“Senyer, montre nou fer Lapriyer”

“Enn son bann disip ti dir li, ‘Senyer, montre nou fer lapriyer.’ ”—LIK 11:1.

1. Akoz enn bann disip Zezi ti demann Zezi pour montre zot fer lapriyer?

EN FWA dan lannen 32 N.L., en disip Zezi ti obzerv Li pe priye. I pa ti kapab tande ki Zezi ti pe dir son Papa, akoz petet Zezi ti pe priy an silans. Me kan Zezi ti fini, sa disip ti dir avek li: “Senyer, montre nou fer lapriyer.” (Lik 11:1) Kwa ki ti fer li demann sa? Lapriyer ti form parti lavi ek ladorasyon en Zwif. Dan Lekritir Ebre i annan plizyer lapriyer trouve dan Psonm oubyen lezot landrwa. Alors, sa disip pa ti pe demann Zezi pour ansenny li en keksoz ki i pa ti konn nanryen lo la oubyen ki i pa ti’n zanmen deza fer. Byensir, i ti familye avek lapriyer formel bann sef relizye Zwif. Me la i ti’n obzerv Zezi pe priye e petet i ti’n santi en gran diferans ant lapriyer ipokrit bann profeser e lafason ki Zezi ti pe priye.—Matye 6:5-8.

2. (a) Kwa ki endike ki Zezi pa ti pe demann nou pour resit sa lapriyer mo pour mo? (b) Akoz nou enterese konnen konman pour priye?

² Apepre 18 mwan avan sa, letan Zezi ti pe donn son sermon lo montanny, i ti’n donn son bann disip en model ki zot kapab baz zot lapriyer lo la. (Matye 6:9-13) I kapab ki sa disip pa ti la sa zour. Alors, Zezi ti zantiman repet bann pwen enportan sa model lapriyer. I kler ki i pa ti repet li mo pour mo. Sa i endike ki i pa ti pe donn en lapriyer pour nou resite parker san konnen ki nou pe dir. (Lik 11:1-4) Parey sa disip ki nou pa konn son non, nou osi nou anvi konnen konman pour priye pour ki nou lapriyer i fer nou vin pli pros avek Zeova. Alor, annou egzamin versyon pli konplet sa model lapriyer, ki’n ganny rikorde par zapot Matye. Sa model lapriyer i demann set keksoz. Trwa ladan i konsernan plan Bondye e kat i konsernan nou bann bezwen materyel e spirityel. Dan sa lartik, nou pou vwar sa trwa premye keksoz.

En Papa Lanmour

3, 4. Letan nou adres Zeova konman “nou Papa,” ki sa i vedir?

³ Pour konmanse, Zezi ti montre ki nou lapriyer i devret reflekte en relasyon pros e anmenmtan respe pour Zeova. Prensipalman pour benefisye son bann disip ki ti’n ralye avek li lo sa montanny, Zezi ti dir zot adres Zeova konman “nou Papa ki dan lesyel.” (Matye 6:9) Dapre en spesyalis Labib, ki swa Zezi ti pe koz en kalite Ebre popiler oubyen Arameen, sa mo ki i ti servi pour “Papa” i zis parey en zanfan ti pou kriy son papa. Adres Zeova konman “nou Papa” i endik sa lafeksyon e konfyans ki nou annan dan li.

⁴ Par dir “nou Papa,” nou osi rekonnet ki  nou form parti en gran fanmiy ki aksepte Zeova konman sa Enn ki donn lavi. (Izai 64:8; Akt 17:24, 28) Bann Kretyen ki’n ganny swazir par lespri sen i bann “garson Bondye” ki i’n adopte, e zot kapab “kriy: ‘Aba! Papa!’ ” (Romen 8:14, 15, nou ki’n met an italik.) Plizyer milyon dimoun in vin zot konpanyon fidel. Zot in dedye zot lavi avek Zeova e senboliz zot dedikasyon par batize dan delo. Tou sa bann ‘lezot mouton’ i kapab apros Zeova onon Zezi e apel Li “nou Papa.” (Zan 10:16; 14:6) Nou kapab toultan apros nou Papa ki dan lesyel dan lapriyer, pour loue li e remersye li pour tou son labonte ki i demontre anver nou. Nou osi konfye li nou bann traka dan lapriyer parski nou konvenki ki i vreman pran swen avek nou.—Filipyen 4:6, 7; 1 Pyer 5:6, 7.

Lanmour pour Non Zeova

5. Ki sa premye keksoz ki sa model lapriyer i demande, e akoz sa i apropriye?

⁵ Premye keksoz ki ganny demande i deswit met sa ki pli enportan dan son plas. I dir: “Ki ou non sen i ganny glorifye.” (Matye 6:9) Wi, glorifye non sen Zeova i devret vin keksoz pli enportan pour nou. Sa se akoz nou kontan li e nou pa kontan vwar tou sa bann repros ki zot in mete lo son non. Letan Satan ti rebele e enfliyans sa premye koup imen pour dezobei Zeova, i ti sali Son non par kestyonn lafason ki Bondye i diriz liniver. (Zenez 3:1-6) Depi sa, bann ki dir zot reprezant Bondye in fer e ansenny bann keksoz ki anmenn laont e repros lo son non.

6. Ki nou pa pou fer si nou priye ki non sen Zeova i ganny glorifye?

⁶ Letan nou priye ki non sen Zeova i ganny glorifye, sa i montre nou pozisyon an rapor avek drwa Zeova pour diriz liniver. Nou montre ki nou donn li tou nou sipor pour diriz liniver. Zeova i anvi liniver ganny abite par bann lanz ek imen ki pare pour soumet avek son dominasyon drwat e fer li avek lazwa akoz zot kontan li e kontan tou sa ki son non i reprezante. (1 Kronik 29:10-13; Psonm 8:1; 148:13) Nou lanmour pour non Zeova pou ed nou pour pa fer okenn keksoz ki ti a kapab anmenn repros lo sa non sen. (Ezekyel 36:20, 21; Romen 2:21-24) Lape liniver ek son bann zabitan i depan lo glorifye non sen Zeova e soumet anba son dominasyon avek lanmour. Alors, letan nou priye “ki ou non sen i ganny glorifye,” nou pe eksprim nou konfyans ki plan Zeova pou ganny akonpli e sa pou loue li.—Ezekyel 38:23.

Sa Rwayonm ki nou priy lo la

7, 8. (a) Ki sa Rwayonm ki Zezi in ansenny nou pour priye? (b) Ki nou aprann konsernan sa Rwayonm dan liv Danyel ek Revelasyon?

⁷ Dezyenm keksoz ki ganny demande  dan model lapriyer i: “Ki ou Renny [oubyen Rwayonm] i ganny etabli.” (Matye 6:10) Sa demann i relye etrwatman avek sa enn premye. Lenstriman ki Zeova pou servi pour glorifye son non sen se son Rwayonm. Setadir son gouvernman dan lesyel, dan ki son Garson Zezi Kri in ganny apwente konman Lerwa dan en letan fikse. (Psonm 2:1-9) Profesi Danyel i dekrir Rwayonm Mesi konman “en ros” ki’n ganny detase avek en “montanny.” (Danyel 2:34, 35, 44, 45) Sa montanny i reprezant drwa Zeova pour diriz liniver. Alors, sa ros ki reprezant Rwayonm i en nouvo fason ki Zeova i egzers son dominasyon iniversel. Apre, sa ros dan sa profesi i ‘vin en gro montanny e i ranpli later antye.’ Sa pe endike ki sa Rwayonm Mesyanik pou reprezant lotorite siprenm Bondye letan i renny lo later.

⁸ Dan sa Rwayonm, i annan ankor 144,000 lezot ki pou dirize konman lerwa ek pret ansanm avek Kris. Zot in ganny swazir parmi bann imen lo later. (Revelasyon 5:9, 10; 14:1-4; 20:6) Danyel i apel sa bann dimoun “bann sen” Bondye Tre O ki ansanm avek Kris konman zot Sef, zot resevwar “rwayonm, dominasyon, ek grander bann rwayonm anba lesyel . . . Zot rwayonm i en rwayonm ki dir pour letan endefini, e tou dominasyon pou servi e obeir zot.” (Danyel 7:13, 14, 18, 27) Sa i byen dekrir sa gouvernman seles ki Kris in ansenny son bann disip pour priye.

Akoz bezwen kontinyen priye ki sa Rwayonm i ganny etabli?

9. Akoz i apropriye pour nou priye ki Rwayonm Bondye i ganny etabli?

⁹ Dan son model lapriyer, Kris ti ansenny nou pour priye ki Rwayonm Bondye i ganny etabli. Lakonplisman bann profesi Labib i endike ki Rwayonm Mesi ti ganny etabli dan lesyel an 1914. * Alor, eski i apropriye pour nou kontinyen priye ki sa Rwayonm i ganny “etabli”? Definitivman. Dan profesi Danyel, sa Rwayonm Mesyanik ki sa ros i reprezante, i an konfrontasyon avek bann gouvernman imen, ki ganny reprezante par en gran stati. Dan lavenir, sa ros pou tap sa stati e fer li vin lapousyer. Profesi Danyel i dir: “Sa rwayonm li menm pa pou pas avek okenn lezot pep. I pou kraz e met en lafen avek tou sa bann rwayonm e li menm i pou dire pour en letan endefini.”—Danyel 2:44.

10. Akoz nou anvi ki Rwayonm Bondye i ganny etabli?

¹⁰ Nou vreman anvi vwar Rwayonm Bondye pran aksyon kont sistenm mesan Satan akoz sa pou glorifye non sen Zeova e retir tou bann ki opoz son dominasyon. Nou priye avek bokou santiman: “Ki ou Renny i ganny etabli,” e ansanm avek zapot Zan nou dir: “Amenn! Vini, Senyer Zezi!” (Revelasyon 22:20) Wi, nou swete ki Zezi i vini  pour glorifye non sen Zeova e zistifye Son drwa pour dirize. Alors, parol sa psalmis i ava vin vre: “Ki dimoun i konnen ki ou, ki ou non i Zeova, se ou tousel ki Tre O lo tou later.”—Psonm 83:18.

“Ki ou Lavolonte i ganny akonpli”

11, 12. (a) Ki nou pe demande kan nou priye ki lavolonte Bondye “i ganny akonpli lo later parey dan lesyel”? (b) Ler nou priye ki lavolonte Zeova i ganny akonpli, ki sa i osi vedir?

¹¹ Apre Zezi ti ansenny son bann disip pour priye: “Ki ou lavolonte i ganny akonpli lo later parey dan lesyel.” (Matye 6:10) Liniver ti vin an egzistans akoz lavolonte Zeova. Bann Kreatir pwisan dan lesyel i kriye: “Nou Senyer, nou Bondye, ou merite resevwar laglwar, loner ek pisans, parski ou’n kree tou keksoz, e se par ou lavolonte ki zot egziste e ki zot in ganny kree.” (Revelasyon 4:11) Zeova i annan en plan pour bann “keksoz ki dan lesyel e lo later.” (Efezyen 1:8-10) Letan nou priye ki lavolonte Bondye i ganny akonpli, an realite nou pe demande ki Zeova i realiz son plan. Deplis, nou pe montre ki nou anvi vwar lavolonte Bondye ganny akonpli dan liniver antye.

¹² Atraver sa lapriyer, nou osi montre ki nou pare pour viv nou lavi an akor avek lavolonte Zeova. Zezi ti dir: “Mon nouritir se pour obei lavolonte sa enn ki’n anvoy mwan, e fini travay ki i’n donn mwan.” (Zan 4:34) Parey Zezi, nou ki’n dedye nou lavi avek Bondye, nou pran plezir pour fer Son lavolonte. Nou lanmour pour Zeova ek son Garson i pous nou pour viv nou lavi ‘non pa selon nou dezir imen, me selon lavolonte Bondye.’ (1 Pyer 4:1, 2; 2 Korentyen 5:14, 15) Nou sey fer nou mye pour evite fer keksoz ki nou konnen i kont lavolonte Zeova. (1 Tesalonisyen 4:3-5) Kan nou fer letan pour lir e etidye Labib, nou pe kontinyen ‘konpran konman Senyer i oule nou azir,’ ki enplik ki nou vreman pres “sa Bonn Nouvel Rwayonm.”—Efezyen 5:15-17; Matye 24:14.

Lavolonte Zeova dan Lesyel

13. Ki mannyer lavolonte Bondye ti pe ganny akonpli dan lesyel bokou letan avan Satan ti rebele?

¹³ Lavolonte Zeova ti pe ganny akonpli dan lesyel byen lontan avan enn son bann garson spirityel ti rebel e vin Satan. Liv Proverb i portre Garson premye ne Bondye konman lasazes ki pe koze. I montre ki pandan en peryod letan tro long pour konte, Garson byenneme Bondye ti “rezwir toultan devan li.” I ti kontan pour fer lavolonte son Papa. Avek letan, i ti vin “zouvriye abil” Zeova dan kreasyon tou keksoz “ki egziste dan lesyel ek lo later, sa ki vizib ek sa ki envizib.” (Proverb 8:22-31; Kolosyen 1:15-17) Zeova ti servi Zezi konman son Parol, oubyen son Portparol.—Zan 1:1-3.

14. Ki nou kapab aprann atraver Psonm 103 konsernan konman bann lanz i akonpli lavolonte Zeova dan lesyel?

¹⁴ En psalmis i montre ki Zeova i pli o ki tou e sa kantite lanz ki i annan i ekout son lenstriksyon ek son lord. Nou lir: “Zeova li menm in etablir son tronn dan lesyel; e son rwayote i domin lo tou keksoz. Beni Zeova, zot son bann lanz, ki annan en gran lafors, ki realiz son parol, par ekout son lavwa. Beni Zeova, zot tou son bann larme, son bann minis, ki pe fer son lavolonte. Beni Zeova zot tou son bann travay, partou kot i dominen.”—Psonm 103:19-22.

15. Letan Zezi ti ganny pouvwar dan Rwayonm, ki lefe sa ti annan lo lavolonte Bondye dan lesyel?

¹⁵ Apre ki Satan ti rebele, i ti ankor ganny akse avek lesyel, parey liv Zob i endike. (Zob 1:6-12; 2:1-7) Me liv Revelasyon ti profetize ki en letan ti pou arive kot Satan ek son bann demon ti pou ganny pouse dan lesyel. Aparaman, sa letan ti arive zis apre ki Zezi Kri ti ganny pouvwar dan Rwayonm an 1914. Depi sa letan, sa bann rebel in nepli  kapab reste dan lesyel. Zot kapab reste zis lo later. (Revelasyon 12:7-12) Dan lesyel, ou pou nepli tann okenn dispit konsernan drwa Zeova pour dirize aprezan. Okontrer, ou pou tann zis bann lavwa ki zwenn ansanm pour felisit “Lanyo,” setadir Zezi Kri, e rann glwar Zeova. (Revelasyon 4:9-11) Vreman, lavolonte Zeova in ganny akonpli dan lesyel.

Lavolonte Zeova pour Later

16. Ki mannyer sa model lapriyer i montre ki lansennyman Kretyente konsernan lespwar bann imen i fo?

¹⁶ Bann legliz Kretyente i retir later dan plan Bondye par dir ki tou bon dimoun i al dan lesyel. Me Zezi ti ansenny nou pour priye: “Ki ou Renny i ganny etabli; Ki ou lavolonte i ganny akonpli lo later parey dan lesyel.” (Matye 6:10) Eski nou kapab krwar ki lavolonte Zeova pe ganny akonpli lo sa later ozordi ki’n ganny boulverse avek vyolans, lenzistis, maladi, ek lanmor? Ditou! Alors, nou bezwen priye pour ki lavolonte Bondye i ganny akonpli lo later, anliny avek sa ki zapot Pyer ti rikorde: “Nou pe espere dapre son promes en nouvo lesyel [Rwayonm Mesyanik gouvernen par Kris] ek en nouvo later [en sosyete imen ki drwat] kot pou annan lazistis.”—2 Pyer 3:13.

17. Ki lavolonte Zeova pour later?

¹⁷ Zeova ti annan en plan letan i ti kree later. I ti enspir profet Izai pour ekrir: “La sa ki Zeova in dir, Kreater lesyel, sa vre Bondye ki’n form later e fer li, sa Enn ki’n etabli li solidman, ki pa’n kree li pour nanryen ditou, ki’n fer li pour ganny abite: ‘Mwan, mon Zeova, napa en lot.’ ” (Izai 45:18) Bondye ti met sa premye koup imen dan en tre zoli zarden e i ti dir zot: “Fer zanfan e vin bokou, ranpli later e domin li.” (Zenez 1:27, 28; 2:15) I kler ki plan Kreater se ki later i ganny abite par bann dimoun ki parfe e drwat. Deplis sa bann dimoun pou soumet zot volonterman avek dominasyon Zeova e viv pour touzour dan sa Paradi ki Kris in promet.—Psonm 37:11, 29; Lik 23:43.

18, 19. (a) Kwa ki bezwen ganny fer pour lavolonte Bondye ganny akonpli antyerman lo later? (b) Ki lezot laspe model lapriyer Zezi ki nou pou egzaminen dan lartik swivan?

¹⁸ Lavolonte Zeova konsernan later pa pou zanmen ganny akonpli antyerman tan ki lo later i annan dimoun ki pa oule soumet avek son dominasyon. An servan bann lafors spirityel pwisan anba direksyon Kris, Bondye pou “detri bann ki detri later.” Sistenm mesan Satan avek son bann fo larelizyon, politik koronpi, son sistenm komers egois e malonnet, ek son militer destriktif pou ganny tire konpletman lo later. (Revelasyon 11:18; 18:21; 19:1, 2, 11-18) Drwa Zeova pour dirize pou ganny zistifye e son non sen pou ganny glorifye. Tousala nou demande ler nou priye: “Nou Papa ki dan lesyel ki ou non sen i ganny glorifye; ki ou Renny i ganny etabli; ki ou lavolonte i ganny akonpli lo later parey dan lesyel.”—Matye 6:9, 10.

¹⁹ Dan son model lapriyer, Zezi ti montre ki nou kapab priy konsernan bann keksoz personnel osi. Dan lartik swivan, nou pou egzamin sa laspe son model lapriyer.

[Not anba lo paz]

Revizyon

• Akoz i apropriye pour nou adres Zeova konman “nou Papa”?

• Akoz i vreman enportan pour nou priye ki non sen Zeova i ganny glorifye?

• Akoz nou priye ki Rwayonm Bondye i ganny etabli?

• Ler nou priye ki lavolonte Bondye i ganny akonpli lo later parey dan lesyel, ki sa i enplike?

[Kestyon]

[Portre lo paz 19]

Lapriyer Zezi ti vreman diferan avek lapriyer ipokrit bann Farizyen

[Portre lo paz 20]

Bann Kretyen i priye ki Rwayonm Bondye i ganny etabli, ki son non sen i ganny glorifye, e ki son lavolonte i ganny akonpli