Ki savedir kontan nou Prosen?

“Kontan ou prosen parey ou kontan ou prop lekor.”—MATYE 22:39.

1. Konman nou kapab montre nou lanmour pour Bondye?

KI ZEOVA i ekspekte avek bann ki ador li? An bref, Zezi i servi detrwa mo senp me profon pour reponn sa kestyon. I ti dir ki pli gran komannman i ki nou devret kontan Zeova avek tou nou leker, tou nou nanm, nou lespri ek lafors. (Matye 22:37; Mark 12:30) Parey nou ti vwar dan lartik avan, lanmour pour Bondye i enplik obei li e swiv son bann komannman, e sa i fason pour eksprim nou lapresyasyon anver sa lanmour ki i’n demontre pour nou. Pour bann ki kontan Bondye, i pa en fardo pour fer son lavolonte, okontrer i en plezir pour zot.—Psonm 40:8; 1 Zan 5:2, 3.

2, 3. Akoz nou devret egzamin sa komannman pour kontan nou prosen, e ki kestyon ki ganny souleve?

² Zezi ti dir ki sa dezyenm pli gran komannman i relye avek sa enn premye: “Kontan ou prosen parey ou kontan ou prop lekor.” (Matye 22:39) Aprezan nou pou konsantre lo sa komannman, e i vo lapenn egzamin li. Dan sa lepok ki nou pe viv ladan ozordi, i ranpli avek en kalite lanmour ki pa sa vre lanmour e ki egois. Kan i ti ganny enspire pour dekrir bann “dernyen zour,” zapot Pol ti ekrir ki dimoun ti pou kontan zot prop lekor, olye zot kanmarad, zot ti pou kontan larzan ek plezir. Bokou ti pou napa sa [“lafeksyon natirel” NW] oubyen parey en lot versyon Labib i dir, zot ti pou “napa sa lafeksyon normal pour zot fanmiy.” (2 Timote 3:1-4) Zezi Kri ti predir ki “en kantite . . . pou trai e ay kanmarad. . . . Lanmour en pli gran kantite dimoun pou diminyen.”—Matye 24:10, 12.

³ Remarke ki Zezi pa ti dir ki lanmour tou dimoun ti pou diminyen. I’n toultan egziste e i pou toultan annan sa bann ki demontre sa kalite lanmour ki Zeova i ekspekte e merite gannyen. Bann ki vreman kontan Zeova  pou fer bokou zefor pour vwar lezot parey Zeova i vwar zot. Me lekel nou prosen ki nou bezwen kontan? Konman nou devret demontre lanmour anver nou prosen? Labib i kapab ed nou reponn sa bann kestyon enportan.

Lekel mon Prosen?

4. Dapre Levitik sapit 19, anver ki bann Zwif ti bezwen demontre lanmour?

⁴ Kan Zezi ti dir sa Farizyen ki sa dezyenm pli gran komannman i, kontan nou prosen parey nou kontan nou prop lekor, i ti pe refer avek en lalwa spesifik ki bann Izraelit ti gannyen. E sa i trouve dan Levitik 19:18. Dan sa menm sapit, Bondye ti demann bann Zwif pour konsider tou dimoun konman zot prosen, pa zis zot bann kanmarad Zwif. Verse 34 i dir: “En rezidan etranze ki pe reste ansanm avek zot, i bezwen ganny konsidere konman en sitwayen parey zot menm, e zot bezwen kontan li parey zot kontan zot prop lekor, akoz zot osi zot ti bann rezidan etranze dan pei Lezip.” Anfet, menm bann ki pa ti Zwif, sirtou bann ti’n konverti dan larelizyon Zwif, ti pou bezwen ganny trete avek lanmour.

5. Konman bann Zwif ti konpran sa nide pour kontan zot prosen?

⁵ Bann sef relizye Zwif dan letan Zezi ti get keksoz dan en lot fason. Serten ti ansennyen ki zis bann Zwif ki ti zot “zanmi” ek “prosen.” Zot ti ay bann ki pa ti Zwif. Sa bann ansennyan ti dir ki bann ki ador Bondye i devret deteste bann ki pa servi Bondye. Dapre en liv ki koz lo sa size, i dir ki “dan en tel lanvironnman i ti vreman fasil pour laenn devlope. I ti annan en kantite keksoz pour promot laenn.”

6. Ki sa de keksoz Zezi ti fer resorti ler i ti pe koz lo lanmour pour nou prosen?

⁶ Dan son sermon lo montanny Zezi ti koz lo sa size, i ti montre lekel ki devret ganny trete avek lanmour. I ti dir: “Zot in tande ki i’n ganny dir: ‘Kontan zot zanmi e ay zot lennmi.’ Me mwan mon dir zot: kontan zot lennmi e priy pour bann ki persekit zot, koumsa, zot a vin garson zot Papa ki dan lesyel. Akoz i fer leve son soley lo bann ki move parey lo bann ki bon, e i fer tonbe lapli lo bann ki fer dibyen parey lo bann ki fer dimal.” (Matye 5:43-45) Zezi ti fer resorti de keksoz. Premyerman, Zeova i zenere e zantiy anver dimoun ki bon e osi anver sa ki move. Dezyenmman, nou devret swiv son legzanp.

7. Ki leson nou tire dan sa parabol bon Samariten?

⁷ En lot fwa, en Zwif ki ti annan en bon konnesans lo Lalwa ti demann Zezi: “Lekel mon prosen?” Pour reponn li, Zezi ti rakont en parabol kot en Samariten ti vwar en zonm, en Zwif, ki bann voler ti’n bat li e pran tou sa ki i ti annan avek li. Menm si an zeneral bann Zwif pa ti kontan bann Samariten, sa Samariten ti bann son blesir e anmenn li dan en lotel, kot i ti pou kapab rekipere. Ki leson nou tire ladan? Nou demontre lanmour pour nou prosen pa zis anver sa bann ki menm ras, nasyonalite ek larelizyon avek nou, me i al pli lwen ki sa.—Lik 10:25, 29, 30, 33-37.

 Ki savedir kontan nou Prosen

8. Dapre Levitik sapit 19, konman lanmour i devret ganny demontre?

⁸ Zis parey lanmour pour Bondye, lanmour pour nou prosen i pa zis en santiman, i enplik aksyon. I ti a byen si nou egzamin en pe plis konteks sa komannman rikorde dan Levitik 19 ki ankouraz pep Bondye pour kontan zot prosen parey zot prop lekor. Dan sa sapit, nou vwar ki bann Izraelit ti bezwen les bann aflize ek rezidan etranze partisip dan rekolt. Ti napa plas pour voler, anbeter ek triker. Zot pa ti devret fer lapliferans dan bann ka zidisyer. Menm si zot ti bezwen reprimann lezot kan ti neseser, zot ti ganny dir dan en fason presi: “Ou pa devret ay ou frer dan ou leker.” Sa ansanm avek lezot komannman ti ganny rezimen dan sa parol: “Ou devret kontan ou kanmarad parey ou kontan ou prop lekor.”—Levitik 19:9-11, 15, 17, 18.

9. Akoz Zeova ti komann bann Izraelit pour reste separe avek lezot nasyon?

⁹ Menm si bann Izraelit ti bezwen demontre lanmour anver lezot, zot ti bezwen reste separe avek sa bann ki ti ador fo bondye. Zeova ti averti zot kont danze ek konsekans move lasosyasyon. Par egzanp, konsernan bann nasyon ki bann Izraelit ti pou pran an posesyon, Zeova ti komann zot: “Ou pa devret form en lalyans maryaz avek zot. Ou fiy, ou pa devret donn son garson, e son fiy, ou pa devret pran pour ou garson. Akoz i pou fer ou garson aret swiv mwan, e sirman zot pou servi lezot bondye; e lakoler Zeova pou monte kont zot.”—Deterononm 7:3, 4.

10. Ki nou bezwen veye?

¹⁰ Pareyman ozordi, bann Kretyen i evite vin pros avek sa bann ki kapab fer zot lafwa vin feb. (1 Korentyen 15:33) Nou ganny averti: “Pa bezwen asosye zot avek bann non-krwaryan,” sa bann ki pa form parti kongregasyon Kretyen. (2 Korentyen 6:14) Deplis, Kretyen i ganny ankouraze pour marye “selon Senyer.” (1 Korentyen 7:39) Me kantmenm sa, nou pa devret zanmen deteste sa bann ki napa en relasyon avek Zeova parey nou. Kris in mor pour bann peser, e en kantite dimoun ki ti fer sa ki mal avan sa ti sanz zot lavi e rekonsilye avek Bondye.—Romen 5:8; 1 Korentyen 6:9-11.

11. Ki pli bon fason pour demontre nou lanmour anver bann ki pa servi Zeova, e akoz?

¹¹ Pli bon fason pour demontre lanmour anver bann ki pa servi Bondye, i par imit Zeova. Menm si i pa kontan sa ki mal, i demontre labonte leker anver tou dimoun par fer li posib pour zot ganny sa loportinite pour rezet sa ki mal e ganny lavi eternel. (Ezekyel 18:23) Zeova i anvi ki “tou dimoun i arive repanti.” (2 Pyer 3:9) I son lavolonte “ki tou dimoun i ganny sove e ganny konnesans laverite.” (1 Timote 2:4) Se pour sa rezon Zezi ti donn lord son bann disip pour al prese, ansennyen ‘e fer tou pep vin son bann disip.’ (Matye 28:19, 20) Kan nou partisip dan sa travay, nou pe montre nou lanmour pour Bondye ek nou prosen, e menm pour nou lennmi!

Lanmour pour nou bann Frer ek Ser Kretyen

12. Ki zapot Zan ti ekrir konsernan lanmour pour nou frer dan lafwa?

¹² Zapot Pol ti ekrir: “Annou fer dibyen tou dimoun, sirtou nou bann frer dan lafwa.” (Galat 6:10) Konman Kretyen nou anba lobligasyon pour demontre lanmour anver bann ki partaz menm lafwa avek nou, savedir nou bann frer ek ser spirityel. Ki lenportans sa lanmour i annan? Pour montre ki kantite  enportan i enportan, zapot Zan ti ekrir: “Dimoun ki ay son frer i en kriminel . . . Si en dimoun i dir: ‘Mon kontan Bondye’, e i ay son frer, i en manter, parski si en dimoun i ay son frer ki i war, i pa kapab kontan Bondye ki i pa war.” (1 Zan 3:15; 4:20) Sa i bann parol vreman for. Zezi Kri ti apel Satan en “kriminel” ek “manter.” (Zan 8:44) Zanmen nou pou anvi ganny apele dan sa fason!

13. Dan ki fason nou kapab demontre nou lanmour pour nou bann frer ek ser dan lafwa?

¹³ Vre Kretyen i “ganny ansennyen par Bondye pour kontan kanmarad.” (1 Tesalonisyen 4:9) Nou demontre lanmour pa par “bann zoli parol, e zoli diskour, me vreman par nou laksyon” ek laverite. (1 Zan 3:18) Nou lanmour i devret “san lipokrizi.” (Romen 12:9) Lanmour i fer nou vin zantiy, annan konpasyon, pasyans, pardonnen, e i anpes nou zalou, vantar, arogan, oubyen egois. (1 Korentyen 13:4, 5; Efezyen 4:32) Lanmour i pous nou pour “servi kanmarad.” (Galat 5:13) Zezi ti dir son bann disip kontan kanmarad parey i ti kontan zot. (Zan 13:34) Alors, kan i neseser en Kretyen i devret menm pare pour mor pour son bann frer ek ser dan lafwa.

14. Ki mannyer nou kapab demontre lanmour dan lafanmiy?

¹⁴ Lanmour i devret ganny demontre dan en fanmiy Kretyen, sirtou ant msye ek madanm. Sa relasyon maryaz i sitan entim ki Pol ti dir: “Bann zonm devre alor, kontan zot madanm parey zot kontan zot prop lekor.” I ti azoute: “Sa ki kontan son madanm, i kontan son prop lekor.” (Efezyen 5:28) Plitar dan verse 33 nou vwar ki Pol i repet menm konsey. En msye ki kontan son madanm pa pou imit bann Izraelit dan letan Malaki ki ti pe trai zot madanm. (Malaki 2:14) I pou apresye son madanm. I pou kontan li parey Kris ti kontan kongregasyon. Pareyman, lanmour pou pous en madanm pour respe son msye.—Efezyen 5:25, 29-33.

15. Lefe ki serten ti’n vwar sa lanmour Kretyen an aksyon, ki sa ti pous zot pour dir e fer?

¹⁵ I kler ki sa kalite lanmour i en mark pour idantifye vre Kretyen. Zezi ti dir: “Dimoun pou war ki zot mon bann disip si zot kontan kanmarad.” (Zan 13:35) Sa lanmour ki nou annan pour kanmarad i atir dimoun ver sa Bondye ki nou kontan e reprezante. Par egzanp, i annan en leksperyans konsernan en fanmiy Temwen, ki ti ariv Mozanbik. “Nou pa’n zanmen vwar en keksoz koumsa avan. Son apremidi, en tanpet divan ti konmans soufle, swivi par gro lapli ek lagrel. Sa tanpet divan ti detri nou lakaz ki ti’n ganny fer avek zon, e son twa ki ti’n ganny fer avek fey tol ti voltize dan divan. Bann frer sorti dan bann kongregasyon pre avek nou, ti vin donn nou en kou-d-men pour aranz nou lakaz. Nou vwazen ki ti sirprann pour vwar sa ti dir: ‘Ou larelizyon i vreman byen. Zanmen nou’n ganny en tel led avek nou legliz.’ Nou ti ouver Labib e montre zot Zan 13:34, 35. Ozordi, en kantite nou bann vwazen pe etidye Labib.”

Lanmour pour bann Dimoun endividyelman

16. Ki diferans i annan ant kontan en group dimoun, ek kontan en dimoun endividyelman?

¹⁶ I pa difisil pour nou kontan nou vwazen dan en fason kolektif konman en group. Me i kapab difisil pour kontan en dimoun endividyelman. Par egzanp, serten dimoun i demontre lanmour pour zot prosen zis par fer en donasyon  avek serten lorganizasyon saritab. I aret la, i pa al pli lwen ki sa. Anfet, i pli fasil pour dir ki nou kontan nou prosen ki pour kontan en koleg travay ki paret pa fatig li avek nou, en dimoun brit ki reste obor nou, oubyen en zanmi ki dezapwent nou.

17, 18. Konman Zezi ti demontre son lanmour pour bann dimoun endividyelman, e kwa ki ti pous li pour fer sa?

¹⁷ An rapor avek lanmour pour bann dimoun endividyelman, nou kapab aprann avek Zezi, sa enn ki reflekte bann kalite Bondye parfetman. Menm si i ti vin lo later pour efas pese lemonn, i ti montre lanmour anver bann dimoun endividyelman, par egzanp en madanm malad, en lepre ek en zanfan. (Matye 9:20-22; Mark 1:40-42; 7:26, 29, 30; Zan 1:29) Pareyman nou montre ki nou kontan nou prosen par lafason ki nou azir anver bann dimoun ki nou zwenn dan lavi toulezour.

¹⁸ Nou pa devret zanmen oubliye ki lanmour pour nou prosen i relye avek nou lanmour pour Bondye. Menm si Zezi ti ed bann pov, geri bann malad, nouri bann ki ti lafen, e ansenny bann lafoul, i ti fer tousala akoz i ti anvi ed dimoun pour rekonsilye avek Zeova. (2 Korentyen 5:19) Zezi ti fer tou keksoz pour glorifye Bondye, i pa ti zanmen oubliye ki i ti reprezant e reflekte sa Bondye ki i kontan. (1 Korentyen 10:31) Par imit legzanp Zezi, nou osi nou kapab montre ki nou senserman kontan nou prosen e anmenmtan reste separe avek sa lemonn mesan.

Konman nou kontan nou Prosen parey nou menm?

19, 20. Ki savedir kontan nou prosen parey nou prop lekor?

¹⁹ Zezi ti dir: “Kontan ou prosen parey ou kontan ou prop lekor.” I normal pour nou enterese avek nou lekor, e dan en fason rezonnab respekte nou lekor. Si sa pa ti normal sa komannman pa ti pou sitan enportan. Sa lanmour apropriye ki nou annan pour nou lekor pa devret ganny konfonn avek sa lanmour egois ki zapot Pol ti mansyonnen dan 2 Timote 3:2. Okontrer i en valer rezonnab ki nou atase avek nou lekor. En spesyalis Labib i dekrir li konman “en lanmour balanse ki nou annan pour nou lekor ki pa egzazere, parey dir: ‘Mon en bondye,’ oubyen ki toultan pe abes son lekor, par dir: ‘Mon en bon nanryen.’”

²⁰ Pour ki nou kapab kontan lezot parey nou kontan nou prop lekor, nou pou bezwen vwar lezot parey nou nou ti a kontan lezot i vwar nou, e tret lezot parey nou ti a kontan ganny trete. Zezi ti dir: “Fer pour lezot sa ki ou oule lezot i fer pour ou.” (Matye 7:12) Remarke ki Zezi pa ti dir nou konsantre lo sa ki lezot in fer nou dan lepase, e esey fer menm parey anver zot. Okontrer, nou bezwen reflesir konman nou ti a kontan lezot i tret nou, e apre azir dan menm fason anver lezot. E osi remarke ki Zezi pa ti pe aplik sa parol zis an relasyon avek nou bann zanmi, frer ek ser ki annan menm krwayans avek nou. I ti servi sa mo “lezot,” petet pour montre ki nou devret azir dan sa fason anver tou dimoun ki nou zwenn.

21. Ki nou pe demontre kan nou eksprim nou lanmour pour lezot?

 ²¹ Kan nou kontan nou prosen, sa pou anpes nou fer sa ki mal. Zapot Pol ti ekrir: “Konmannman ki dir, ‘Pa fer adilter, pa fer krim, pa vole, pa konvwate.’ . . . Ler nou kontan nou prosen nou pe akonpli lalwa konpletman.” (Romen 13:9, 10) Lanmour pou pous nou pour rod fason pour fer sa ki byen anver lezot. Kan nou kontan tou dimoun, nou pe demontre ki nou osi kontan Zeova, sa enn ki’n kree imen dan Son resanblans.—Zenez 1:26.

Ki ou pou reponn?

• Anver lekel ki nou devret demontre lanmour, e akoz?

• Ki mannyer nou kapab demontre nou lanmour anver sa bann ki pa servi Zeova?

• Konman Labib i dekrir sa lanmour ki nou devret annan pour nou bann frer ek ser spirityel?

• Ki savedir kontan nou prosen parey nou prop lekor?

[Kestyon]

[Portre lo paz 24]

“Lekel mon prosen?”

[Portre lo paz 27]

Zezi ti osi demontre son lanmour anver bann dimoun endividyelman