Rwayonm Bondye pe rennyen depi 100 an Ki i’n akonplir?

‘Zeova Bondye . . . ou travay i gran e merveye. Lerwa eternel.’​—REV. 15:3.

ESKI OU KAPAB REPONN?

Ki mannyer Zeova ti vin Lerwa an 1914 e ki serten keksoz sa Rwayonm ti akonpli o konmansman?

Ki mannyer Zezi in servi Rwayonm pour rafin, edik e organiz bann sitwayen Bondye ki fidel lo later?

Kan ki nou lapriyer ki ou Rwayonm i vini pou ganny reponn konpletman e ki sa pou vedir?

1, 2. Ki Rwayonm Bondye pou akonpli e akoz nou kapab annan konfyans ki sa Rwayonm pou vini?

LO EN montanny pros avek Kapernaoum dan prentan lannen 31 N.L., Zezi Kri ti ansenny son bann disip pour priye: “Ki ou Rwayonm i vini.” (Mat. 6:10, NW) Ozordi, bokou i doute si Rwayonm Bondye pou vini. Me, nou annan konfyans ki nou lapriyer senser pour Rwayonm Bondye vini pou ganny reponn.

² Zeova pou servi sa Rwayonm pour ini son fanmir dan lesyel e lo later. Son plan pou ganny realize. (Iza. 55:10, 11) Anfet, Zeova in fini vin Lerwa dan nou letan. Bann levennman eksitan diran sa 100 an ki’n pase i montre sa klerman. Bondye pe fer bann gran travay merveye anver plizyer milyon son bann sitwayen fidel. (Zeka. 14:9; Rev. 15:3) Pourtan, kan Zeova in vin Lerwa, sa i diferan avek larive Rwayonm Bondye ki Zezi ti ansenny nou pour priy lo la. Ki mannyer sa bann levennman i diferan e ki lefe zot annan lo nou?

LERWA KI ZEOVA IN APWENTE I PRAN AKSYON

3. (a) Kan ki Zezi ti ganny apwente konman Lerwa e kote? (b) Ki mannyer ou ti pou prouve ki Rwayonm Bondye ti ganny etabli an 1914? (Vwar not.)

³ Ver lafen diznevyenm syek, sa profesi ki ti ganny ekri par Danyel plis ki 2,500 an pase ti konmans vin kler: “Dan bann  zour sa bann lerwa, Bondye lesyel pou etabli en rwayonm ki pa pou zanmen ganny detri.” (Dan. 2:44) Pandan, plizyer dizenn lannen, bann Etidyan Labib ti anonse ki 1914 ti pou en lannen enportan. Bokou dimoun sa letan ti annan menm pwennvi pozitif. Parey en ekriven ti dir: “An 1914 lemonn ti ranpli avek lespwar ek promes.” Me, pli tar sa lannen, bann profesi Labib ti vin vre ler Premye Lager Mondyal ti konmanse. Lafamin, tranblemandter, lepidemi ek lezot profesi Labib ki ti pe ganny akonplir, ti montre klerman ki Zezi Kri ti’n konmans rennyen dan lesyel konman Lerwa Rwayonm Bondye an 1914. * Par apwent son Garson konman Lerwa dan son Rwayonm, Zeova ti sirman vin Lerwa dan en nouvo fason!

4. Ki sa nouvo Lerwa ti fer deswit apre ki i ti’n ganny apwente e anver lekel ki i ti tourn son latansyon apre?

⁴ Premye misyon ki nouvo Lerwa Bondye ti gannyen ti pour lager kont Satan, sa pli gran Lennmi son Papa. Zezi ek son bann lanz ti retir Dyab ek son bann demon dan lesyel. Sa ti anmenn en gran lazwa dan lesyel, me en letan maler ki pa ti’n zanmen arive oparavan lo later. (Lir Revelasyon 12:7-9, 12.) Apre, sa Lerwa ti tourn son latansyon ver son sitwayen lo later pour rafin, edik e organiz zot pour fer lavolonte Bondye. Annou vwar ki mannyer zot reaksyon pozitif anver sa trwa laspe dominasyon Rwayonm i en bon legzanp pour nou ozordi.

LERWA RWAYONM BONDYE I RAFIN SON SITWAYEN FIDEL

5. Ki netwayaz ti arive ant 1914 e konmansman 1919?

⁵ Apre ki sa Lerwa ki ti’n ganny apwente ti’n netway lesyel avek move lenfliyans Satan ek son bann demon, Zeova ti demann Zezi pour enspekte e rafin kondisyon spirityel son bann disip lo later. Profet Malaki ti dekrir sa konman en netwayaz spirityel. (Mal. 3:1-3) Listwar i montre ki sa ti arive ant 1914 e konmansman 1919. * Pour form parti fanmir iniversel Zeova, nou bezwen prop oubyen sen. (1 Pyer 1:15, 16) Nou pa devret les nou ganny kontaminen avek fo larelizyon oubyen politik dan sa lemonn.

6. Ki mannyer nou ganny bann nouritir spirityel e akoz i enportan?

⁶ Apre, Zezi ti servi son lotorite konman lerwa pour apwent en “lesklav fidel e pridan.” Sa lesklav ti pou regilyerman donn nouritir spirityel a tan, tou dimoun ki form parti sa “sel troupo” ki Zezi i pran swen avek. (Mat. 24:45-47, NW; Zan 10:16) Depi 1919, en pti group frer swazir in fidelman desarz sa gro responsabilite pour nouri “lezot serviter.” Sa kantite nouritir spirityel ki nou gannyen atraver sa lesklav i fer nou vin pli for dan lafwa. I ranforsi nou determinasyon pour reste prop spirityelman, moralman, mantalman e fizikman. Sa nouritir spirityel i osi edik nou e ekip nou pour partisip plennman dan sa travay pli enportan ki pe ganny fer dan lemonn ozordi. Eski ou pe profit plennman tou sa bann provizyon?

SA LERWA I EDIK SON SITWAYEN POUR PRES DAN LEMONN ANTYE

7. Ki travay enportan Zezi ti konmanse ler i ti lo later e ziska kan i pou kontinyen ganny fer?

⁷ Kan Zezi ti konmans son minister lo later i ti dir: “Mon bezwen anons Bonn Nouvel konsernan Rwayonm Bondye dan bann lezot lavil osi, parski se pour sa, ki Bondye in anvoy mwan.” (Lik 4:43) Pour trwa-z-an edmi, Zezi ti fer sa travay sa keksoz pli enportan dan son lavi. I ti demann son bann disip pour: “Ale, e prese ki, ‘Rwayonm lesyel i pros!’” (Mat. 10:7)  Apre son rezireksyon, Zezi ti predir ki son bann disip ti pou propaz sa mesaz “ziska tou bann landrwa pli elwannyen lo later.” (Akt 1:8) I ti promet zot ki i ti pou personnelman partisip dan sa travay enportan ziska dan nou letan.​—Mat. 28:19, 20.

8. Ki mannyer sa Lerwa ti pous son sitwayen lo later pour azir?

⁸ Apartir 1919, sa “Bonn Nouvel Rwayonm” ti osi annan en lot sinifikasyon. (Mat. 24:14) Sa Lerwa ti pe rennyen dan lesyel e i ti’n rasanble en pti group sitwayen lo later ki ti’n ganny rafinen. Zot ti azir avek lantouzyasm anver sa lenstriksyon Zezi: Pres sa bon nouvel konsernan Rwayonm Bondye ki’n ganny etabli lo later antye! (Akt 10:42) Par egzanp, preski 20,000 dimoun ki ti siport Rwayonm ti zwenn dan en lasanble enternasyonal Cedar Point, Ohio, Leta-z-ini, Septanm 1922. Zis mazin zot leksitasyon kan Frer Rutherford ti donn sa diskour ki ti annan pour tit “Sa Rwayonm” e i ti dir: “Gete, nou Lerwa pe dirize! Zot zot sa bann ki i pe servi pour anons sa mesaz. Alor anonse, anonse, anonse konsernan sa Lerwa ek son rwayonm.” De mil delege ti reazir par partisip dan en “Zour Predikasyon” spesyal pour vizit bann lakour ziska 72 kilomet avek kot lasanble ti pe ganny fer. En delege ki ti’n ganny motive pour azir ti dir: “Mon pa pou zanmen oubliy sa demann pour anons sa Rwayonm ek sa devouman ki bann dimoun dan lasistans ti annan!” Sa frer pa ti tousel.

9, 10. (a) Ki laranzman ki’n ganny fer pour form bann proklanmater? (b) Ki mannyer ou’n benefisye personnelman avek sa formasyon?

⁹ Apartir 1922, plis ki 17,000 proklanmater ti pe prese dan 58 pei dan lemonn. Par kont, zot ti bezwen ganny formen. Dan premye syek, sa Fitir Lerwa ti donn son bann disip bann lenstriksyon kler lo kwa, kote e ki mannyer pour prese. (Mat. 10:5-7; Lik 9:1-6; 10:1-11) An swivan sa menm legzanp ozordi, Zezi i fer sir ki tou dimoun ki partisip dan sa travay predikasyon i ganny bann lenstriksyon ek bann zouti ki zot bezwen pour pres dan en fason efikas. (2 Tim. 3:17) Atraver kongregasyon Kretyen, Zezi pe form son bann sitwayen pour prese. En fason ki i form zot i atraver Lekol Minister Teokratik ki ganny fer dan sa plis ki 111,000 kongregasyon dan lemonn antye. Par met an pratik sa bann lenstriksyon, sa plis ki set milyon proklanmater i aprezan ekipe pour pres e ansenny dan en fason ki atir “tou dimoun.”​—Lir 1 Korentyen 9:20-23.

¹⁰ An plis ki Lekol Minister Teokratik, i annan lezot lekol lo Labib ki’n ganny etabli pour form bann ansyen, pionye, frer selibater, koup Kretyen, manm Komite  Brans ek zot madanm, sirveyan rezyonal e distrik ek zot madanm ek misyonner. * Bann etidyan dan en laklas Lekol pour bann koup Kretyen ti eksprim zot lapresyasyon pour sa lekol par dir: “Sa formasyon ki nou’n gannyen in fer nou lanmour pour Zeova vin pli for e nou pli byen ekipe pour ed lezot.”

11. Ki mannyer bann predikater in kapab andire menm si i annan lopozisyon?

¹¹ Tou sa zefor pour pres e ansenny lo Rwayonm Bondye pa’n ganny fer san ki Satan nou lennmi i remarke. Pour esey aret sa travay, i servi bann latak direk ek latak anba anba kont sa mesaz Rwayonm e kont bann ki pe anons sa mesaz. Me zefor nou lennmi pa’n reisi. Zeova in met son Garson “par lao tou pouvwar, tou lotorite, tou pisans, tou dominasyon.” (Efe. 1:20-22) Konman Lerwa, Zezi i servi son lotorite pour protez e gid son bann disip pour fer sir ki lavolonte son Papa i ganny fer. * Sa bon nouvel pe ganny prese e plizyer milyon dimoun ki annan en leker senser pe ganny ansennyen pour ador Zeova. Pa i en privilez pour nou partisip dan sa gran travay!

SA LERWA I ORGANIZ SON SITWAYEN POUR FER PLIS

12. Dekrir serten azisteman ki lorganizasyon in fer depi ki Rwayonm in ganny etabli.

¹² Depi ki sa Rwayonm in ganny etabli an 1914, sa Lerwa in fer bann azisteman dan lafason ki bann serviter Bondye i ganny organize pour fer lavolonte son Papa. (Lir Izai 60:17. *) An 1919, en direkter servis ti ganny apwente dan sak kongregasyon pour responsab travay predikasyon. An 1927, predikasyon portanport ti ganny organize regilyerman dan Dimans. Bann ki ti siport sa Rwayonm ti ganny motive pour fer plis dan sa travay an 1931 ler zot ti adopte sa non Temwen Zeova ki sorti dan Labib. (Iza. 43:10-12) An 1938, bann ki ti annan responsabilite dan kongregasyon ti nepli ganny apwente par bann vot dan en fason demokratik. Plito, zot ti ganny apwente dan en fason teokratik. An 1972, en konsey ansyen ti ganny apwente pour ansarz bann responsabilite kongregasyon dan plas en sel sirveyan kongregasyon. Tou bann frer ki ti kalifye ti ganny ankouraze pour anvi ganny plis responsabilite pour “pran byen swen troupo Bondye ki’n ganny konfye  avek zot konman berze.” (1 Pyer 5:2) An 1976, Konsey Direkter ti ganny organize dan sis komite pour sirvey sa travay Rwayonm dan lemonn antye. Alor, i fer sans ki sa Lerwa ki Zeova in swazir in ptitapti organiz son bann sitwayen dan en fason teokratik, ki vedir dirize par Bondye li menm.

13. Ki lefe lakonplisman sa 100 an ki Rwayonm Bondye pe rennyen i annan lo ou lavi?

¹³ Zis mazin sa ki Lerwa Rwayonm Bondye in akonpli pandan sa premye 100 an son renny. I’n pirifye en pep pour non Zeova. I’n diriz predikasyon bon nouvel Rwayonm dan 239 pei e i’n edik plizyer milyon konsernan ladorasyon Zeova. I’n reini plis ki set milyon sitwayen fidel ki’n ofer zot lekor volonterman pour fer lavolonte son Papa. (Ps. 110:3) Sirman, travay ki Zeova in fer atraver sa Rwayonm dirize par Kris i gran e merveye. I annan bann levennman pli eksitan ki pe vini dan lavenir!

BENEDIKSYON RWAYONM DIRIZE PAR KRIS DAN LAVENIR

14. (a) Ki nou pe demann Bondye ler nou priye ki ou Rwayonm i vini? (b) Ki nou teks pour lannen 2014 e akoz sa i apropriye?

¹⁴ Menm si Zeova ti apwent son Garson Zezi Kri konman Lerwa son Rwayonm an 1914, sa pa ti larepons konplet nou lapriyer pour ki sa Rwayonm i vini. (Mat. 6:10) I ti’n ganny predir dan Labib ki Zezi ti pou “al diriz o milye [son] bann lennmi.” (Ps. 110:2) Anba kontrol Satan, bann gouvernman imen i ankor pe opoz sa Rwayonm. Kan nou priye pour Rwayonm Bondye vini, nou pe demann Bondye ki Lerwa son Rwayonm ek bann ki pe renny avek li i met en lafen avek bann gouvernman imen e retir bann ki opoz sa Rwayonm lo later. Kan sa i arive, sa profesi dan Danyel 2:44 ki Rwayonm Bondye “pou kraz e met en lafen avek tou sa bann rwayonm” pou ganny akonplir. I pou detri bann gouvernman ki lennmi Rwayonm. (Rev. 6:1, 2; 13:1-18; 19:11-21) I pros pour sa arive. Vi ki i fer 100 an ki sa Rwayonm in ganny etabli dan lesyel, pa i apropriye alor ki nou teks pour lannen 2014 ki baze lo Matye 6:10 i, Ki ou Rwayonm i vini!

15, 16. (a) Ki bann levennman ekstraordiner ki Zezi pou fer pandan sa Mil An? (b) Ki dernyen aksyon Zezi pou akonpli a lafen son renny e ki sa pou vedir an rapor avek plan Zeova pour tou son kreasyon?

¹⁵ Me larive Lerwa Rwayonm Bondye pour detri bann lennmi Bondye, pou zis konmansman ‘destriksyon bann travay dyab.’ (1 Zan 3:8) Apre, i pou zet Satan ek son bann demon pour mil an dan labim. (Rev. 20:1-3) San lenfliyans Satan, deswit sa Rwayonm pou ed dimoun benefisye plennman atraver sakrifis Zezi e i pou tir konpletman lefe pese Adan. Sa Lerwa pou resisit sa plizyer milyon ki pe dormi dan latonm e pou organiz en progranm pour ansenny zot lo Zeova. (Rev. 20:12, 13) Later antye pou vin en paradi parey zarden Edenn. Tou bann imen fidel pou vin parfe.

¹⁶ A lafen sa Mil An ki Kris pou rennyen, sa Rwayonm pou’n atenn son bi. Apre sa, Zezi pou remet Rwayonm dan lanmen son Papa. (Lir 1 Korentyen 15:24-28.) I pou nepli bezwen annan en lentermedyer ant Zeova ek son zanfan lo later. Tou bann garson Bondye dan lesyel ek son bann zanfan lo later pou reini avek zot Papa dan lesyel konman en fanmir iniversel.

17. Ki ou determinen pour fer an rapor avek sa Rwayonm?

¹⁷ Bann levennman eksitan ki’n arive pandan sa 100 an ki sa Rwayonm pe rennyen i lasirans ki Zeova i annan kontrol e ki son plan pour later pou ganny realize. Annou kontinyen reste son sitwayen fidel e anons sa Lerwa ek son Rwayonm. Nou fer sa avek konfyans total ki Zeova pou byento reponn nou lapriyer senser: Ki ou Rwayonm i vini!

[Not anba lo paz]

[Kestyon]

[Ekstre lo paz 12]

Nou teks pour lannen 2014: “Ki ou Rwayonm i vini.”​—Matye 6:10

[Tablo lo paz 14, 15]

NOU TI GANNY RAFINEN depi 1914 ziska 1919

Zezi i enspekte e rafin kondisyon spirityel son bann disip lo later. Lannen 1919 i apwent en “lesklav fidel e pridan”

1919 En direkter servis i ganny apwente dan sak kongregasyon

1927 Predikasyon portanport i ganny organize dan Dimans

1938 Bann ki annan responsabilite dan kongregasyon i konmans ganny apwente dan en fason teokratik

1972 En konsey ansyen i ganny apwente pour okip bann responsabilite kongregasyon

1943 Lekol Minister Teokratik ek Lekol Gilead

Proklanmater dan lemonn antye:

6,000

17,000

328,572

851,378

1910

1914

1920

1930

1940

1950

1960

1976 Konsey Direkter i ganny organize dan sis komite

1977 Lekol pionye

1987 Lekol Formasyon Ministeryel

2000 Lekol pour sirveyan rezyonal e distrik

2011 Lekol pour bann koup Kretyen

1,384,782

2,175,403

6,035,564

7,224,930

1970

1980

1990

2000

2010

2014

Lorganizasyon

Ledikasyon