Zenn—Zeova Pa Pou Oubliy Zot Travay!

“Bondye pa enzis pour li oubliy travay ki zot in fer, ni lanmour ki zot in montre pour li par servis ki zot in rann e pe kontinyen rann bann sen.”—EBRE 6:10.

1. Ki mannyer liv Ebre ek Malaki dan Labib i montre ki Zeova i apresye ou servis?

ESKI ou’n deza rann en gran servis ou zanmi e apre i pa dir ou mersi? Letan en dimoun pa montre lapresyasyon oubyen menm oubliy en servis ki ou’n rann li, sa i kapab bles ou en kantite. Parkont, i vreman diferan letan nou servi Zeova avek tou nou leker! Labib i dir: “Bondye pa enzis pour li oubliy travay ki zot in fer, ni lanmour ki zot in montre pour li par servis ki zot in rann e pe kontinyen rann bann sen.” (Ebre 6:10) Mazinen ki sa i vedir. Zeova ti pou konsider li enzis lo son par, en pese, si i ti oubliy sa ki ou’n fer e pe kontinyen fer dan son servis. Pa i en Bondye ki rekonesan!—Malaki 3:10.

2. Akoz servi Zeova i vreman spesyal?

² Ou annan en loportinite spesyal pour ador e servi sa Bondye rekonesan. I en loportinite rar parski zis apepre sis milyon  dan apepre sis bilyon dimoun ki viv lo later, ki servi sa Bondye parey ou. Deplis, lefe ki ou pe ekout e aksepte sa bon nouvel, i montre ki Zeova i annan en lentere personnel avek ou. Apre tou, Zezi ti dir: “Personn pa kapab vin kot mwan, si mon Papa ki’n anvoy mwan, pa atir li kot mwan.” (Zan 6:44) Wi, Zeova i ed sak dimoun pour benefisye avek sakrifis Kris.

Apresye ou gran Privilez

3. Ki mannyer bann garson Kora ti eksprim zot lapresyasyon pour privilez ki zot ti annan pour servi Zeova?

³ Parey nou ti diskite dan lartik presedan, ou dan en pozisyon spesyal pour rezwir leker Zeova. (Proverb 27:11) Sa i en keksoz ki ou pa devret zanmen pran alalezer. Dan enn zot bann psonm enspire, bann garson Kora ti eksprim zot lapresyasyon pour sa privilez ki zot ti annan pour servi Zeova. Nou lir: “Vomye en zour dan ou bann lakour ki mil zour dan en lot landrwa. Mon’n swazir pour debout dan larantre lakaz mon Bondye plito ki sirkile dan bann latant mesanste.”—Psonm 84:10.

4. (a) Kwa ki kapab fer serten krwar ki ladorasyon Zeova pe priv zot? (b) Konman Zeova i montre ki i pare pour remark e rekonpans son bann serviter?

⁴ Eski ou santi koumsa anver ou privilez pour servi ou Papa dan lesyel? I vre ki parfwa ou kapab ganny sa lenpresyon ki ador Zeova i priv ou ou liberte. Nou rekonnet ki i demann sakrifis lo nou par pour kapab viv an akor avek bann prensip Labib. Me finalman, nenport kwa ki Zeova pe demann ou, i pour ou prop dibyen. (Psonm 1:1-3) Deplis, Zeova i vwar zefor ki ou fer e i montre lapresyasyon pour ou fidelite. Anfet, Pol ti ekrir ki Zeova “i rekonpans tou bann ki rod li.” (Ebre 11:6) Zeova pe rod loportinite pour li fer sa. En bon profet dan ansyen Izrael ti dir: “An se ki konsern Zeova, son lizye pe ale vini partou lo later pour li montre son lafors an faver bann ki zot leker i tou pour li.”—2 Kronik 16:9.

5. (a) Nonm enn bann pli bon fason ki ou kapab montre ki ou leker i tou pour Zeova. (b) Akoz i kapab paret difisil pour koz avek lezot lo ou lafwa?

⁵ Enn bann pli bon fason pour montre ki ou leker i tou pour Zeova se kan ou koz avek lezot lo li. Eski ou’n deza ganny loportinite pour koz avek serten ou bann kanmarad lekol lo ou lafwa? Premye kou, ou kapab krwar ki i enposib pour ou fer sa, e sa lide i kapab fer ou en pe per. Petet ou a demande: ‘Si zot riy mwan? Si zot krwar mon larelizyon i drol?’ Zezi ti admet ki pa tou dimoun ki ti pou ekout mesaz Rwayonm. (Zan 15:20) Me sa pa vedir ki tou dimoun pou sikann ou e pa oule ekout ou. Okontrer, bokou zenn Temwen in kapab trouv en dimoun ki’n pare pour ekout zot. Zot in  menm ganny plis respe avek zot kanmarad akoz zot reste ferm avek zot konviksyon.

“Zeova pou ed ou”

6, 7. (a) Ki mannyer en fiy 17 an ti kapab donn en temwannyaz avek bann manrmay dan son laklas? (b) Ki ou’n aprann atraver leksperyans Jennifer?

⁶ Me ki mannyer ou kapab ganny kouraz pour koz lo ou lafwa? Akoz ou pa determinen pour koz fran kan dimoun i demann ou kestyon lo ou larelizyon? Annou vwar legzanp Jennifer ki annan 17 an. I dir: “Mon ti pe manze lekol. Sa bann fiy ki ti lo menm latab avek mwan ti pe koz lo larelizyon e enn ti demann mwan ki larelizyon mon ladan.” Eski Jennifer ti per pour reponn? I admet: “Wi, akoz mon pa ti asire ki kalite reaksyon mon ti pou gannyen.” Alors, ki Jennifer ti fer? “Mon ti dir zot ki mon en Temwen Zeova. Premye kou, zot ti sirprann. I paret ki zot ti krwar ki Temwen Zeova i bann dimoun drol. Alors zot ti demann mwan kestyon e mon ti kapab eklersi serten fo pwennvi ki zot ti annan. Menm apre sa, serten zot in apros mwan detanzaot pour demann kestyon.”

⁷ Eski Jennifer ti regrete ki i’n profit sa loportinite pour koz lo son krwayans? Pa ditou! I dir: “Mon ti byen satisfe letan brek midi ti fini. Aprezan sa bann fiy i pli byen konpran ki bann Temwen Zeova i vreman ete.” Konsey ki Jennifer i oule donnen aprezan, i senp: “Si ou vwar li difisil pour temwanny avek bann manrmay dan ou laklas oubyen avek bann ansennyan, fer en pti lapriyer. Zeova pou ed ou. Ou pou kontan apre akoz ou’n byen servi ou loportinite pour donn en temwannyaz.”—1 Pyer 3:15.

8. (a) Ki mannyer lapriyer ti ed Neemya kan i ti trouv li dan en sitiasyon ki i pa ti pe ekspekte? (b) Ki bann sitiasyon ki ou rankontre lekol kot ou ti a bezwen fer en pti lapriyer dan ou leker?

⁸ Remarke ki Jennifer i sizere ou “fer en pti lapriyer” kan ou ganny en loportinite pour koz lo ou lafwa. Neemya, en serviter Lerwa Artazekzes, ti fer sanmenm kan i ti vwar li dan en sitiasyon ki i pa ti pe ekspekte. Neemya ti vreman tris akoz i ti’n tande ki bann Zwif ti dan en move kondisyon e ki miray ek baro Zerizalenm ti’n ganny abandonnen. Lerwa ti remarke ki Neemya ti paret enkyet. Alors i ti demann li ki i gannyen. Avan ki i ti reponn, Neemya ti priye pour ganny gidans. Apre i ti ganny kouraz pour demann permisyon pour retourn Zerizalenm pour ede rebatir lavil ki ti’n tonbe. Artazekzes ti dakor. (Neemya 2:1-8) Ki leson ou kapab tire? Si ou ganny en loportinite pour koz lo ou lafwa e ou santi ou en pe per, pa oubliye ki ou kapab fer en pti lapriyer dan ou leker. Pyer ti ekrir: “Desarz tou zot sousi lo li, parski limenm ki pran swen avek zot.”—1 Pyer 5:7; Psonm 55:22.

“Pare pour donn en Repons”

9. Ki mannyer Leah aze 13 an, ti arive donn 23 liv Les jeunes s’interrogent?

⁹ Annou vwar en lot legzanp. Leah, aze 13 an, ti pe lir liv Les jeunes s’interrogent—Réponses pratiques * pandan son brek midi lekol. I dir: “Lezot ti pe get mwan e pa mank bokou letan apre zot ti’n ariv devan mwan pe get mwan. Zot ti demann mwan lo ki sa liv i baze.” Alafen lazournen, kat fiy ti’n demann Leah enn sa liv Les jeunes s’interrogent. Sa bann fiy ti pret lezot sa liv, e zot osi zot ti anvi enn. Pandan sa detrwa semenn ki ti swiv, Leah ti donn 23 liv Les jeunes s’interrogent son bann kanmarad lekol ek zanmi. Eski i ti fasil okonmansman pour Leah koze letan lezot ti demann li lo ki sa liv ti baze? Pa ditou! I admet: “Premye kou, mon ti en pe per. Me mon ti priye e mon ti konnen ki Zeova ti avek mwan.”

10, 11. Konman en zenn fiy Izraelit ti kapab ed en sef larme Siryen pour konn Zeova? Ki sanzman sa larme Siryen ti fer apre sa?

 ¹⁰ Petet leksperyans Leah i fer ou mazin en sitiasyon en pe parey. Sa i sitiasyon en zenn fiy Izraelit ki ti’n ganny anmennen konman lesklav an Siri. Naamann, ki ti en sef larme Siryen, ti ganny lalep. I kapab ki son madanm ti’n konmans en konversasyon ki ti fer sa pti fiy koz lo son lafwa. I ti dir: “Si zis mon senyer ti devan sa profet an Samari, son lalep ti pou geri!”—2 Lerwa 5:1-3.

¹¹ Gras a kouraz sa zenn fiy, Naamann ti arive konnen ki “napa okenn Bondye partou lo later eksepte an Izrael.” I ti menm deside ki i pou “nepli ofer sakrifis brile, ni lezot sakrifis avek okenn lezot bondye apard ki Zeova.” (2 Lerwa 5:15, 17) Sirman, Zeova ti beni kouraz sa pti fiy. I kapab e i pou fer parey pour bann zenn ozordi. Leah in vwar ki sa i vre. Avek letan, serten son bann kanmarad lekol ti apros li e dir ki sa liv Les jeunes s’interrogent pe ed zot dan zot konportman. Leah i dir: “Mon ti kontan akoz mon ti konnen ki mon ti pe ed lezot konn plis lo Zeova e ed zot sanz zot lavi.”

12. Ki mannyer ou kapab ganny kouraz pour reponn bann ki oule en leksplikasyon konsernan ou lafwa?

 ¹² Ou kapab ganny menm leksperyans ki Jennifer ek Leah. Swiv konsey Pyer, ki ti ekrir ki konman en Kretyen ou devret touzour ‘pare pour donn en repons bann ki demann en leksplikasyon konsernan lesperans ki dan ou. Me fer li avek labonte ek respe.’ (1 Pyer 3:15, 16) Konman ou kapab fer sa? Imit bann Kretyen premye syek ki ti priy Zeova pour ed zot pres “avek lasirans san okenn lafreyer.” (Akt 4:29) Apre sa, pran kouraz e koz avek lezot konsernan ou krwayans. Ou kapab sirprann avek rezilta ki ou gannyen. Deplis, ou pou rezwir leker Zeova.

Bann Video ek Proze spesyal

13. Ki bann loportinite serten zenn in sezi pour donn en temwannyaz? (Vwar bwat lo paz 14 ek 15.)

¹³ Bokou zenn in eksplik zot lafwa avek zot kanmarad lekol ek ansennyan an servan bann video. Parfwa, bann proze ki lekol i donnen i ganny servi konman en loportinite pour loue Zeova. Par egzanp, dan zot laklas listwar, de garson 15 an, ki tou le de i Temwen Zeova, ti ganny demande pour ekrir en rapor lo enn bann larelizyon ki annan dan lemonn. Sa de garson ti travay ansanm pour ekrir en rapor lo Temwen Zeova, an servan sa liv Les Témoins de Jéhovah: Prédicateurs du Royaume de Dieu konman zot referans. * Zot ti osi bezwen prezant en rapor senk minit devan laklas. Apre ki zot ti’n prezant zot rapor, sa ansennyan ek bann zelev ti annan sitan bokou kestyon ki zot ti reste devan laklas pour ankor 20 minit. Detrwa semenn apre, bann manrmay dan zot laklas ti kontinyen demann kestyon lo Temwen Zeova.

14, 15. (a) Akoz annan lafreyer pour zonm i en pyez? (b) Akoz ou devret annan konfyans letan ou koz avek lezot lo ou krwayans?

 ¹⁴ Parey sa bann leksperyans i montre, ou kapab ganny bokou benediksyon letan ou koz avek lezot lo ou krwayans ek konviksyon konman en Temwen Zeova. Pa les lafreyer lezot priv ou sa privilez ek lazwa pour ed lezot konn Zeova. Labib i dir: “Tranble devan zonm se sa ki vin en latrap, me sa ki met konfyans dan Zeova pou ganny proteze.”—Proverb 29:25.

¹⁵ Mazinen ki konman en zenn Kretyen, ou annan en keksoz ki ou bann kanmarad i vreman bezwen. Sa se pli bon fason viv ek promes pour viv pour touzour dan lavenir. (1 Timote 4:8) En resers ki ti ganny fer an Letazini i montre ki omwen lanmwatye bann zenn i pran larelizyon oserye, e en tyer i dir ki lafwa relizye i annan en “pli gran lenfliyans” dan zot lavi. Sa i byen enteresan akoz an Letazini, ou kapab krwar ki dimoun an zeneral pa enterese avek larelizyon oubyen zot lespri i zis lo bann keksoz lemonn. I kapab ki sitiasyon i parey dan plizyer lezot landrwa dan lemonn. Alors, i tre probab ki ou bann kanmarad lekol ti pou kontan pour ekout sa ki ou annan pour dir lo Labib.

Konman en Zenn, apros avek Zeova

16. Apard ki zis koz lo li avek lezot, kwa ki enplike dan fer plezir Zeova?

¹⁶ Byensir, fer plezir Zeova pa enplik zis koz lo li avek lezot. Ou bezwen annan en kondwit ki an akor avek son standar. Zapot Zan ti ekrir: “Annefe, la lanmour Bondye: ki nou obei son konmannman; e son bann konmannman i pa en fardo.” (1 Zan 5:3) Ou pou vwar ki sa i vre si ou apros avek Zeova. Ki mannyer ou kapab fer sa?

17. Ki mannyer ou kapab apros avek Zeova?

¹⁷ Pran letan pour lir Labib ek bann piblikasyon ki baze lo Labib. Pli ou aprann plis lo Zeova, i pou pli fasil pour ou obeir li e koz avek lezot lo li. Zezi ti dir: “En zonm bon i tir dibyen dan kof son bon leker, tandis ki en zonm move i tir dimal dan kof son move leker. Labous i koz sa ki debord dan leker.” (Lik 6:45) Alors, ranpli ou leker avek bann bon keksoz. Akoz ou pa etabli serten lobzektif dan sa domenn? Petet ou kapab amelyor ou preparasyon pour renyon sa semenn ki pe vini. Ou lot lobzektif i kapab pour partisipe dan renyon par fer en komanter bref me ki sorti ofon ou leker. Byensir, i enportan ki ou osi met an pratik bann keksoz ki ou aprann.—Filipyen 4:9.

18. Kantmenm ou sibir serten lopozisyon, ki lasirans ou kapab annan?

¹⁸ Bann benediksyon ki ou gannyen letan ou servi Zeova i dirab. Anfet, i pour touzour. I vre ki parfwa ou kapab ganny serten lopozisyon oubyen ganny sikannen akoz ou en Temwen Zeova. Me mazin Moiz. Labib i dir ki “son regar ti fikse lo rekonpans dan lavenir.” (Ebre 11:24-26) Ou osi ou kapab annan lasirans ki Zeova pou rekonpans ou pour zefor ki ou fer pour aprann konsernan li e koz lo li. Anfet, i pa pou zanmen “oubliy travay ki zot in fer, ni lanmour ki zot in montre pour li.”—Ebre 6:10.

[Not anba lo paz]

Eski ou rapel?

• Akoz ou kapab asire ki ou servis i annan valer dan lizye Zeova?

• Nonm serten metod ki serten zenn in servi pour donn en bon temwannyaz kot lekol.

• Konman ou kapab ganny kouraz pour temwanny avek bann manrmay dan ou laklas?

• Ki mannyer ou kapab apros avek Zeova?

[Kestyon]

[Bwat/Portre lo paz 14]

Menm bann pti Manrmay i loue Zeova!

Menm bann pli pti manrmay in kapab donn en temwannyaz kot lekol. Annou vwar ennde leksperyans.

Amber i annan dis an. En zour son laklas ti pe lir en liv lo konman Nazi ti atak bann Zwif pandan Dezyenm Lager Mondyal. Amber ti deside anmenn sa video Les triangles violets pour son ansennyan. Son ansennyan ti sirprann letan i ti aprann ki Temwen Zeova osi ti ganny persekite pandan sistenm Nazi. Sa ansennyan ti fer laklas antye vwar sa video.

Alaz wit an, Alexa ti ekrir en let son laklas pour eksplike akoz i pa kapab selebre Nwel. Son ansennyan ti telman enpresyonnen ki i ti fer Alexa lir sa let aotvwa avek son laklas e osi avek de lezot laklas! Pour konklir, i ti dir: “Mon’n ganny ansennyen pour respekte lezot ki napa menm krwayans avek mwan, e mon remersi zot pour respekte mon desizyon pour pa selebre Nwel.”

Zis apre ki i ti konmans lekol primer, Eric ti anmenn Mon Liv Zistwar Labib kot lekol e i ti demann permisyon pour montre sa liv son laklas. Son mis ti dir: “Pa i ti pou pli bon si ou lir en zistwar avek laklas?” Alor Eric ti lir. Apre, i ti demann bann ki anvi enn sa liv pour lev zot lanmen. Dizwit zanfan, enkli son mis, ti lev lanmen! Aprezan, Eric i santi ki i annan son prop teritwar spesyal pour donn temwannyaz.

Whitney ki annan 9 an i apresye bokou sa brosir Les Témoins de Jéhovah et l’instruction. * I dir: “Mon manman i abitye donn sa brosir mon bann ansennyan tou le zan, me sa lannen mon’n donn zot mwan menm. Sa brosir in ed mwan pour ganny swazir konman ‘etidyan lasemenn.’ ”

[Not anba lo paz]

[Bwat/Portre lo paz 15]

Bann Sitiasyon ki serten in servi pour koz lo zot Lafwa

Kan serten in ganny en rapor oubyen en proze pour fer kot lekol, zot in swazir en topik ki pou permet zot donn en temwannyaz

Serten zenn in donn zot ansennyan en video oubyen en piblikasyon ki annan pour fer avek en size ki ti pe ganny diskite dan laklas

Serten zenn in ganny aprose e demann kestyon par lezot zenn letan zot ti pe lir Labib oubyen en piblikasyon baze lo Labib dan zot letan brek

[Portre lo paz 12]

Bann ki pli eksperyanse i kapab ede form bann zenn pour servi Zeova