Konsey bann “Eksper”

SI OU tip sa mo “paran” oubyen “konsey” dan en progranm resers popiler lo Internet, deswit ou pou vwar plis ki 26 milyon referans aparet. Me si ou pran zis en minit pour rod e lir sak referans, ou zanfan pou ganny letan grandi e kit lakour avan ki ou kapab fini lir sa bann konsey.

Kote paran ti ale pour ganny konsey lontan, avan psikolog zanfan ek Internet ti egziste? Laplipar zot ti rod konsey avek fanmiy. Manman, papa, tantin, ek tonton ti pare e zot ti kapab ofer gidans, led finansyel, e menm vey zanfan. Me dan bokou pei konmela, dimoun i kit zot vilaz e al reste dan lavil. Sa i fer ki bann fanmiy nepli pros parey avan. Byen souvan, bann manman ek papa i vwar zot pe lite pour elve zot zanfan zot tousel.

San dout, sa i en rezon akoz en sel kou nou’n vwar laparisyon bann biznes en pe partou ki ofer servis vey zanfan. En lot rezon i sa konfyans ki dimoun partou pe mete dan lasyans. Ver lafen bann lannen 1800, lepep Ameriken ti deza konvenki ki lasyans i kapab amelyor tou laspe lavi en dimoun. Akoz i pa ava amelyor lafason ki nou elve zanfan osi? Alors an 1899, dek ki Kongre Nasyonal bann Manman Ameriken ti eksprim zot sagrinasyon lo “lenkonpetans bann paran,” en kantite “eksper syantifik” ti aparet lo lasenn. Zot ti promet pour ed bann manman ek papa ki pe lite pour elve byen zot zanfan.

Konsey dan bann Liv

Me ki sa bann eksper in akonpli? Eski bann paran ozordi i annan mwens traka e pli byen ekipe pour elve zot zanfan ki bann paran avan? Pa dapre en serve ki’n fek fer Langleter. Sa serve i montre ki apepre 35 poursan paran ki annan pti zanfan, i ankor pe rod konsey ki zot kapab met konfyans ladan. Lezot i santi ki zot napa swa, zot bezwen zis ekout zot santiman.

Dan son liv Raising America: Experts, Parents, and a Century of Advice About Children, Ann Hulbert i tras listwar bann liv lo konman elve zanfan ekrir par bann profesyonnel. Hulbert, ki li menm i en manman de zanfan, i fer resorti ki parmi lenformasyon ki sa bann eksper in donnen, zis en pti gin ladan ki’n ganny prouve dapre lasyans. Anfet, i paret ki zot konsey in ganny enfliyanse par zot prop leksperyans dan lavi olye par bann fe. Ler ou reflesir lo la, i paret sa ki zot ti ekrir ti alamod sa letan, ti kontradiktwar, e parfwa byen drol.

Alors ki sitiasyon bann paran ozordi? Pour dir laverite, bokou i konfize. Zot bezwen fer fas avek plis konsey, plis lopinyon, ek deba kontrovers ki zanmen oparavan. Me pa tou paran ki santi zot totalman konfize. I annan bann paran en pe partou dan lemonn ki pe benefisye avek en sours lasazes ki ti la depi byen lontan. Parey lartik swivan pou montre, nou ankor touzour kapab met nou konfyans dan sa bann konsey ki sorti ladan.