Ladorasyon Fanmir Eski ou kapab fer li vin pli gou?

En papa Brezilyen i dir: “Si mon pa aret mon fanmir, nou Ladorasyon Fanmir i al ziska tar aswar akoz nou sitan preokipe pour fer bann gran diskisyon.” En sef fanmir Zapon i dir ki son garson di-z-an pa remarke ki letan pe pase e i zis anvi kontinyen. Akoz? Sa papa i dir: “I vreman kontan e sa i kontribye pour fer li vwar Ladorasyon Fanmir pli gou.”

Byensir, pa tou zanfan ki sitan motive e pour serten, Ladorasyon Fanmir pa en keksoz gou pour fer. Akoz sa? En papa ki reste Togo i partaz son leksperyans: “Ladorasyon Zeova pa devret en keksoz ki pa enteresan.” Si i leka, eski sa i kapab depan lo lafason ki sa sef fanmir i fer Ladorasyon Fanmir? Parey Izai ti dir konsernan Saba, bokou fanmir in vwar ki Ladorasyon Fanmir i kapab en keksoz ki donn“bokou plezir.”​—Iza. 58:13, 14.

Bann papa Kretyen i realize ki si zot oule ki zot fanmir i vwar Ladorasyon Fanmir gou, i devret touzour ganny fer dan en latmosfer kalm. Ralf, ki annan trwa fiy ek en garson, i dir ki zot Ladorasyon Fanmir i plito parey en konversasyon enformel kot tou manm fanmir i partisipe e i pa ganny fer konman en letid. I vre, par ler, i en defi pour fer tou dimoun konsantre e enterese avek sa topik. En manman i admet: “Pa toultan ki mon annan lafors pour fer Ladorasyon Fanmir gou parey mon ti a kontan.” Eski ou kapab fer fas avek sa defi?

ADAPTE E SERVI DIFERAN FASON ANSENNYEN

En papa ki annan de zanfan e ki reste Lalmanny i dir: “Nou bezwen adapte.” Natalia en manman ki annan de zanfan i dir: “Sa ki  pli enportan pour nou fanmir se varyete, varyete, varyete.” Bokou fanmir i diviz zot Ladorasyon Fanmir an diferan parti. Cleiton papa de adolesan Brezilyen i dir: “Sa i fer sa letid pli vivan e i fer tou dimoun partisipe. Kan paran i met letan dekote pour diferan parti dan Ladorasyon Fanmir, sa i kapab zot adapte avek bezwen sak zanfan si zot annan en gran diferans laz. Paran i kapab adres bezwen sak manm fanmir e kapab adapte par swazir lo kwa zot pou diskite e ki mannyer zot pou fer li.

Ki serten fanmir pe fer pour fer ki i annan plis varyete dan zot Ladorasyon Fanmir? Serten i konmans zot ladorasyon par sant kantik. Juan sorti Meksiko i dir: “I kre en bon latmosfer e prepar nou lespri pour diskit lo sa topik ki’n ganny swazir.” Son fanmir i swazir bann kantik ki relye avek topik ki’n ganny swazir pour sa zour.

Serten fanmir i lir en bout dan Labib ansanm. Pour ki i annan en varyete, sak manm fanmir i zwe rol en dimoun ki ganny mansyonnen dan sa parti Labib. En papa an Zapon i admet e i dir: “O konmansman, i en pe drol pour lir Labib dan sa fason.” Me son de garson ti kontan ki zot paran ti pe fer en keksoz ansanm avek zot. Serten manm fanmir i menm zwe rol bann senn dan Labib. Roger en papa sorti Sidafrik ki annan de garson i dir ki bann zanfan i “souvandfwa vwar bann keksoz dan en resi Labib ki nou nou pa’n vwar.”

En lot fason pour varye nou ladorasyon i pour travay ansanm lo en proze, tel konman konstri en model lars Noe oubyen tanp Salomon. Sa bann proze i demann resers e i eksitan pour fer. Par egzanp, dan en fanmir Lazi ti annan en fiy senk an, son paran ek son granparan, zot ti annan en proze pour fer en zwe ki baze lo bann vwayaz misyonner ki Pol ti fer. Lezot fanmir in fer bann zwe baze lo bann resi ki trouve dan bann liv Labib tel parey Egzod. Donald ki annan 19 an e reste Togo i dir: “Varyete ti renouvle nou devouman pour Ladorasyon Fanmir e osi fer nou fanmir vin pli for.” Eski ou kapab mazin lo en proze ki pou fer ou Ladorasyon Fanmir vin pli gou?

PREPARASYON I ESANSYEL

Menm si varyete e lefet ki nou pare pour adapte i fer Ladorasyon Fanmir enteresan, pour benefisye tou dimoun i bezwen fer en bon preparasyon. Par ler bann zenn zanfan i kapab fatige, alor bann papa i devret fer en bon plan davans e pran letan pour prepar byen bann topik ki zot swazir. En papa i dir: “Kan mon byen prepare, Ladorasyon Fanmir i pli benefisye tou dimoun.” En papa Lalmanny i enform son fanmir davans lo kwa zot pou diskit lo la dan bann semenn ki pou vini. En papa ki annan sis zanfan ki pa ankor vin adolesan e ki reste Benin i fer sir ki i prepar bann kestyon byen davans ler zot swazir pour get en DVD baze lo Labib pour Ladorasyon Fanmir. Definitivman, en bon preparasyon i fer en diferans dan kalite Ladorasyon Fanmir ki nou fer.

Kan sa fanmir i konn byen davans sa ki pou ganny diskite dan Ladorasyon Fanmir, zot pou kapab koz lo la pandan lasemenn e sa pou ogmant zot lantouzyazm. Si sak dimoun i annan en partisipasyon, sak manm fanmir pou santi ki sa i zot Ladorasyon Fanmir.

FER BOKOU ZEFOR POUR REGILYE

Bokou fanmir i vwar li en defi pour fer Ladorasyon Fanmir regilyerman.

Bokou papa i bezwen travay plizyer erdtan pour fer en bout zwenn avek en lot. Par egzanp, en papa Meksiko i kit lakour si-z-er bomaten e i retourn kot lakour nek wit er diswar. Par ler, progranm Ladorasyon Fanmir i bezwen ganny sanze akoz i annan en lot aktivite spirityel.

Kantmenm sa, nou bezwen fer sir ki nou regilye dan nou Ladorasyon Fanmir. Loïs en fiy douz an sorti Togo i dir sa konsernan determinasyon son fanmir: “Menm si par ler nou bezwen konmans Ladorasyon Fanmir tar akoz en keksoz ki’n arive dan lazournen, nou touzour fer nou Ladorasyon Fanmir.” Ou kapab konpran akoz serten fanmir i fer zot Ladorasyon Fanmir byen boner dan lasemenn. Si en keksoz ki zot pa ti pe ekspekte i arive, zot kapab fer li pli tar dan sa menm semenn.

Ladorasyon Fanmir i form parti ou ladorasyon pour Zeova. Ki tou manm ou fanmir i anmenn kot Zeova ‘sa zenn toro avek zot labous’ tou le semenn. (Ose. 14:2, not.) Sa i ava en moman zwaye pour sak manm fanmir, “akoz lazwa Zeova i zot latour for.”​—Nee. 8:9, 10.

 [Bwat lo paz 19]

OU LADORASYON FANMIR I DEVRET:

Ganny fer dan en latmosfer kalm

Adapte avek bezwen sak zanfan

Varye

Byen prepare

Ganny fer regilyerman

[Portre lo paz 19]

Sri Lanka

[Portre lo paz 19]

Sidafrik

[Portre lo paz 19]

Leta-z-ini