Zot ti volonterman servi—dan Was Lafrik

ANMEZIR ki i ti pe grandi dan en landrwa pov Kotdivwar, Pascal ti reve pour annan en lavi pli konfortab. Konman en bokser amater i ti pe mazinen, ‘Kot mon kapab ale pour ganny en sans vin renonmen dan sport e vin ris?’ Kan i ti dan son 25 an an montan, i ti deside ki Lerop ti sa landrwa. Me vi ki i ti napa bann dokiman pour vwayaze, i ti pou bezwen antre Lerop ilegalman.

An 1998, a laz 27 an, Pascal ti konmans son vwayaz. I ti travers lafrontyer pour al Gana, travers Togo ek Benen e finalman i ti ariv dan lavil Birni Nkonni, Nizer. Aprezan i ti’n ler pour fer sa parti pli danzere sa vwayaz. Pour al dan Nor i ti bezwen sot lo en kanmiyon pour travers Dezer Sahara. Apre ki i ti’n ariv Lanmer Mediterane, i ti pou anbark lo en bato pour al Lerop. Sa ti son plan, me i ti annan de keksoz ki ti arive Nizer ki ti anpes li.

Premyerman, tou son larzan ti’n fini. Dezyenmman, i ti zwenn Noé, en pionye ki ti konmans etidye Labib avek li. Sa ki i ti aprann ti tous li en kantite e sa ti sanz lafason ki i ti vwar lavi. Son bann lobzektif materyel ti ganny ranplase par bann lobzektif spirityel. Pascal ti batize an Desanm 1999. Pour montre son lapresyasyon anver Zeova, i ti konmans fer pionye Nizer an 2001, dan sa menm lavil kot i ti konn laverite. Ki mannyer i santi anver son servis? I dir: “Mon pe viv en pli bon lavi!”

EN PLI GRAN SATISFAKSYON, LAFRIK

Parey Pascal, bokou in vwar ki pour ganny plis satisfaksyon dan lavi i ler nou pourswiv bann lobzektif spirityel. Pour arive atenn sa bann lobzektif, serten in kit Lerop pour al reste Lafrik pour servi dan bann landrwa kot i annan bezwen pour plis proklanmater. Anfet, apepre 65 Temwen ant 17 a 70 an ki sorti Lerop in al reste kot i annan en pli gran bezwen dan bann pei Was Lafrik parey Benen, Burkina Faso, Nizer ek Togo. * Kwa ki ti motiv zot pour fer en sitan gran sanzman e avek ki rezilta?

Anne-Rakel ki sorti Dennmark i rakonte: “Mon paran ti servi konman misyonner Senegal. Toultan zot ti koz avek bokou lantouzyasm konsernan zot servis misyonner e sa ti motiv mwan pour anvi fer sanmenm mwan osi.” Apepre 15 an pase kan Anne-Rakel ti dan son 20-t-an, i ti al reste Togo kot i pe servi dan en kongregasyon ki servi langaz siny. Dan ki fason son legzanp ti ankouraz lezot? I dir: “Pli tar mon pti ser ek mon frer ti vin Togo.”

 Aurele en frer 70 an ki’n marye sorti Lafrans i dir: “Senk an pase kan mon ti konmans ganny mon pansyon, mon ti annan en swa, i ti swa pour annan en lavi trankil Lafrans e esper Paradi vini ouswa pran serten pa pour fer plis dan mon minister.” Aurele ti fer sa dezyenm swa. Apepre trwa-z-an pase, li ek son madanm Albert-Fayette ti al reste Benen. Aurele i dir: “Lefet ki nou’n fer nou disponib pour servi Zeova la kot nou ete i sa pli bon keksoz ki nou’n kapab fer.” I azoute avek en zoli sourir: “Anfet i annan serten landrwa o bor lakot ki fer mwan mazin Paradi.”

Clodomir ek son madanm Lysiane ti sorti Lafrans pour al reste Benen 16 an pase. O konmansman zot ti vreman mank zot fanmir ek zanmi Lafrans e sa koup ti per ki zot pa ti pou kapab adapte avek zot nouvo lavi. Par kont, zot ti napa okenn rezon pour per. Zot ti ganny bokou lazwa. Clodomir i dir: “Dan sa 16 an, nou’n annan sa privilez pour ed an mwayenn en dimoun sak lannen pour aksepte laverite.”

Sébastien ek Johanna en koup marye sorti Lafrans ti al reste Benen an 2010. Sébastien i dir: “I annan sitan bokou pour fer dan kongregasyon. Pour servi isi i konmsi ou pe asiste en kour entans lekol teokratik!” Ki mannyer i ete dan predikasyon? Johanna i dir: “Dimoun isi i swaf pour laverite. Menm ler nou pa pe prese dimoun i aret nou dan semen e demann nou bann kestyon baze lo Labib e pour ganny nou bann piblikasyon.” Ki lefe sa sanzman in annan lo zot maryaz? Sébastien i dir: “Sa in ranforsi nou maryaz. I en plezir pour pas lazournen antye dan predikasyon avek mon madanm.”

Eric ek son madanm Katy i servi konman pionye dan en landrwa kot napa bokou dimoun, dan Nor Benen. Apepre di-z-an pase kan zot ti pe reste Lafrans, zot ti konmans lir bann lartik lo servi kot i annan plis bezwen e koz avek bann serviter a plen tan. Sa ti donn zot sa dezir pour al dan en lot pei e sanmenm ki zot ti fer an 2005. Sa progre ki zot in vwar i enpresyonan. Eric i dir: “De-z-an pase, i ti annan zis 9 proklanmater dan nou group dan lavil Tanguiéta, aprezan i annan 30. Dan Dimans i annan 50 a 80 dimoun ki asiste renyon. Pa i en lazwa ekstraordiner pour vwar sa kantite progre!”

IDANTIFYE E SIRMONT BANN DEFI

Ki defi serten ki al servi kot i annan en pli gran bezwen in bezwen fer fas avek? Benjamin ki annan  33 an i frer Anne-Rakel. An 2000, i ti zwenn en misyonner Denmark ki ti servi Togo. Benjamin i rapel: “Kan mon ti dir sa misyonner ki mon ti anvi fer pionye i ti dir: ‘Ou konnen ou kapab fer pionye Togo.’” Benjamin ti reflesir lo la. I dir: “Mon ti napa ni menm 20 an sa letan, me mon de ser ti deza pe servi Togo. Sa ti fer li pli fasil pour mwan al laba.” Alor i ti ale kantmenm sa ti en defi. Benjamin i eksplike: “Mon pa ti konn ni en mo Franse. Sa premye sis mwan ti difisil akoz mon pa ti tro kapab kominike.” Me avek letan i ti fer progre. Ozordi Benjamin pe servi dan Betel Benen pour transport bann piblikasyon e ede dan departman konpiter.

Eric ek Katy, ki nou’n mansyonnen o konmansman, ti servi dan en teritwar Lafrans ki koz en lot langaz avan zot ti al reste Benen. Ki mannyer sa ti diferan avek Was Lafrik? Katy i dir: “I pa ti fasil pour trouv en landrwa konvenab pour reste. Pour plizyer mwan nou ti reste dan en lakaz kot ti napa ni elektrik ni delo.” Eric i azoute: “I ti annan en kantite tapaz lanmizik ziska tar aswar. Dan bann sityasyon parey ou bezwen annan pasyans e pare pour adapte.” Zot tou le de i dakor pour dir: “Difikilte ki ou bezwen fer fas avek i nanryen ditou konpare avek lazwa ki ou gannyen pour servi dan en teritwar ki preski pa’n deza ganny prese.”

Michel ek Marie-Agnès en koup marye ki sorti Lafrans ki dan zot 55 an an montan ti al reste Benen apepre senk an pase. Zot ti enkyet. Michel i dir: “Serten ti konpar nou deplasman parey en dimoun ki pe pous en bouret lo en lakord e nou ki pe asiz dan sa bouret! Ou ti pou per si ou pa ti konnen ki sa enn ki pe pous sa bouret i Zeova. Alor, nou ti fer sa deplasman pour e avek Zeova.”

KI MANNYER POUR PREPAR OU

Bann ki annan leksperyans konman bann ki’n al servi kot i annan en pli gran bezwen i met lenportans lo prepar ou lekor par fer en plan davans, aprann adapte, pa depans plis ki ou’n plàn e depan lo Zeova.​—Lik 14:28-30.

Sébastien ki’n ganny mansyonnen pli boner i dir: “Avan ki nou ti sanz landrwa reste, mwan ek Johanna ti anmas larzan pour de-z-an par koup lo nou bann depans lo lanmizman e pa aste bann keksoz ki pa neseser.” Pour kontinyen servi dan en lot pei, zot travay Lerop sak lannen pandan detrwa mwan, sa i permet zot pour kapab fer pionye Benen pour larestan lannen.

 Marie-Thérèse i enn parmi sa apepre 20 ser selibater ki servi kot i annan en pli gran bezwen dan Was Lafrik. I ti travay konman en drayver bis Lafrans, me an 2006 i ti pran enn an konze pour fer pionye Nizer. Pa bokou letan apre i ti realize ki sanmenm sa kalite lavi ki i ti anvi. Marie-Thérèse i dir: “Apre ki mon ti’n retourn Lafrans, mon ti koz avek mon anplwayer konsernan mon desizyon pour aziste mon progranm travay e i ti dakor. Aprezan depi Me ziska Out mon travay konman en drayver bis Lafrans e depi Septanm ziska Avril mon servi konman en pionye Nizer.”

Bann ki anvi “rod plito Rwayonm” i kapab annan konfyans ki Zeova pou donn zot “tou lezot keksoz osi.” (Mat. 6:33) Pour donn en legzanp, vwar sa ki ti arive avek Saphira, en ser selibater ki sorti Lafrans ki dan son 25 an an montan e ki servi konman en pionye Benen. An 2011, i ti retourn Lafrans pour ganny ase larzan pour li kapab siport son lekor pour lot lannen (son sizyenm fwa) Lafrik. Saphira i dir: “I ti en zour Vandredi, mon dernyen zour travay me mon ti bezwen travay ankor dis zour pour ganny ase larzan pour lannen prosenn. Mon ti annan zis de semenn pour mon reste Lafrans. Mon ti priy Zeova pour eksplik mon sityasyon. Pa bokou letan apre, en lazans ki rod travayer ti telefonn mwan pour demande si mon kapab ranplas en dimoun pour de semenn.” Lendi Saphira ti al kot sa landrwa travay pour ganny sa formasyon avek sa dimoun ki i ti pou ranplase. I dir: “I ti en sirpriz ler mon ti dekouver ki ti en ser e i ti bezwen 10 zour konze pour asiste Lekol Pionye! Son anplwaye ti’n refize pour donn li konze si i ti napa en lot dimoun pour ranplas li. I ti’n sipliy Zeova pour ed li zis parey mwan menm.”

EN SOURS VRE SATISFAKSYON

Serten frer ek ser dan lezot pei in servi dan Was Lafrik pour plizyer lannen e zot in fer li vin zot lakour. Lezot in servi pou detrwa lannen apre zot in retourn dan zot pei. Me menm ozordi, bann ki nepli servi kot i annan en pli gran bezwen i benefisye avek sa bann lannen ki zot in servi dan lezot pei. Zot in aprann ki nou ganny vre satisfaksyon dan lavi ler nou servi Zeova.

[Not anba lo paz]

[Bwat lo paz 4]

Ki mannyer pour form lezot

Pascal en pionye e ansyen sorti Lafrans in servi Benen pour plis ki 12 an. I dir: “I en benediksyon pour vwar bann frer ek ser pe progrese spirityelman.” Ki mannyer i’n ed serten pour progrese?

“Mon adapte mon formasyon dapre sak dimoun. Dan predikasyon, mon’n aprann avek bann frer dan sa landrwa ki mannyer pour apros e dir bonzour dimoun. Ki serten in aprann avek mwan? Konman pour pran not. Bokou semen napa non e bann lakaz napa nimero. Serten proklanmater pa ti pran okenn not e sa ti fer ki zot pa ti arive fer zot bann retourn vizit. Mon ti montre zot ki mannyer en senp not i kapab fer nou rapel bann dimoun enterese, kote zot reste e osi ede pour motiv nou pour fer bann retourn vizit.

“Dimoun isi i aprann pli byen ler zot ekoute. Zot aprann plizyer langaz san servi okenn liv. Me lektir i kapab en defi pour zot. Mon ti lir aotvwa avek detrwa zenn frer. Plis zot ti progrese, plis zot ti kontan lir. Apre mon ti montre zot ki mannyer pour fer resers. Zot ti fer progre vitman e pa bokou letan apre zot ti vin asistan ministeryel.”

[Portre lo paz 3]

Pascal pe prese Nizer

[Portre lo paz 5]

Anne-Rakel

[Portre lo paz 5]

Albert-Fayette ek Aurele

[Portre lo paz 5]

Lysiane ek Clodomir avek serten ki zot in ede pour konn laverite

[Portre lo paz 6]

Johanna ek Sébastien

[Portre lo paz 6]

Katy ek Eric

[Portre lo paz 5]

Benjamin

[Portre lo paz 6]

Marie-Agnès ek Michel

[Portre lo paz 5]

Marie-Thérèse

[Portre lo paz 6]

Saphira