Servi Zeova avan bann zour difisil i konmanse

“Mazin ou Gran Kreater.”​—EKLE. 12:1.

ESKI OU KAPAB EKSPLIKE?

Ki mannyer bann Kretyen eksperyanse i kapab ed bann ki pli zenn?

Ki legzanp dan Labib ki kapab ankouraz bann Kretyen pli aze pour servi kot i annan en pli gran bezwen?

Ki mannyer serten Kretyen in konmans servi Bondye dan bann nouvo fason pli tar dan lavi?

1, 2. (a) Ki konsey Salomon ti ganny enspire pour ekrir bann zenn? (b) Akoz konsey Salomon i aplik osi pour bann Kretyen dan zot 50 an oubyen plis?

LERWA SALOMON ti ganny enspire pour adres bann zenn par sa bann parol: “Mazin ou Gran Kreater letan ou ankor zenn, avan ki bann zour difisil i konmanse.” Kwa sa bann “zour difisil”? Salomon ti koz dan en fason poetik pour dekrir bann difikilte ki vin avek lavyeyes, par egzanp lanmen i tranble, lipye i afeblir, ledan i tonbe, lizye i vwar sonm, zorey i sourd, seve i vin blan e lekor i vin kourbe. Personn pa devret mazin pour esper ziska i ariv sa staz dan lavi avan i konmans servi Zeova.​—Lir Eklezyast 12:1-5. *

² Bokou Kretyen ki dan zot 50 an oubyen plis i ankor for. I kapab ki zot annan seve blan, me tre probab zot pa ankor ariv sa staz kot zot annan move lasante parey sa ki Salomon ti dekrir.  Eski sa bann Kretyen pli aze i kapab benefisye avek sa konsey ki ti ganny adrese avek bann zenn: “Mazin ou Gran Kreater”? Ki sa konsey i vedir?

3. Kwa ki enplike ler nou mazin nou Gran Kreater?

³ Menm si nou pe servi Zeova pour bokou lannen, i byen ki tanzantan nou aret en pti kou e mazin avek lapresyasyon lo konbyen nou Kreater i gran. Pa lavi i vreman enpresyonan? Fason ki tou keksoz in ganny kre i sitan konplike ki nou pa kapab konpran li konpletman. Zeova in fourni nou avek diferan provizyon ki permet nou rezouir lavi dan plizyer fason. Kan nou reflesir lo kreasyon Zeova, sa i fer nou rapel kantite lanmour, lasazes ek pwisans i annan. (Ps. 143:5) Me mazin nou Gran Kreater i osi enplik reflesir lo nou lobligasyon anver li. Pandan sa bann moman refleksyon, sirman sa i fer nou annan sa determinasyon pour demontre nou lapresyasyon pour nou Kreater par servi li tan ki nou ankor vivan.​—Ekle. 12:13.

BANN LOPORTINITE SPESYAL PLI TAR DAN LAVI

4. Ki kestyon bann Kretyen ki annan bokou leksperyans i kapab demann zot lekor e akoz?

⁴ Si ou annan plizyer dizenn lannen leksperyans konman en adilt, i annan en kestyon enportan pour demann ou lekor, ‘Ki mon pou fer avek mon lavi aprezan, la ki mon ankor annan en pe lenerzi ek lafors?’ Konman en Kretyen eksperyanse ou annan bann loportinite ki lezot napa. Ou kapab ansenny bann zenn sa ki ou’n aprann avek Zeova. Ou kapab ranforsi lezot par partaz ou leksperyans ki ou’n gannyen dan ou servis pour Bondye. Lerwa David ti priye pour ganny bann loportinite pour fer sa. I ti ekrir: “O Bondye, ou’n ansenny mwan depi mon zenes. . . . Menm ler mon’n vin vye e mon seve in vin blan, pa kit mwan. Pour ki mon koz avek sa lot zenerasyon lo ou lafors e lo ou pwisans avek tou sa bann ki pou vini.”​—Ps. 71:17, 18.

5. Ki mannyer bann Kretyen pli aze i kapab transmet avek lezot sa ki zot in aprann?

⁵ Ki mannyer ou kapab partaz sa lasazes ki ou’n gannyen diran tou sa bann lannen? Eski ou kapab envit bann serviter Bondye ki pli zenn kot ou pour profit lasosyasyon ki ankourazan? Eski ou kapab demann zot pour vin avek ou dan predikasyon e montre zot lazwa ki ou eksperyanse dan servis Zeova? Eliou en zonm dan lepase ti dir: “Ki bann aze i koze e ki bann ki annan bokou lannen i koz lo lasazes.” (Zob 32:7) Zapot Pol ti demann bann madanm Kretyen eksperyanse pour ankouraz lezot par zot parol ek legzanp. I ti ekrir: ‘Bann vye madanm i devret donn bon konsey.’​—Tit 2:3

KI OU KAPAB FER POUR ED LEZOT

6. Akoz bann Kretyen ki annan plizyer dizenn lannen leksperyans pa devret souzestim zot abilite?

⁶ Si ou en Kretyen eksperyanse ou annan en gran potansyel. Egzamin sa ki ou konpran la konmela ki ou pa ti konnen 30 oubyen 40 an pase. Ou kapab aplik byen bann prensip Labib dan lavi. San dout ou annan sa abilite pour tous leker lezot avek laverite dan Labib. Si ou en ansyen, ou konnen ki mannyer pour ed bann frer ki’n fer en keksoz mal. (Gal. 6:1) Petet ou’n aprann ki mannyer pour desarz bann responsabilite dan kongregasyon, lasanble oubyen konstriksyon Lasal Rwayonm. Ou kapab konnen ki mannyer pour ankouraz bann dokter pour servi bann bon metod pour pa fer transfizyon disan. Menm si ou’n fek aprann laverite, ou annan bon leksperyans dan lavi. Par egzanp, si ou’n elve zanfan ou pou’n ganny bann abilite ki vreman itil. Bann  Kretyen pli aze i annan sa abilite pour ankouraz pep Zeova par ansenny, gid e ranforsi bann frer ek ser.​—Lir Zob 12:12. *

7. Ki formasyon itil bann Kretyen pli aze i kapab donn bann zenn?

⁷ Ki mannyer ou kapab pli byen servi ou abilite? Petet ou kapab montre bann ki pli zenn ki mannyer pour konmans e kondwir en letid Labib. Si ou en ser, eski ou kapab sizer avek bann zenn manman ki mannyer zot kapab pran swen avek zot zanfan e an menm tan fer zot bann aktivite spirityel? Si ou en frer, eski ou kapab ansenny bann zenn frer pour donn bann diskour avek lantouzyazm e pour pli efikas dan predikasyon? Eski ou kapab montre zot ki mannyer ou vizit bann frer oubyen bann ser aze pour ankouraz zot spirityelman? Menm si ou napa sa lafors fizik ki ou ti annan avan, ou annan bann zoli loportinite pour form bann zenn. Parol Bondye i dir: “Laglwar bann zennonm se zot lafors, e labote bann vyeyar se zot seve blan.”​—Prov. 20:29.

SERVI KOT I ANNAN EN PLI GRAN BEZWEN

8. Ki zapot Pol ti fer pli tar dan lavi?

⁸ Zapot Pol ti servi son abilite plennman pour servi Bondye pli tar dan lavi. Kan i ti ganny large dan prizon Ronm apepre lannen 61 N.L., i ti travay dir pour plizyer lannen dan servis misyonner e i ti’n kapab reste Ronm pour prese. (2 Kor. 11:23-27) Bann frer dan sa gran lavil ti pou’n san dout apresye sa sipor ki i ti pe donn zot. Me Pol ti vwar ki i ti annan en pli gran bezwen dan lezot landrwa. Avek Timote ek Tit i ti repran son servis misyonner i ti al Efez, apre Kret e tre probab Masedwann. (1 Tim. 1:3; Tit 1:5) Nou pa konnen si i ti vizit Lespanny me i ti annan lentansyon fer li.​—Rom. 15:24, 28.

9. Apepre ki letan Pyer ti’n kapab al servi kot ti annan plis bezwen? (Vwar portre lo paz 22.)

⁹ Petet zapot Pyer ti annan plis ki 50 an kan i ti al servi kot i ti annan en pli gran bezwen. Akoz sa i kapab leka? Si i ti annan apepre menm laz ki Zezi oubyen en pti pe pli vye, i ti pou annan apepre 50 an ler i ti zwenn lezot zapot Zerizalenm lannen 49 N.L. (Akt 15:7) En pe letan apre ki zot ti’n zwenn, Pyer ti al reste Babilonn, san dout pour pres avek sa gran kantite Zwif ki ti pe reste dan sa rezyon. (Gal. 2:9) I ti pe reste laba ler i ti ekrir son premye let enspire, apepre lannen 62 N.L. (1 Pyer 5:13) I en defi pour reste dan en pei etranze me Pyer pa ti les son laz fer li perdi son lazwa pour servi Zeova plennman.

10, 11. Rakont leksperyans en dimoun ki pli tar dan lavi ti al servi kot i annan en pli gran bezwen.

¹⁰ Ozordi bokou Kretyen dan zot 50 an oubyen pli aze i vwar ki zot sirkonstans in sanze e ki zot kapab servi Zeova dan bann nouvo fason. Serten in al reste kot i annan en pli gran bezwen. Par egzanp Robert i ekrir: “Mwan ek mon madanm ti dan nou 55 an kan nou ti realize ki bann loportinite nou ti annan pour servi Zeova. Nou sel garson ti’n kit lakour, nou ti nepli annan paran aze pour pran swen avek e nou ti’n ganny en pti leritaz. Mon ti kalkile ki si nou vann nou lakaz i ti pou sifi pour pey nou lón lakaz e annan ase larzan pour viv lo la ziska ki mon ganny mon pansyon. Nou ti tande ki i ti annan en kantite dimoun ki aksepte letid Labib Bolivia, me pri lavi i ba. Alor nou ti deside pour al laba. I pa ti fasil pour adapte avek nou nouvo landrwa. Tou keksoz ti telman diferan avek sa ki nou ti abitye avek dan Nor Lanmerik. Me nou zefor ti ganny byen rekonpanse.”

 ¹¹ Robert i azoute: “Nou lavi antye aprezan i santre lo bann aktivite kongregasyon. Serten dimoun ki nou’n etidye Labib avek in batize. En fanmir pov ki nou ti etidye avek i reste dan en vilaz detrwa kilomet avek nou. Me sak semenn sa fanmir i fer sa traze difisil pour vin renyon dan lavil. Eski ou kapab mazin nou lazwa ler nou vwar sa fanmir progrese e zot pli gran garson pran servis pionye?”

BEZWEN DAN TERITWAR KI KOZ EN LOT LANGAZ

12, 13. Rakont leksperyans en Kretyen ki ti konmans servi Zeova dan bann nouvo fason apre ki i ti’n pran son retret.

¹² Bann kongregasyon ek group ki koz en lot langaz i kapab benefisye en kantite avek legzanp bann frer ek ser pli aze. An plis, ou kapab ganny bokou satisfaksyon pour travay dan sa teritwar. Par egzanp, Brian ki sorti Langleter i ekrir: “Mon madanm ek mwan ti annan en lavi trankil ler mon ti pran mon retret a laz 65 an. Nou zanfan ti’n kit lakour e rar nou ti zwenn dimoun ki ti enterese pour nou etidye Labib avek. Apre mon ti zwenn en zenn msye Sinwan ki ti pe fer resers kot en liniversite dan sa landrwa kot nou ti pe reste. I ti aksepte en lenvitasyon pour vin nou renyon e mon ti konmans etidye Labib. Apre detrwa semenn i ti konmans anmenn enn son zanmi Sinwan avek li. De semenn pli tar, i ti anmenn en trwazyenm e apre en katriyenm.”

¹³ “Ler en senkyenm Sinwan dan menm liniversite ti demann en letid Labib mon ti dir dan mwan menm, ‘Zis akoz mon annan 65 an, sa pa vedir ki mon devret pran mon retret dan servis Zeova.’ Alor, mon ti demann mon madanm ki de-z-an pli zenn ki mwan si i ti pou kontan aprann langaz Sinwan. Nou ti servi en kour ki ti ganny rikorde. Sa ti di-z-an pase. Nou predikasyon dan en teritwar ki koz en lot langaz ti fer nou santi ki nou’n revin zenn. Ziska aprezan nou’n etidye Labib avek 112 dimoun Sinwan! Laplipar zot in asiste renyon. Enn parmi zot pe fer pionye ansanm avek nou.”

 APRESYE SA KI OU KAPAB FER

14. Kwa ki kapab fer bann Kretyen pli aze ere e ki mannyer legzanp zapot Pol i ankouraz zot?

¹⁴ Menm si bokou Kretyen dan zot 50 an i annan bann bon loportinite pour fer bann nouvo keksoz dan servis Zeova, pa tou dimoun ki kapab. Serten parmi zot i annan move lasante, lezot pe pran swen avek zot paran aze oubyen zanfan ki ankor kot lakour. Ou devret kontan pour konnen ki Zeova i apresye nenport kwa ki ou fer dan son servis. Alor olye vin fristre pour sa ki ou pa kapab fer, apresye sa ki ou kapab fer. Annou vwar legzanp zapot Pol. Pour plizyer lannen, i ti en prizonnyen e i pa ti kapab vwayaze pour fer son servis misyonner. Me nenport ki moman ki dimoun ti vizit li i ti koz avek zot lo Lekritir e ranforsi zot lafwa.​—Akt 28:16, 30, 31.

15. Akoz bann Kretyen aze i annan en gran valer?

¹⁵ Zeova i osi apresye sa ki bann aze i kapab fer dan son servis. Menm si Salomon ti montre ki bann zour difisil, setadir ler nou annan en move lasante i pa sa pli bon moman dan lavi, Zeova i apresye sa ki bann Kretyen aze i kapab fer pour loue li. (Lik 21:2-4) Kongregasyon i apresye legzanp fidelite bann ki’n servi Zeova pour bokou lannen parmi zot.

16. Ki privilez i paret Ann pa ti gannyen me ki i ti kapab fer pour ador Bondye?

¹⁶ Labib i montre ki en madanm aze ki ti apel Ann ti kontinyen loue Zeova fidelman menm ziska dan son vye zour. I ti en vev 84 an kan Zezi ti ne. I paret ki i pa ti viv ase lontan pour vin en disip Zezi, pour ganny swazir par lespri sen oubyen pour pres sa bon nouvel Rwayonm. Par kont, sa ki Ann ti kapab fer i ti kontan. “I pa ti kit Tanp. I ti kontinyen servi Bondye, nwit-e-zour.” (Lik 2:36, 37) Kan pret ti ofer lansan dan tanp tou le bomaten ek aswar, Ann ti parmi sa lafoul ki ti’n rasanble dan lakour pe priye dan son leker pour apepre en demi erdtan. Kan i ti vwar Zezi ler i ti ankor en pti baba, i ti konmans “koz lo sa zanfan avek tou bann ki ti pe esper delivrans Zerizalenm.”​—Lik 2:38.

17. Ki mannyer nou kapab ed bann Kretyen aze oubyen malad pour partisip dan vre ladorasyon?

¹⁷ Ozordi nou devret rod fason pour ed bann Kretyen aze oubyen malad. Serten ki ti pou kontan pour vin bann renyon ek lasanble petet pa nobou fer li souvan. Dan serten landrwa, kongregasyon i fer laranzman pour ki sa bann aze i kapab ekout renyon par telefonn. Petet i pa posib fer sa dan lezot landrwa. Menm si serten Kretyen pa kapab asiste renyon, zot kapab siport vre ladorasyon. Par egzanp, zot lapriyer i kontribye pour byennet kongregasyon.​—Lir Psonm 92:13, 14. *

18, 19. (a) Akoz i kapab ki bann Kretyen pli aze pa realize ki kantite zot ankouraz lezot? (b) Lekel ki kapab aplik sa konsey: “Mazin ou Gran Kreater”?

¹⁸ Petet bann Kretyen aze pa realize ki kantite ki zot ankouraz lezot. Par egzanp, menm si Ann ti fidel tou sa lannen kot tanp, i tre probab ki i pa ti realize ki plizyer syek pli tar son legzanp ti pou ankor pe ankouraz lezot. Lanmour ki Ann ti annan pour Zeova in ganny ekrir dan Labib. San dout, ou lanmour pour Bondye in ganny ekrir dan leker ou bann frer ek ser. Alor, i fer sans ki Parol Bondye i dir: “Seve blan i en kouronn labote kan i ganny trouve dan semen ladrwatir.”​—Prov. 16:31.

¹⁹ Nou tou nou annan en limit lo sa ki nou kapab fer dan servis Zeova. Me bann parmi nou ki ankor annan lafors ek devouman, annou pran aker sa parol enspire: “Mazin ou Gran Kreater . . . avan ki bann zour difisil i konmanse.”​—Ekle. 12:1.

[Not anba lo paz]

[Kestyon]

[Portre lo paz 25]

Petet ou pa tro vye pour fer plis dan ou minister (Vwar paragraf 12, 13)