Zot partaz bon Nouvel avek bann Sourd

“ZOT anmenn keksoz spirityel pour nou.” Sa i fason ki direkter en lenstitisyon pour bann dimoun aze Navalcarnero, Madrid, Lespanny, ti resaman dekrir vizit bann Temwen Zeova kot son sant. Kwa ki ti fer li dir sa?

Detrwa rezidan dan sant Rosas del Camino i sourd. Me vi ki bann Temwen Zeova in fer zefor pour aprann Langaz Siny Espanyol, zot kapab kominik avek sa bann rezidan. Sa direkter ti koz an byen lo bann Temwen akoz zot donn zot letan pour ansenny keksoz spirityel avek sa bann ki bezwen led pour nanryen. I ti remarke ki lansennyman sa bon nouvel Rwayonm in annan en bon lefe lo bann rezidan. Deplis, bann rezidan zot menm, sirtou bann ki pa kapab vwar oubyen tande i apresye en kantite vizit bann Temwen Zeova.

En rezidan ki aveg e sourd, apele Eulogio, pe aktyelman etidye Labib avek Temwen Zeova. En zour ler letid ti pe deroule, en zonm aze ti aprose e donn sa Temwen en poenm ki bann rezidan in konpoze pour montre zot lapresyasyon. Sa poenm ti annan pour tit “Pour vin en Temwen.” La en ekstre sa poenm: “Zot viv en bon lavi, en lavi byen disiplinen, e Zeova i donn zot lasazes avek lazwa. Zot ale vini kot bann lakour akoz zot met konfyans dan Zeova.”

I egzakteman sa konfyans dan Zeova ki’n fer bokou Temwen partou dan lemonn aprann langaz siny bann dimoun sourd dan zot pei. Dan sa fason zot partaz avek sa bann dimoun sa mesaz lespwar ankourazan ki trouve dan Labib.