Ador Zeova, sa Lerwa eternel
Ador Zeova, sa Lerwa eternel
“Annou rann loner ek laglwar Lerwa eternel, . . . pour touzour.”—1 TIM. 1:17.
KI OU POU REPONN?
Akoz nou ganny atire anver fason ki Zeova i dirize?
Ki mannyer Zeova in toultan montre ki i vreman enterese avek son fanmir imen?
Kwa ki motiv ou pour ador Lerwa eternel?
1, 2. (a) Lekel sa “Lerwa eternel” e akoz sa tit i apropriye? (Vwar portre anler.) (b) An rapor avek dominasyon Zeova, kwa ki fer nou vin pros avek li?
LERWA SOBHUZA 2 sorti Swaziland ti renny pour preski 61 an. Sa ti remarkab pour en lerwa dan nou letan. Menm si sa kantite letan ki Lerwa Sobhuza ti rennyen i enpresyonan, i annan en lerwa ki son renny pa limite dapre kantite letan ki en imen i viv. Anfet, Labib i apel li “Lerwa eternel.” (1 Tim. 1:17) En psalmis i idantifye sa Souvren par son non: “Zeova i lerwa pour touzour, wi pour leternite.”—Ps. 10:16.
2 Kantite letan ki Bondye i Lerwa i fer son renny diferan avek sa ki pour bann imen. Anfet, i fason ki Zeova i dirize ki atir nou ver li. En lerwa ki ti diriz Izrael pandan 40 an ti loue Bondye par sa parol: “Zeova i annan mizerikord ek konpasyon, i pa ankoler vitman, e i annan en kantite lanmour fidel. Zeova in etablir son tronn dan lesyel; e son rwayote i domin lo tou keksoz.” (Ps. 103:8, 19) Zeova pa zis nou Lerwa me i osi nou Papa dan lesyel ki ranpli avek lanmour. Sa i fer nou demann de kestyon: Dan ki fason Zeova in azir konman en Papa? Dan ki fason Zeova in egzers son dominasyon depi sa rebelyon dan zarden Edenn? Larepons sa bann kestyon pou motiv nou pour vin pli pros avek Zeova e ador li avek tou nou leker.
LERWA ETERNEL I KRE EN FANMIR INIVERSEL
3. Lekel ki ti premye pour form parti fanmir iniversel Zeova e lekel ankor ki ti ganny kree konman “bann garson” Bondye?
3 Pa i ti bezwen en plezir pour Zeova ler i ti kre son sel Garson! Bondye pa ti tret son premye ne konmsi i ti napa lenportans. O kontrer, i ti kontan li konman son Zanfan e i ti ofer li sa privilez pour ede kre plizyer milyon lanz parfe. (Kol. 1:15-17) Bann lanz i ganny dekrir konman “son bann minis, ki pe fer son lavolonte.” Zot servi Bondye avek lazwa e Bondye i onor zot par apel zot son “bann garson.” Zot form parti fanmir iniversel Zeova.—Ps. 103:20-22; Zob 38:7.
4. Ki mannyer bann imen in kapab form parti fanmir iniversel Bondye?
4 Dek ki Zeova ti’n kre lesyel ek later, i ti agrandi son fanmir iniversel. Apre ki i ti’n kre later konman en zoli landrwa reste kot i ti annan tou keksoz, Zeova ti met en dernyen pti latous final par kre sa premye zonm, Adan dan Son resanblans. (Zen. 1:26-28) Konman Kreater, Zeova ti annan drwa ekspekte ki Adan i obeisan. Konman en Papa, Zeova ti donn tou son bann lord avek lanmour ek labonte. Sa bann lenstriksyon pa ti pou zanmen priv bann imen zot liberte.—Lir Zenez 2:15-17. *
5. Ki laranzman Bondye ti fer pour ranpli later avek son bann zanfan?
5 Kontrerman avek laplipar lerwa imen, Zeova i kontan partaz son responsabilite avek son sitwayen, i tret zot konman bann manm son fanmir ki i annan konfyans ladan. Par egzanp, i ti donn Adan lotorite lo lezot kreasyon lo later e menm donn li sa zoli privilez pour donn non bann zannimo. I ti en travay ki ti gou pour fer e ki ti osi en defi. (Zen. 1:26; 2:19, 20) Bondye pa ti kre plizyer milyon dimoun parfe pour ranpli later. O kontrer, i ti swazir pour kre en led parfe pour Adan, sa ti en madanm ki ti apel Ev. (Zen. 2:21, 22) Apre, i ti donn sa koup loportinite pour ranpli later avek zot zanfan. Anba bann kondisyon parfe, bann imen ti pou kapab agrandi sa zarden ziska ki later antye i vin en paradi. Ansanm avek bann lanz dan lesyel, zot ti pou kapab ador Zeova pour touzour konman en parti son fanmir iniversel. Pa sa i en lespwar merveye e en fason ki Zeova i demontre ki i vreman annan lanmour konman en papa!
BANN GARSON REBEL I REZET RWAYOTE BONDYE
6. (a) Ki mannyer rebelyon ti konmanse dan fanmir Bondye? (b) Akoz sa rebelyon pa vedir ki Zeova ti’n perdi kontrol?
6 Malerezman, Adan ek Ev pa ti satisfe pour annan Zeova konman zot Souvren. O kontrer, zot ti swazir pour swiv Satan, en garson Bondye ki ti rebel. (Zen. 3:1-6) Lefet ki zot ti rezet dominasyon Bondye, sa ti anmenn douler, soufrans ek lanmor pour zot ek zot desandans. (Zen. 3:16-19; Rom. 5:12) Bondye ti nepli annan bann sitwayen obeisan lo later. Eski sa ti vedir ki i ti’n perdi kontrol oubyen abandonn son drwa pour diriz bann zabitan lo later? Definitivman non! I ti egzers son lotorite par pous Adan ek Ev an deor zarden Edenn e pour anpes zot retournen, i ti met bann Seriben vey larantre. (Zen. 3:23, 24) An menm tan, Bondye ti demontre son lanmour konman en papa. I ti promet ki i ti touzour son plan pour annan en fanmir lanz ek imen fidel e ki enn bann “desandans” Adan ti pou detri Satan e elimin lefe pese ki i’n anmennen.—Lir Zenez 3:15. *
7, 8. (a) Ki mannyer later ti ete dan letan Noe? (b) Ki laranzman Zeova ti fer pour netway later e protez fanmir imen?
7 Dan bann syek ki ti swiv, serten zonm ti swazir pour reste fidel avek Zeova. Parmi i ti annan Abel ek Enok. Me lamazorite imen ti rezet Zeova konman zot Papa ek Lerwa. Dan lepok Noe, later “ti ranpli avek vyolans.” (Zen. 6:11) Eski sa i vedir ki Zeova ti nepli annan kontrol lo sa ki ti pe pase lo later? Ki listwar i prouve?
8 Annou pran legzanp resi Noe. Zeova ti donn Noe bann plan detaye ek lenstriksyon pour konstri en gran lars ki ti pou sov li ek son fanmir pros. Bondye ti osi demontre son gran lanmour pour tou son fanmir lo later ler i ti demann Noe pour vin “en predikater lazistis.” (2 Pyer 2:5) San dout, Noe ti envit bann dimoun pour repantir e averti zot konsernan sa destriksyon ki ti pou vini, me personn pa ti ekoute. Pour plizyer dizenn lannen, Noe ek son fanmir ti reste dan en lemonn kot dimoun ti vyolan e vreman imoral. Konman en Papa ki enterese avek son bann zanfan, Zeova ti protez e beni sa wit dimoun fidel. Atraver sa Deliz, Zeova ti demontre son dominasyon lo bann imen ki ti rebel ek bann move lanz. Definitivman Zeova ti an kontrol tou sa ki ti pe pase lo later.—Zen. 7:17-24.
RWAYOTE ZEOVA APRE DELIZ
9. Ki loportinite Zeova ti donn limanite apre Deliz?
9 Kan Noe ek son fanmir ti poz lipye pour premye fwa lo later ki ti’n ganny netwaye e respir sa ler fre, nou kapab asire ki zot leker ti ranpli avek rekonesans pour swen ek proteksyon Zeova. Deswit, Noe ti konstri en lotel e ofer sakrifis pour ador Zeova. Bondye ti beni Noe ek son fanmir e donn zot lenstriksyon pour “fer zanfan e vin bokou e ranpli later.” (Zen. 8:20–9:1) Ankor enn fwa, limanite ti annan sa loportinite pour ini dan zot ladorasyon e pour ranpli later.
10. (a) Kote e ki mannyer rebelyon kont Zeova ti rekonmanse apre Deliz? (b) Ki aksyon Zeova ti pran pour fer sir ki son lavolonte ti ganny fer?
10 Par kont, Deliz pa ti balye lenperfeksyon e imen ti ankor bezwen fer fas avek lenfliyans Satan ek bann lanz rebel. Rebelyon kont dominasyon Zeova ti rekonmanse pa bokou letan apre. Par egzanp, ayer pti zanfan Noe, Nimrod ti opoz dominasyon Zeova dan en fason pli pir ankor. Nimrod i ganny dekrir konman en “gran saser kont Zeova.” I ti konstri bann gran lavil, parey Babel e fer son lekor vin lerwa “dan pei Sinear.” (Zen. 10:8-12) Ki Lerwa eternel ti pou fer anver sa lerwa rebel e son zefor pour anpes Bondye akonpli son plan pour “ranpli later”? Bondye ti sanz langaz bann dimoun, sa ti fer bann sitwayen Nimrod fristre e zot ti eparpiye “lo later antye.” Partou kot zot ti ale, zot ti anmenn zot fo ladorasyon e fason dirize avek zot.—Zen. 11:1-9.
11. Ki mannyer Zeova ti montre ki i ti fidel anver son zanmi Abraam?
11 Menm si en kantite dimoun ti ador bann fo bondye apre Deliz, i ti annan serten zonm fidel ki ti kontinyen onor Zeova. Abraam ti enn sa bann zonm fidel ki ti obei par kit deryer son lavi konfortab dan lavil Our e al reste dan latant pour plizyer lannen. (Zen. 11:31; Ebr. 11:8, 9) Dan sa letan ki Abraam ti pe viv dan latant, souvan i ti antoure avek bann lerwa imen ki ti pe viv dan bann lavil ki ti ganny proteze par bann gran miray. Me pour Abraam ek son fanmir, se Zeova ki ti zot proteksyon. Konsernan proteksyon Zeova konman en papa, en psalmis ti dir: “[Bondye] pa ti les okenn zonm fer zot ditor, i ti reprimann bann lerwa akoz zot.” (Ps. 105:13, 14) Parski Zeova ti fidel anver son zanmi, i ti promet Abraam: “Bann lerwa pou sorti kot ou.”—Zen. 17:6; Zak 2:23.
12. Ki mannyer Zeova ti egzers son souvrennte lo bann Ezipsyen e ki lefe sa ti annan lo son pep?
12 Bondye ti repet Son promes avek Izaak, garson Abraam ek son pti zanfan Zakob ki i ti pou beni zot e ti pou annan bann lerwa dan zot desandans. (Zen. 26:3-5; 35:11) Par kont, avan ki ti pou annan bann lerwa, desandans Zakob ti vin lesklav Lezip. Eski sa ti vedir ki Zeova pa ti pou akonpli son promes oubyen ki i ti’n abandonn son souvrennte lo later? Zanmen! Dan son letan apropriye, Zeova, ti demontre son pouvwar e egzers son souvrennte lo Faraon ki ti antete. Bann Izraelit ki ti dan lesklavaz ti annan lafwa dan Zeova e i ti delivre zot dan en fason ekstraordiner, kot Lanmer Rouz. I evidan ki Zeova ti ankor Souvren Iniversel e konman en papa ki enterese avek son zanfan, i ti servi son gran pwisans pour protez son pep.—Lir Egzod 14:13, 14. *
ZEOVA I VIN LERWA IZRAEL
13, 14. (a) Dan en kantik, ki bann Izraelit ti dir konsernan rwayote Zeova? (b) Ki promes konsernan rwayote, Bondye ti fer avek David?
13 Deswit apre ki Zeova ti delivre bann Izraelit Lezip atraver en mirak zot ti sant en kantik laviktwar pour loue Zeova. Sa kantik i dan Egzod sapit 15 e dan son verse 18 i dir: “Zeova pou diriz konman lerwa pour touzour, wi pour leternite.” Zeova ti vreman vin Lerwa sa nouvo nasyon. (Det. 33:5) Par kont, zot pa ti satisfe pour annan Zeova konman zot Dirizan ki envizib. Apepre 400 an apre ki zot ti’n kit Lezip, zot ti demann Bondye pour donn zot en lerwa imen parey bann nasyon payen ki ti otour zot. (1 Sam. 8:5) Malgre sa, Zeova ti ankor Lerwa, sa ti ganny demontre pandan renny David, dezyenm lerwa imen Izrael.
14 David ti anmenn lars lalyans sakre Zerizalenm. Pandan sa moman zwaye, bann Levit ti sant en kantik louanz ki ti annan en parol remarkab ki ganny rikorde dan 1 Kronik 16:31: “Anonse avek tou bann nasyon: ‘Zeova in vin lerwa!’” En dimoun i kapab demande ‘Vi ki Zeova i Lerwa eternel, ki mannyer i ti vin Lerwa sa letan?’ Zeova i vin Lerwa ler i egzers son dominasyon oubyen ler i servi en serten mwayen pour reprezant li pour en serten letan oubyen dan serten sityasyon spesifik. Sa laspe rwayote Zeova i annan en pli gran sinifikasyon. Avan lanmor David, Zeova ti promet li ki son rwayote ti pou dire pour en letan endefini: “Mon pou sirman etabli ou desandans apre ou; e mon pou solidman etablir son rwayonm.” (2 Sam. 7:12, 13) Sa promes ti ganny akonpli kan sa “desandans” David ti aparet plis ki 1,000 an pli tar. Lekel ki ti sa desandans e kan ki i ti pou vin Lerwa?
ZEOVA I APWENT EN NOUVO LERWA
15, 16. Kan ki Zezi ti ganny swazir konman fitir Lerwa e kan i ti lo later ki laranzman i ti fer pour son dominasyon?
15 Lannen 29 N.L., Zan Batis ti konmans prese ki “Rwayonm Bondye [ti] pros.” (Mat. 3:2) Kan Zan ti batiz Zezi, Zeova ti swazir Zezi konman sa Mesi ki ti’n ganny promet e konman fitir Lerwa Rwayonm Bondye. Zeova ti demontre son lafeksyon konman en papa anver Zezi par sa parol: “Sa mon Garson byenneme, ki donn mwan bokou lazwa.”—Mat. 3:17.
16 Diran son minister Zezi ti glorifye son Papa. (Zan 17:4) I ti fer sa par pres konsernan Rwayonm Bondye. (Lik 4:43) I ti menm ansenny son bann disip pour priye ki sa Rwayonm i vini. (Mat. 6:10) Konman Fitir Lerwa, Zezi ti kapab dir avek son bann opozan: “Rwayonm Bondye i deza parmi zot.” (Lik 17:21) Pli tar, sa zour swar avan son lanmor, Zezi ti fer en lalyans pour en rwayonm avek son bann disip. La, i ti donn serten son bann disip sa loportinite pour vin lerwa ansanm avek li dan Rwayonm Bondye.—Lir Lik 22:28-30.
17. Dan ki fason Zezi ti konmans egzers son rwayote dan premye syek, me kwa ki i ti pou bezwen espere?
17 Kan ki Zezi ti pou konmans rennyen konman Lerwa dan Rwayonm Bondye? I pa ti kapab fer sa deswit parski son lannmen apremidi Zezi ti ganny met a mor e son bann disip ti disperse. (Zan 16:32) Par kont, Zeova ti ankor an kontrol tou keksoz parey dan lepase. Trwa zour pli tar, i ti resisit son Garson e zour Lapannkot lannen 33 N.L., Zezi ti etabli en rwayonm spirityel pour diriz kongregasyon bann Kretyen swazir. (Kol. 1:13) Kantmenm sa, konman sa “desandans” ki ti’n ganny promet, Zezi ti pou bezwen espere pour ki i kapab annan kontrol total lo later antye. Zeova ti dir son Garson: “Asiz lo mon kote drwat ziska ki mon fer ou bann lennmi vin en marspye pour ou lipye.”—Ps. 110:1.
ADOR LERWA ETERNEL
18, 19. Ki nou ganny motive pour fer e ki nou pou aprann dan lartik ki swiv?
18 Pour plizyer milener, rwayote Zeova in ganny opoze dan lesyel e lo later. Zeova pa’n zanmen abandonn son rol konman Souvren e i’n toultan annan kontrol. Konman en Papa ranpli avek lanmour, i ti protez e pran swen avek son bann sitwayen fidel parey Noe, Abraam ek David. Pa sa i pous nou pour soumet avek nou Lerwa e vin pli pros li?
19 Me aprezan nou kapab demande: Ki mannyer Zeova in vin Lerwa dan nou letan? Ki mannyer nou kapab montre ki nou bann sitwayen fidel Rwayonm Zeova e vin bann zanfan parfe dan son fanmir iniversel? Ki i vedir kan nou priye pour Rwayonm Bondye vini? Nou pou reponn sa bann kestyon dan lartik ki swiv.
[Not anba lo paz]
^ par. 4 Zenez 2:15-17: “15 Alor Zeova ti pran sa zonm e met li dan zarden Edenn pour li kiltiv later e pran swen avek sa zarden. 16 Zeova ti donn zonm sa komannman: ‘Fri dan tou pye dibwa sa zarden ou kapab manze ziska ou rasazye. 17 Me an sa ki konsern sa pye konnesans bon e move ou pa devret manze, parski sa zour ki ou manz son fri, sirman ou pou mor.’”
^ par. 6 Zenez 3:15: “Mon pou met en laenn ant ou ek sa madanm, ant ou desandans ek son desandans. I pou kraz ou latet e ou pou kraz son talon.”
^ par. 12 Egzod 14:13, 14: “13 Apre Moiz ti dir lepep: ‘Pa bezwen per. Tenir ferm e vwar delivrans ki Zeova pou realize pour zot ozordi. Parski bann Ezipsyen ki zot vwar ozordi, zot pa pou vwar zot ankor, non, zanmen ankor.’ 14 Zeova pou lager pour zot, e zot, zot pou reste trankil.”
[Kestyon]
[Tablo lo paz 10]
Zeova in toultan egzers son rwayote (Vwar paragraf 6, 8, 10, 12, 17)
Zarden Edenn
Deliz dan letan Noe 2370 A.N.L.
Latour Babel 2269 A.N.L.
Lanmer Rouz 1513 A.N.L.
Zezi i ganny resisite 33 N.L.
