Eski ou parey Pye Lagani Auna?

DE TEMWEN Zeova lo lakot por Moresby, Papua New Guinea, ti pe retourn kot zot apre predikasyon. Anmezir ki zot ti pe marse, zot ti vwar en zoli pye dibwa. Sa enn pli vye ti dir: “Get sa pye Lagani Auna!” Apre i ti dir ki non sa pye dibwa i vedir en pye ki fleri tou le zan. Kontrerman avek lezot pye dibwa dan bann pei tropikal, tou le zan tou son fey i tonbe e ler ou get li i paret en pye dibwa ki’n mor. Me kan lapli i konmans tonbe, i repran, i fleri e pour ankor enn fwa i les tou dimoun vwar son labote.”

Nou kapab aprann en leson avek pye Lagani Auna oubyen pye flanbwayan. Dapre serten eksper, pye flanbwayan in ganny klasifye parmi sa senk pye dibwa ki fleri pli zoli fler dan lemonn. Menm si dan letan sek i napa ni fler ek fey, pye flanbwayan i kapab prezerv delo. Son rasin i for, e i kapab pous toultour bann ros ki’n byen anfonse dan later. Sa i permet li reste debout menm si i annan gro divan. An bref, i kapab fer fas avek bann sitiasyon difisil.

Nou osi nou kapab trouv nou dan bann sitiasyon ki kapab teste si nou lafwa i vreman solid. Kwa ki pou ed nou andire? Zis parey pye flanbwayan, dan en sans nou kapab bwar e prezerv sa delo ki donn lavi, ki sorti dan Parol Bondye. Nou devret reste atase avek ‘nou ros,’ Zeova, e osi byen avek son lorganizasyon. (2 Samyel 22:3) Vreman pye flanbwayan i en bon rapel pour nou, ki menm si nou pe viv dan en move lantouraz, nou kapab reste for spirityelman e zoli, si nou profit omaksimonm tou provizyon ki Zeova i fourni. E kan nou fer sa, nou pou “erit bann promes” ki Bondye in fer, enn parmi i lavi eternel.—Ebre 6:12; Revelasyon 21:4.