Ou kapab viv pour touzour

LAPLIPAR dimoun sorti dan diferan larelizyon ozordi, i annan sa lespwar pour ganny lavi eternel dan en fason ou en lot. Sak larelizyon i kapab annan son prop versyon, me zot annan menm lespwar. Se pour viv ere dan en lemonn parfe kot lanmor in disparet. Eski sanmenm sa ki ou osi ou ti a kontan? Akoz en kantite dimoun i krwar ladan? Eski vreman en zour lavi eternel pou egziste?

Labib i fer resorti ki depi okonmansman Bondye in met sa lanvi dan imen pour viv eternelman, depi ler i ti kree premye koup imen. Labib i dir: ‘Pour viv pour en letan endefini Bondye in met dan zot leker.’—Eklezyast 3:11.

Pour ki sa lanvi dan zot i vin vre, Adan ek Ev ti pou bezwen aksepte lotorite Bondye, zot ti pou bezwen les li deside kwa ki byen ek mal pour zot. Si zot ti’n fer sa, Zeova ti pou vwar ki zot merite viv “pour en letan endefini” dan sa landrwa ki i ti’n prepare pour zot, dan zarden Edenn.—Zenez 2:8; 3:22.

Laport Lavi eternel i fermen

Labib i fer resorti ki Bondye ti plant dan zarden en “pye konnesans bon e move.” I ti defann Adan ek Ev manz fri sa pye dibwa, akoz si zot ti fer sa zot ti pou mor. (Zenez 2:9, 17) Si zot ti obeir sa komannman, sa ti pou montre ki zot aksepte lotorite Bondye. E si zot ti fer lekontrer sa ti pou montre ki zot rezet son lotorite. Adan ek Ev ti dezobei Zeova e zot ti pran kote avek Satan, en lanz ki ti rebel kont lotorite Zeova. Finalman, Bondye ti deside ki zot pa ti pou kapab ganny lavi eternel.—Zenez 3:1-6.

Bondye ti’n ofer zot lavi ouswa lanmor, pour reste vivan oubyen pour nepli viv. Rezilta dezobeisans ti lanmor, savedir zot ti pou nepli egziste pour touzour. I ti enposib pour zot ouswa zot desandans kontinyen viv par mwayen en pouvwar mazik oubyen en nanm imortel. *

Tou desandans Adan ti soufer akoz son rebelyon. Zapot Pol i eksplik son konsekans. I ti ekrir: “Pese in antre dan lemonn par en sel zonm, e pese in anmenn lanmor, e lanmor in pas avek tou dimoun, parski tou dimoun in konmet pese.”—Romen 5:12.

Laport Lavi eternel i ouver

Zapot Pol ti konpar sitiasyon bann desandans Adan avek en lesklav dan premye syek. Akoz zot ti’n erit pese, otomatikman bann zanfan Adan ti ne konman bann “lesklav pese,” e finalman zot ti mor. (Romen 5:12; 6:16, 17) Si Zeova pa ti’n fer en laranzman legal pour liber bann zanfan Adan anba sa lesklavaz, zot ti pou napa okenn lavenir. Pol ti eksplike: “Par pese en sel zonm [Adan] tou dimoun in ganny kondannen, demenm par laksyon zis en sel zonm Bondye in akit e donn lavi tou dimoun.” Sa “laksyon zis” ti fer li neseser ki Zezi i sakrifye son lavi parfe, konman en pri oubyen ranson ki kapab donn lavi tou dimoun. Zeova ti rekonnet sa valer legal, ki sa sakrifis i annan pour sov imen dan sa ‘zizman kondannasyon.’—Romen 5:16, 18, 19; 1 Timote 2:5, 6.

Se pour sa rezon bann syantis pa pou zanmen kapab anpes dimoun mor, par fouy dan kod zenetik imen. Larepons i ganny trouve dan en lot landrwa. Dapre Labib, lakoz prensipal lanmor imen in annan pour fer avek en problenm moral oubyen legal, me pa avek nou lekor imen. Alors, pour kapab redonn lavi  eternel, sakrifis Zezi ti bezwen legal. Sa sakrifis i donn levidans ki Bondye i drwat e ki i annan labonte leker. Lekel alors ki pou benefisye avek sa sakrifis e ganny lavi eternel?

Sa Kado pour pa mor ditou

Zeova i egziste “depi en letan endefini ziska en letan endefini.” I pa kapab mor. (Psonm 90:2) Sa premye personnaz ki Zeova ti donn sa kado pour pa mor ditou ankor ti Zezi Kri. Zapot Pol i eksplike: “Kris in resisite e ki i pa pou zanmen mor ankor; e pese nepli annan okenn pouvwar lo li.” (Romen 6:9) Kontrerman avek bann dirizan isi lo later, Pol i fer resorti ki zis Zezi ki pa kapab mor. Zezi pou reste vivan ‘pour touzour.’ Son lavi “pa kapab ganny detri.”—Ebre 7:15-17, 23-25; 1 Timote 6:15, 16.

Pa zis Zezi ki pou ganny sa kado. Bann Kretyen ki’n ganny swazir par lespri sen pour dirize konman lerwa dan Rwayonm Bondye, zot osi zot ganny sa menm rezireksyon ki Zezi ti eksperyanse. (Romen 6:5) Zapot Zan i fer nou konpran ki sa kado in ganny donnen avek 144,000 imen. (Revelasyon 14:1) Zot osi zot pa kapab mor. Pol ti koz lo zot rezireksyon, i ti dir: ‘Laser ek disan pa kapab erit Rwayonm Bondye . . . Tronpet pou soufle e bann mor pou resisite imortel, e nou pou ganny transformen. Fodre ki sa lekor mortel i vin imortel, e sa ki devre pouri i a vin en natir ki enposib pouri.’ Lanmor napa pouvwar lo sa bann ki pou ganny sa kalite rezireksyon.—1 Korentyen 15:50-53; Revelasyon 20:6.

Pa i remarkab sa ki Bondye in fer nou konnen! Menm bann lanz, ki bann lespri, pa’n ganny kree avek sa posibilite pour pa mor ditou. Laprev, se ki sa bann lanz ki ti zwenn Satan dan son rebelyon pou ganny detri. (Matye 25:41) De lot kote, sa bann ki pou dirize avek Kris i ganny sa kado pour pa mor ditou. Sa i laprev ki Zeova i antyerman annan konfyans dan zot.

Eski sa i vedir ki zis 144,000 imen ki pou reste pour touzour konpare avek sa plizyer bilyon dimoun ki egziste? Non. Annou vwar akoz?

Lavi eternel dan Paradi lo Later

Dernyen liv dan Labib, Revelasyon, i montre nou en zoli portre kot nou vwar en gran lafoul dimoun ki’n ganny sa posibilite pour viv pour touzour dan paradi lo later. Parmi sa gran lafoul, i osi annan sa bann ki ti’n mor, me ki’n resisite e ki’n retourn zenn, zot annan tou zot lafors ek en bon lasante. (Revelasyon 7:9; 20:12, 13; 21:3, 4) Zot ganny anmennen ver en “larivyer delo lavi, ki ti kler konman kristal, sorti kot tronn Bondye.” Lo bor sa larivyer i annan bann ‘pye dibwa lavi. . . . Fey sa bann pye dibwa pou servi pour gerizon tou bann nasyon.’ Avek lanmour, Zeova i lans en lapel: “‘Vini!’ Ki sa ki swaf i vini, e ki sa ki anvi, i pran delo lavi gratwitman!”—Revelasyon 22:1, 2, 17.

Sa bann pye dibwa ek delo i pa bann keksoz mirakile oubyen delo ki fer vin zenn parey serten syantis ek serser ti pe rode plizyer syek pase. Okontrer, zot reprezant sa provizyon ki Bondye in fer par mwayen Zezi Kri pour fer imen retourn dan sa kondisyon parfe parey i ti ete okonmansman.

Plan Bondye pour fer imen obeisan viv pour touzour lo later pa’n sanze. Son plan pou ganny akonpli, akoz Zeova i en Bondye fidel. Psonm 37:29 i dir: “Bann dimoun drwat pou posed later, e zot pou reste lo la pour touzour.” Sa promes i pous nou, ansanm avek sa bann ki pou ganny lavi imortel dan lesyel pour dir: “Senyer Bondye Toupisan! Ou travay i gran e merveye. Lerwa bann nasyon! Tou ou bann plan i zis e vre. Senyer, lekel ki pa pou respekte ou? Lekel ki pou refize rann ou glwar? Zis ou tousel ki sen.”—Revelasyon 15:3, 4.

Eski ou ti a kontan ganny sa kado presye, lavi eternel? Si wi, ou bezwen fidel e obeir sa “Lerwa bann nasyon.” Ou bezwen aprann konn Zeova ek sa enn ki’n fer li posib pour nou ganny lavi eternel, Zezi Kri. Tou sa bann ki aksepte standar Bondye konsernan sa ki byen ek mal pou ganny sa kado “lavi eternel.”—Zan 17:3.

[Not anba lo paz]