Kote Nou Kapab Trouv Vre Rekonfor?
Kote Nou Kapab Trouv Vre Rekonfor?
“Bondye, Papa, nou Senyer Zezi-Kri . . . i konsol nou dan nou bann soufrans.”—2 KORENTYEN 1:3, 4.
1. Ki bann sitiasyon ki kapab fer dimoun santi ki zot vreman bezwen rekonfor?
EN MALADI terib i kapab fer en dimoun santi ki son lavi in gate. Tranbleman-d-ter, tanpet, ek lafamin i kapab pran tou sa ki en dimoun i annan. Lager i pran lavi en manm fanmiy, detri bann lakour, oubyen obliz serten dimoun pour kit zot lakour pour al rod sekirite pli lwen. Lenzistis i kapab fer dimoun krwar ki napa okenn landrwa pour ale pour ganny soulazman. Bann dimoun ki’n ganny afekte par sa bann maler i vreman bezwen rekonfor. Kote zot kapab trouv rekonfor?
2. Akoz napa okenn rekonfor ki parey sa rekonfor ki Zeova i fourni?
2 Serten dimoun ek serten lorganizasyon i sey zot mye pour fourni rekonfor. Bann pti parol ankourazan i ganny bokou apresye. Bann led sekour i ede pour fourni bezwen materyel lo en baz tanporer. Me zis Zeova, sa vre Bondye, ki kapab repar tou sa bann domaz e fourni sa kalite led ki nou bezwen pour ki bann tel maler pa zanmen ariv ankor. Labib i dir sa konsernan li: “Nou rann glwar Bondye, Papa, nou Senyer Zezi-Kri, Papa ki ranpli avek labonte, Bondye ki touzour donn konsolasyon. I konsol nou dan nou bann soufrans pour ki nou osi nou a kapab konsol tou bann ki dan soufrans, par sa konsolasyon ki noumenm nou’n gannyen avek li.” (2 Korentyen 1:3, 4) Ki mannyer Zeova i rekonfort nou?
Atak bann Problenm kot zot Sours
3. Konman ki sa rekonfor ki Bondye i donnen i atak sours problenm limanite?
3 Tou imen in erit lenperfeksyon akoz pese Adan. Lenperfeksyon in anmenn bokou problenm e finalman lanmor. (Romen 5:12) Lefe ki Satan Dyab i “sef lemonn,” sa i fer sitiasyon pli pir ankor. (Zan 12:31; 1 Zan 5:19) Zeova pa’n zis eksprim son sagren konsernan sa kondisyon deplorab ki bann imen i ladan. I’n anvoy son sel Garson konman en ranson pour sov nou. I’n dir nou ki nou kapab ganny soulaze avek bann konsekans pese Adan si nou demontre lafwa dan Son Garson. (Zan 3:16; 1 Zan 4:10) Bondye in osi predir ki Zezi Kri, ki’n ganny konfye avek lotorite dan lesyel ek lo later, pou byento detrir Satan ek son sistenm mesan.—Matye 28:18; 1 Zan 3:8; Revelasyon 6:2; 20:10.
4. (a) Ki Zeova in fourni pour fortifye nou konfyans dan son promes pour soulaz nou? (b) Konman Zeova i ed nou pour rekonnet kan soulazman pou vini?
4 Pour fer nou annan plis konfyans dan son bann promes, Bondye in prezerv bokou levidans pour montre ki tou sa ki i predir i arive. (Zozye 23:14) Dan Labib, i’n raport sa ki i’n fer pour delivre son bann serviter dan bann sitiasyon kot ti pou enposib pour imen sape. (Egzod 14:4-31; 2 Lerwa 18:13–19:37) Deplis, atraver Zezi Kri, Zeova in demontre ki son plan i enkli geri “bann ki enfirm,” e menm resisit bann mor. (Matye 9:35; 11:3-6) Kan tousala pou arive? Pour reponn sa, Labib i dekrir bann dernyen zour sa sistenm, zis avan nouvo lesyel ek nouvo later Bondye. Sa deskripsyon ki Zezi ti donnen i al byen avek sa lepok ki nou pe viv ladan.—Matye 24:3-14; 2 Timote 3:1-5.
Rekonfort en Pep dan Ladetres
5. Kan Zeova ti rekonfort ansyen Izrael, lo ki i ti atir zot latansyon?
5 Nou aprann ki mannyer Zeova ti rekonfort son pep ansyen dan letan ladetres, par lafason ki i ti azir avek zot. I ti rapel zot ki kalite Bondye i ete. Sa ti fer zot met plis konfyans dan son promes. Zeova ti fer son bann profet servi bann konparezon kler ant li konman sa vre Bondye vivan ek bann zidol, ki pa kapab ed ni zot lekor ni bann ki ador zot. (Izai 41:10; 46:1; Zeremi 10:2-15) Kan i ti dir Izai, “Rekonfort, rekonfort mon pep,” Zeova ti ankouraz son profet pour servi bann legzanp ek deskripsyon Son travay kreasyon. Sa se pour met lanfaz lo son grander konman sa sel vre Bondye.—Izai 40:1-31.
6. Ki lendikasyon Zeova ti donnen parfwa an rapor avek kan delivrans ti pou vini?
6 Parfwa, Zeova ti donn rekonfor par spesifye kan son pep ti pou ganny delivre. Sa ti kapab pre oubyen lwen dan lavenir. Anmezir ki zot delivrans ti pe aprose, i ti dir sa avek bann Izraelit ki ti pe pas martir: “Mon pou anmenn ankor en fleo lo Faraon ek Lezip. Apre sa i pou les zot ale.” (Egzod 11:1) Dan letan lerwa Yeosafat, ler trwa nasyon ti ralye pour atak Zida, Zeova ti dir zot ki i ti pou azir dan zot faver “demen.” (2 Kronik 20:1-4, 14-17) De lot kote, zot delivrans an Babilonn ti ganny rikorde par Izai 200 an avan, e Zeremi ti donn plis detay lo la apepre 100 an avan delivrans ti arive. Sirman, sa bann profesi ti vreman ankourazan pour bann serviter Bondye kan zot delivrans ti pe aprose.—Izai 44:26–45:3; Zeremi 25:11-14.
7. Ki ti souvan ganny enkli dan bann promes delivrans, e konman sa ti enfliyans lavi bann fidel an Izrael?
7 I enteresan note ki bann promes ki ti anmenn rekonfor pour pep Bondye ti souvan enkli bann lenformasyon konsernan Mesi. (Izai 53:1-12) Zenerasyon apre zenerasyon, sa ti donn lespwar bann dimoun fidel kan zot ti trouv zot dan diferan leprev. Dan Lik 2:25, nou lir: “Ti annan en zonm dan Zerizalenm ki ti apel Simeon. I ti en zonm zis e ki ti respekte Senyer. I ti pe esper konsolasyon pep Izrael [oubyen rekonfor; an realite larive Mesi] e Lespri Sen ti avek li.” Atraver Lekritir, Simeon ti konnen ki i annan lespwar pour en Mesi vini, e vi ki i ti pe esper sa, sa ti enfliyans son fason viv. I pa ti konpran konman ki tou sa bann promes ti pou ganny akonpli e li personnelman, i pa ti viv pour vwar sa delivrans vin en realite. Me i ti byen kontan letan i ti kapab idantifye sa Enn ki Bondye ti pou servi pour anmenn “delivrans.”—Lik 2:30.
Rekonfor atraver Kris
8. Ki mannyer sa led ki Zezi ti donnen ti diferan avek sa ki bokou dimoun ti krwar zot bezwen?
8 Dan son minister lo later, Zezi pa ti toultan fourni sa kalite led ki bann dimoun ti krwar zot bezwen. Serten ti anvi en Mesi ki ti pou liber zot anba dominasyon Romen ki zot ti deteste. Me Zezi pa ti ankouraz rebelyon. I ti dir zot “rann Sezar sa ki pour Sezar.” (Matye 22:21) Plan Bondye ti enplik bokou plis ki zis liber dimoun ki pe ganny dominen par serten sistenm politik. Bann dimoun ti anvi fer Zezi vin lerwa, me i ti dir ki i ti pou “donn son lavi konman pri pour liberasyon bokou dimoun.” (Matye 20:28; Zan 6:15) Pa ti ankor ler pour li vin lerwa. Deplis, se Zeova ki ti pou donn li lotorite pour dirize, pa bann lafoul mekontan.
9. (a) Ki sa mesaz rekonfor ki Zezi ti anonse? (b) Konman Zezi ti montre lenportans sa mesaz anver bann sitiasyon ki dimoun i fer fas avek personnelman? (c) Minister Zezi ti poz en fondasyon pour kwa?
9 Sa rekonfor ki Zezi ti anmennen ti ganny enkli dan “Bonn Nouvel konsernan Rwayonm Bondye.” Sa i mesaz ki Zezi ti anonse partou kot i ti ale. (Lik 4:43) I ti montre ki rapor sa mesaz i annan avek bann problenm ki dimoun i rankontre toulezour, par demontre ki i pou fer pour limanite ler i diriz later. I ti donn bann dimoun ki ti pe soufer rezon pour viv, par fer zot vwar kler e koze (Matye 12:22; Mark 10:51, 52), geri bann ki ti paralize (Mark 2:3-12), geri bann Izraelit ki ti annan serten maladi terib (Lik 5:12, 13), e soulaz zot avek lezot maladi ki fer soufer. (Mark 5:25-29) I ti anmenn en gran soulazman pour serten fanmiy ki ti pe plere par resisit zot zanfan. (Lik 7:11-15; 8:49-56) I ti montre ki i kapab kontrol bann tanpet danzere e nouri en gran lafoul dimoun. (Mark 4:37-41; 8:2-9) Deplis, Zezi ti ansenny zot bann prensip ki ti pou kapab ed zot fer fas avek bann problenm e ki ti pou donn lespwar pour en gouvernman drwat avek Mesi konman lerwa. Alors, minister Zezi pa ti zis rekonfort bann ki ti ekout li avek lafwa me ti osi poz en fondasyon pour ankouraz dimoun ki ti pou viv plizyer milye lannen apre.
10. Kwa ki’n posib gras a sakrifis Zezi?
10 Plis ki 60 an apre ki Zezi ti’n sakrifye son lavi e resisite pour al viv osyel, zapot Zan ti ganny enspire pour ekrir: “Mon bann pti zanfan, mon pe ekri zot sa pour ki zot pa fer pese, me si okenn antre zot i arive fer pese nou annan en avoka kot Bondye, Zezi-Kri, nou Lazistis. Limenm, viktim sakrifis ki permet nou ganny pardon nou pese, pa zis pour nou, me osi pour pese lemonn antye.” (1 Zan 2:1, 2) Nou ganny rekonforte par bann byenfe ki sakrifis parfe Zezi i anmennen. Nou konnen ki nou kapab ganny pardonnen pour nou pese, ganny en konsyans kler, en bon relasyon avek Bondye, ek lespwar pour viv pour touzour.—Zan 14:6; Romen 6:23; Ebre 9:24-28; 1 Pyer 3:21.
Lespri Sen i rekonfort nou
11. Ki sa lot laranzman Zezi ti promet avan son lanmor ki ti pou anmenn rekonfor?
11 Dernyen sware ki i ti pase avek son bann zapot avan son lanmor, Zezi ti koz lo en lot laranzman ki son Papa ti’n fer pour rekonfort zot. I ti dir: “Mon pou demann mon Papa, e i pou donn zot en lot Konseyer [oubyen konsolater; Grek, pa·raʹkle·tos] ki pou reste avek zot pour touzour.” Zezi ti asir zot: “Konseyer, Lespri-sen . . . pou ansenny zot tou keksoz, e fer zot rapel tou sa ki mon’n dir zot.” (Zan 14:16, 17, 26) Ki mannyer lespri sen ti vreman anmenn rekonfor pour zot?
12. Vi ki lespri ti ed bann disip Zezi pour rapel sa ki Zezi ti dir, konman ki sa in anmenn rekonfor pour bokou dimoun?
12 Zezi ti’n ansenny son bann zapot bokou keksoz. Byensir zot pa ti pou zanmen oubliy sa leksperyans. Me eski zot ti pou rapel tou sa ki i ti dir? Eski zot ti a kapab oubliy serten lansennyman enportan vi ki zot enparfe? Zezi ti asir zot ki lespri sen ti pou ‘fer zot rapel tou sa ki i ti’n dir zot.’ Alors, apepre wit an apre lanmor Zezi, Matye ti kapab ekrir premye Levanzil. Ladan i ti enkli sa Sermon vreman ankourazan ki Zezi ti fer lo montanny, son bann diferan konparezon ki i ti servi konsernan Rwayonm, ek son diskisyon detaye lo siny ki ti pou endik son prezans. Plis ki 50 an apre, zapot Zan ti kapab ekrir en resi diny konfyans ki ti ranpli avek bokou lezot detay lo bann dernyen zour lavi Zezi lo later. Sa bann resi enspire in vreman servi konman en sours lankourazman menm ziska nou letan!
13. Konman lespri sen ti vin konman en ansennyan pour bann premye Kretyen?
13 Lespri sen pa ti zis fer bann disip rapel sa ki Zezi ti dir, me i ti ansenny bann disip e gid zot pour konpran pli byen plan Bondye. Letan Zezi ti ankor avek son bann disip, i ti dir zot serten keksoz ki zot pa ti konpran sa letan. Me gras a lespri sen, plitar Zan, Pyer, Zak, Zid, ek Pol ti kapab eksplik lezot devlopman konsernan plan Bondye. Alors, lespri sen ti vin konman en ansennyan pour zot. I ti asir zot ki zot ti pe ganny gide par Bondye.
14. Konman lespri sen ti ed bann serviter Zeova?
14 Bann mirak ki bann Kretyen ti fer gras a lespri sen, ti osi ede pour montre klerman ki laprouvasyon Bondye ti nepli lo nasyon Izrael me plito lo kongregasyon Kretyen. (Ebre 2:4) Fri lespri ki ti evidan dan lavi serten dimoun ti osi en fakter enportan pour idantifye bann ki ti vreman disip Zezi. (Zan 13:35; Galat 5:22-24) Lespri sen ti osi fortifye bann manm kongregasyon pour pres avek lardyes e san okenn lafreyer.—Akt 4:31.
Led anba Presyon entans
15. (a) Ki presyon ki bann Kretyen in rankontre dan lepase e konmela? (b) Akoz bann ki donn lankourazman i bezwen osi ganny lankourazman parfwa?
15 Tou sa ki devoue e fidel avek Zeova i eksperyans serten persekisyon dan en fason ou en lot. (2 Timote 3:12) Me i annan serten Kretyen ki’n sibir bann presyon vreman dir. Dan nou letan, serten in ganny atake par bann group vyolan e ganny met dan bann kan konsantrasyon, bann prizon, e dan bann kan travay ki kondisyon i vreman deplorab. Serten gouvernman in persekit bann Kretyen oubyen zot in les bann bandi fer sa ki zot oule san okenn pinisyon. Deplis, serten Kretyen in ganny bann problenm lasante grav oubyen bann problenm fanmiy tre serye. Menm en Kretyen matir ki abitye ed plizyer konpanyon Kretyen pour fer fas avek bann sitiasyon difisil, i kapab santi li anba serten presyon. Dan bann ka parey, petet sa dimoun ki donn lankourazman i bezwen li osi ganny lankourazman avek lezot.
16. Kan David ti anba bokou presyon, ki mannyer i ti ganny led?
16 Kan Lerwa Sail ti pe rod David pour touy li, David ti tourn ver Bondye pour ganny led. I ti sipliye: “Bondye, ekout mon lapriyer . . . Dan lonbraz ou lezel, mon pran refiz.” (Psonm 54:2, 4; 57:1) Eski David ti ganny led? Wi. Pandan sa letan, Zeova ti servi profet Gad ek pret Abyatar pour gid David. I ti osi servi Yonatann, garson Sail, pour fortifye David. (1 Samyel 22:1, 5; 23:9-13, 16-18) Zeova ti osi permet bann Filisten atak pei, ki ti fer Sail aret rod David.—1 Samyel 23:27, 28.
17. Kote Zezi ti rod led letan i ti anba gro presyon?
17 Zezi Kri li menm ti anba en gro presyon letan son lanmor ti pe aprose. I ti konsyan konman ki son kondwit ti pou kapab afekte non son Papa seles e ki sa ti pou vedir pour lavenir limanite antye. I ti priye seryezman, menm “dan son lagoni.” Bondye ti fer sir ki Zezi ti ganny sipor ki i bezwen pandan sa letan difisil.—Lik 22:41-44.
18. Ki rekonfor Bondye ti donn bann premye Kretyen ki ti severman ganny persekite?
18 Persekisyon ki bann Kretyen ti gannyen apre ki kongregasyon premye syek ti’n formen, ti sitan kriyel ki zot tou eksepte bann zapot ti disperse dan Zerizalenm. Zonm konman fanm ti ganny trennen an deor zot lakaz. Ki rekonfor Bondye ti donn zot? Lasirans sorti dan son Parol ki zot ti “posed bann byen bokou meyer e ki dirab pour touzour,” en leritaz sir dan lesyel avek Kris. (Ebre 10:34; Efezyen 1:18-20) Ler zot ti kontinyen prese, zot ti vwar laprev ki lespri Bondye ti avek zot, e zot leksperyans ti donn zot plis rezon pour rezwir.—Matye 5:11, 12; Akt 8:1-40.
19. Kantmenm Pol ti pas dan bann persekisyon dir, konman i ti santi konsernan rekonfor ki Bondye i donnen?
19 Avek letan, Sol (Pol), ki li menm ti persekit bann Kretyen avan sa, ti ganny persekite akoz i ti vin en Kretyen. Lo zil Sip, ti annan en mazisyen ki ti esey anpes Pol prese an servan riz ek mansonz. An Galat, Pol ti ganny saboule avek ros e ganny les ater akoz zot ti krwar i’n mor. (Akt 13:8-10; 14:19) I ti ganny fwete an Masedwann. (Akt 16:22, 23) Apre ki i ti’n fer fas avek en lafoul ankoler an Efez, i ti ekrir: “I ti plis ki nou ti kapab siporte, ziska en tel pwen ki nou pa ti konnen menm si nou ti a reste vivan. Nou ti santi ki nou santans lanmor ti’n fini deside.” (2 Korentyen 1:8, 9) Me dan sa menm let, Pol ti ekrir sa parol rekonfortan ki’n ganny site dan paragraf 2 dan sa lartik.—2 Korentyen 1:3, 4.
20. Ki nou pou vwar dan lartik swivan?
20 Ki mannyer ou osi ou kapab donn en tel rekonfor? Dan nou letan, i annan en kantite dimoun ki bezwen rekonfor letan zot dan lapenn, swa akoz maler ki afekte bokou dimoun oubyen akoz bann problenm ki pe fatig zot. Dan nou lartik swivan, nou pou vwar konman nou kapab rekonfort sa bann dimoun.
Eski ou rapel?
• Akoz sa rekonfor ki Bondye i donnen i annan en pli gran valer?
• Ki rekonfor ki ganny fourni atraver Kris?
• Ki mannyer lespri sen in rekonfort nou?
• Donn serten legzanp konman Bondye in rekonfort son bann serviter anba bann gro presyon.
[Kestyon]
[Portre lo paz 23]
Labib i montre nou ki Zeova ti anmenn rekonfor par delivre son pep
[Portre lo paz 24]
Zezi ti rekonfort lezot par ansenny zot, geri zot, e resisit bann mor
[Portre lo paz 26]
Zezi ti ganny led sorti kot Bondye