En kanpanny byen organize in anmenn bon rezilta

María Isabel i en zenn proklanmater byen devoue ki reste dan lavil San Bernardo, Sili, en pei Sid Lanmerik. Li ek son fanmir, zot bann Mapuche. Sa fanmir antye in siport avek bokou lantouzyasm zefor ki ganny fer pour form en nouvo kongregasyon ki koz langaz Mapuche, ki osi ganny apele Mapudungun.

Kan i ti ganny anonse ki Memoryal lanmor Kris ti pou osi ganny fer an Mapudungun e ki 2,000 lenvitasyon Memoryal dan sa langaz ti disponib pour distribisyon, María Isabel ti reflesir bokou. Ki i ti kapab fer pour ede? I ti rapel leksperyans lezot zenn Temwen ki ti ganny bon rezilta letan ki zot ti pres avek zot kanmarad lekol ek ansenyan. I ti koz avek son paran lo la e ansanm zot ti mazinen ki i ti pou pli bon ki María Isabel i mazin en plan pour distribye sa bann lenvitasyon kot lekol. Ki ti son plan?

Premyerman, María Isabel ti demann ladministrasyon lekol permisyon pour li met en lenvitasyon kot larantre lekol. Ladministrasyon lekol ti aksepte sa demann e felisit li pour sa linisyativ. En zour bomaten, direkter sa lekol ti menm dir tou manrmay konsernan sa lenvitasyon lo spiker.

Apre sa, María Isabel ti demann permisyon pour vizit tou laklas. Enn fwa ki bann ansenyan ti’n donn li permisyon, i ti demande si dan sak laklas i annan zelev ki Mapuche. I ti dir: “Mon ti krwar ki i ti annan apepre 10 ouswa 15 zelev ki sorti dan fanmir Mapuche, me i ti annan plis ki sa. Finalman, mon ti donn 150 lenvitasyon!”

“I TI PE EKSPEKTE EN DIMOUN PLI AZE KI SA”

En madanm ki ti vwar sa lenvitasyon kot larantre lekol ti demande avek lekel i kapab koze pour sa levennman. I pa ti oule krwar ler i ti ganny anvoye kot en fiy 10-z-an. María Isabel ti dir avek en sourir: “I ti pe ekspekte en dimoun pli aze ki sa.” Apre ki i ti donn sa madanm en lenvitasyon ek en pti leksplikasyon, María Isabel ti demann sa madanm son ladres pour ki li ek son paran i vizit li pour koz ankor plis avek li lo Rwayonm Bondye. Sa 20 proklanmater ki pres dan teritwar Mapudungun ti vreman kontan pour vwar sa madanm ensi ki 26 lezot dimoun enterese asiste Memoryal. La prezan, sa group in vin en kongregasyon ki pe byen progrese.

Nenport ki laz ou annan, eski ou ti a kapab fer parey pour envit ou bann kanmarad lekol ouswa koleg travay pour Memoryal, en diskour ouswa lasanble distrik? Akoz ou pa fer resers dan nou bann piblikasyon e lir bann leksperyans ki kapab donn ou bann lide lo konman pour reisi en proze koumsa? An plis ki sa, priy Zeova pour ganny son lespri sen pour ed ou annan sa kouraz pour koz lo li avek lezot. (Lik 11:13) Si ou fer sa, ou osi ou kapab sirprann e ganny bann rezilta vreman ankourazan pour zefor ki ou fer pour ou kanpanny byen organize.

[Portre lo paz 32]