dan laverite. Labib i dir: “Pour tou keksoz i annan en letan fikse.” Sa i enkli letan ki ou pase avek ou manm fanmir, espesyalman ou konzwen ki pa dan laverite. Kan zot pas letan ansanm, sa i permet zot kominike. Leksperyans i montre ki en bon kominikasyon i redwir risk ki zot santi zot tousel, ganny rezete oubyen zalou.​—Ekle. 3:1.

PA ZANMEN PERDI LESPWAR

Holger ki son papa ti batize 20 an apre lezot manm son fanmir i fer sa remark: “I enportan pour demontre lanmour anver sa manm fanmir e ki nou priy pour li.” Christa i azoute ki i ‘pa pou zanmen perdi lespwar ki son msye pou pran kote avek Zeova e aksepte laverite.’ Nou latitid anver nou bann manm fanmir ki pa dan laverite i devret touzour pozitif e nou devret touzour gard lespwar.

Nou lobzektif i pour prezerv nou relasyon avek nou fanmir, donn zot sa sans pour trouv laverite e tous zot leker avek sa mesaz ki dan Labib. Dan tou sa ki nou fer nou devret “fer li avek labonte ek respe.”​—1 Pyer 3:16.

[Ekstre lo paz 3]

“Nou pa devret fors zot oubyen bonbard zot avek bann keksoz spirityel.”​—Jürgen

[Ekstre lo paz 4]

“Ou kapab fer bokou keksoz si ou pasyante e pasyante e kontinyen pasyante.”​—Roswitha

[Ekstre lo paz 6]

“Bon kondwit en Kretyen i enportan, sa i fer ki sa manm fanmir i vwar lefe pozitif ki laverite i fer dan nou lavi.”​—Hans